Latin

За зи дагълар манийривди жагъурна...

Süzlärneñ gomumi sanı 694
Unikal süzlärneñ gomumi sanı 490
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Кӏуррин хуьре 1931-йисуз дуьнядал атай Агъамегьамед Беделован саки вири уьмуьр Самур поселёкдихъ галаз галкӏанваз хьана. Институт акьалтӏарна инин мектебда сифте муаллим, гуьгъуьнай 25 йисалай артух береда директор хьайи ада вири районда хъсан педагогди хьиз гьуьрмет къазанмишнавай.
Поэзиядал рикӏ алай Агъамегьамед муаллимди 1957-йисалай лезги чӏалал шиирар кхьиз башламишна. Адан сад лагьай шиир 1959-йисуз Дагъустандин лезги чӏалан "Коммунист" газетдиз акъатна.
Бакуда басмадай акъатнавай "Рикӏин гаф", "Бахтунин эквер", "Бахтавар чил" ва маса алманахра Агъамегьамед муаллимдин гзаф шиирар гьатнава.
1995-йисуз дуьня дегишаруни шаирдиз вичин "Зи къерез" тӏвар алай кьилди ктаб басма ийидай мажал ганач. Зегьметдикай, муьгьуьббатдикай, инсанрин ва халкьарин дуствиликай кхьенвай шиирар гьатнавай и ктабдай бязи чешнеяр гуналди чна шаирдин руьгьдин вилик чи буржи кьилиз акъудзава. Гьакӏни чаз и ктаб басма авуниз куьмек гудай ксар жагъунал чӏалахъ жез канзава.

Зи сивин хъвер, зи ашкъи
Пичина цӏай, патав баде, аялар,
Къулал чайдан ягъиз мани демина,
И сегьнедиз тамаш ийиз гьа инал
Са кьезилвал гьатзава зи хамуна.
Акӏ жемир зи чайдал ала рикӏ пара
Чи булахдин къайи ятар хъсан я,
Зи сивин хъвер, рикӏин ашкъи, секинвал
Шад уьмуьрдин къужахдавай хизан я.


Чидачир заз
Аял чӏавуз эцигна кьил
Зи бубадин хурудал,
Тажуб хьана алтадна гъил
Адан рехи чурудал
Лугьудай за:-Михьа, буба,
Тамир чӏарар зерени,
Куь суфат пис къалузва
Са фикир це куьнени!
Чидачир заз лацу чуру
Кьуьзуь касдин абур хьун.
Чидачир заз зи уьмуьрда
Чи рикӏериз сабур хьун.
Чидачир заз каф жедай чӏал
Кьуьзуь Шагьдин кьацӏарал...
Хуьр дагълара илигин

Эцигнава зи хуьр кама бубайри
Чайгъундикай чуьнуьхнавай аял хьиз,
Анжах лекьре кигида муг рагарал
Дагъдин кукӏвал алай муркад ккӏал хьиз.

Зи эллерин гьунар вацран яхадал
Алкӏанва къе зегьметдин са орден яз,
Зи гъвечӏи халкь чи миллетрин арада
Къе кьастарал хьанва мягькем гьуьлдан яз.
Жемир, буба, куьн чахъай къе инжиклу
Це ихтияр, хуьр дагълара илигин
Хьанва адет лекьериз гьа сифтедай
Рагарилай инай агъуз килигин.

Чи гуьзгуьяр

Ханва екез чи хуьрера
Берекатар, гьуьрметар,
Авачизни туш гьарданбир
Акъулдин гьахъ туьгьметар,
Зи намус я, зи калам я
Чи хуьрера чӏехибур,
Заз камалдин ктабар я
Гьа и чуру рехибур.
Гьабур я заз авурди чир
Абур, гьая, берекат,
Зегьмет, ашкъи, элдин къадир,
Уьмуьрдин рехъ, гьерекат.
Гьабур я заз авурди чир
Жуван къамат илигиз
Лугьузва за чи гуьзгуьяр,
А кьуьзуьбруз килигиз.

Кьве гаф
Экуь дуьня хуш я гьелбет, шак авач,
Анжах далу агалд жедач ажалдив.
Кан хьайила кӏватӏна гъилер-кӏвачерни,
Къекъвез тадач ада вун гьич мажалдихъ.
Тапшурмишна вичин уьмуьр инсанрив
Фида инсан уьмуьрда таз нехишар.
Я пис тир ам, я хъсан тир лугьудай
Кьве гафунихъ авуна чан дегишар.

Анжах зи чан дегиш тахьуй гафарихъ
Ам крарихъ дегиш хьунухь кан я заз.
Залай са шеъ амукьайтӏа дуьняда,
Ам уьмьурлух рекьин тийир чан я заз.
Цӏийи женгер

Жегьил уьмуьр алатзава пашман яз
Чӏарарал жив ацукьнава гатузни,
Гагь пад гуз зун цуькверилай алатиз
Гагь канзава рикӏиз абур атӏузни.
Пис ниятри лугьузва: вахъ вуч ама?
Ви илгьамдин вилер гила буьркьуь я.
-Ваъ,-лугьузва хуш ниятри кӏевелай
Чи элдин рехъ гила мадни гьяркьуь я.

Яшарилай шикаят туш- ажал вич-
Алахъайтӏан зи эхир югъ йигинриз
Эгечӏда зун цӏийи-цӏийи женгериз
Гележегдин мурад-метлеб якъинриз.

Зи бахт
Бахт къуват я, бахт алакьун, векъивал,
Бахт чирун я, къе девирдин чӏаларни.
Кьил цифера аваз жеда гьамиша
Къуьн- къуьне тваз агалтайла дагъларин.
Бахт инсандин виждан, адан михьивал,
Гьуьрмет къалун кьейидазни-диридаз,
Ингье зи бахт, къад йис я зун малим яз,
Зегьметдикай пай ганва за виридаз.
Экуьнилай няналди классра
Зун бахтарив рахазава датӏана
Бахт тушни бес гележегдин кьегьалри
Цуькверин кӏунчӏ гъиле вугун атана?

Дагъларни зун
Хайи чӏалал маниярна
За дагълара, рагара
А манийри хъувуна ван
Элкъвена зи япара.
Рикӏе ашкъи авай дагълар
Акьуна зи гъавурда,
За зи дагълар гьа и жуьре
Манийривди жагъурна.

Цав
Гагь-гьагь дакӏваз-элекьда вун,
Яда на чун хьелерив.
Гагь гугрумиз асунда на
Чилер жуван вилерив.
Гагь къурда на лацу живер
Кефер патан къаяр кваз,
Гагь вуна рагъ ракъурда чаз
Къибле патан цӏаяр кваз.
Алахда на чи кьилелай
Гагь цуьквер, гьагь ири хар.
Лагь кван, эй цав, вучиз ква вак
Шаирвилин къилихар?!
Сандик тахьурай

Сятдин спелри къачузва тади
Ргазвай рикӏерикай хабар авай хьиз.
Алцумай, атӏугъай еришдив вичин
Инсанрин уьмуьрдиз тарихар кхьиз.
Сят кардик гала, суткадин къеняй
Секундар, минутар тарашзава зи
Лугьумир, жувазни авачиз хабар
Гъиликай уьмуьрдиз тамашзава зи.

Тараша, пашман туш вуна зи уьмуьр
Анжах зун кӏвачерал чандик тахьурай,
Алакьай йикъар зи гьисабдик кутур,
Буш йикъар гьич садни сандик тахьурай.

Кцlар газет
Sez Lezgin ädäbiyättän 1 tekst ukıdıgız.