Хкягъай эсерар - Стӏал Мусайиб - 2

  Социализмад ватанд халкьар,
  Шад уьмуьрдин бахтлу ксар,
  Гьакӏ ракъурмир куьне вахтар,
  Гьамиша гьакӏ кхьиз алахъ.
  Са декьикьан буш ракъурмир,
  За лугьур гьал я квез хийир,
  Лап рикӏивай кӏел-кхьин чир,
  Къачуз гьама гъилиз алахъ.
  Цӏийи гьарфар кьуна гъиле,
  Гьам курсуна ва гьакӏ кӏвале,
  Йикъалай-къуз геле-геле,
  Чирвал артух ийиз алахъ.
  Рус гьарфарин бинедаллаз,
  Дагъустандин гьар са чӏалаз,
  Гьа метлебдихъ агакьнамаз,
  Гила юкъуз-йифиз алахъ.
  И бахтлу тир гуьзел йисар,
  Чаз хьанавай цӏийи тарсар,
  Азиз юлдаш—колхозникар,
  Гьада хийир куь чиз алахъ.
  За и квез гила къалай,
  Хъуьтӏуьн кӏвалах тӏимил авай,
  Вахтунда илмидиз гьарай,
  Куь курсариз лап физ алахъ.
  
  Чун метлебдихъ агакьарай,
  Партия чи вич сагъурай,
  Чӏехи-гъвечӏи кӏвачел къарай,
  Ашкъилу яз чириз алахъ.
  Стальский Мусайибан,
  Гафар квез гьич жемир такӏан,
  За лагьай гъал я квез хъсан,
  Гьа гьакӏ куьне ийиз алахъ.
  ГАТФАРИН ГУЬЗЕЛ ГЬАВАДИЗ
  Кьацу багъдин михьи гьава,
  Чандиз жеда дарман, дуст,
  Гьам галукьум лал яз дава,
  Ачух жеда инсан, дуст.
  Сталинан и девирдин
  Цуьквед багъ, вич ачух рикӏин,
  Им гатфарин гуьзел цикӏин,
  Хъсан вахт я йисан, дуст.
  Экуьн кьиляй пенжердихъай,
  Къацу багъдин цуьквед юкьвай,
  Билбилари ийиз гьарай,
  Къведа ширин гьа ван, дуст.
  Тарар къацу цуькведивди,
  Багълар михьиз векьедивди,
  Гуз гьар патахъ атирдин ни,
  Им гатфар я хъсан, дуст.
  Амачиз я кӏеви кьефес,
  Инсанд къачуз азад нефес,
  Йикъалай къуз жери гьевес,
  Им я азад ватан, дуст.
  Жуьрбе-жуьре къушар, нуькӏвер,
  Чӏигъичӏигъдин ванер-эвер,
  Пӏинийрин ни галай цуьквер
  Вахт я гьа гьа таран, дуст.
  Вич са багъда ацукьнаваз,
  Стальский Мусайибаз,
  Безетмиш тир багълар акваз,
  Рахана зун жуван, дуст.
  СССР-ДИН КУРОРТ СОЧИДИЗ
  Къацу хьана хъуьтӏуьн цикӏиз,
  Безетмиш тир гатфариз хьиз,
  Билбилари гьарай ийиз,
  Заз Сочид багълар акуна.
  Билбиларин ширин ванци
  Рикӏер пара ийиз хци,
  
  Нече шумуд Сочидин ци
  Сагърай инсанар акуна.
  Гъар уьзуьрдиз жедай дарман,
  Азарлуяр ийиз хъсан,
  Гьамиша физ гьахьдай инсан,
  Заз Сочид ятар акуна.
  Инсандихъ гьакӏ лап рикӏ кудай,
  Хъсан пара къадир чидай,
  Юлдашарин хатур хуьдай,
  Заз гьа докторар акуна.
  Къекъвез тежер вуч гьич ерли,
  Сагъ авуна гьам, Сочид ци,
  Хъсан игит хьана дири
  Заз гьадан гьунар акуна.
  Цуькведивди безетмиш тир,
  Кьуд патахъди ни къвез атир,
  Сердиз къекъвез инсанар фир
  Заз гьанин халкьар акуна.
  Гада, руш, итим, дишегьли
  Шадлу гьевес пара хци,
  Зун фейила Сочидиз цӏи,
  Заз гьанин халкьар акуна.
  Сочи шегьердин гьавадал
  Гьар гьи касди ягъайтӏа ял,
  Сагъ хьунухьиз лап адан тӏал,
  Заз гьанин халкьар акуна.
  А Сочидин курортара
  Къанни цӏерид лугьур йиса
  Виш агъзур касдилай пара
  Инсанар аваз акуна.
  Чи и бахтар гъилиз атун,
  Зегьметчийриз икӏ ял ягъун,
  Йикъалай къуз чун гужлу хьун,
  Им заз гьунар яз акуна.
  Кӏвалах курортарин вири
  Кьиле тухуз дишегьлийри,
  Зирек, шадлу, пара дири,
  Заз папар аваз, акуна.
  Стха хьтин юлдашар галаз,
  Сочи шегьер, Мусайибаз
  Йикъалай къуз гьакӏ хъсан яз,
  Заз гьакӏ гьана кваз акуна.
  КОЛХОЗНИКРИН ФИКИРДИЗ
  Гатфар къвезва, ахъая вил.
  Эй, колхозник, лежбер юлдаш.
  
  Гьазур ая, жервал техил,
  Кьук вегьена, никӏер, юлдаш.
  Ирид-муьжуьд миллиард пуд,
  Техил къачун патал дохуд,
  Алахъ гьама кьилиз акъуд,
  Къачуз мухар, къуьлер, юлдаш.
  Гатфар магьсуларин патал,
  Са зерре кьван тежез кегьал,
  Югъугъ, игит, къарагъ кӏвачал,
  Гьазур ая кьуьгъвер, юлдаш.
  Къведай йисан гьа гьан зулуз, .
  Кьакьан магьсул гъиле къачуз,
  Гьазур хьухь куь къемаз гатуз,
  Вахчуз гьахьтин бегьер, юлдаш.
  Цӏуд килодлай виниз техил
  Гьалтайтӏа гьакӏ са кьилди кьил,
  Ачух жеда мадни гевил,
  Колхозникрин рикӏер, юлдаш.
  Гьамиша квез герек къведай,
  Араба гваз физ хуькведай,
  Гатфар вахтунда къекъведай
  Расна кӏанда рекьер, юлдаш.
  Куь физ авай рекьел алай
  Гьар са касдиз герек къведай,
  Хъуьтӏуьз кьежер хьана чкӏай
  Туькӏуьра гьа муькъвер, юлдаш.
  Дугун патал никӏер, чилер,
  Багълар, салар ва куь векьер,
  Гьазур ая яд фир рекьер,
  Ремонта гьа хуьлер, юлдаш.
  Малдарвилин кӏвалах куьне,
  Артух ийиз яхъ гьам гъиле,
  Йикъалай къуз геле-геле,
  Пара жервал хипер, юлдаш.
  Лап хъуьтӏемаз ремонт ийиз,
  Алахъ лазим шейэр михьиз,
  Рикӏелай алатна ваз течиз,
  Амукь турай гьа пер, юлдаш.
  Агъа Стӏаларин колхоз
  Гьазур хьана йифиз-юкъуз,
  Гьар са кардал чеб гьакӏ къалуз,
  Гузава квез эвер, юлдаш.
  Стальский Мусайибан,
  Рикӏин метлеб гьам я гьадан,
  Вири кӏвалах тухун хъсан,
  Пара артух иер, юлраш.
  
  ГАТФАР
  Хъуьтӏуькай чун хьана азад,
  Амач къайи живер, гатфар.
  Дагъда муркӏар цӏрана яд,
  Физва гурлу селлер, гатфар.
  Са шумуд жуьре мугьманар яз
  Чаз хкведа нуькӏвер, гатфар.
  Гьар са жуьре ширин аваз,
  Цӏийи манид ванер, гатфар.
  Билбилдин сес ширин тир ван,
  Чаз къведа а сесер, гатфар.
  Хъуьтӏуьз чуплах тир а таран
  Ачух хьана пешер, гатфар.
  Вил вегьена килигна зун:
  Хупӏ гуьрчег я чуьллер, гатфар.
  Гьар са патаз къацу-яру
  Акъатнава цуьквер, гатфар.
  Вун атайла и чи гевил
  Ачух жеда рикӏер, гатфар.
  Хъуьтӏуьн къаю авур сефил,
  Вири къушар, чӏижер, гатфар.
  Пакамахъай фад яз ярар,
  Куьруь жеда йифер, гатфар.
  Ширин я хупӏ йифен ахвар,
  Билбил рахаз сегьер, гатфар.
  Гуьзгуь хьтин михьи я цав,
  Аламачиз цифер, гатфар.
  Пакамахъай чуьлда къирав
  Алаз жеда векьер, гатфар.
  Гъиле аваз кьуькни дегьре,
  Багъда жеда лежбер, гатфар.
  Жегьил рушар жерге-жерге
  Кӏватӏиз кьалар пешер, гатфар.
  ХЪУЬТӏУЬЗ ЧУЬЛ
  Лацу яргьан алукӏна чуьл
  Ийиз жеда ахвар, кьуьд.
  Авуна на михьиз сефил,
  Вири нуькӏвер, къушар, кьуьд.
  Чуьллер жеда пара пелеш,
  Амачиз векь-кьалар, кьуьд,
  Вилиз такваз къацу тир пеш,
  Чуплах хьана тарар, кьуьд.
  Мажбурда на ийиз кӏевер
  
  Михьиз ракӏар, дакӏар, кьуьд.
  Метӏяй ягъиз жеда живер,
  Вун алукьай йикъар, кьуьд.
  Серф гьатайла а ви гъиле,
  На къалуда гьунар, кьуд.
  Муркӏад кьуна дере-тепе,
  Михьиз гьуьлер, вацӏар, кьуьд.
  Стӏал шаир Мусайибаз
  Вакай хьана хабар, кьуьд.
  Ви гьайбатар акурла заз,
  Лагьана и чӏалар, кьуьд.
  ВАТАН ХУЬЗ ГЬАЗУР Я ЧУН
  Ватандин тӏвар рикӏе аваз,
  Чун дяведиз физ гьазур я.
  Фикирар сад халкьар галаз
  Совет уьлкве хуьз гьазур я.
  Кӏантӏа пака, кӏандатӏа къе,
  Чан эцигиз азад рекье,
  Вири санлай Совет уьлкве
  Душман терг ийиз гьазур я.
  Вич пехъи тир а фашист лам,
  Чи Ватандиз вегьейла кам,
  Дуьньядайни терг ийиз ам
  Чун вири, сад хьиз, гьазур я.
  Фашизм - а мичӏи тир сур,
  Алахънавай дуьнья из чӏур,
  Пехъи кицӏин гардандиз тур
  Гьамиша вегьез гьазур я.
  Чи азад тир бахтлу Ватан,
  Гьам гаф я чи лап виридан,
  Ленинизмдин рекье гуз чан
  Юлдашар михьиз гьазур я.
  Душманарин хура къвазиз,
  Гьабрун винел гъалибвал гъиз,
  Мягькем хьана техникадиз,
  Чун вири гьакӏ чиз гьазур я.
  Диде Ватан патал дяве,
  Авун кьазва чна хиве,
  Гьич са касдин кам чи чиле
  Тутаз чун къуз-физ гьазур я.
  ГЬАЗУР ХЬУХЬ ВИРИ
  Юлдашар ама,
  Буьркьуь фашизма,
  Терг ийиз гьа-гьам,
  
  Гатут лап тамам.
  Хьанва фикир сад,
  Ватан хуьз азад,
  Гьазур хьухь вири,
  Гьам куьлуь-ири.
  Фашизм ая дар,
  Ая ам кукӏвар,
  Терг ийиз гьа-гьам,
  Гатут лап тамам.
  Михьиз паб-аял
  Ватан хуьз хиял,
  Гьазур хьухь вири,
  Гьам куьлуь-ири.
  Тутур чун секин,
  Кьил атӏун кицӏин,
  Терг ийиз гьа-гьам,
  Гатут лап тамам.
  Дяведиз къарагъай,
  Душмандиз ягъ цӏай,
  Гьазур хьухь вири,
  Гьам куьлуь-ири.
  Бурж я гьар садан,
  Хуьнуьхин Ватан,
  Гьазур хьухь вири
  Гьам куьлуь-ири.
  Нефес вич къайи,
  А фашист пехъи,
  Терг ийиз гьа-гьам
  Гатут лап тамам.
  Гьарнихъ вегьез вил,
  Атӏуз душманд кьил,
  Гьазур хьухь вири,
  Гьам куьлуь-ири.
  Бахтлу уьмуьр хуьз,
  Гьам юкъуз-йифиз,
  Гьазур хьухь вири
  Гьам куьлуь-ири.
  Фашизм(а) я каш,
  Вегь адаз лапӏаш,
  Терг ийиз гьа-гьам
  Гатут лап тамам.
  Мукални гуьлле,
  Эцягъиз пеле,
  Терг ийиз гьа-гьам,
  Гатут лап тамам.
  
  Чи азад уьлкве,
  Душман тваз кӏеве,
  Гьазур хьухь вири
  Гьам куьлуь-ири.
  ЧАВАЙ УЬМУЬРЛУХ КЪАКЪАТАЙ ЗИ ИГРАМИ БУБА СУЛЕЙМАНАЗ
  I
  Къе вун хайи тарих йикъан,
  За гьам рикӏел гъана буба.
  Ви яшайишдин гьалдикай,
  Зун рахана инал буба!
  Акъатдалди дуьньядиз вун,
  Диден буба хьана тахкун,
  Малумарна чеб чара хьун,
  Диде ви рахкана, буба!
  Цӏекӏуьд лугьур гьа асрида,
  Пудкъанни кьуд лугьур йиса,
  Вад лугьур гьа майдин йикъа
  Халуд кӏвале хана, буба!
  Дагъустандин кьибле кьиле
  И Агъа Стӏалрин хуьре
  Лап кесиб тир хизанд къене,
  Гьа гьана вун хьана, буба!
  Дидеди вун хайи гъилди,
  Нек вилериз аквадалди,
  Элкъуьрна вун бубадалди,
  Гьадав вун вахкана, буба!
  Са кесибди къуншидаллаз,
  Минетуна гьа гьан папаз,
  Гунуг патал гьада нек ваз,
  Эминатав гана, буба!
  А кьегьал тир игит папа,
  Ви язухвал рикӏе кьуна,
  Ирид йисахъ агакьарна,
  Вун гьа гьада хвена, буба!
  Лап гьа кьиляй гъвечӏиди яз,
  Хайи диде авачиз ваз,
  Уьмуьр ви лап тазаз амаз,
  Азиятдик фена, буба!
  Ирид йисахъ агакьнамаз,
  Гьа къуншидин гьаятдаваз,
  Вахчуна вун вичин патаз
  Ви бубади гена, буба!
  Кьвед лугьур паб гъанваз гьадаз,
  Гьа тахайди лап писди яз,
  Гьажикӏад фу гьич тагуз ваз,
  
  Кӏандачир вун рикӏиз, буба!
  Хуьрек недай гьа гьан чӏавуз,
  Кӏасиз жедай, мумкин тагуз,
  «Дулмад кӏусар са пай тур», луз,
  Алахъдай вал йифиз, буба!
  Вун гьа цӏусад йисавайла,
  Чӏур жедай хесет кткана,
  Буба ви гьа йиса кьена,
  Амукьна вун ялгъуз, буба!
  Бад аялни валай гъвечӏи,
  Цӏусад савайд ву яз чӏехи,
  Тахай диден хьайла пехъи,
  Фидай батраквилиз, буба!
  Чантада фу мухан ичӏиз,
  Туна къуншид маларив физ,
  Йиф хьайила тӏуна къаткиз,
  Хабар жечир месиз, буба!
  Цӏукьуд саваз дулалмишиз
  Фена гьа Дербент шегьердиз.
  Хьайитӏани кӏвалах ийиз,
  Жибин хьанай ичӏиз, буба!
  Кьуд йиса вун батраквиле
  Дербентда са кулакд кӏвале.
  Са затӏни гьат тийиз гъиле,
  Мад хтана хуьруьз, буба!
  Хтанамаз инай хуьруьз,
  Девлетлу тир къуншийриз
  Хьана, гьана батраквализ
  Кьве йисалай виниз, буба!
  Хуьряй къучӏна ву, Генжедиз,
  Фикир хьанай, гьа гьаниз физ,
  Гьа гьана вун дулалмишиз
  Фена фялевилиз, буба!
  Кьве йис хьана кӏвалах ийиз,
  Килиг садра эхир кьилиз:
  Са копекни амукь тийиз,
  Рахкъуз хьанач кӏвализ, буба!
  Бахъуд зангар кутаз, гъидай
  Хуьрек тӏуьна харчевнидай...
  Гьа гьанизни бурж вахкудай,
  Пул хьаначир михьиз, буба!
  Жибиндиз вун килигнамаз,
  Артух тежез йисалай саз,
  Ви кӏвалахдин гьакъияр ваз
  Сакӏан текъвез гъилиз, буба!
  
  А къамишлух тир чуьллерин,
  Куьч хьана вун гьаниз четин.
  Кьил гана ваз мад цӏаярин,
  Хьана азарлу яз, буба!
  Ина гьакӏа гьаларив кьаз,
  Катна Самаркъандди патаз.
  Пуд суз гьана рабочий яз,
  Мад алукӏна эскиз, буба!
  Сырь-Дарьядин ракьун рекьел,
  Кӏвалах кьуна гьана муькъвел,
  Кьве йисни са шумуд вазрал
  Хьана гьанал алаз, буба!
  Гьич санални фу батракдиз
  Бегьем такваз сакӏан вилиз,
  Килигнамаз мад жибиндиз,
  Мад хьана гьакӏ ичӏиз, буба!
  Шумуд йисар, шумуд варцар,
  Кӏвалах ийиз йифер-йикъар...
  Гьар жуьредин азиятар
  Акунай ваз гьачӏуз, буба!
  Я жибинда пул хьаначир вин,
  Бес гьинихъди гила вун фин.
  Язух гьалар хьанай гьа вин,
  Кӏвалах къимет тагуз, буба!
  Зегьметдалди гьа Бакудиз
  Хиял хьана ви гьаниз физ.
  Тӏалабна, са буругъчидиз
  Кӏвалахна на пуд суз, буба!
  Генже, Баку сад тир михьиз,
  Кӏвалахд гьакъи текъвез гъилиз.
  Батракд гафар ише тефиз,
  Фена вахтар мичӏиз, буба!
  Къанни цӏуд йис уьмуьрдалди
  Кӏвалах ийиз кьве гъилалди,
  Мад элкъвена вун хуьруьхъди,
  Пулни бегьем гвачиз, буба!
  Акъатайлахди гьаятдиз,
  Хтайлахди гьанай кӏвализ,
  Башламишна эвлалмишиз,
  Са юлдаш ваз на гъиз, буба!
  Хуьряй, кӏвалер маса гана,
  Къерехда са бицӏи чума
  Эцигна гьам вичин папа,
  Хъфенай куьн гьанал, буба!
  Гъилелди гьа чпин кьведан
  Башламишна гьам цаз бустан.
  
  Къаравулвал гьам хуьз йикъан,
  Юлдаш жедай салал, буба!
  Масадбурвай на генар кьаз,
  Гьа вахтунда вун генаваз,
  Техил къачуз чарайиз жуваз,
  Гъиле аваз мукал, буба!
  Хтайлахд садра фу нез кӏвализ,
  Килигайтӏа ву куьчедиз,
  Жемятар кӏватӏ хьанваз михьиз,
  Алаз хьана кимел, буба!
  Сад атана лугьуз гьанал,
  Тафт кьунаваз вичин хурал,
  Башламишна билбилдин чӏал
  Лугьуз гьада инал, буба!
  Фикир ийиз вуна гьакӏ ваз,
  Лап яб гана дикъетдаказ.
  Ви акьулдик и кӏвалах кваз,
  Жагъанай ваз гьа гьал, буба!
  Звел бине инлай рикӏиз
  Ваз кӏан хьайд тир башламишиз.
  Лап сифте гьа-гьа билбилдиз
  Лагьана на ви чӏал, ,буба!
  Къанни цӏикьвед хьайла йисар,
  Аваз талантдикай хабар,
  Гъиле кьуниз гьа-гьа чӏуз кар,
  Хьана гьакӏа хиял, буба!
  Вуна туькӏуьрай сифтегьан чӏал
  Фена лагьайлахди патал,
  Дегиш хьана гьабур хиял,
  Кткана лап гъакӏ къал, буба!
  «Бадракдивай я ихьтин гьал
  Лугьуз жедай туш. Ву «пашел».
  «Гьинай чуьнуьхна, - лугьуз, - чӏал»,
  Вал ийичир амал, буба!
  Кесибдикай хьунухь шаир,
  Девлетлуйриз лап залан тир.
  Вун хьтин зегьметдик квай фекъир
  Эзмишун тир хиял, буба!
  Хипеж Къурбан, Султан хьтин
  Вилик кутаз «шаирар» чпин.
  Гьабур хьанай пара эркин,
  Гаф гьалтдачир я вал, буба!
  Фекьияри гьа гьан чӏавуз,
  Хпеж Къурбан хьитинбуруз
  Гьар патахъди ачух рехъ гуз,
  Гьабур жедай кӏвенкӏвал, буба!
  
  Ви гафариз къимет тагуз,
  «Вакай шаир жедач»,- лугьуз,
  Гьар патахъай гьакӏ ваз къургъ гуз,
  Акьалтдачир винал, буба!
  Гьа гьабурун дакӏанвилиз,
  Килиг тийиз гьич са куьниз,
  Хьана кӏвалах тухуз кьилиз,
  Тхвена ви шаирвал, буба!
  Зегьметчийрин патал алаз,
  Ругьанийрихъ дяве чӏугваз,
  Ви чӏаларалд гьабур гатаз,
  Жедай акъваз тийиз, буба!
  Кьве зулумдин зиллетдик квай,
  Азиятдик, хифетдик квай,
  Батрак юлдашрин патай
  Алахъна вун кӏевиз, буба!
  Гьелбетда, юлдашар, адаз.
  Чидачир лап дериндаказ,
  Бязи крар, вилелди акваз,
  Чир хьана ви рикӏиз, буба!
  Фекьияриз, судияриз,
  Пачагьдин ктӏай законариз,
  Ви чӏаларалди «протест» гуз,
  Жедай кичӏе тушиз, буба!
  Жедай ахьтин кичӏе вахтар:
  Акурла ви бязи чӏалар,
  Табдил хьана гьабрун гьалар,
  Кӏан жедай вун рекьиз, буба!
  Ажузвал на гьич ви патаз
  Са вахтундан хиве такьаз,
  Зегьметдик квай гьалар акваз,
  Алахъна къуз, йифиз, буба!
  Залумарин а залумар,
  Хтӏундай зегьметчид хамар,
  Рекьидай гьа фекъир чанар,
  Хьана акваз вичиз, буба!
  Вири зегьметчийрин векил
  Яз, гьабурал хьана ви гъил:
  Гьабур авай зегьмет шикил
  Хьана вуна къалаз, буба!
  Са рекьера булахд кьилал,
  Гьалтна гьанал са молладал,
  Лагьайлахди «фекьийрин» чӏал,
  Къвез хьана лап хъилер, буба!
  Инсанар кӏватӏ хьанаваз кимал,
  
  Лагьайла на судийрин чӏал,
  Зегьметчийрин чпин хиял
  Хьанай ачух рикӏер, буба!
  Кавхадиз ван хьана и гьал,
  Кткана гьакӏ вичик лап хъел,
  Ахтармишиз хьана ви гел,
  Вун къекъведай рекьер, буба!
  Векьелар молла Рамазан,
  Ктӏай гьажикӏа лап гур масан,
  Гьар патахъай гьелер гьадан
  Гъавурда тваз зллер, буба!
  Самовардин гьа алакъа
  Нихъ жедайтӏа пара мукьва,
  Къалаз хьана гьа гьам вуна,
  Попов чайни шекер, буба!
  «Инсафсуз» тӏвар алай къавум,
  Веревирдна уна фагьум,
  Тенкъид ийиз на гьа зулум,
  Рушахъ къачур вад гьер, буба!
  Ихьтин нече шумудни сад
  Чӏалар туькӏуьрна вуна мад.
  Кьиляй кьилиз батракар мад
  Яз хьана гьа тегьер, буба!
  А вахтунда батракариз,
  Мектебдин къен такваз вилиз,
  Къулни чӏугваз хьанач я чиз,
  Ви зегьметдин гъилиз, буба!
  Низ жегъидай кӏелун, тарсар.
  Гьабур тирки илмид дустар,
  Ни жибиндик хьанайтӏа пар,
  Жедай гьабур кӏелиз, буба!
  Ахчуз тежер гьич садавай,
  Ваз са хурун дафтар авай.
  Михьиз гафар, вуна лагьай,
  Хьана гьана кхьиз, буба!
  Гуд лугьуз ваз малар сада,
  Пудкъанни цӏуд араба на
  Кулакд никӏяй кӏанчӏар къудна,
  Хьанай гьахьтин гьелер, буба!
  Хуьруьн къерех, са салал
  Ирид йиса хьана гьанал,
  Дулалмишвал тежез гьадал,
  Гьанлай хьанай лежбер, буба!
  А заманда ваз чиликай
  Авачиз гьич са зерре пай,
  Тен паюнлай вуна кьадай
  
  Арендда масад никӏер, буба!
  Никӏин иесид сивик хъвер кваз,
  Юг вегьена куьтягьнамаз,
  Михьи гьазур къуьл тваз,
  Гваз къведай гьам чувал, буба!
  Пакамалай вилиз такваз,
  Нянихди, югъ серин хьанмаз,
  Ахпа хабар жез а патаз,
  Алаз жедай ратӏрал, буба!
  Гьа гьан чӏулав йикъаз къарши,
  Совет власть атана чи.
  Мичӏи дуьнья хьана экуь,
  Гана ишигъ, эквер, буба!
  Ачухна рехъ гьар патахъди,
  Гьич санихъни тушиз кӏеви.
  Цӏийи хьана батракди ви,
  Ачух хьана рикӏер, буба!
  Башламишна колхоз бине
  Хьайилахъди гьа чи хуьре,
  Какахьна вун эвел кӏвенкӏве,
  Гуз хьана на эвер, буба!
  На ви уьмуьр, эхирдал кьван,
  Гьич са патахъ тагана ян,
  Партид рекье эцигна чан.
  Хьайид я гьа тегьер, буба!
  Гьар са йикъан кӏвалахарин
  Тир вун шерик чи ватандин.
  Вири агалкьунар на чин
  Хьана къалуз иер, буба!
  Советарин бахтлу рекье,
  Гьазур яз вун гьадан геле,
  Эхирдал кьван фикир рикӏе
  Авай дуьз тир гьелер, буба!
  Партиядин регьбервал гваз,
  Фяле-лежбер гьалар сад яз,
  Вахъ гьа большевикар галаз,
  Сад тир крар-чӏалар, буба!
  Гьелбет, Ленин ва Сталин.
  Кьилеваз регьберар гьа чин,
  Гьа гьабурун дуьз тир луькӏуьн,
  Хуьз хьайид тир икьрар, буба!
  Гьа граждандин дявейра,
  Кьегьалариз куьмек гуз на,
  Гьа гьабурухъ яз алакъа,
  
  Кьунай мягькем на кар, буба!
  Кулакар терг авун карда,
  Большевикрихъ галаз вуна,
  Рикӏивай гьа кӏвалах кьуна,
  Тир, дугъридан, шерик буба!
  Вири женгчи кьегьаларин
  Гила метлеб-гъалиб я кин,
  Нур гуз совет ватандин чин,
  Физава чун вилик, буба!
  Гьа Сталин юлдашди вичи
  Яратмишна Конституци,
  Гъалибвилер акурла чи,
  Кткана хъвер сивик, буба!
  Социализмад нур чкӏана,
  Гьар са карда гъалиб хьана.
  Гила хьана цӏийи гьава,
  Зарб кткана рикӏик, буба!
  Женгчи кьилди тушир са чин,
  Гьа гьакӏ михьиз яз дуьньядин,
  Испанидизни чӏалар вин
  Ква-гьа ви шииррик, буба!
  Сад садав хьана са стха,
  Рикӏ рикГӏивди хьана мукьва,
  Михьиз дуьнья хьунухь гьакӏа—
  Ваз кӏандай азадвилер, буба!
  Партияди, гьукуматди,
  Къимет гана кӏвалахиз ви:
  Гьар патахъди гьяркьуь уьлчуь,
  Ачухна ваз рекьер, буба!
  Гьа Совет власть хьана себеб,
  Туькӏвена чи икӏ крар эжеб;
  Гьар патахъди рикӏин метлеб
  Ачух хьана мецер, буба!
  Дагцик-дин ва писателрин
  Яз вун фадлай член тайин,
  Иштраквал ийиз на вин,
  Жедай йикъар, йифер, буба!
  Таниш хьана съезддал куьн,
  Максим Горькид патай вичин
  «Къад лугьудай виш йисарин,
  Гана тӏвар ваз «Гомер», буба!
  Уьмуьрлухдин яшайишдин
  Авуна ваз пенси тайин.
  Йикъалай-къуз мадни гьа вин
  Гуз хьанай на бегьер, буба!
  
  Съездара, собранийра
  Иштраквал гьар са йикъа,
  Зегьметчийрихъ яз алакъа,
  Жедай вун гьа тегьер, буба!
  Лай гъвечӏи тир аялзамаз,
  На чаз дуьз тир рекьер къалаз,
  Гьамиша ви гъил чал алаз,
  Гудай на чаз тербет, буба!
  -Гьидахъ хьайтӏан юлдаш жемир,
  Жуван дустни душман хьухь чир,
  Душмандин гьич рекьяй фимир,Луз, идай на суьгьбет, буба!
  -Гьич нубатсуз чарадалай
  Фитне ийимир гьич садалай,На гьамиша гьакӏ лугьудай,
  Дугъриданни гьелбет, буба!
  Ву кефсуз тир эхир къара,
  Ви тапшуругъ мадни пара.
  Дуьз рекье тваз, чаз лагьана
  Гафар на ви сивин, буба!
  -Вафалу хьухь чи ватандиз,
  Гьар са кардал куь хьухь хциз,
  Чан эцига партид рекьиз,На лугьудай якъин, буба!
  Шумудни са чӏаларалди
  Акъатнавай ктабар ви.
  Газетарни, журналарни
  Дад ама вин мецин, буба!
  Са гьунар ваз мадни авай:
  Вири затӏар, на туькӏуьрай,
  Чидай гьабур ваз хуралай,
  Авачиз ваз кхьин, буба!
  Чӏалар туькӏуьр ийидайла,
  Гзафни хуш тир гьа ви чкаАцукьна са къацу багъда,
  Жедай тарцик серин, буба!
  Гьамиша ви чӏал туькӏуьрнин,
  Лап гзаф тир вини кьилин,
  Вахт жедай тир вад минутдин,
  Гьа гьакӏ жедай якъин, буба!
  Кьуьзуьвал я ва кефсузвал,
  Акьалт тийиз гьабур рикӏал,
  Галатун гьич тушир хиял
  Ви хци тир рикӏин, буба!
  Ленинан орден ганаваз ваз,
  Гьа гьама ви хурал алаз,
  
  Багъиш авурд М-1 яз,
  Ваз хьана гьа машин, буба!
  Гьукуматди вичин патай,
  Яхцӏур агьзур манатдик квай,
  Са кӏвалер хъсан безетмишай,
  Гана артух кьилин, буба!
  Дербентдин сечкид округдай
  Эллерини вун чпин патай,
  Верховный Советдиз фидай,
  Тир депутат вун чи, буба!
  Вахт амаз са цӏекӏуьд къанди,
  Сес гудалди ви халкьари,
  Нефес куьтягь хьана гьа ви,
  Эй, играми тир я зин, буба!
  Гьа пустунин винел алаз
  Рекьидалди пуд югъ амаз,
  Сечкийрин чӏал лагьана чаз
  Эхиримжи на ви, буба!
  Къанни цӏерид лугьур йиса,
  Ноябрдин къанни пуд къа,
  Сят цӏуд яхцӏурни вад декьикьа
  Акъвазна ви луькӏуьн, буба!
  Чи СССР-дин халкьариз,
  Вири чӏехи - гъвечӏидаз чиз,
  Вун кьейила, гьабур рикӏиз
  Хьанай пара серин, буба!
  Эхиримжи гьа йикъалди,
  На вак квай ви акъваздалди,
  Кӏвалах вуна гьа ви рикӏи
  Чи партиядин цӏарцӏиз, буба!
  Гила къатхьухь вун архайин,
  Миллионралд жегьиларин
  Патай гаф гуз гьазур я чин,
  Ви гелеваз чун физ, буба!
  Вуна къалай пример кьадай,
  Сталинан чи цуьквед багъдай,
  Къелемар, чеб бегьер гудай,
  Жез туш гьабур кимиз, буба!
  Ви кӏвалахдин ери - бине
  Кьунава гьам за зи гъиле.
  Алахъда зун геле-геле
  Акъудиз лап кьилиз, буба!
  Партиядиз на вун къалай,
  Игитвилин кӏвалах тухвай,
  Экъечӏдач зун гьа ви геляй,
  Гаф гуда за гьам хуьз, буба!
  
  Ви гада тир Мусайибан,
  Чӏалахъ агъугъ вун гьа гьадан,
  Гьич са патахъ тагана ян,
  Хуьда гьам за гьакӏ дуьз, буба!