Latin

“Текивидин хвал”

Süzlärneñ gomumi sanı 348
Unikal süzlärneñ gomumi sanı 290
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Цӏийи йисан вилик ихьтин тӏвар алаз Махачкъалада, “Мавел” чапханади Нуьсрет Агъакеримован шииррикайни гьикаяйрикай ибарат ктаб акъуднава. Адан авторди хейлин йисара математикадин муаллим, Дагъустандин ктабрин издательствода корректор яз кӏвалахнай. Гуьгъуьнлай кьисметди ам Сумгаит шегьердиз акъудна…
Н.Агъакеримован яратмишунрихъ галаз кӏелзавайбур алатай асирдин 60-йисарилай таниш я. Амма икьван чӏавалди адан са ктабни чапдай акъатнавачир. Ингье, шаир рагьметдиз фейидалай кьулухъ 18 йис алатайла, къайгъудар хци — Тельман Нуьсретовича бубадин ирс квадар тавун, гележегдин несилрал агакьарун патал яратмишунар чапдиз гьазурна.
Ктабдин редактор, шаир ва публицист Мердали Жалилов сифте гафуна Нуьсрет Агъакеримован уьмуьрдин ва яратмишунрин рекьикай гегьеншдиз раханва. Анай малум жезвайвал, Н.Агъакеримован сад лагьай критик, шииратдин рекье муаллим лезгийрин чӏехи лирик Шихнесир Къафлановакай хьана. Яратмишунрикай рахадайла Мердали Жалилова къейдзавайвал, Н.Агъакеримован эсерар, асул гьисабдай, хайи чиликай, зегьметдал ашукь гьунарлу халкьдикай, кӏани ярдикай, дуствиликайни марифатлувиликай я. Шаирдин эсеррай чав Шалбуз дагъдин яйлахринни булахрин ширширрин ван, цуькверин атирлувал агакьзава…
Ктабда гьатнавай шииррай аквазвайвал, Нуьсрет Агъакеримов хайи ерийрални тӏебиатдал гзаф кьару инсан тир. “Гатфарин тӏебиат” шиирда авторди чӏехи гьевесдивди тӏебиатдин гуьзел легьзейрин шикилар чӏугвазва:
Дегиш жезва ирид сефер цавун чин,
Гагь къай, гагь циф дагъдин
кьилел къугъвазва.
Гагь чилерал алукьзава рагъ
къизгъин,
Дагъдин хура хважамжамар
акьазва…
Бязи шииррай кӏелзавайдаз шаирдин акьалтӏай ватанпересвални инсанпересвал аквазва. Нуьсрет Агъакеримова Ватандин — лезги хуьрерин тарифарзава, акьалтзавай несилриз бубайрин адетар хуьниз, Ватандин къуллугъда акъвазуниз, къадирлу хьуниз эвер гузва. “Зун — сергьятдал” шиир ихьтин бендинилай гатӏунзава:
Чил квахьнава йифен чӏулав чуруда,
Сухвар сухиз дарзава зун аязди.
Зун — сергьятдал. Къуй дидедин
хуруда
Шириндаказ ксурай къе аял зи…
Лирический игит Ватандин сергьят хуьзвай аскер я. Югъ-йиф, къай-чим талгьана ам датӏана сергьятдал мукъаятдиз акъвазнава. Вичин бала шириндиз ксун патал ада вири Ватандин архайинвал, секинвал хуьзва…
“Кӏани ярдиз манияр” тӏвар алай пай кьиляй-кьилиз кьуд цӏарцӏин шииррикай ибарат я. Манийриз ухшар гьар са бендина авторди ярдин гуьзелвилин, назиквилин тарифарзава, кӏанивал, михьи гьиссер бахтунин чешме тирди тестикьарзава. Абур регьят, гъавурда акьадай чӏалалди кхьенва. Гьавиляй кӏелизни хуш жезва.
Ктабда гьатнавай гьикаяяр тӏимилбур ятӏани, абурай Н.Агъакеримова лезги гьикаятдани вичиз хас хвал атӏайди аквазва. Абур гьам чӏалан, гьам туькӏуьр хьунин, гьам къарагъарнавай месэлайрин, гьам образрин (суьретрин) тӏебиивилин жигьетдай устадвилин дережада авайбур я. Рагьметлуда несилриз тунвай “хвал” квахь тийидайди я…

Мегьамед Ибрагьимов
Лезги газет
Sez Lezgin ädäbiyättän 1 tekst ukıdıgız.