Latin Original

  Хьайи крар кьезилвилиз элкъуьриз
  Хьайи крар кьезилвилиз элкъуьриз,
  Мад зи рекьер кьазва вуна, азизди,
  Гьа сифте хьиз рикӏ тӏанур хьиз ифириз,
  Дамаррай экв хъвазва вуна, азизди.
  
  Четин я хьи, шиир бахшун рушариз,
  Къакъатайтӏа, гьикӏда, вучда лугьуда.
  Гьахьда хиял мензил атӏуз яргъариз,
  Гьар гафуни кьарайсузвал вугуда,
  
  Бахтаварвал, эхь, уьмуьрдин шадвал я.
  Им гьа ваз хьиз зазни чида, азизди.
  Къадир техвей бахтаварвал са тӏал я, -
  Нин рикӏелай а тӏал фида, азизди.
  
  Зун акурла, чинал гъилер эцигиз,
  Килигдай хьи вун тупӏарин арадай,
  Гьар сеферда рикӏел денгер илигиз,
  Фикирдай на: ашукь ятӏа хатадай?
  
  Къе бахтавар уьмуьрдиз вуч лугьун за,
  Эхир тежер чӏалар тирла, азизди?
  Рикӏяй рахай шиирдиз вуч лугьун за,
  Адан ашкъи ви тӏвар тирла, азизди?
  
  
  
  
  Агь, лацубур алай гуьзел
  Агь, лацубур алай гуьзел,
  Вун хупӏ лацуз аквазвачни!
  Ваз килигиз хьана мягьтел,
  Къеневай рикӏ цӏразвачни!
  
  Ваз гатукай хабар хьана,
  Гатфар гьеле яргъа амаз.
  Заз чидач низ, сувар хьана,
  Гьатдатӏа вун гара аваз...