Latin

Шиирар - Билал Адилов - 2

Süzlärneñ gomumi sanı 2710
Unikal süzlärneñ gomumi sanı 1348
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Тӏебиат я гьа ваз чидай, уьмуьр ичӏи
Эвеззава вядеди са муькуь вяде,
Минет хьурай, ятӏани зун, яб це гъвечӏи:
Мажал тагуз гьич садазни лугьуз тегьер,
Уьмуьр физва са карван хьиз акъваз тежер.
Рехивилин нубат ингье атанва чал,
Элуьхъара тадиз вуна чандавай тал…
Эй азиз дуст, гьич балайрихъ чидани ваз
Дидейрин рикӏ кузаватӏа гьикӏ вижеваз?
Садни ава са гьакъикъат, алахъа къаз:
Аслу тушиз яшарилай, даим, дустар,
Дидейриз чун я аялар, гьа бицӏекар…





Килиг вуна...
Гьеле рикӏи ягъазма зи
Ша яб це на эцигна кьил
Гьеле ашкъи амазма зи
Килиг вилиз эцигна вил.

Тӏимил хьанва чанда ялав…
Гьеле я зун ашкъид къази .
Тек са вавай гуз жед къилав
Къуьруь хьанвай байихриз зи

Агакьзава зав хабарар
Дустарив чи вуна гайи
Зун гьа зун я, чӏурнач икърар
Накь ваз хайи, къе тир къайи

Эхь а вилер, а киферни
И дуьняда ахквадач заз…
Бес а пата са сеферни
Аквадач жал чун сад садаз?





Уьмуьр гьала касди хьиз..
Веси хьиз ваз амукьрай и гафар зи
Садрани гьакъ гумир кӏвачик нагьахъдан
Дуьзвиликай къуна гапур на хци
Кичӏе жемир, уьткемдик лагь гаф жуван!

Пехилдавай акъваз яргъал жедай кьван-
Ам гъулягъ я зегьер тадай гелера,
Пара фидач гъида ада са буьгьтан,
Какадарна къал кутадай кӏвалера..

Яб це хаин пара хьанва дуьняда,
Атӏудай ви тарце аваз ви хилер
Чинал хъуьрез,кӏан эгъвез са къайдада,
Алуд тийиз валай пехъре хьиз вилер.

Дардавайдаз яргъи ая гъил вуна,
Анай жуваз алхиш гуьзет гьич тийиз
И несигьат гъиле пайдах хьиз кьуна
Уьмуьр гьала вижеваздик - касди хьиз!





Са дили ашкъидин...
Са дили ашкъидин сурагъдава рикӏ
Каспи хьиз дерин тир, Шагьдагъ хьиз къакъан
Цӏверекӏар кутадай къайи гьиссерик
Жедайвал руьгьдикай ялавдин макан.

Уьмуьрдин улубда турай цӏийи чар
Дегишрай ацакьун - къарагъунар зи
Гьижрандин азабди гайитӏа гъамар
Агьу –зар ийидач жеда зун рази..

Цӏайлапан йеришдив чандиз атурай,
Кьилелай кӏвачелди къурай зун битав.
Кичӏе туш, ашкъиди къуй рикӏ атӏурай
Гъалиб хьуй амма зи хиялриз чӏулав…




Ша, чубарук...
Мад хъфена вун чубарук туна зун
Кичӏе хьана къаярикай чи патан
Вун хъфена, мад дердини кьуна зун
Муг ви акваз ичӏи хьанвай биябан..

Архайин хьухь, вафа ава дустунихъ
Хуьда ви рехъ гатфаралди гьикӏ вилив.
Чаравилин жава ава дустунихъ,
Хъша вун фад,минет хьурай, зи кьилив

Вун мад патав ацукь мани илигиз,
Мурк акъудиз ругьдин кӏеле къунавай
Сефил я зун, чукулриз ви килигиз
Зи чӏередик вуна зулуз тунавай






Маса гузва вилери вун...
Лугьузва на, хъвач хквемир и патаз
Галатнава, четин я дерт, гъам эхиз
Лугьузва на, чинихъ гьихтин хъел галаз
Амма вилер хъуьрезва ви эвел хьиз.

Чуьнуьх жезвач вавай рикӏин кьатӏунар,
Маса гузва вилери вун,чизвани?
Низ лазим я акъажунар, атӏунар
Бегем ида ашкъидиз дад гъизвани?

Хъел жез туьхкуьн вуч са лез ет я лугьуз
Белки вуна чиз- чиз зи рикӏ тӏарзава?
Азиятар кӏватӏал- кӏватӏал зав вугуз
Вучиз элдиз чи кӏанивал харзава?






Ахвар, хъша, секинара...
Ахвар, вучиз вун мад закай катзава
Туна мад зун дердин-гъамун гуьнгина?
Ви чкадал чанда азаб гьатзава
Гьикьван жеда зун йифни югъ женгина?

Ахвар,хъша, секинара на зи рикӏ,
Гьижрандин тӏал кьезил хьурай са тӏимил.
Жемир,яб це, гъулгъуладиз вун шерик
Шумуд йиф я мичӏ тийиз за и кьве вил

Ахвар хъша хиялар зи, сустара
Ахъая заз йиф акъатна вуна мах.
Мумкин ятӏа са легьзеда,са ара ..
Минет хьуй ваз зун кӏанидан патав твах….





Бес архайин яни ви рикӏ
Атана чӏав чара жедай
Зун са патахъ, вун са патахъ..
Чи ругьериз къаяр къведай
Хиялариз:вуч хьанва чахъ?
Алахънава секинариз
Акъваз туна гьа вуна зун.
Кӏанзавач ваз деринариз
Рикӏеравай къенин юзун.
Заз чида вун валай хъсан,
Руьгь инамаз фин туш асан …
Акъвазнава зун килигиз
Кьиткьиннавай нагъв вилериз,
Гьал кумачир ви гъилериз…
Гафарилай зурхъуман ви
Муркар жезва чанда иви!
Мажбурна жув хъуьрезва зун,
Саймазди хьиз къекъвезва зун…
Туна рекъе жуван гъилив
Агакьнава исят кӏвалив.
Ичӏивили акъудна йекь …
Къефесдава саки са лекь…
Ингье, гила къеняй ргаз:
«Бес архайин яни ви рикӏ?
Вуна ам тек валай яргъаз
Залумдин хва, ахъайна гьикӏ?»-
Жузаз завай гузвач аман,
Зун, къеневай гьа зун хьтин
Са масада кузва яман…





Къе ви мехъер...
Им вуч кьисмет,им вуч къугъун
Ви мехъерик гала къе зун,
Ацӏанава къе ресторан
Сиве сивди –пуд виш инсан,
Гьар сад вичин са кефина,
Къенин юкъуз ава ина,
Сада незва гишинда хьиз,
Вилик галай тӏуьнар михьиз,
Са масади акъваз туна
Къуншидин гъил гъиле кьуна
Рахазава алатна ван
Ихтилатар жегьил чӏаван.
Гьарайзава тамадади,
Гаф лугьузва са гадади,
Сада зи яб акъудзава
Хиялривай къакъудзава
Ягь кван лугьуз «Перизада»
Кукӏварзава стол ада…
Ацукьнава зун вири хьиз
Тахтунавай ваз килигиз..
Тек зи рикӏ я тазавайди
Вири къене твазавайди.
Дар я къе заз цавар,чилер
Алуд тежез валай вилер.
Агь вуч иер аквазва вун
Лацу лиф хьиз вили цавун,
Бурма чӏарар гьатна пеле,
Хабар туш ваз закай гьеле..
Гъил гъилева са чарадан
Бес ругь ятӏа ви авадан?
Яраб зун ваз акунватӏа?
Вун гъавурда акьунватӏа
Я тахьайтӏа хъел ава ваз
Вил ягъайла гьа зун акваз?
Ингье, гила къвезва макъам
Чамран -сусан кьулуьн макьам…
На хкягьай чам яни им?
Эхиз жедай гъам яни им?
Ягъазава зи кьилиз тӏал
Къведачни бес вилел стӏал?
Кӏеви я зи бахтунин рак
Ваз свасвилин тахт мубарак -
Лугьуз –лугьуз экъецӏда зун
Мярекатдай галаз зурзун
Япараваз къенин гьава:
«…Чамран кӏвализ свас къвезава»…





Чинеба тан
Белкини тан чи кӏанивал чинеба,
Кичӏе я заз и ашкъида вил акьаз.
Икьван мили байихар чи эквеба
Лугьун тийин, минет хьурай гьич садаз.

Экъецӏин чун Селибурдин яйлахдиз
Гуьлуьшан яз атир гудай кьуд патай
Ашкъидин са кӏвал тӏуькӏуьруьн кӏеле хьиз,
Мягькемвилив бед незерар атӏудай.

Пехил жеда шаксуз сувун жейранар
Акурлахъди цукьвед къене ви къамат,
Тӏимилармир, чан кӏаниди, заз дидар-
И дуьняни вун авачиз - къазамат!





Гьахъвал
Гьар са чӏавуз дуьз рахух вун,
Гьахъвал вине къаз алахъа.
Авай гавар чинал лугьун
Лазим кьимет гуз алакьа.

Яргъал фидач тапарунар
Яхцӏур югъ я уьмуьр адан.
Гьакъикъат - са чӏехи гьунар
Ийида ви кар авадан.

Гьахъ чуьнуьхна чиз -чиз вуна
Ам нагьахъдан кӏвачик гумир,
Кичӏе хьана,багьна кьуна
Жува жуван иман кумир .

Гьахъвал чӏехи са нямет я,
Лугьудай чи бубайри чаз .
Итимвилин са къимет я
Яб це хъсан, чир хьурай ваз!





Стӏура...
Гьидан хуьряй шумуд шаир акъатнава
Лугьуз гана интернетда суал сада
Жаваб гун за: эхь, шаирар Стӏурава
За гьисабин, тупӏар къата вуна гада.

Ваз чидани Стӏур Далагь -чӏехи мазан
Хабар гайи цикьвед лагьай виш йисарай
Къелем хци, вичихъ авай терез –мизан,
Эхиз тахьай чӏанавилер, чӏугваз гьарай.

Машгьур кас я Дагъустанда Байрам халу
Халкьдин шаир тӏвар къачунвай хуьруьнви зи,
Ам чи дамах, ам чи даях, ам чи далу,
Адан мили шииррилай я эл рази!

Рахан гила кхьинрикай Келентаран
Шииратдин кукӏуш тир са алемдикай,
Гъайитӏани на кьил- кьилел дагъни аран
Жагъуриз жеч вавай ихьтин къелемдикай.

Зерифедин гьар са шиир-са жавагьир
Философдин кьатунарни фагьум галай
Гьар цӏаруна ава хайи хуьруьн атир,
Алакьдач икӏ иер кхьиз залай - валай

Рикӏерава Куругълийрин Рамизан тӏвар
Дуьнядилай фенатӏани жегьилзамаз.
Мецяй- мециз физва адан гафар,цӏарар-
Ватан кӏани сеняткарар азиз я чаз!

Лакӏаб кьуна Стӏурви хьиз Шакира чи
Теснифзава хайи ватан, хайи чилер.
Куьн сагъ хьурай Салимован мирес гъвечӏи,
Жани лугьуд чӏехи тарцин зурба хилер.

Алимурад Шагьдагъвини фена, туна
Чаз вичелай ядигар яз шумуд улуб.
Твадай касди зергерди хьиз гаф хатӏуна
Авай адаз вичин къелем, вичин кӏалуб.

Инал белки кутьягьин за гьисабунар
Аматӏани шумуд шаир тӏвар кьун тавур?
Эхь, шаирдиз герек я хьун зурба пунар:
Дамахар тир илгьам гъидай - Шагьдагъ, Стӏур!





Кьил чуькьузва хиялри..
Къе гьавани зи кефер хьиз чӏуру я
Элуьхънава ругьдин кӏвале экверни…
Яд гатӏанва -илгьамдин кам къуру я,
Шуьтӏкьенава зи бахчадин цуькверни.

Марфадин ван авахьзавай къаварал
Стӏал –стӏал къвезва кьилиз тӏал хьана...
Физ кӏанзава рикӏиз экуь цаварал
Чӏулав цифер вилик гала цал хьана.

Кефер патай къвезвай йигин гарари
Зурзурзава са къайдада дакӏарар…
Вучрай рехи тахьана бес чӏарари
Кьуд пад кьуна хаинвилер, тапарар…

Кьил чӏуькьузва виш дердини, хиялди
Кьисмет туш заз якъин рикӏин секинвал
Са тескинвал гузва амма суалди:
Жедани бес кудай къула серинвал?






Хкведач жал?
Чаравилин пар вугана
Гьиниз фена вун яр туна?
Багьнадилай багьна кьуна
Хкведач жал вун зи патав?

Са гафунив за рикӏ хана?
Вучиз яраб бес икӏ хьана?
Тек кӏвале мад гъерикӏ хьана
Хкведач жал вун зи патав?

Чуьнуьхармир,ахъая сир
И азабрин мус жед эхир?
Кутаз мад захъ синих-тахсир
Хкведач жал вун зи патав?

Акур ксар къвезва чӏалал
Вегьей парар на зи кулал.
Азиятар ийиз гьалал
Хкведач жал вун зи патав?

Ша ийимир зи югъ чӏулав
Мекьи я заз ифей къулав,
Къизгъи ийиз чанда ялав
Хкведач жал вун зи патав?





Вучиз?
Вучда вакай зун кьейила атана
Акӏ жеда ваз са шедайди жагъидач?
Хаинвилин харци мягькем гатана
Хиялмир зун гьалдай фенва, хъижедач...

Айиб авач туникай зун къерехда
Четин чӏавуз- хкягьунин береда.
Чалахъ хьухь вун, тадач гьич са чӏерехда
Дерин цацар ругьдин кӏвалин чӏереда.

Мал-девлетар акьван верци хьана жал?
Дегиш я и дуьняни ваз, бес вучиз?
Къизгъи хьайтӏа къвердавай зи рикӏин тӏал
Къведа жал вун архайиндик, вири хьиз?





Коломено паркина
Къекъвезва зун Коломено паркина,
Перишан тир цифери цав къунавай.
Дар жезва зи гьар камунал рикӏ ина
Акурла тар зулу кьецӏил тунавай.

Сумагдал хьиз чилел алай пешерал,
Яргъи хьанва урусдин руш кӏунчӏар къаз.
Бахтавар яз байих тийиз ламувал,
Наз гузава патав гвайи кӏанидаз.

Агъадикай атай вацӏун къайивал
Вуч ухшар я серинриз чи патарин.
Къвезва чандиз са кьадар зи хайивал,
Акурла чиг и шегьердин паркарин .

Аватӏани кьуд пад къизил рангина,
Ичӏивили галудзава ругь къе зи .
Пашманвилихъ галаз ава женгина
Байихарни кӏанивилин рекъе зи.

Къекъвез ама Коломено паркина,
Перишан тир цифери цав къунавай.
Гьам сефил я, гьам бахтавар зун ина,
Ашкъи галаз вуна рикӏе тунавай…




Хайи хуьре..
Хъуьтӏуьн юкъуз хтанва зун Стӏуриз,
Муркар, живер,маргъал гъилив атӏана.
Килигда за байихар гьа юзуриз,
Хайи чилиз тухдал ара датӏана.

Пилте- пилте жив къвазава къаварал,
Лацу хьанва кьуд пад сувун кукӏвар хьиз.
Ахквазамач са булутни цаварал.
Акӏ жезва заз и акунар ахвар хьиз.

Алатна ван къецел ала аялар,
Гьикьван чӏав тир живедин рехъ гуьзетиз,
Къулан патав яргъал физва хиялар,
Секин тежез гьа захъ галаз гьуьжетиз.

Вегьирдавай цӏаюн винел кӏарасар,
Нав гьатзава кӏвалин къайи цлара,
Амма заз чим, амач лугьуз миресар,
Акъатзамач сакӏани и патара .

Ацукьна руг чарар гала зи вилик.
Гьар цӏаруна кӏанивилин гел авай .
Хъим къунавай варар гала зи вилик,
Яргъал хьайи сагьибдикай хъел авай.

Экъецда зун хуьрун кимел нянихъ,
Живедикай яваш- яваш гелер таз,
Галукьдай а ихтилатри япарихъ
Гъам алудна чим гъидатӏа яраб заз?..





Далагь бубадиз
Икьван дердер аквар кьван чаз,
Ацакь вун чи кьилел, дагълар!
Стӏур Далагь. ӏ2-лагьай виш йис.


За низ лугьун дердер жуван?
Са яб гудай кас авачир.
Чӏуру хьанва девран яман
Итимвилихъ мас кумачир

Лагь я буба нихъ жен чалахъ
Тарифдайдахъ сивеллаз каф?
Модда гьатна ялтах - ялахъ
Кьит хьанава ниятар саф …

Пул паталди хьанва къаних
Мидагъа яз мукьва -кьили .
Гьахъвал акур кӏвачин кӏаник
Акьуллиди жезва дили.

Вуч затӏ тушиз мецераллай
«Къагьриманар» ава пара.
Дуьзди чӏана-какурдавай
Четин хьанва ийин чара

Къе незвайбур фу гузвай гъил,
Икрамдик ква гьар са пата.
Акъатзамач и кардай кьил
Эхир –заман атанватӏа?

Далагь буба, а ваз акур
Дагълари гьа эхиз ама.
Кьасар ийиз саки такур
Секиндаказ негьиз ама.




Тек вакай...
Сухан тал хьиз суза ава зи чанда
Жакӏумрин къен руцӏугулди эгъвезва.
Аватӏани са гуьлуьшан маканда
Сефил я зун, вилер тек вахъ экъвезва.

Ахъатнава чӏурариз цуьк- хъуьрезва,
Гатфарин ни алатнава суварал…
Амма руьгьда са ялгъузвал къекъвезва,
Йеб арушиз ахъа жезвай луварал.

Ракъин нурар гьатай чӏавуз зи чина
Акӏ жезва заз вун мад патав атай хьиз,
Эхь, тек вакай я хиялар къе ина.
Хьайитӏани рикӏ хенжелди атӏай хьиз…





Мумкин яни?
Гила геж я, чи уьмуьрдин хьанва пай-
Лагьана заз кьил агъузна вуна къе,
Чи карванар элухъарна фенва цӏай
Амайди тек са гелер я и рекъе …

Амукьин чун дустар хьана гьар чӏавуз-
Ви гафар зи акъатзамач япарай
Хкведатӏа йикъарикай са юкъуз
Акъатна мад ашкъи вичин къапарай?

Физамач зи вилерикай а вилер,
Килигзавай эхиримжи сефер хьиз…
Кӏандай хьи заз са легьзеда а гъилер
Алчуд хьана зи гардандал кифер хьиз!

Жедани цӏай чинеба хвен, кӏаниди?
Бес кӏан яз-яз чара гьикӏ жен,кӏаниди?
Ихьтин ашкъи -атӏудай къен,кӏаниди,
Мумкин яни тикрар хъжен, кӏаниди?!





Ша патав зи...
Лагьанай за, вердишармир зун жувал
Кичӏе я заз четин жеда къакъатиз
Магнитди хьиз чугна –лугьун авайвал
Кӏанзавачир амма заз гьич агатиз.

Тухвана ви ихтилатри яргъариз,
Акъудна зун чин тийидай алемдиз.
Чӏанавилер элкъуьрна шад йикъариз
Илгьам гъана, къуват гана къелемдиз.

Акьурла вил ви вилера кана зун,
Гьатай ялав акъатзамач зи чандай.
Иервиливив, мили ванцив хана зун,
Хьана закай Керем тек са вун кӏандай!

Якъин геж я вердиш хьанва зун вал гьикӏ
Белки им я ашкъидин чӏав атанвай?
Агата зав, ша акъудмир вуна рикӏ
Хабар тушиз кӏанивилив ацӏанвай ….





Ихтияр це
Ихтияр це, садра хквен ви патав,
Гьич тахьайтӏа яргъарилай килигиз,
Гъерикӏвили ийизва зи югъ чӏулав
Цӏай элуьхъна, гум алатай са къул хьиз.

Ихтияр це, кьве гаф хъийин вахъ галаз,
А верци ван галукьрай мад япарихъ.
Вач ахпа вун,шегьре рекъер хьурай ваз,
Айиб авач, алукьрай зун капарихъ.

Ихтияр це,темен хгун пӏузарриз,
Гъил алтадин къалин яргъи чӏарарал,
Кхьин ви тӏвар экв гудай са чирагъ хьиз
Кӏеви хьанвай зи бахтунин варарал.

Ихтияр це, кӏанивал хуьн рикӏе за,
Хазина хьиз шумуд къатин къеневаз.
Агакьдатӏа вав ашкъидин и суза
Гьич тахьайтӏа,фидайла зун къуьнеллаз?..




Тамарзу я..
Багьнадилай багьна кутаз вун хъелиз
Вучиз икьван хару хьанва, кӏаниди?
Чидатӏа ваз рикӏ алама гьикӏ шелиз,
Мана квачир уьмуьр лугьуз фаниди…

Шумуд югъ я жаваб амач чарариз,
Вил рекъелла тамарзу яз ванцихъ ви.
За вуч хъийин нагагь къвезвай гарариз
Зурзалаг хьиз къван тазмачир къванцихъ зи.

Хиялри зи къахчунава секинвал:
Яраб ви рикӏ са чарадахъ кузва жал?
Туна гила зи гьиссера серинвал,
Ашкъиди нав са масадаз гузва жал?





Шаир Эйвазаз
Шаир Эйваз,ша мугьман хьухь дагълариз,
Фаданлай ваз къвез кӏанзавай и патаз.
Фидани чун Селибурдин сувариз
Цуькверикай атир галай кӏунчӏар къаз.

Къалурда за дамахдивди зи макан
Тухуда вун Шарвилидин гелерай.
Ингье, им я хайи диге Далагьан,
Аквада ваз са кӏанивал вилерай!

Келентерни Байрам хьайи яйлахар
Шад жедачни ихьтин шаир атунал?
Бул я инра нек- нисияр, къаймахар,
Тамагь фидач дагъда маса затӏунал .

Ахпа вуна яд хъухъ "Кизир" булахдин
Акӏ жеда ваз «Купул» дагъдиз атай хьиз
Къведа ваз гьикӏ серинвал куь къавахдин
Акъатдачни чандавай тӏал гатай хьиз?!

Экъецдачни Шагьдин суван кӏукӏварал
Аквадайвал Теки патар -ви ватан?
Секин чӏавуз лекь ацукьдай мукварал
Ягъана ял, шиир кхьихь са масан!





Марф
Марф къвезава зи дакӏардиз
Шуьшейрилай стӏал -стӏал
Гьижрандин тӏал гъизва рикӏиз
Кутаз руьгьдик са къал магъал…
Зи дакӏардин вилик галай,
Ахъа я кеф тутун тарцин .,
Къуразавай чимивиляй
Акваз гила булахар цин …
Алатнани валай са пар?
Мад вуч кӏанда ваз тутун тар
Хьана гила хупӏ бахтавар?
Акьад гила гъавурда вун!
Чир хьанани ваз заланвал
Яр гуьзетиз акъвазунин?
Гьикьван чӏав тир рекьеллай вил…
Зазни кӏанда ашкъидин гьуьл!...
Белки вав гва,яб це стӏал
Kӏанидакай зи са хабар?
Белкини куьн ятӏа ярдин
Гьикьванни саф, гьикьван ухшар
Вилин накъвар инжи хьтин?
Яраб шехьиз амазматӏа …
Тутун тар хьиз тамарзу яз
Белки ада ракъурнатӏа
Вун булутдив вугана заз?






Са зулун юкъуз
Ингье са зулун югъ, чи багъ, чи кетил,
Фенава хиялар эвел йисариз..
Чи расал акурбур гьикӏ жедай пехил
Патавай фидайла такур кьасариз..

Са чӏавуз серинвал захадик гудай
Тарар вилериз къе аквазва пелеш,
Кӏанибурун рикӏер къене атӏудай
Зулун гарарикай аламач са пеш…

Эхь, вуч ава тарциз,фад фида вахтар,
Ам зи сят туш хьи экъребар тифиз…
Амач алатиз зул, алукьда гатфар,
Мублагьвал хкведа мад и патариз.

Амма дердер ава кетилдиз чӏехи,
Гьа зун хьиз бахтавар юкъукъ цӏигел яз,
Йисар алатзава, кьил жезва рехи
Ашкъи галай са багъ, гуьруьш рикӏеваз…





Хар хьана
Четин я хьи а ви вилер галачиз
Гьар гьалтайла чинебадик килигдай,
Ихтилатар ширин ширин амачиз
Зи умудриз лекьрен лувар илигдай.

Рикӏ шезава цӏигел яз а къаматдихъ
Жейранди хьиз къекъвез тек заз наз гудай.
Кӏанивилин багъчадихъни багъатдихъ
А верцивал кумач гила чаз чидай .

Гьикьван вахт я зи дуьнядин наварни
Какахьнава туьхкуьуруьн гьич жен тийиз.
Амач вакай гьич тахьай са хабарни
Хкведач жал чимивал зи байихриз?

Декъикъаяр яргъи хьанва йисар хьиз,
Гьижран рикӏяй кватнава са пар хьана
Лугьумир чаз авамвиляй чин тийиз
Чи ашкъини алатнава хар хьана ..





Акъвазмир бейкеф
Акъвазмир вун икьван бейкеф,кӏаниди
Рагъ элцифна циф атанвай яйлах хьиз
Къуй ван турай дагълариз чи маниди
Ашкъи галаз шадвал гъурай рикӏериз

Такурай заз мад биришар ви пеле
Беневша хьиз залум харци атӏанвай
Кӏичӏе я заз юзиникай чи кӏеле
Гарарилай хабар квачиз атанвай

А гъерикӏвал акъатзавач вилерай
Белки вуна хъелнаватӏа ярдивай?
Аян тушни кӏанивилин селерай
Зун тух тахьун садрани дидардивай?!





Лугьумир...
Лугьумир на - кичӏезва ваз
Жуваз жуван байихрикай,
Жезвач вавай са хабар къаз
Ашкъи патал къарихрикай.

Лугьумир на- къван я ви рикӏ
Кьатӏузвачир зи кӏанивал,
Гьикьван чӏавал эхин за икӏ
Давамда жал ви къайивал?

Лугьумир на- тӏимил амай
Вавай яргъаз къакъатиз зун,
Ашкъи лугьуд и ахварай
Бизар хьана аватиз зун.

Лугьумир на- залан я заз
Чаравилер жезвач эхиз.
Са легьзеда яб це, акъваз,
Дерт ийимир на заз чӏехиз.

Лугьумир на, лугьумир ша,
Ягьанатар вугумир ша!
Ашкъи даим вине кьуна
Санал чӏуган и гъам чна!
Sez Lezgin ädäbiyättän 1 tekst ukıdıgız.
  • Büleklär
  • Шиирар - Билал Адилов - 1
    Süzlärneñ gomumi sanı 3950
    Unikal süzlärneñ gomumi sanı 1741
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Шиирар - Билал Адилов - 2
    Süzlärneñ gomumi sanı 2710
    Unikal süzlärneñ gomumi sanı 1348
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.