Кьурагь Дагълар - 4

Пак инсанар, рикӏиз масан,
Аферин квез, пожарныяр!


ДОЯРКА ГЬУЬРУЬПЕРИ ГЬАМИДОВАЗ
Гьуьрипери, кӏерецдин хвех,
Нек ацаз вуж агакьда вахъ?
Гьич са касни! Вун я дамах,
Некӏедикай авур булах!
Хъухъвазарни, Хутад тӏулар,
Алаф кӏватӏур а ви тупӏар.
Къе рикӏел къвез а ви крар,
Агаж жемир, Гьуьруьпери!
Халкь паталди чӏугур вафа,
Садрани гьич фидач бада.
Чаз виридаз я вун багьа,
Кьурагьви руш, Гьуьрипери.
Вахтар къведа, крар фида,
Цӏийи уьмуьр серес жеда.
Гьа девирда чи япара
Гьуьрипери, ви сес жеда.

ОРДЕН МУБАРАКРАЙ
(Р.И. Гьайдароваз)

«Дувул галачир тар тахьуй,
Тарих авачир халкь» – лугьуз,
Хьана алим кар тухуз, –
«Чӏал чи хци яракь» – лугьуз.
Муаллим, вуна чӏал хвена,
Халкьди рикӏе вун хуьда.
Мез гапурдиз элкъвена,
Дидед чӏала чун хуьда.
Алимрин межлисда гур
Ярашугъ я вун шагь яз хьун.
Мубаракрай, хва такабур,
Хурал орден, вун сагъ яз хьун!
2.02.2000 й.


КЬУРАГЬРИН РАЙОНДИН
АДМИНИСТРАЦИЯДИН КЬИЛ
Эмиргамзаев Даираз
Пайгъамбаррини дуьньяда
Чпин жанлу гел тада.
Умудзава уьмуьрда на
Ваз дуьазавай эл тада.

КЬУРАГЬРИН ХУЬРУЬН АДМИНИСТРАЦИЯДИН
КЬИЛ, ЗИ РИКӏ АЛАЙ УЧЕНИК
Къурбанов Сейфудиназ
Кьурагьар чи – Гияр шегьер,
Гьикьван гуьрчег, гьикьван иер,
Женнетдихъни тежер тегьер
Тӏуькӏуьр жечни вавай мегер.

ГАТФАРИЗ
Галукьайла гатфар гьава,
Марфар къурна цифери.
Варз экъечӏна мичӏи цава,
Ишигъ гана йифери.
Припев : Луж-луж къушар хквезава,
Луж-луж рушар къекъвезава,
Цуькверихъ чи багълара.
Кӏунчӏ-кӏунчӏ векьер экъечӏзава,
Къунж-къунж цифер къекъечӏзава
Рагъ акьурла, дагълара.
Фадлай хьанвай чун вахъ цӏигел,
Майдин сувар – гатфар гуьзел!
Хтайлахъди вун чи варцел.
Кьил хкажна цуьквери.
Цуьквер атӏуз акурла руш,
Гьатна япа авазар хуш,
Лугьуз: «Уьмуьр хьурай квез нуш!», –
Туй къурмишна векьери.
30.04.I998 й.


ИСКЕНДЕР КЪАЗИЕВАН 80 ЙИС
(Лезгийрин яшлу зари Искендер Къазиев Ватандиз хтун
ва адан 80 йис тамам хьун рикӏин сидкьидай мубарак яз)

Гатана вун жувандани чарада,
Алахъайла гунагьрикай дунья михьиз.
Къе Искендер ава мад чи арада,
Кьабул хъуна багъри чили хайи хва хьиз.
Гила кьванни ви кьилел рагъ алаз хьуй,
Бухтуни чин тагай зари, Искендер.
80 йисан илгьамд булах на хъваз хьуй,
Душмандиз рей тагай зари, Искендер!

АЖУЗВАЛМИР
Эй, викӏегь хва, жезвай аскер,
Югъур хьуй рехъ, вун физвай!
Акурай чаз ислягь, иер
Мублагь уьлкве, на хуьзвай!
Гъалибвилин гьунар чӏехи,
Аскервиле чешне хьурай!
Атайтӏа вал душман пехъи,
Эседан гуж гъиле хьурай!
Эй, игит хва, женгчи кьегьал,
Душманд вилик кьил агъузмир!
Дидед гайи нек хьуй гьалал,
Асквервиле ажузвалмир!
– Ай, маншаллагь! – ваз лугьурвал
Къуллугъ ая, асланди хьиз.
Вун хтана, сагъ акурвал,
Темен гуда ярди сивиз!


Госдумадин депутат Фазил АЗИЗОВАЗ
Чатук яд гай гьулдан хьтин,
Алпандин цӏа лигим хьана.
Кьисайрик квай Султан хьтин,
Ам лезги хва Фазил хьана.
Ваз гана сес чна, Фазил!
Чи дагъларин яйлахрай
Хунчадал вирт хкидайла,
Москвада, Госдумадиз
Депутат яз хкядайла,
Ваз гана сес чна, Фазил!
Хайи халкьдин къадир, гьуьрмет –
Чидай хва я вун а къимет!
Хкажнава лап гьуьндуьрдиз,
На халкъ акъуд шад уьмуьрдиз!
Ваз гана сес чна, Фазил!
2.04.I998 й.

ЦӏИЙИ ЙИСАН РАДИОПЕРЕДАЧАДИН СА ЧӏУК
…Къуй, куь къулара цӏай, къулавни туькӏвей хзан, кӏвалерани экуьвал хьурай! Къуй, рикӏера гьамиша михьи ва
ракъини хьиз чими ийидай муьгьуьббатдин нур хьурай! Къуй
гьар са кӏваляй дишегьлидин манидин ширин сес атурай! Им,
чир хьухь квез, ислягь ва бахтлу вахт я. Куь суварин бокаларни ислягьвални бахтлувал патал хкажа! Цийи йис мубаракрай!
Цӏийи йисан бахтар хьурай,
Рикӏ шад жедай вахтар хьурай,
Чими-чими ракъар хьурай,
Хушбахтвилин йикъар хьурай!
Цӏийи йисуз эквер хьурай,
Къизилгуьлдин цуьквер хьурай!
Мехъер, межлис, мелер хьурай,
Дустарин шад телер хьурай!
30.I2.I997 й.


ВИЧИН «ЧИНАЛ ГЕЛ» КТАБДАЛ
АМАНАТ ЯЗ КХЬЕЙ ЧӏАЛАР
Расим!
Зи азиз хва! Чинал гьич гел тахьуй!
Хьайитӏани, рикӏел гьич хер тахьуй!
Заманадал, хуьрел са хъен тахьурай!
Вун хзандал, кӏвалел цӏигел хьел хьурай!
Алукьзавай Цӏийи йис вири патахъай туькӏвей, хзанда
бахт, динжвал, берекат авай къени йис хьурай! Кьилинди
сагъвал хьурай! Сагъвал вири я!
Цӏийи йисан тост хкажуналди ви дах.
28.I2.I994 й.

АБИДАТАЗ
Дурияни, Суьлгьуьжатни, Абидат,
Лезгистандин тарцел алай цуьквер я.
А цуьквериз ийин чна ибадат,
Абур вири чи рикӏера эквер я.
Кьадар-кьисмет гьар садан са жуьре я,
Куркурдин мез авай сиве Абидат.
Ви яш, ви баш-лап ял ядай бере я,
Кьуьзуьвал на кьамир хиве, Абидат.
Ви манийри гьейранарна жемятар,
Суварризни, мехъерризни мелериз.
Эциг жедач ви зегьметдал кьиметар,
Билбилариз я вун чешне, Абидат.
08.09.2005 й.


АРБЕНАЗ КАП ЯЗАВА
Самур вацӏай Шагь дагъдал кьван
Арбеназ къе кап ягъзава.
Къуба падни чак кутуна,
Куьре патан халкьарини
Къе Арбеназ кап язава.
Кап ягъзава, «Лезгинкадин»
Далдамдал хутӏ кӏар илигна.
На лугьуди, Лезгистандин
Кьве пад, Арбен, на гилигна.
Кап ягъзава дидейрини,
Хурухъ галай куьрпейрини,
Билбилрини, цуькверини,
Бубайрини, эмейрини.
Ваз вирида кап ягъзава,
Вучиз ятӏа чидани ваз?
Дуьз гаф сивел хьун кӏан я чаз!
Рагъ яз акун кӏан я вун чаз!
4.ӏӏ.2004 й.

РУЬГЬДИН ЧИРАГЪ
(«Дагъдин булах» газетдин 70 йисаз)

Тек сад я хьи вун чахъ авай,
Кьурагь газет, «Дагъдин булах».
Гьам адалат, гьамни гьахъ гвай,
Чан чи даях, чан чи дамах!
«Дагъдин булах» – акьулд чешме,
Руьгьдин чирагъ, рикӏин сирдаш.
Несилризни жервал чешне,
Мадни гзаф хьурай ви яш!
«Лезги газет» – чӏехи стха,
Гьам ви далу, гьам ви арха.
Мягькем кьуна ада яха,
Илгьам гузва, «Дагъдин булах».
«Дагъдин булах», дар вахтара
Экв гузвай гъед ятӏа вун?
Тахьайтӏа дуьз серт вахтара
Халкьди хъвазвай мед ятӏа вун?
«Дагъдин булах», заз акӏ я хьи,
Халкьдин акьул, мез я вун.
Даим сагърай, багъри газет,
Эл уяхдай сес я вун.


«Дагъдин булах», гагь терс я вун,
Гахълу мизан терез хьиз.
«Дагъдин булах», серес я вун,
Бедендиз чи нефес хьиз.
Даим сагърай, «Дагъдин булах»,
Халкь кӏубан я, вун хъваз булах.
Зазни кӏан я, гьамга яд хъваз,
Кӏуф эцигна, гьа ви къвалахъ.
6.I2.200I й.

ЯШАМИШРАЙ «ЛЕЗГИ ГАЗЕТ»
(мани)

Къифле-къифле дурнайри хьиз,
Гузва на лув, «Лезги газет».
Илифзава гьар са кӏвализ,
Аваз гьуьрмет, назни лезет.
Даим хьана ваз и адет,
«Цӏийи дуьнья» – лезги газет.
Припев : Ша, чан газет, «Лезги газет»,
Фикирар чи извай безет.
Мубарак ваз 80 йис яш,
Лезгийрин тур, лезгийрин баш!
Алай винел кьимет, гьуьрмет,
Чан чи девлет, «Лезги газет».
Килигайла тек сад я кьван
Вун чахъ авай, «Лезги газет».
Ви еришдиз шад я гьакьван,
Гьахъвал кӏани, писвал такӏан.
Адалат хуьн хьана хесет,
«Соцрехъ» хьайи «Лезги газет».
Лув це, газет, жемир яваш,
Зегьметдин кӏаш, якъут я къаш!
Яхцӏур йис заз хьана юлдаш,
Чирна дустни душман, саваш.
Ачухна рехъ, майдан газет,
На «Коммунист», масан газет.

Заз кӏанда зи хайи газет
Гьар лезгидин гъиле акун!
Кьуд пад вичи ийиз гуьзет,
Рагъ хьиз пеле, виле акьун!
Вун мадни хьуй вине, газет,
Кӏелиз серес, «Лезги газет».
Припев : Ша, чан газет, «Лезги газет»,
Мубарак ваз сувар безет.
Вун тебрикиз лезги миллет
Къвазнава фад ийиз гуьзет.
Тӏямлу нямет, ширин суьгьбет,
Яшамишрай «Лезги газет».
23.I2.I999 й.

САЖИДИНАН 65 ЙИС
Темпел такӏан, зарафат кӏан устӏар яз,
Шаир я вун цуьквед багъда билбил хьиз.
Везин зериф, нагъма назик устад яз,
Фикирарни дерин я ви са гьуьл хьиз.
Припев : Мецел ала вун, Сажидин
Гьам къардашдин, гьам бажидин.
Мубаракрай и шад межлис,
Кьисмет хъхьуй мад 60 йис!
«Жедайлахъди ша кеф чӏугван, Шамсудин», –
Лугьуз ада Кьурагь дагълар раижна.
Сулейманни, Мусаибни, Фейзудин
Рикӏе аваз кхьизава Сажидна.
Припев : Чаз кӏанзава буба хьана,
Хзанд кьилел сагъ, Сажидин!
Къизилдин къаш-къуба хьана,
Чилин винел рагъ, Сажидин!
I.05.I998 й.


ДУРИЯ ВАХАЗ
Гъил ахъа яз, рикӏ михьи яз,
Вун дуьньядиз атана.
Сивел ширин мани алаз,
Руьгь ашкъидив ацӏана.
Аквазва тик живер авай,
Кьакьан дагълар цуьквер авай,
Рушни гада мехъер авай,
Ви манийрай чаз, Дурия.
Къубадани Куьредани
Шад межлисар, мелер хьурай!
Дурияди мани лугьуз,
Лезгистанда демер хьурай!
Дуьнья амай кьван гагьда ви
Куркурдин сес япа хьурай!
Къизилгуьлер Аллагьди ви
Къунжа-къунжа гъапа турай!

ЗИ СТХА МАГЬАМАДАЛИДИЗ
Магьамадали, зи рикӏин дуст,
Ваз хажалат бул хьана.
Ви гъвечӏи руш Мильварадин
Уьмуьр кӏан я гуьл хьана.
Магьамадали, Тӏухшарбуран,
Аял вахтар тухвай майдан.
Кӏанда заз, дуст, бахтлу хзан
Гележегда хъхьун хъсан.
28.I2.99 й.


НАЗИМ ДУХТУРДИЗ
Инсанарин ава жуьре:
Кисна, лагьай кар ийидай,
Шекер мез хьиз авай сиве,
Гьич садан рикӏ тӏар тийидай.
Гьа жуьре я, Назим духтур,
Вири элдиз лазим духтур.
Гъвечӏи чирагъди чӏехи ужагъдиз,
Уьмуьр амай кьван гуда вичин экв.
Аквада чаз ви чинай уьзягъдиз
Лезги пагьливан Шарвилидин эрк.
Мубаракрай юбилей, духтур!
Шалбуз дагъдин пӏир я, духтур!
2006-йисан I5-апрель.

ЗИ ХТУЛ МУСАДИЗ
Чи рикӏ алай хтул Муса,
Чаз виридаз я вун багьа.
Пайгъамбардин тӏвар я Муса,
Вун гьа тӏварцӏиз хьурай мукьва!
Муса, Муса, мехъер хьурай,
Гьар са кӏвализ рекьер хьурай!
Къавумариз муькъвер хьурай!
Вун абуруз иер хьурай!
Муса, ваз и мехъер хьана,
Куь рикӏера эквер хьана,
Цӏийи йисуз чаз акурай:
Пабни гъуьл яз, цуьквер хьана
Рикӏин ашкъид сирер хьана,
Хушбахт уьмуьр ваз акурай!
28.I2.I999 й.


ДИДЕ-КЪУРЪАН
(Назлухан халадин гьуьрметдиз)

Саламарни салаватар алаз мецел, –
Шад девирдин экв хтана вилериз.
Куркурар хьиз хтулар къугъваз метӏел,
Темен гузвай абуру ви гъилериз.
Духтурар ви мецел хьана,
Максимал гъил алтадиз.
Сад Аллагь ви рикӏел хьана,
Куьмек патал гададиз…
…Шумуд йисар къвез алатда,
И девирар амукьда.
Халкьдин сивяй ви балайрихъ,
Диде, ви дуьа галукьда.
24.03.I994 й.

НАЖМУДИНАН 60-ЙИСАН
ЮБИЛЕЙ ТЕБРИК ЯЗ
И шад юбилей – вун хайи югъ
Ваз мубарак хьуй, Нажмудин!
Уллу буба вун хьайи югъ,
Акун кьисмет хьуй, Нажмудин!
Дагъларал чи вун ашукь я,
Ви рикӏни гьакӏ чаз ачух я.
Ярар-дустар ви артух я,
Гьуьрметарни ваз, Нажмудин.
Зегьметдалди са кьас фу тӏуьр,
Къазанмишай гьуьрмет-хатир,
Мадни яргъи хьурай уьмуьр,
Кьилел алаз рагъ, Нажмудин!
I3.02.I999 й.


АЯЛРИН ДИДЕ
25 салай алатна ви,
Аялриз рикӏ-жигер гуз,
Тӏвар эллериз акъатна ви
Акьул-камал бегьер гуз.
– Суьрия бах! – аваз сиве, –
Эверзава: – Суьруь диде!
– Лагь, чан бахдин, лагь чан бике, –
Гьазур я квез, Суьруь диде!
Суьрия вун, бахчад бине,
Ви кӏвалахда ава кӏвенкӏве.
Маншалла ваз, мад хьухь вине,
Аялрин рикӏ алай диде!

ЦӏИЙИ СУСАЗ
Хъуьтӏуьн цикӏиз живер авай
Вун дидеди хана, чан свас.
Сарубугъдад къуьлуьв ацӏай
Бахтлу уьмуьр хьана, чан свас.
Тарцел алай емишар хьиз,
Веледар бул хизан хьуй, свас!
Лагьай къуллугъ битмишариз,
Апай, къари масан хьуй, свас!
Дуьнья гуьрчег, уьмуьр гуьзел,
Гатфар хьтин алаз либас,
Гатфарар мад хьуй ви кьилел,
Чан зи хцин – Расиман свас!


ХТУЛ ТИМУРАЗ МЕХЪЕР МУБАРАК ЯЗ!
Лугьузва за къе и гаф
Кьве жегьилдин сагълугъдай.
Шишер ягъа, ашпаз, гзаф
Куьк гьерен лап ютурдай!
Балаяр куь къелемди
Бул емишар гъурай квез!
Халикьдини алемдин
Еке бахтар гурай квез!
Куь кӏвалера жедайбур
Мехъерарни мелер хьуй!
Дустар галаз недайбур
Гъилихъ хвейи кӏелер хьуй!
Мурад я квез гзаф хьун
Хтуларни птулар.
Мехъер квез мубарак хьуй,
Дериндиз физ дувулар!
Фад, устӏаррив ягъиз тур
Са макьам кьуьл ийидай.
Цӏийи свасни хтул кутур,
Виридан руьгь гуьл идай.
27.04.2006 й.

АЙ, АМАН, ПАБ!
(Зарафатдин мани)

Я чан гуьзел, хаму жейран,
Ви дерт за икӏ гьикьван чӏугван?
Ша, гила кьван, зун хьухь ваз кӏан,
Заз йифен ахвар авач хьи.
Припев : Ай, аман, паб,
Чан, масан, паб!
Гумир на заз
Икьван азаб!
Паб яни вун,
Чан вили лиф.
Чилел (э)цигиз
Я вун гьайиф!
Я паб, зи сир лугьун за ваз,
Зи чан-жигер ава кьураз,
Валлагь, Суна, эсиллагь заз
Валай гъейри яр авач хьи!
Припев:
Эрзиман я ваз зи ван хьун,
Вазни гьакьван зунни кӏан хьун.
Чахъни туькӏвей са хзан хьунИдлай хъсан кар авач хьи!
Припев:
03.I0.I993 й.

ЗАЗ КӏАН Я КУЬН ТУЬКӏВЕНА!
Заз кӏан я куьн туькӏвена:
Къирини зи, сусар чи.
Гъиз гьазур я савкьатар,
Мубаракиз сувар куь!
Заз кӏан куьн гьамиша
Сивел, шад яз, хъвер алаз.
Заз кӏан я зи хтулар
Вири жуван метӏел кьаз!
7.03.I997 й.

МУСЛИМАТАЗ
Ви веледрин зар алай
Дамах я вун, Муслимат.
Берекатдин чар алай
Къаймах я вун, Муслимат.
Къе вун хайи сувар я,
60 – йисар мад хьурай!
Вун чи мягькем лувар я,
Уьмуьр мадни шад хьурай!
20-сентябрь I999 й.


АВАЙ СА РУШ, ЖАМИЯТ!
Рикӏера чи сувар ава,
Ашкъидин жуьт лувар ава,
Шагь дагълара шавгьар ава,
Авайвиляй кӏвале вун,
Авай са руш, Жамият!
Гатфар гьахьна цуьквер галаз,
Варз илифна гъетер галаз,
Хъвазава чай шекер галаз,
Авайвиляй кӏвале вун,
Авай са руш, Жамият!
Илим чириз, низам чириз
Вилик вегьез къадам чириз,
Вафалу яз элдиз, хуьруьз
Мектебда ава кӏвале хьиз,
Ви мурадар фирай кьилиз,
Авай са руш, Жамият!

ХТУЛ ГЬАСАНАН 5 ЙИС!
Хъсан касдин тӏвар я Гьасан,
Хьурай, яллагь, вунни масан!
Дуьньядал ви йисар я вад,
Хъхьурай, лагь, са вишни вад!
«Гьасан гуьрчег, Гьасан гуьзел –
Гада лугьуз», – кьазва метӏел.
Итим хьана кӏвалин – йикъан,
Тӏвар хьурай ви халкьдин мецел!
23.03.2005 й.


КЪАВУМ ХЕЛЕФАЗ
Хелеф стха, вун ви веледриз масан я,
Вун кьилел алаз хзандин гьал хъсан я.
Пудкъанни цӏуд йис тебрикзава чна ваз
Амай уьмуьр хьурай гуьзел хунча ваз!
УМА СУСВАЗ
Йисар, йисар, бахтлу йисар,
Хьурай чи свас Ума вахъ
Хтуларин баде хьурай,
Иесини галаз къвалахъ!
29.06.I997 й.

НАМИКАН 40 ЙИСАН ЮБИЛЕЙДИЗ
Куьн азиз я куь дидейриз –
Хуралай квез нек гайи.
Куьн багьа я куь бубайриз –
Намус, гъейрат, эдеб хвейи.
И дуьньядал бубадиз хва,
Рушни ширин хьаначиртӏа,
Дидедини вичин лайла
Веледариз яначиртӏа,
Бес гьикӏ жедай эхир, инсан?
Сад Аллагьди дуьнья халкьна:
«Куьн инсанар хьухь!» – лагьана.
Дидедини кап алтадна:
«Бала вуна хуьх!» – лагьана.
Къе межлис я чи Намикан,
Яхцӏур йисан яшараваз.
Мад жеда, хва, яхцӏур йисар,
Уьмуьр къизил къашараваз.
Уьмуьр хьурай гуьлуьстан багъ,
Гьа багъдани беден яз сагъ!
Вили цава кьилеллаз рагъ,
Мубаракрай юбилей, Намик!
I8 февраль 200I й.


РАСИМАН 35 ЙИСАН ЮБИЛЕЙДИЗ
Я эвел туш, я туш эхир,
Къизилдин лап юкь я, Расим.
Подполковник чин туш эхир,
Генерал вун хьун я, Расим.
Генералар мад хъжеда
Амукьдайди тӏвар я, Расим.
Йисар, йисар мад хъжеда,
Аквадайди кар я, Расим.
Тӏварни хьурай, карни хьурай,
Уьмуьрда ракъарни хьурай!
Ваз шад хуш йикъарни хьурай,
Чи арада аваз, Расим!
I8 февраль 200I й.

МУБАРАКРАЙ, ХИДИРНАБИ!
Хидирнаби, вун я зи хтул,
Зунни я ви хайи халу.
Кефияр зи авачтӏани,
Мехъер хьана ви лап гурлу.
Хидирнаби, вун гъвечӏи велед,
Гъанвай свас – экуьнин гъед.
Мехъерни свас мубаракрай,
Бахтлу хьурай, яллагь, куьн кьвед!
И чӏал хьурай халуд патай
Ваз мехъерин багьа савкьат!
Уьмуьрлухда свасни галаз
И чӏал хуьдай гуй ваз кьуват!
I7.09.2006 й.


Куьтягь тавунвай эхиримжи шиирар…
НИ ЛУГЬУДА: РЕКЬИДА!
Экуь дуьнья мичӏи жеда
Цуькни эхир шуьткьуьда,
Чи уьмуьрни пичӏи жеда,
Чунни са къуз рекьида.
Яраб, Гьамид, чун рекьида,
Чи уьмуьрни шуьткьуьда?!
Ваъ, халкьдихъ чан кайи кас
Ни лугьуда: рекьида!

ЗИ ГЪЕТЕР-РУХВАЯР
Зи вад хва – зи гъетер,
Рагъ хьана чилерал.
Жедатӏа яраб заз
Малаикар къуьнерал?
Припев : Зи далу-даяхар
Куьн я, рухваяр!
Берекат – булахар
Куьн я, рухваяр! ...


БАРКАЛЛА ВАЗ, МУСЛИМАТ!
Маизатан муьхцин пуна эцигна кӏвал,
Вакай хьана фяле, куьмек, Муслимат!
Кьваларикай тукӏуьрна за бахчани сал,
Вакай хьана кӏвалин дестек, Муслимат!
Кӏвал эцигна бахчани галаз,
Ви берекат яз, Муслимат!
Вад хвани са руш гана на заз,
Баркалла ваз, Муслимат!
Хваяр гана, са руш гана.
Берекат хьуй ви гъапал!
Яраб цуьквер кьуна хурал
Къведач жал вун, яр, зи сурал? ...

Редактордин патай са алава
Эхь, дугъриданни Ш. Исаеван уьмуьрдин юлдаш Муслимат вафалу, намуслу, халис дагъви дишегьли я. Ам далудихъ дагъ хьиз тахьанайтӏа автордивай бажагьат еке хзандин
кьилни кьуна, гьукуматдин жавабдар къуллугъарни тамамарна, акӏ бегьерлудаз яратмишунрин никӏе кӏвалах жедай.
Ваз икрам авуналди, бах, ви веледрин патай агъадихъ
галай шиир багъишзава ва ам ви кайванидин шииррик кухтазва.
Аллагьди чаз гана вун, бах!
Балаяр ваз вири сад я, ширин я.
Вун кьилел хьун тушни бес бахт,
Дердер ама лугьуз тежез, дерин я.
Мутӏуьгъ хьанач цӏаюз, вацӏуз,
Дурум гана турдин синел,
Къеневай рикӏ, жигерни гуз,
Хизан ялна шегьре рекьел.
Ничхирди хьиз лув гуз винел
Акьулдна вад хвани са руш.
Яргъа аваз, я вахъ цӏигел,
Вахкуз жедай джафаяр туш.
Йисар физва къвез-алатиз,
Ваз ви уьмуьр гьайиф ятӏа?
Къаразда ава галат тийиз,
Куьмек гуз, вуж зайиф ятӏа.
Четин уьмуьр алатна, кьил рехи я,
Ругуд велед, цӏукьуд хтул, бахтар я!
Са геренда секин туш, рикӏ чӏехи я,
Гила кьванни ял я вуна, вахтар я.
Буба фена…Сабур ая, жемир серин,
Мад вучда кьван кьадарар я, кьисмет я.
Шаирвилин хазина яз, калам дерин
Туна касди, чаз ам еке девлет я.
Бах, гьамиша рагъ хьиз вун чи кьилел хьуй,
Ви капӏ-дуьа лап чкадив агакьрай,
Рикӏ шаддиз, чан сагъ яз кӏвачел хьуй,
Птулариз сусвар гъунни алакьрай.
12.01.2007 г.


ШЕХЬМИР, КЪАРИ
Гьар са гатфар яр атайла,
Билбилар-къушар хтайла,
Багъ-бустанда кӏвалахдайла,
Зун рикӏел къвез, шехьмир къари.
Гатун йикъар алукьайла,
Векь яз Сува амукьайла,
Булахд кьилел ацукьайла,
Зун рикӏел къвез, шехьмир къари.
Берекатлу зулун къара,
Мелни-мехъер жеда пара.
«Кьурагь дагълар» хьайла япа,
Зун рикӏел къвез, шехьмир къари.

Хтулдин чи мехъер серес,
Кьуьлер авун хьайила бес,
«Мегьрижанан» атайла сес,
Зун рикӏел къвез, шехьмир къари.
Гьар пакамахъ ягъдайла рагъ,
Гьалтайла вал за кутур багъ,
Зи кӏвач хкӏур дерени дагъ
Рикӏел хквез, шехьмир къари.
Ярар-дустар зи акурла,
Гьар садак ви вил хкӏурла,
Виридакай зун такурла,
Кьагьар хьана, шехьмир къари.
Вил алаз ви Жуьмя йикъал,
Къизилгуьлер кьуна хурал,
Атайлахъди вун зи сурал,
Минет хьуй ваз, шехьмир къари.
Худади вун яргъал туртӏа,
Са къуз ажалд ви чан кьуртӏа,
Чи руьгьер чал гьалт тахъуртӏа,
Гьайиф хьана, шехьа къари.
I994 й.


ГУЬЗГУЬ ХЬАНА
Жикӏид тарцин хьана зун цуьк:
Садаз-цацар, садаз-атир.
Хайи халкьдихъ кана зи рикӏ,
Саданни за ханач хатир.
Къачунач за тике, я лаш,
Девлетрихъни галтугнач.
Иликьариз невсинин каш,
Гьакимривни гатӏумнач.
Кӏан хьанач заз чӏехивилер, –
Авайтӏани алакьунар.
Негьиз хьана ялтахвилер,
Тирвал жуван акъакьунар.
Такабурлу лекьре хьиз за
Гьахъ кар патал женг чӏугуна.
Дергесдалди векье хьиз, за
Къелемдал рехъ генг авуна.
Дагълара зун гзаф серес,
Хьана гуьгьуьл ачухариз.
Азаддаказ къачуз нефес,
Зигьин, илгьам артухариз.

Кӏан тахьайла еке къуллугъ,
Гьахъ кӏвачерик кутазвай.
Гьавиляй зун яна кьулухъ,
Эцигиз вик тутазвай.
Кьулухъ хьана, вилик хьана,
Дустни душман ахтармишиз.
Лезги халкьдин зун вик хьана
Уьмуьр пашман къаралмишиз.
Йисар са-сад алатзава,
Рикӏ хци-чан кьуьзуь хьана.
Гила, дустар, заз кӏанзава,
Уьмуьр зи квез гуьзгуь хьана.
I997 й.


Автор 2006-йисан I4 октябрдиз рагьметдиз фена.
Адаз дуьа яз кӏватӏал вичин и шиирдалди агалзава

РАСУЛУЛЛАГЬ
Аллагьдин эмирдал ракъурна чилел,
Эрзиман мурад Мегьамед пайгъайбар.
Къуръандин аят пак хвейи рикӏел,
Инсанрин рикӏерай акъудна гъам, пар.
Исламдин гьахъ тир дин вуна тешкилна,
Уьлметдин зигьинда мягькемна иман.
Аллагьдин аятар туькӏвей шикилна,
Яратмишна тарихда пак тир Къуръан.
Цаварилай гана гьахълу тир калам,
Имансузар на арадай акъудна.
Инсанрин мецерал къурмишна салам,
Мусурман миллет сад садав агудна.
Сад Аллагь сад тирди чаз чир хьун патал
Алихлас сура кхьена эхир.
Кьибледихъ элкъуьн сад авуна чӏал,
Вири мусурманриз яз амукьнач сир.
«Фатигьагь!» хьана ви къуръандин куьлег,
Ахъайна ада женнетдин варар.
Йикъа вад сеферда тӏалабиз куьмек,
Аллагьдин патав физ мукьва жез гурар.
7 март 2002 й.
ВАЗ ГУЬМБЕТ ХЬУРАЙ
«Чи харапӏайрикай Гияр шегьер хъувур Шамсудин. Чи
кӏамарикай вацӏар авур Шамсудин. Чи аялрин сиве мез тур
Шамсудин!» – лугьузва ваз къе Кьурагьрин жемятди. Ви экуь
кьил, ви кьезил гъил, ви мез, я чи межлисрин билбил, чаз
хкӏама…
Къуй и ктаб ваз хзандин патай гуьмбет яз халкьдин
гъилера, ви манийрин сес гьамиша куркур яз япара, ви ирсни
хазина яз несилрин рикӏера амукьрай.

Виридан патай Расима кхьей кьве цӏар я,
И ктаб ваз чӏур тежедай гуьмбет хьуй !
И дуьньяда амукьайди са тӏвар я,
А дуьньяда ваз дженнетар кьисмет хьуй.

Ви уьмуьрдин юлдаш МУСЛИМАТАН
ва веледар тир ДАВУДАН, НАМИКАН,
ТОФИКАН, РАСИМАН, НАЗИМАН, ЖАМИЯТАН
хизанрин патай рикӏин сидкьидай.