Latin

Марвар: Агьмедпашаева Саират

Süzlärneñ gomumi sanı 407
Unikal süzlärneñ gomumi sanı 305
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Агьмедпашаева Саират 1958-йисуз С. Сулейманан райондин Кьулан Стӏал хуьре дидедиз хьана. Ада хуьруьн мектеб куьтягьна ва "Куьредин ярар" газетдин редакцияда кӏвалахна.
Шаир диде Мислиматавай пай къачунвай руша мектебда кӏелзамаз шиирар кхьиз кьил ктунай. Ада тӏебиатдикай, муьгьуьббатдикай, уьмуьрдикай кхьенвай шиирар, рубаияр кӏелзавайбуру хушдаказ кьабулзава
Заридин рикӏ алай жанр рубаияр, дерин фикир квай кьуд цӏарцӏин шиирар, я. Саиратан рубаияр "Куьредин ярар" кӏватӏалда гьатнава, "Рубаияр" тӏвар алай улубни акъатнава.
С. Агьмедпашаевади Каспийск шегьерда уьмуьрзава.

“МАРВАР”

Гьуьлуьн чиркер михьда кьакьан лепеди,
Руквар, кьалар цӏурурда къваз живеди…
Намусдал ви мукъаятвал тахьайтӏа,
Кьацӏурда вун кткай стӏал лекеди!
***
Пис гаф лугьуз, на кьулухъди элкъуьриз,
Япун перде жедач цӏийиз туькӏуьриз…
Уьмуьр кӏватӏ я краринни чӏаларин –
Ягъалмиш хьухь, рикӏерик экв куькӏуьриз.

***
Са таб квачиз рахай инсан къалур заз,
Нефсинин кӏвал ацӏай инсан къалур заз.
Эхиратда чахъ суд авач лугьурбур,
А хабар гваз хтай инсан къалур заз.
***
Кас авай туш ви вилик пад кьаз жедай,
Эй уьмуьр, вун са хупӏ яд я, хъваз жедай.
Тади ийин, дуьньядин нур хчӏализ,
Къведалди вахт, ам къах хьана къваз жедай!
***
Дуьня, види залум кьисас кьун я жал!?
Бязи рикӏер ви есирда тун я жал!?
Я тахьайтӏа, сад Керем, сад Эсли хьиз,
Цӏал вегьена, кьведни санал кун я жал!?
***
Им дуьнья я, вичик умуд кутаз тежедай,
Чкӏайтӏани, мад кӏалубда хутаз тежедай.
Ша, къецин югъ безетмишин гьунаррив жуван,
Уьмуьр - ганвай легьзе я чаз, мад кьаз тежедай...
***
Эй, фугъара, дерт кӏевириз алахъзава вун,
Циф хьиз, чкӏиз, рикӏелай ви алахьзава гум.
"Уьмуьрдин рагъ", вун, муркӏадин къаябдиз элкъвей,
Гатфарни гад хъфейла, куьз авагъзава вун?
***
Галачтӏани жуван кьулухъ са чӏехи арха,
Рехъ гудай туш за далудлай, зун я зи кавха.
Дагъви я зун, дамарра зи къекъвезва вацӏар,
Ватан патал герек чӏавуз чанни гуда за.
***
Хъсан тир, чаз дуьньядикай регъуь жедайтӏа,
Намуссузбур хъуьтӏе гьатна, рехи жедайтӏа...
Дуьня хуьзвай паклубурун уьмуьрдин рекьер,
Гатун къар хьиз, куьтягь тежез, яргъи жедайтӏа.
***
Чаз ганвайди чилел куьруь яшар я, инсан.
Амукьдайди чакай пака махар я, инсан.
Бедгьавая пуч тийин, ша, къизилдин кьит вахт,
Атӏа дуьнья чӏулав, къайи дагьар я, инсан.
***
Вуч гуьзел я! Гьамиша вун жегьил я, дуьня
Кӏанзавайди тамашдай ваз кьве вил я, дуьня.
сад билбил я ви бахчада, садни, есир хьиз,
Буькьуь яз рикӏ ви къузадик, сефил я, дуьня.
***
Чир хьухь, инсан, уьмуьр ганвач Эбеди яз чаз,
Вахт атала, хутахда чун чили, кьаз, чӏугваз.
Яшайишдин гуьзелвилик кутур жуван пай,
Регьимлу тӏвар и дуьньядал кан ятӏа ваз таз.
***
Хъуьтуьл меци цаварални акъудда инсан,
Хцӏи чӏавуз кӏвачерикни авудда инан.
Белки, цӏухъни авач жеди мецин къуватар,
Суьгьурда тваз, агудизни къакъудда инсан.

"АЛАМ" журнал
Sez Lezgin ädäbiyättän 1 tekst ukıdıgız.