Latin

Гьар ктаб са вакъиа я

Süzlärneñ gomumi sanı 307
Unikal süzlärneñ gomumi sanı 226
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Са береда чи тӏвар-ван авай шаир Лезги Нямета лагьанай: «Шаирар рекьидач.» Гьакӏни я. Хъсан шаирри чпин дуьнья дегишарайдалай кьулухъни абурун тӏварарни цӏарар мецел къведа. Лезги Няметни гьа ихьтин рикӏелай тефир къелемэгьлийрикай я.
И йикъара Бакудин «Азербайжан» чапханади адан «Хкягъай эсерар» тӏвар ганвай ктабдин ӏ жилд чап авун шаир рикӏелай ракъур тавунин лишан я. Ктабдин редактор Камран Аламви, ам туькӏуьрна сифте гаф кхьейди филологиядин илимрин кандидат, шаир Азиз Мирзебегов я. Вич сагъ амаз Лезги Няметан Бакуда «Дагълара» (1964), «Бембецӏ» (1966), «Зегьметдикай баядар» (1975), «Зи хиялар» (1984) тӏварар ганвай кьуд ктаб чап хьанай. Рагьметдиз фейидалай кьулухъ Магьачкъалада шаирдин «Шиирар» (1992) ктаб басма хьана.
Вичин уьмуьр халкьдин четин кьисмет кьезил авуниз, адан милли къанажагъ ва ватанпересвилин руьгь хкажуниз серф авур Лезги Нямет женгчи шаир тир. 1959-йисуз Кцӏар шегьерда чи машгьур шаир ва камалэгьли Забит Ризванов кьиле аваз арадал атай «Рикӏин гаф» эдебиятдин кӏватӏалдик кваз ада халкь паталди чӏугур кьван зегьметар садрани рикӏелай фидач. Девирдин залан шартӏаризни вичиз гузвай басрухриз килиг тавуна ада 1976-йисалай «Рикӏин гаф» кӏватӏалдиз регьбервал ганай. Са шумуд йисан къене кӏватӏалдиз цӏийи къуватар – жегьил шаирарни кхьирагар желбнай. Районда поэзиядин нянияр тухванай, лезги чӏал, эдебият, меденият теблигънай. Гьавиляй коммунист режимди вичиз басрухар ганай. Гьа и кар себеб яз начагъ хьайи шаирди 1986-йисан 9-январдиз вичин дуьнья дегишарнай.
Ктабда шаирдин алатай асирдин 50-80-йисара кхьенвай шиирар гьатнава. Ибур сиясатдин, сатирадин ва лирикадин чӏалар я. Шаирди хайи ватандиз, тӏебиатдиз, муьгьуьббатдиз, дустариз бахшнавай шиирар рикӏелай тефидайбур я. Ктабда гьатнавай «Дагълара» поэмади ва манияр патал кхьенвай шииррини кӏелдайбур чпихъ ялзава.
Лезги Нямета вичин 1971-йисуз къелемдиз къачур «Шаирар фад рекьида» шиирда кхьенай:

Шаирар фад рекьида.
Дагъ рекьидач. Ваъ.
Шаирар фад рекьида.
Рагъ рекъидач. Ваъ.
Шаирар фад рекьида,
Ваъ! Рекьидач шаирар.
Чилни, цавни рекъида,
Гьич садрани рекьидач
Эл паталди абуру кхьей
Даим дири шиирар!..

Гьакъикъатдани, Лезги Нямет хьтин чӏехи шаирар рекьидач. Абуру эл паталди кхьей шиирар гьамиша дири яз амукьда. Абурун чӏалари халкьдик руьгь кутада. Абурун шиирралди халкьди дамахда.

Самур газет
Sez Lezgin ädäbiyättän 1 tekst ukıdıgız.