Дидед чӏалан экв

  Кьве йис я Къебеле райондин Арзулла Регьимован тӏва­рунихъ галай Цӏийи Дызахлы хуьруьн юкьван мектебда и тӏвар алай мярекатар кьиле физ. Цӏинин мярекат Алина Бабаева, Тегьмине Камилова, Жале Эмирасланова, Эф­сане Хидирова ва Элназ Ашралиевади санал лагьай «Дидедин чӏал» манидалди ачухарна. С.Ке­ри­мо­вади вичин гафариз кхьей и маниди мярекатдиз халисан лезги руьгь гъа­на. Ахпа лезги чӏалан муаллим Ай­те­­кин Бабаевади шаир М.Меликмамедован «Зи бахтуниз акъатай чӏал» шиир кӏелна. Идалай гуьгъуьниз ада викторина кьиле тухун патал командайриз эверна. «Алпан» ва «Бубу» командайри чпин чкаяр кьуна. Аялри суалриз чӏехи шан­кьунивди жаваб гуз­­вай. Тургай Фер­залиеван, Нурай Ал­лагьвер­диевадин, Ху­раман Ягья­ева­дин, Сем­ра Аслано­вадин ва масабурун гафунал туькӏвей жа­ваб­ри вири гьейранарнай.
  
  
  Викторина кьилиз акъа­­­тайла аялри ши­­­ир­рал, манийрал илиг­на. Гуьлчин Же­лиловади Ш.Э. Му­радован «Накьв ши­рин я», Гуьлай Ал­лагь­вердиевади К.Келентерлидин «Лезгидин руьгь квадарнач за», Гуь­лай ва Айчин Аш­ралиевайри М.Меликмамедован «Ва­тан», Леман Манафова ва Ханум Регь­мановади С.Керимовадин «Лезги чӏал», Нурай Аллагьвердиевади ва Гуьл­нар Ашра­лиевади Э.Гуьла­лие­ван «Лезги чӏал» шиирар фасагьатвилелди кӏелна. Ламие Хасиевади, Жамале Мутал­либовади, Къумру Къе­­­дировади чи халкьдин манияр «Магьи Дилбер» ва «Перизада» рикӏ алаз лагьана мярекатдик верцӏи дад кутуна.
  Эхирда мектебдин директор Мир­земмед Мирзелиева, заведиш Навруз Бабаева, муаллимрикай Рамиз Регьи­мова, Феркъане Хасиевади, Ресмийе Ма­ме­довади, Рауф Бай­рамова ва ма­са­­буру мярекат арадал гъайи лезги чӏа­лан муаллим Айтекин Бабаевадиз ва хайи чӏалал рикӏ алай аялриз чпин разивал къалурна. Дидед чӏал кӏанарун, ам вини дережадив агакьарунин карда ихьтин мярекетрин роль чӏехиди тирди къейдна.
  
  АЙГУЬН ХИДИРОВА
  "Самур" газет