Оспантайдың ойыны

  Он жасар Оспантай компьютерде ойнағыш болып алды. Компьютер бағдарламасындағы түрлі ойындарды арнаға қосып, телміріп отырады.
  - Компьютерге көп тесіле берме, көзіңе зиян болады, - деп оған Айгүл анасы сан рет ескерткен болатын.
  - Қазір... Қызық... Міне, - деп ол ойнай береді, ойнай береді.
  - Ойнасаң денеңді, миыңды шынықтыратын ойындарды ойнамайсың ба? - деп Әбен әкесі қабағын түйіп, қапаланып жүр.
  - Компьютер де ойды шынықтырады ғой, - деп Оспантай қысық көзін жыпылықтатты.
  - Бұдан гөрі, доп теуіп жүгіріп ойнағаның жақсы болар еді, - деді Асан ағасы.
  - Ағатай, қоям ғой, - деп Оспантай мұрнын тартты.
  Күнде компьютерге көп тесіле бергендіктен, Оспантайдың көзінің көруі нашарлады.
  - Ертең дәрігерге барамыз, - деп әкесі жұмыстан қалып, әбігер болды.
  - Зиянды ойындарды мен ойнамаймын, - деп Зияда қарындасы Оспантай ағасын аяп, көзі жасаурап отыр.
  Оспантай «зиянды ойын да болады екен-ау» деп ойланып қалды.