Latin

Уԥры, сара сашәа - 4

Süzlärneñ gomumi sanı 2930
Unikal süzlärneñ gomumi sanı 1830
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Ҳгәы зфахьоу ажәала.
Изылашом амза ҭәымзар, –
Иаҵам ахаара,
Дзынаӡаӡом уи аҟынӡа,
Иҭахызаргь даара.
08.09.09

Агәалашәара...
Еишьҭагылан ахқәа ҭҟьон,
Игәынқьуан амшынгьы.
Ахысыбжьқәа шгац игон,
Адгьыл акәын агәы ԥжәон,
Иԥжәоит ахаҳә уршыргьы.

Алҩа халон, еиқәаҵәан,
Агәы кылжәан адгьыл.
Ҳажәлар иҳәон хыхь Анцәа:
«Ҳадгьыл иақәлаз ибӷа ԥҵәа,
Ҳуҳәоит, ҳиаша уадгыл!»
Ашьа илҵуан, сықәла дхәын,
Аӡә дыргон лабала.
Аӷа джьышуан, иҭахын,
Агәаӷ иман иҵәахны,
Нас иҭитон шьала.
Алҩа халон илакьуа,
Ҿеихак амам абџьар.
Иҵысуан адәқәа, ахәқәа,
Насгьы анацәа рыгәқәа,
Иахьа амш – сабшан.
Аха ага амца ахуп,
Ацәқәырԥ иамам ҭаха.
Иазҳәарыма ҳа ҳҿахәы,
Ашьха инаӡаз ахы...
Ибылуеит ацәаҳа...
Схәыцра аибашьрахь сагон,
Сара сгәы тәаӡомызт.
Ҳаҷкәынцәа ахысшьа рҵон,

Фырхацәан иҟанаҵон,
Шьҭа саргьы сшәаӡомызт.
06.09.09

Бара беиԤш...
Бара быччаԥшь лыман,
Бара быбла лхан.
Лыхәда шкәакәа ҵәыцан,
Лгәы разын, иԥхан.
Бара бқәыԥшра лыман,
Насгьы – ба быбжьы.
Лныҟәашьа хазынан,
Лашҭаҿ есшьыжьы.
Бара бсахьа лыман,
Бара беиԥш дыԥшӡан.
Аеҵәақәа дрылан,
Лажәақәа раӡан.
Бара быџьымшь лыман,
Аџьымшь, амзаҿа.
Ба бышәҭыцны бгылан,
Бкәицны уа баҿан.
Бара былахь лыман,

Нас – бара быхцәы.
Ҷкәынак лаԥхьа дгылан,
Длеиҽырбон ҽаӡәы.
Иҟалеи, ба быда,
Дзыҟамлаз лара,
Сеидру, ашәҭыц сыҭан,
Уи днагылт хара!
Сеидру шьҭа исԥеиԥшу,
Сеидру сахьаго...
Аԥшӡақәа зегь беиԥшуп,
Шәсахьагь – сахьак ауп.
29.08.09

Ашәҭқәа рҵыхәан...
Аҵла иқәлаз дылбаауеит,
Адәы иқәлаз дықәҵуеит.
Ахьы зцәыӡыз иԥшаауеит...
Сара аума схыҵуеит.
Ашәҭқәа рҵыхәан сқәыԥшра збоит,
Сгәакәын уахь исыхоит.
Сымра ацыԥхьқәа аԥоит,
Аха са исыԥсыхәои?

Алашьцараҿ сгәы ҷаԥшьоит,
Уа цәашьыкгьы гылап.
Ирҳәап усҟан: «иԥсы ишьоит,
Дыҟан Анцәа ила»..
Ҩыза-ԥызала сыхиан,
Исыман агьама.
Илуан сымаҵ «Анцәа иан», –
Дқәыԥшын уи макьана.
Ахра схалон сара зны,
Скыдланы напхыцла.
Арҩаш салыргон сыԥсны,
Салашәар, ианхыҵлак.
Тәаха сымамызт џьара,
Са сбылуан аҿҿаҳәа.
Сыԥсҭазаара – уи қәԥаран,
Сажәлон уи саҿаҳар.
Зынгьы сгәырӷьон, зны схәаҽын,
Сшәеиԥшын зегь акала.
Аха гәыла – са схәыҷын, –
Даҽакызаргь ԥшрала...
Аҵла иқәлаз дылбаауеит,
Адәы иқәлаз дықәҵуеит.

Ахьы зцәыӡыз иԥшаауеит...
Сара аума схыҵуеит.
12.02.07

Зны...
Ашьыжь сбаҳча са сынҭалап,
Шәҭык бызҿысхып сара зны.
Насгьы бымҩа кны сантәалап,
Сыԥшып уаҟа сыҽӡаны.
Нас ибасҳәап агәра гага,
Исҳәап ажәақәа иԥшӡоу.
Харантә инаԥшуа дархагап,
Дгьыли жәҩани сахьрыбжьоу.
Иԥхап сымза, сымза ҽага,
Ацыԥхь акаҭақәа рҳап.
Са сымшынхан сықәлап ага,
Ашьха сажәлан сыцәқәырԥап.
Зных аӡәы аҵәы сахеиҵап,
Дсыҵашьыцлап даҽаӡәы.
Ех, аҵәылаҵара ҽеиӡам, –
Гәнаҳак уи дагоит уаҵәы!
Сахьцалакгьы быҟаз, бсыцыз,
Шьыбжьы, ахәылԥаз, шьыжьы.

Зынгьы бџьархан сылахь бкыдыз.
Зынгьы сакәыз ба бышәшьы.
Са слабжышыз, бара бкәицыз,
Уаҟа баҭәҳәан исзырба.
Нас аҵәуара иаҟәыҵыз,
Хаҵак сакәызшәа сҽырбап.
Зныхгьы быбла ихылаз ҭәыцыз,
Зынгьы сҵысыз, зны сгәырҩаз.
Бара бзын сбырфын рахәыцыз,
Са соуп ааԥынра иарҩаз.
Зынгьы, сгәыраз, сышәҭыц быдкыл,
Са сыхчнызыз ба бхаҿы.
Ҽазны амца скыртәы сгәыдкыл,
Нас быхцәала наҟ схәаҽы!
01.12.09

Аҿар рашәа *
Аҿар иҳамоуп ахьӡ-аԥша,
Ҳажәлар ҳацуп есымша.
Шәаԥхьа ҳгылан
*Ари ажәеинраала иалхны ашәа лҩит ашәаҳәаҩ, акомпозитор Лиудмила Логәуа 1959 шықәсазы.
Иахьа акьыԥхь зымбац ари аҩымҭа ажәақәа аамҭа иақәшәартә
еиҭаскит.

Ажәа шәаҳҭоит,
Шәа шәус ҳшаҵамхо ҳара!
Ажәҩан ҳамҭоуп,
Адгьыл ҳамҭоуп,
Амҩа ссируп ҳа ҳҿара.
Зны, ианшәарҭаха Аԥсны,
Уи ҳазықәԥеит ҳабџьар кны.
Уи иахылҵыз
Афырхацәа,
Ҳашәа иалоуп есымша!
Аԥсуа ҷкәынцәа,
Ахьырҵәаҵәа,
Аԥсуа ӡӷабцәа – анцәахша!
Ашәҭ иатәылоуп шьҭа Аԥсны,
Ашәа ҩныҩуеит ҳа ҳаҩны.
Ан агараҿ,
Шьыжь ашараз,
Афырхацәа рашәа лҳәоит.
Ари ашәа,
Ари ажәа,
Ҳадгьыл шьацла иқәнаҵоит.
Азҵаара
– Исаҳә узыргәырӷьо, –
Дсазҵаауеит аӡәы.

– Ашәҭқәа сдыргәырӷьоит! –
Исҭеит аҭак.
– Ашәҭқәа ԥшӡазаргь,
Уаҵәынӡоуп, уаҵәы,
Нас, убри ашьҭахь
Иссирым усҟак.
– Уаҳа узеигәырӷьои? –
Дсазҵааит иара.
– Сӡыхьқәа сдыргәырӷьоит
Исгәакьоуп, ицқьоуп!
– Аӡыхьқәа закәыхи? –
Инҵәом изҵаара. –
Иҟәнушьо аӡыхьқәа
Ҳалалуп, иԥшьоуп!
– Уаҳа узеигәырӷьои,
Зҵаара ԥхашьарам,
– Исымоуп ахшара,
Нцәа хшароуп дара!
Аԥсадгьыл азыҳәан
Урҭ цеит еибашьра,
Сыҷкәынцәа ршьала
Еиқәхеит Аԥсынра!
– Сыԥсымзар, сықәла,
Узеигәырӷьо рацәоуп,
Иҵегь уи еиԥшу
Ак ыҟазшәа збоит!
– Сыжәҩан кеикеиуа
Еҵәала иқәҵоуп,

Исылоуп урҭ рымыч,
Урҭ рыла сҽырбоит.
– Ашәҭ удыргәырӷьеит,
Уӡыхьқәа хәашьым,
Иумоуп ахшара
Аԥсны еиқәзырхаз,
Улымҳаҿ иҭаҩуеит
Еҵәаџьаа рыбжьы,
Уаҳа узыргәырӷьои,
Иарбан инхаз?
– Урҭ зегь ирҷыдан,
Инхеит са сбызшәа,
Ухаҵоуп, ицәырга,
Еицаҳҳәап ашәак!
04.12.09

Аеҵәақәа рылыԤхала...
Иарбан еиӷьу амра ԥхозар,
Амра цқьоуп, ихагоу ҽым.
Ба бгәаҿы сара сынхозар,
Сбыҳәоит, сыҟаз бара бҿы.
Усҟан ацыԥхь сахьынҳалан,
Ажәҩан аҵанӡа снаӡап.
Аеҵәақәа рылыԥхала,
Адгьылаҿ аԥхашьа сҵап.

Адгьыл ауп изцу аԥхара,
Амырхәагагьы зҭаху.
Бара, сымыш, сылашара,
Уи абаҳчаҿы бҵәахуп.
ԥхыӡла сбыцуп, сбыцуп, сбыцуп,
Сгәаҟуеит, сҵәуоит зны стәаны.
Сиаҵә-рыцуп, сышьха-кыцуп,
Са бысхаршәуп ба бкасны.
Иарбан еиӷьу амра ԥхозар,
Ашәа бҳәозар бгәырӷьаҵәа!
Аха, сымыш, сыбгәаԥхазар,
Усҟан дбыцхраауеит Анцәа.
Ажәҩан иаҵоу амра ԥхозар,
Ашәа бҳәозар бгәырӷьаҵәа.
Бигәаԥхозар, дыбгәаԥхозар, –
Мапқәа хҭабымкын рацәак.
06.12.09

Сымыш, бқәыԤшуп...
Сымыш, бқәыԥшуп, ба быԥшӡоуп,
Ба – бнаӡоуп, бара – бааӡоуп.
Бымра ҟәандоуп, бымҩа қәҵоуп,
Сымыш, бқәыԥшуп, ба быԥшӡоуп.

Бкофҭа шкәакәаҿ сыгәлаҵоуп,
Былаԥш сыҵашәом, смаӡоуп.
Са сцәашьуп, бара бымцоуп,
Сымыш, бқәыԥшуп, ба быԥшӡоуп.
Сымыш, бқәыԥшуп, ба быԥшӡоуп,
Ба – храӡагала браӡоуп.
Ашәҭқәа срыжәлоуп, са слаҵоуп,
Уи аныласҵаз иацоуп.
Сымыш, сықәла, ба быԥшӡоуп,
Са сыдгьылтәуп, ба бымзоуп.
Сара сылахь ус ианҵоуп, –
Сара – сеидру... Ба быԥшӡоуп.
Сымыш, сгәыӷра, ба быԥшӡоуп,
Аха сышҟа ба бнаԥшӡом.
Са сцалап, абас сышцо...
Сымыш, сгәыӷра, ба быԥшӡоуп.
18.12.09

Уареи сареи...
Уареи сареи ҳаиҿаԥшуеит, аԥсра,
Уара уахьыҟоу ашәҭқәагьы ҿшәоит.
Аха уи аӡбахә са сҟны аҳәара,
Иухьыз сыздырам, маҷӡак уацәшәоит.

Аха издыруеит, иузымҳәар иахьа,
Уи аӡбахә соуҳәоит иахьымӡар уаҵәы.
Ирхаан исоуҳәоит, угәаҵа ҭыӷьӷьа,
Снацәа иқәыскран сыҟам ҽаӡәы.
Иҿыцу ак акәны иҟам аԥсра,
Ҽнактәи мрами, уи аԥсрагьы.
Аха исыздырам уара ухаҿра,
Сара исыздырам уа уԥшрагьы.
Ушԥаҟоу, узҿузеи, мшәан абжьааԥны,
Узҿызыз сышҟа уандәықәлоз уара,
Са сышҟа уандәықәлоз – усҟан ааԥнын,
Иахьакәын, – еимаҳан иаҿуп асоура.
Ианбыкәу уи ажәа уҳәарц уанаҿу,
Ианбыкәу ҳандәықәло, нас, ҽаџьара?..
Ирыцҳауп инсыжьуа, лабжышла ихәаҽуп,
Урҭ рылабжышқәа цәгьоуп агара.
Мшәан, узеиԥшроузеи, иуҳәаруеи, аԥсра,
Аблақә ухоума, мамзаргь иҵәаху?
Абыз узҭоума, ихааума иара? –
Аиашаз, цқьа ҳаибадырыр сҭахуп.
Сара сышықәсқәа цеит, ирацәоуп.
Ацәгьагь абзиагь еицын есқьынгьы.

Аха сызуҳәо, сызуҳәо акоуп:
Инырҵуаз са сеиҳа аԥсуаа зегьы.
24.12.09

Аха сеидру уи иахырҳәааз...
Ашәа сҳәеит, иҳәа анырҳәа,
Са скәашеит, уԥры анырҳәа.
Амаҵ зуит, иуы анырҳәа, –
Аха сеидру уи иахырҳәааз.
Ашәҭқәа хысхит, ус анырҳәа,
Сӡыхьгьы збеит, иба анырҳәа.
Ҩызак дсоуит, дуоу анырҳәа,
Аха сеидру уи иахырҳәааз.
Смал касыжьт, икьажь анырҳәа,
Хьҭак сычҳаит, ичҳа анырҳәа.
Сӡы сымжәит, уаҟәыҵ анырҳәа,
Аха сеидру уи иахырҳәааз.
Са сықәԥеит, уқәԥа анырҳәа,
Сшьа каҭәеит, иахәҭоуп анырҳәа.
Са сыблит, ублы анырҳәа,
Аха сеидру уи иахырҳәааз.
Ԥҳәызбак схылхит, акыр-кырҳәа
Дыччон, ашәҭыц еиԥш деинаалан.

Аха уи улҟәаҵ анырҳәа,
Сныҟәеит, знызаҵәык са стәала.
29.12.09

Ҽаанбзиала, ҽааны!..
Ҽаанбзиала, агәы ҭынчуп Аԥсынра!
Аԥҭа хыҵит, амра цәырҵит, ҳӡыхьқәа цқьоуп.
Ахра шкәакәа,
Ашьха ӡышқәа збоит сара,
Ҳара – амца иалаӡрыжәу ҳарԥацәоуп.
Ҽаанбзиала, ҽаанбзиала, ҽааны, –
Ари адгьыл сара сықәызҵаз сшаны!
Ашәа ссирқәа
Сашҭа иҭыҩуаз есшьыжьы,
Аҳра амаз
Уаҟа ҳҵеицәа рхәыҷыбжьы!
Ҳара аибашьраҿ иԥышәоу ҳарԥацәоуп,
Убри ами аӷа иаҳамҭеит Аԥсны.
Ҳара ҳныхоуп, ӡиа-ԥҽыхоуп, ҳа ҳшацәоуп.
Дцеит ҳазхылҵыз ҳашҭаҿ ашәҭқәа ҭаԥсаны.
Ҽаанбзиала, ҽаанбзиала, ҽааны, –
Ари адгьыл сара сықәызҵаз сшаны!
Ашәа ссирқәа

Сашҭа иҭыҩуаз есшьыжьы,
Аҳра амаз
Уаҟа ҳҵеицәа рхәыҷы-бжьы!
О, ардәына, уаҟа ашәчаҿ уҿықә-ҿықә,
Адгьыл аԥшәма, уаха иуԥхьоит аҳаԥшьа!
Икьыркьыруеит зхы иақәиҭу иахьа ҽык,
Дгылан дныҳәоит шәкы ирҭысыз са сашьа.
Ҽаанбзиала, ҽаанбзиала ҽааны, –
Ари адгьыл сара сықәызҵаз сшаны!
Ашәа ссирқәа
Сашҭа иҭыҩуаз есшьыжьы,
Аҳра амаз
Уаҟа ҳҵеицәа рхәыҷы-бжьы!
31.12.09

Сара сҵәуон, уа уччон...
Сцеит ҳәа соуҳәан, –
Умцаӡеит,
Ашә аҟынӡа унаӡеит.
Са, сыԥсымзар,
Нас уцеит,
Сара ишызбоз илашьцеит.
Уа цәашьык аԥсы ашьон,
Сара сҵәуон, уа уччон.

Саргьы ашәқәа
Рышҟа сцеит,
Сцеит абаҟоу, са сҳәазеит.
Снапқәа кьаҿхеит,
Инамӡеит,
Уаҳа сылымшеит, уцеит.
Сара сгәыӷрақәа сыржьон,
Сара сҵәуон, уа уччон.
Уара уцозаргь
Умцаӡеит,
Аха уаҳа усымбаӡеит.
Сгәы уцәшәан,
Аԥсы аӡеит,
Са сзаҵәны анхашьа сҵеит.
Сгәаҵа тәомызт, еиҟәыҷҷон,
Сара сҵәуон, уа уччон.
Уа уччон,
Умыччаӡеит,
Убла збон, исымбаӡеит.
Ажәа ҟәанда
Умҳәаӡеит,
Аҵхи-шареи сырҭаӡеит.
Хыхьынтә аеҵәа сдырџьон,
Сара сҵәуон, уа уччон.

Ашәҭқәа укын –
Исымбаӡеит,
Урҭ, сыԥсымзар, иканӡеит.
Ари аҵых
Рыцҳагь цеит,
Саргьы срыцҳан
Сҟанаҵеит.
Схышәаҿ угага ҷаԥшьон,
Сара сҵәуон, уа уччон.
02.01.10

Изышәымҳәозеи аԤсшәа?
Аԥсшәа зымҳәо рахь

Изышәымҳәозеи аԥсшәа,
Ашҭаҿ ма ачараҿ,
Уи, ҳанацәа рашәа,
Ҳԥацха аҿаԥараҿ.
Изышәымҳәозеи аԥсшәа,
Уи шәацәыԥхашьоума?
Арыцҳара иақәшәаз
Бызшәас иԥхьаӡоума?
Уи ҟамларц азыҳәа,
Кәыдры иавацалан.

Ҳабацәа ирҿырхуан,
Аԥсшәа шәақь мцала.
Ашәҭгьы ахьӡ ахырхуан,
Уи рыԥшьон ҽакала.
Ҳагагагь анырхуан,
Аҭӡаҿы иахьалаз.
Аԥсшәа ӷас ирыман,
Уи цҳауан оумала.
Аха уи маакыран,
Аԥсуа дахьынҳалан.
Аԥсшәа ҳәо иаҿалон,
Арԥарцәа ахымҩас.
Урҭ шьаҿа-шьаҿала,
Уи ҟарҵон аԥшәымас.
Мшәан, иахарои аԥсшәа,
Уи ҳзааӡаз ашәами?
Амреи ашәҭи рашәа,
Ҳаԥсадгьыли ҳани.
Ишәҳәала уи ныхоуп,
Жәҩануп изыԥшьазгьы!
Ԥсышәалоуп дышныҳәо,
Зны ҳара ҳазшазгьы!
17.01.10

***
Еицәыхароуп амзеи амреи,
Агеи ашьхеи кыр рыбжьоуп,
Агәыразреи аҳарамреи –
Нырцәи аарцәи реиԥш ишоуп.
Еицәыхароуп амци иашеи
Адгьыл-ажәҩан – кыр рыбжьоуп,
Еицәыхароуп ахааи ашеи,
Урҭ рыбжьара ашәҭқәа ԥшьоуп.
Арҩаш хыҵит, иамам ҿеихак, –
Сӡыхь иацәыхароуп иара...
Аха, сымыш, урҭ зегь реиҳа
Ҳаицәы-хара-хеит ҳара.
18.01.10

Дырмит
Дтәоуп Дырмит уа ижәҩа кыдҵан,
Исқам-ашыш аҿы дтәоуп.
Дтәоуп уарҳалк ишьамхы иқәҵан –
Иага хьҭазаргьы дыԥхоуп.
Дтәоуп ҳпоет, ахаҳәса иалху,
Маҷк дааԥсазаргьы ҟалап.

Ишьҭахь аԥса ԥшаласк иархәоит,
Амра иалшьуп икалам.
Амра иалшьуп, ус анакәха,
Ажәҩан қьаад ашәак ануп.
Амза цәырҵит маҷӡак иагхан,
Аеҵәақәа ргәы рҽануп.
Амҩа арҭеит ашла иажәа,
Гәарԥк абжьара ныжьны ицеит.
Уи ашоураз – ҳауа хьшәашәан,
Сыкәа ԥхаррак ҭанаҵеит.
Уи ахысит ага, ашьха,
Храк иаҿысит иԥырны.
Арха зтәу иҽыхәа рашьха,
Уи агоит ихараны.
О, уи акәхеит, ижәҩа кыдҵан,
Дтәоуп Дырмит иҩыга кны.
Бзынҵы ицәаӡом уи имца,
Иагаҩ аҭәҳәаргьы иааны.
Иаԥхьа-ишьҭахь – уа кашыроуп, –
Ашәҭқәа рами аҳра зуа.
Ииуа дрыциуеит, идыруп,
Аха дрыцыԥсӡом иԥсуа.

Уи даҳҵасуп, уи даҳқьабзуп,
Ҳчара дагхаӡом иара.
Уи ҳгәырҩа, ҳагәҭыха дабзуп,
Дырмит дашәоуп Аԥсынра.
21.01.10

Ажәҵыс
Сахәаԥшуеит ажәҵыс, уи саҵашьыцны, –
Ажәҩан иахьалаз аҳра ауан.
Уи ахақәиҭра иарԥыруаз ҵысын,
Ихалон, иҭалон, ҭынч иԥыруан.
Ажәҩан – аиарҭа иалахан ицәоуп,
Уи ахақәиҭроуп ԥсысгьы иахоу...
Аха уи иамоу ахақәиҭра заҵәыкоуп,
Сара ахақәиҭра мацара сызхом.
07.11.10

Смаҭа
Смаҭа, сара смаҭа,
Кәармак сара сшьа.
Сара сеиԥш дызмада,
Ашәҭыц, Анцәахша?

Дықәыршәуп са сыжәҩа,
Дрыцҳасшьоит, дхәыҷуп.
Сгәы ҟазҵаша ԥсышәак
Аҳәара даҿуп.
Са сыччоит даныччо, –
Лылабжыш сашьуеит.
Мра шәахәала иҩычоу,
Лыкьанџьа сшьышьуеит.
Инҵәаӡом лызҵаара, –
Имариам аҭак.
Сақәымшәаргьы даара,
Дсазҵааӡом еиҭа.
Ҳнеиуан, ҷкәынгьы ӡӷабгьы,
Лаҳахәаԥшуан зны.
Дныҟәызгалон лабгьы
Сыжәҩаҿ дыртәаны.
Нас изба – изаҳада,
Схьаԥшызар снаԥшны.
Сыжәҩа иқәтәаз смаҭа,
Дгылан дҭыԥҳаны.
Дылзыԥшын аныха,
Арԥыс ҳәа алакә...

Иацылҵеит сыгәҭыха, –
Сџьаршьон сызбалак.
Сахәаҽуан, исыжәлан,
Хәыцрак уи аҽны...
Са сыԥсымзар сыжәҩа,
Ҟалом иҭацәны.
07.11.10

Аҟәатәи авокзал
Еилыхаран Аҟәа авокзалаҿ, –
Аӡә ҽаӡәы дицәӷьычуан, аӡә дҳәаҩын.
Аӡә азалаҿ дықәиан, ацәа далан,
Дкарахазар акәхап, дынхаҩын.
Аӡы хьшәашәа рывакны, аҵәыцак,
Абазк-абазк ҳәа ҷкәынцәак ирҭиуан.
Шоурак ыҵан аҳәсақәа рлакыҵа,
Урҭ адәыӷба гәыраз иазыԥшуан.
Нас аҽырхәан, ҭынч аҭшәара иавҵны,
Уи адәыӷба ааилон еиқәышьшьы.
Уа иааҭгылон, маҷӡак игәамҵ-хамҵны, –
Ицахьазшәа иҟан уи абжьы.
Илбаауан адәыӷба аҳәынҭқарцәа,
Шах ишахцәа, аҳцәа, аҭҟәацәа.

Аҩсҭаацәа, аџьныш, амақарцәа...
Авокзалқәа ус ишеит Анцәа.
Ашәҭ уҳәеит ҳәа, ашәҭқәа шьыри ҭали,
Авокзалаҿ хацәхәыц ирацәан.
Адәыӷба дҭыҵхьан уи аҩыза Сталин, –
Аха имагәқәа даара еиқәаҵәан.
Адәыӷба дҭыҵхьан уи ашлиапа ҟьаҟьа,
Имҵахырхәоз гылан еизаны.
Адәыӷба дҭыҵхьан уаҟа абла саркьа, –
Авокзалаҿ зегьы ргәы рҽанын.
Адәыӷба иҭыҵуан аиаҵәахә зызкыдыз,
Аибашьраҿ ахымҩас иацәынхаз,
Аха саб зынӡаск игәхьаа зкыдаз,
Дышҭахазгьы насоуп иансаҳаз.
Адәыӷба иҭыҵуан аразгьы аҟәышгьы,
Ҷкәынгьы ӡӷабгьы, изымбац Аԥсны.
Аха Дмитри диқәымшәацызт Пушкин,
Авокзалаҿ илабҷашь хәыҷ кны.
Зны лашаран, зны аԥшалас асуан,
Авокзалаҿ зны ихәлон, ишон...
Абжьааԥны иԥсадгьыл азын аԥсуа,
Хәышҭаароушәа авокзал ихьчон.

Авокзалаҿ дазыԥшын аиаша,
Дазыԥшын, аиаша есыҽны.
Нас даԥылеит уи агәырӷьаҿҳәаша;
Иацы анаҟә иаҵаҵит Аԥсны.
27.08.08

Идыруан...
Идыруан ҳазнысыз,
идыруан ҿырҳәала,
Ҳшыҟоу, ҳахьыҟоу
идыруан иара.
Зегьы дырбарцаз
дныҟәон ахәала,
Уи аҵаҟала
ҳныҟәон ҳара.
Идыруан аеҵә
анкыдшәоз, ианыхәло,
Аҩсҭаа, аџьныш
змоу иҵәахны.
Иԥҳәысгьы сақәҵас
иаҵых алыхәда,
Уи уҳәан-сҳәанқәа
илҭон ихәны.
Идыруан ахацәа
зыцныҟәоз, изцышьҭаз,
Нас аҵырҭыша
змырхыз, изгаз...

Иамырхуаз, иарҭоз...
иара зегьы шишьҭаз,
Апап дугозаргь...
ҽаӡәызаап дызԥаз.
Хаҵа дыргама
ӡӷаб хәыҷык дҳәамкәа,
Гәыԥҳәыда драаӡама
уаҩ дуӡӡак иԥҳа...
Идырыр, еизигар
уи уҳәан-сҳәанқәа,
Усҟан мыч ҷыдак
иауан иаҳа.
Идыруеит, имаҷзаргь
агага ашьҭа,
Дхыланы днеиуеит
оумак ихарам...
Са сшыҳараркуаз
даҽа мызкашьҭахь
Мызкаԥхьа аҷҷаҳәа
идыруан иара.
14.10.10

Аеҵәақәа ус рҳәеит...
Аеҵәақәа ус рҳәеит:
Амҩа уқәымлан иахьа.

Аҩсҭаа иаци иахьеи,
Уи данылазаап ҩаԥхьа.
Амза еицарса ус аҳәеит;
Иахьа уҭамлароуп аӡы.
Уи иахак ихьанҭахеит,
Уи ласызаарын иацы.
Амра ацыԥхьқәа ирҳәеит:
Маҷк иаҳцәыхьча иахьа ухы.
Ажәҩан аҵаҿ ҳамцахеит, –
Гәнаҳак ҳаҵалар ҳҭахым.
Шарԥиаҵәа ус аҳәеит:
Иахьа иацуп, џьым, ахьы.
Аха уашьҭалар – уагеит,
Умҩа кьаҿуп уаҵәахьы.
Хәылԥиаҵәа ус аҳәеит:
Иахьа аԥшӡа дузыԥшуп.
Аҵх ашәҭқәа аҭынхеит,
Акәиц еиԥшуп, иҟаԥшьуп...
Амҩа сықәымлеит сара,
Аӡы сҭамлаӡеит џьара...
Ашәҭқәа срышьҭалан избеит:
Аеҵәақәа рыгәра згеит.
04.03.10

Уанцалакгьы...
Ашәа рзуҳәон ахәра знылаз,
Ргәы ҟауҵон ахьаа змаз.
Ажәҩан иалшәаз ацыԥхь улан,
Дуҭахын Анцәа ҳазшаз.
Аӡы руҭон нас иӡышуаз,
Ашьха амҵан иԥшааны.
Иурӡыҭуан имӡыҭышаз,
Нас уџьарны ҳгәы уанын.
Днаухәаԥшыр аԥшқа игараҿ,
Ачча нықәлон ихы-иҿы.
Урҭахын урбар ачараҿ,
Уҟан ужәлар ду ргәаҿы.
Аха зны инҵәоит алакәгьы,
Зны ихьшәашәоит, зны иԥхаз...
Аха, суҳәоит, уанцалакгьы,
Уанцалакгьы ус унха!
07.03.10

Иҟалаша ҟазҵаз
Ҳӡыхьқәа хәашьымзи, –
ирыцқьеит иара,

Амҩақәа риҭеит
арҩаш, аӡы.
Ажәҩан дагәылҵит...
иаҿуп аҳәара, –
Адгьылгьы даԥшәман
дгылеит иацы.
Ҳшәырқәа неихаҳан
еиҵихит, ишәҭит,
Ацәа ду иалаз
ирҿыхеит жәлара.
Ирхынҳәит аԥсуа
иҭеҭи иԥшшәи,
Иашәақәа, иажәа,
нас иаҳҭынра.
Иаҿуп уи ауаҩ
ас ирҽхәара,
Ҳазхылҵыз дабаҟоу, –
Иҟоу иа иоуп.
Иҵәуон, игәаҟуан,
иԥсуан Аԥсынра,
Аха еиқәхазар, –
уи ибзоуроуп.
Иац ашьыжь иҳамаз –
ҟазҵаз иара иоуп.
Иахьа ашьыжь иҳамоу...
Ицәгьоуп аҳәара,
Иҟоу-ину зегь
уи ибзоуроуп,

О, иҟалашагь
ҟаиҵазаап иара.
12.13.10

Ашьыцра
Уи даагылазаргьы дшьыцҩын,
Дшьыцҩын ашҭаҿ, адәахьы.
Диҵашьыцуан уи ахәыцҩы,
Ма зыҩны иҩназ ахьы.
Даҵашьыцуан ашәҭ абаҳчаҿ, –
Уи дышәҭызар иҭахын.
Аха диҵашьыцуам ахьча,
Избан акәзар – дыхьчаҩын.
Диҵашьыцуан араз, аԥшӡа,
Бзиа ирбаз ма дызбаз.
Са сибаргьы аҵла амҵан, –
Диҵашьыцуан уа сзыртәаз.
Даҵашьыцуан амра шаша,
Дрыҵашьыцуан зны дызцыз.
Дрыҵашьыцуан нас аиаша,
Аҳра аҳҭап ҳәа иаҿыз.
Иқәлацәа ҳәа арԥар шьахәқәа,

Ақәра руҭарым зынӡа.
Шьабысҭоушәа ихалоит ашьха,
Рцәаҩа иалаӡам маӡак.
Урҭ анибо дрыҵашьыцны,
Даҿын, рыцҳа, аҩара...
Аҵашьыцрагь џьара – ишыӡуп,
Ашыӡ иацуп, џьым, агра.
Нас иқәыԥшра ыӡт ишыӡра,
Дкыҷны дкаршәуп уажә аҩны...
Баша иҟамзаап ашьыцра,
Даражәуазаап ауаҩы!
13.03.10

Ба быԤшӡоуп, быссируп...
Ба быԥшӡоуп, быссируп сҳәазар, –
Ибмаҳазшәа ҟабымҵан,
Ибмаҳазшәа ҟабымҵан,
Ибаҳазар – ибымӡан.
Ба бышәҭуп, бышәҭыцуп сҳәазар,
Идыр, амыц сымҳәаӡеит,
Идыр амыц сымҳәаӡеит, –
Сгәаҿы ашәҭыц аҽаӡеит.

Ба бымроуп, бшәахәацуп сҳәазар, –
Сгәы шәахәала икәабоуп,
Сгәы шәахәала икәабоуп, –
Уи ацәымза бара боуп.
Ба быԥшӡоуп, быссируп сҳәазар, –
Сгәаҿы алабжыш ҭышәшәоит,
Изаҳазгьы ргәы ԥыжәжәоит,
Аҳәатәхамҵа рҳәар ҳәа сшәоит.
14.03.10

Абаҟа
Зны ҳара ҳқыҭаҿ иазгәарҭеит баҟак,
Ҳҵеицәа, ҳаибашьцәа рзыҳәа.
Мшәан, изыргәамҵи ҳқыҭа асҟак, –
Иааиуан аиааира аныҳәа!
Еидарак карыжьуан зны иааганы,
Еиҩыхны еиқәырҵон ахаҳәса...
Дгылан ахаҵа абџьар иркны,
Ажәҩан иашьапкуан аҳәса.
Иакәшон, ишьҭырхуан... Игәаҟи заҟа,
Ашьа кылҵәыруа рԥынҵа!
Аха ирзышьҭымхт уи абаҟа,
Урҭ рыԥсҭазаара аҟынӡа.
03.04.10

Сгәы сыхьуеит...
Сгәы сыхьуеит, исыхьуеит, исыхь,
Рыҭәак иаҿаршәуп уи рыхханы.
Абар ахәхәаҳәа иахьыҵыҵуа сӡыхь,
Аха иҵыҵуеит сгәыхь аханы.
Сгәы сыхьуеит, исыхьуеит, исыхь,
Кәицуп изҩызоу, ицоит ибылны.
Дсымам сзықәгәыӷуа, исҟәызго ахыхь,
Аԥҭақәагь кыдуп хыхь рыҽӡаны.
Сгәы сыхьуеит, ирдыруеит, ирдыруеит зегьы,
Аҵысгьы иадыруеит, ажәҩан иазцаз.
Ашәҭгьы иадыруеит, арҩаш, аӡгьы,
Аԥшқагь идыруеит, аныҟәашьа зҵаз.
Адгьыл сахьықәу, иҟоуп, избоит,
Ашҳам, ақәыцқәа, аха ҽакгьы:
Сашҭаҿ са сымра уарҳал ԥшӡак аԥоит,
Уи даҵагылоуп са сынцәагьы.
09.04.10

***
Уи ардәына ашәа ссирын,
Уи ардәына ашәа хаан.

Саԥхьа ицоз аӡышьҭа сырын,
Саргьы уи сыхнахны стәан.
Ашәаҿ иҟан ашәҭқәа раҳра,
Ашәаҿ иҟан аҿара.
Хьыла икәабаз џьысшьон ахра,
Аеҵәақәа ччон џьара...
Усҟан аблақәа цырцыруа,
Иаҩаӡозаап ахьшьыцба.
Сара хьаак саруазыруан:
"Маҷк абзиара сырба!"
Нас мацәысҵас ҵлак иналшәан,
Ахьшь уи ашәа иахаԥеит.
Арҵәаа ҭгеит. Иаҟәыҵит ашәа,
Иаман ажәҩан ахь ицеит.
Сшазыԥшуаз, иагеит аргама, –
Акгьы сылымшеит саргьы...
Ашәа акәын ԥсыс уи иамаз,
Уи иахаран аԥсрагьы.
26.05.10

***
Ԥхыӡла алашара сыгхеит,
Сыкәша-мыкәша зегь лашьцеит.

Ари ашҭа схала сықәхеит,
Махәык сахеит, даҽак ԥҵәеит.
Иҟалома ажәҩан мрада,
Шәада ажәҵысгьы заҵәуп.
Уи ҷырҷыруам ааԥынрада,
Адгьыл акәын иҭацәуп.
Иҟалома сбаҳча шәҭыда,
Быбла ссирқәа уи иахан.
Лабжышума, мшәан, изтәыда,
Сара сзырбааӡо уаха.
Ԥхыӡла, сымыш, наҟ бысцәыӡит,
Быҵкы шкәакәагь еиқәаҵәоуп.
Сбышьҭоуп алашьцара сгәыҵак,
Иҟам алашәра еицәоу.
Сахьынаԥшлак зегь еиқәароуп,
Ашьха, архақәа, аӡы...
Слабҷашь хәыҷы кыдҟьо сгәароуп,
Ах, ишԥалашаз иацы!
Сгәаҟуеит ԥхыӡла, ԥхыӡла срыцҳауп,
Исызҭыгаӡом сыбжьы.
Сзықәлаӡом икнаҳау сыцҳа,
Макьанагь избом шьыжьы.

Алашьцара сҭоуп суазыруа,
Алашьцараҿы сҭакуп...
Сыԥхыӡ усҟан иснардыруан,
Алашараҵәҟьа закәу!
31.05.10

***
Ажәҩан, идыруп, ирыԥхуп иаҵәала,
Урҭ астрологцәа рыблақәа рхуп.
Ҳрыҵаԥшуа ҳгылоуп ашҭаҿ ҭаацәала, –
Иҿыцу ажәабжьқәак ҳарҳәар ҳҭахуп.
Аџьмақәа ртәыҩа имоуп аӡә дыргас,
О, ус анакәха, иус ԥхьаҟа ицоит.
Аишьцәа ирықәҿиоит урҭ иац иахыргаз,
Ажәҩан аҿынӡагь ҭынч инаӡоит.
Дыӷаџьоуп сҩыза имаӡоу дыргас,
Ԥароуп уи иацу – жәларык рызхара.
Аҭыҵәҟьагь атәыҩа еицарса ҽырбагоуп,
Ашьацра ҟәымшәышәӡа илоуп иара.
Алым азыҳәан игылоит аханқәа,
Зны амариалгьы ашәҭ аҿакуп.
Ҳанасыԥ ақәуп зны акапанга, –
Зны, изӡатәузеи, хәыцуп изку.

Сара – аӡлеи ҳәа дыргас исымоуп, –
Иацым амалгьы, аԥарагь, ахьгьы.
Аӡы ласышьҭуеит. Уи – уи азыноуп,
Иӡышуа дҟамларцаз ҳтәылаҿ аӡәгьы.
02.06.10

***
Сыгәра бгозар, сыгәра бгозар, – исҭахын,
Хаҵа бцозар – ҭацаҩызас ҳәа сыбгар,
Аҽы ццышәуп, ицәгьоуп маҷӡак уи ахы,
Насгьы иалшоит ҭынч ишцо акы иарҳар.
Сыгәра бгозар, сыгәра бгозар, – исҭахын,
Ари амҩаҿ са сыгәҭыхагьы сымӡар.
Ҳаԥхьа инеиуа ирыздырӡом, иҵәахын,
Са сыгәҭыха ҭаха снаҭаӡом зынӡа.
Ана сбықәшәан, – ҳзымеицәажәеит ҳазхара,
Ара бсықәшәан, – ҭаха ҳарымҭеит ҳара.
Бахьызбалак, – ҳаԥхьа игылон аԥарда,
Бара бышҟа сара сымҩақәа мардан.
Бареи сареи ҳзымеицәажәеит ҳазхара,
Мшәан, сыбгаруеи ҭацаҩызас ҳәа бара,
Ҭацаҩызас са саныбго бахьырхәны,
Сара бсыццарц бара сбыҳәоит уи аҽны.
12.06.10

АХҚӘА
Ушьа зықәҭәоу адгьыл
Алмыс
Сыдгьыл, сара сныха…
Ашәҭқәа нсыжьит бара бҿы
Ари адгьыл…
Даҽа хәмаршьак
Ажәа заҵәык
Ҳаҩџьагь ҳабжьы
Аԥсуа быргцәа
Са сазыӡырҩуеит Аԥсны
“Аамҭа сымам, сеилахоуп анысҳәо...”
“Уи споетуп ҳәа ҳахҭеикын...”
“Аӡә игә иахәо малс имшьа...”
Ҳара ҳаиҳа
Кәтол
Кәыдры
Астудентра амшқәа
Сара ушықәсаҿ сыҟан иацы
Ашәарыцара
Анаскьагара
“Амра неихьан...”
Гагра
“Ари ашҭа ԥшӡан, илакәын...”
Ажәеинраала бзызкуада
Ирҳәоит аԥсуара џьабаауп
Ҭабуп
“Ашәҭ ангәылҵуа иԥшӡаӡоуп...”
“Сгәы сҽанӡамкәа ҭынч ицеит аԥхарра...”
“Игәыҟаҵагоуп асабицәа рашәа...”
Уахык ала
Ҭагалан
Амҩахәасҭа ианылан
Ажәҩан ихыҵып ашәшьы
Абри арԥыс дҭамхакәа
“Уҩыза иакәу, уашьа иакәу...”
“Уи аҵәаҵла шәҭын, ихырхәоит...”
“Ихаауп абыз, уи цхарпоуп...”
Аҩы зжәыз
“Игәхьааумган умал ыӡыр...”
“Аты ҩарҩар ҳаст, издыруеит...”
Аҟәазы ашәа
Аиааира авальс
Аԥсни Урыстәылеи
Аԥша
“Шьҭа издыруеит...”
“Ицәқәырԥон, еилысуан...”
“Раԥхьаӡатәи амацәыс...”
Бареи сареи акаҳуа аажәып
Аҩыжәҩы имонолог
Аӡӷаб хәыҷы лашәа
Аиԥылара
Аӡәгьы дахьыԥшым
Агәыла
“Аԥсреи сареи акгьы ҳзеилам...”
Пицунданӡа
Кировтәи аҵых
Аҵеицәа ирҭахуп
Амра ҿыц
Амацәыс
Уахьынаԥшлак
Аума ҵуеит
Аелегиа
Схала
Аимак
“Аиҭаҳатәқәа рҭиуан ашҭаҿ...”
Агьама
Ажәҩанаҿ снаӡаанӡа…
Амала
Агәхьаагара
Дыздыруеит уи ауаҩ
Ажәаҩн ду амҵан
Агәы умаз, ахы умаз
“Угәы бзиоума, ушԥаҟоу...”
Ашҭа еиқәхазар лыԥхала
“Ахш аҽыҭқәа ажәҩан иаҵакнаҳауп...”
Сгәы сазыӡырҩуан
Ааԥын амшқәа
Афырхаҵа иҩнаҿы
Азҵаареи аҭаки
Хаз-хазы
Инымҵәо азҵаарақәа
“Былабжыш адгьыл... “
Шьыжьыбзиа, Аԥсынтәыла!
“Изырканӡазеи, сымыш, сышәҭқәа...”
Ашәыта
Са сыԥхыӡ
Ахьӡ-аԥша абаҳча
Сыхьӡ
Бзиабарамызт
Иузҭеи уи амч
Ныҳәан Аԥсынра
Аимаа ҿыцқәа
Аԥышәҭрықь
Аидара
Ашьыҵәрақәа кны
Аҿыц
Ауаҩы
Аҵәа
Аҳа
“Изурызеи, исҳәарызеи...”
Ахарҵәы
Уԥры, сара сашәа
Ажәҩан ашҟа
“Ажәҩан иалшәан икәеи-цеиуа”
Арбаӷь абжьы
Сыԥсымзар
Ари аҵых
Актәи ахы
Ашьыжь ааит
Адгьыл агәаҿы
Амацәыс
“Изысымҳәозеи, уара уҿы имаӡоума...”
“Абзиабара – хагароуп, гәаҟроуп...”
Иаҳа иҿыцу
“Ибҳәаруеи, сыԥшӡа...”
Ихәу ардәына
Лаӷырӡымзар
Уаамҭа цеит
“Илуан имаҵ иац иԥсыз...”
“Уарада гәышьа, рада, уарада...”
Уи ацыԥхь ала
Агарашәа
Ҳазхылҵыз иныҳәа
“Амца снаҵхеит аҩнаҿы...”
Аԥацәа
Лыԥшаара ҳаҿыз
Дгәырӷьон лара лыла
Бзанҵы имааԥсо
Са сыԥхыӡқәа
Аибашьра еилгеит
Амза аҟынӡа
Агәалашәара
Бара беиԥш
Ашәҭқәа рҵыхәан
Зны
Аҿар рашәа
Азҵаара
Аеҵәақәа рылыԥхала
Сымыш, бқәыԥшуп
Уареи сареи
Аха сеидру уи иахырҳәааз
Ҽаанбзиала, ҽааны!
Сара сҵәуон, уа уччон
Изышәымҳәозеи аԥсшәа?
“Еицәыхароуп амзеи амреи....”
Дырмит
Ажәҵыс
Смаҭа
Аҟәатәи авокзал
Идыруан
Аеҵәақәа ус рҳәеит
Уанцалакгьы
Иҟалаша ҟазҵаз
Ашьыцра
Ба быԥшӡоуп, быссируп
Абаҟа
Сгәы сыхьуеит
“Уи ардәына ашәа ссирын...”
“Ԥхыӡла алашара сыгхеит...”
“Ажәҩан, идыруп...”
“Сыгәра бгозар”

Терент Михаил-иԥа Ҷаниа
Уԥры, сара сашәа
Ажәеинраалақәа
Терентий Михайлович Чаниа
Лети, моя песня
Стихи

На абхазском языке

Аредақтор Марина Тәанба
Атехредақтор Лидиа Анфимова
Асахьаҭыхҩы Руслан Габлиа
Компиутерла иеиқәлыршәеит Асҭанда Аџьынџьал
Sez Abhaz-Abaza ädäbiyättän 1 tekst ukıdıgız.
  • Büleklär
  • Уԥры, сара сашәа - 1
    Süzlärneñ gomumi sanı 3215
    Unikal süzlärneñ gomumi sanı 2081
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Уԥры, сара сашәа - 2
    Süzlärneñ gomumi sanı 3257
    Unikal süzlärneñ gomumi sanı 2014
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Уԥры, сара сашәа - 3
    Süzlärneñ gomumi sanı 3288
    Unikal süzlärneñ gomumi sanı 2090
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Уԥры, сара сашәа - 4
    Süzlärneñ gomumi sanı 2930
    Unikal süzlärneñ gomumi sanı 1830
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.