Latin

Уԥры, сара сашәа - 2

Süzlärneñ gomumi sanı 3257
Unikal süzlärneñ gomumi sanı 2014
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Шьакоуп излаӡәӡәоу, џьым, ҳара ҳдәы.

Ажәҩан иалҵны ашәа бзиа,
Сгәаҿы иқәыҩуеит шьыжьы.
Аԥсынтәыла, нас Россиа,
Ишԥеинаало урҭ рыбжьы!
24.06.05

АԤша
Оҳ, алеишәа цәгьоуп аԥша,
Ицоит,ҽарҳауп, иццакуа!
Аԥша рыцуп есымша
Адыд, амацәыс, ақәа.
Аԥша иацны амахә цоит,
Арҩаш иацуп абжеиҳан.
Зны аԥша уԥсы унаргоит,
Зны иазыҵҟьоит уи ахан.
Аԥша иацны аҵых шоит,
Аԥша иацуп агәырҩа.
Аԥҭа дуқәа ацны ицоит,
Аӡа ыҵнажәоит, аҩа...
Аԥша ҵәуо хыхь ихуп,
Иацуп иҩуа ажә, аҿа...
Саргьы саццар аҭахуп,
Аха сацны сцом шьаҿак.

***
Шьҭа издыруеит,
Аӡә изы имаӡамызт,
Ажәҩан иалаз
Аӡә дызбеит сара.
Ахы иман –
Аус инаруамызт,
Агәы иман
Дызмыртәоз џьарак.
Ажәҩан татан,
Уа аҳауа цамызт,
Аеҵәақәа
Имаҵ ҭынч ируан.
Уи, сыԥсымзар,
Адгьыл имаӡамызт,
Убри акәхап,
Ажәҩанаҿ дԥыруан.
***
Ицәқәырԥон, еилысуан,
Асеи нас аԥшыци,
Урҭ рыбжьара марсак
Хагаха ибжьан.
Иқәсхьан кыр аҟада,

Аха имхоз шыцын,
Са санду дкахәыцуа
Уаҟа даҿатәан.
Ицәқәырԥон, еилысуан,
Аҟаԥшьи ацәыши,
Икахәхәа ишьҭалон,
Хыхьынтә ауарҳал.
Уи – асыга ҿыцқәа,
Азыԥшуан ишьыцны,
Ех, асыга ҿыцқәа,
Шәа шәласуп иаҳа!
Ех, асыга ҿыцқәа,
Шәа шәласуп, идыруп,
Шәыҩуа, шәыҩуа шәашьҭоуп,
Дышәҵәахырц санду.
Илсуаз уи уарҳалӡам,
Ажәытәра ашҟа ԥрыгоуп,
Исыҵашәо џьысшьоит
Мҩа цәгьак санану.
Ицәқәырԥоит, еилысуеит,
Асеи нас аԥшыци,
Урҭ рыбжьара марсак,
Хагаха ибжьоуп.
Сара сахьак сыцуп,
Сахьцалак, ишсыцыц,

Абжеиҳан сыԥхыӡаҿ
Иааҩуа уи абжьоуп.
***
Раԥхьаӡатәи амацәыс,
Сара сгәы иацрасыз,
Бзиабароуп, бзиароуп,
Ус ицом имҩасны.
Раԥхьаӡатәи сашәақәа,
Сымыш, зны ибзысҳәаз,
Урҭ бзынҵы ихьшәашәаӡом,
Сгәаҵаҿ иҭакызшәа.
Раԥхьаӡатәи шәҭы – разуп,
Сқьышә инадыскылаз.
Ԥша ласуп, шәахәа ласуп,
Иқәсуа шарԥазыла.
Раԥхьаӡатәи – гәаҳәароуп,
Ԥсҭазаароуп, аиашаз.
Бзиабароуп, хагароуп –
Ус сишеит сызшашаз.
Аха зны иӡхыҵраны,
Ак ҟалеит ҳабжьара.

Инымҵәаӡо ԥхыӡқәаны
Баццеит алашьцара.
Срыҳәон ажәҩан иалақәаз
Сбышьҭан аԥҭа ԥхьаҳәо.
Аеҵәақәа рыблақәа,
Цәажәон ахьхьа-хьхьаҳәа.
Бареи сареи ҳалабжыш,
Иҟаз қәаб дук азна,
Сажәеинраала иаласҭәон,
Иаласҭәон мацәазла.
Иаҳхылаԥшу дҳалабжьон.
Ҳаргәыбзыӷуа, ҳшаҭан...
Уи азыҳәан ҳалабжыш
Нымхаӡеит ибжатан.
Бареи сареи акаҳуа аажәып...
Бареи сареи акаҳуа ҳаршып,
Нас убри аҵаҿ
Ашьшьыҳәа ҳҭаԥшып.
Уи агәыӷрақәа
Аҵан ажәытә
Бареи сареи акаҳуа аажәып.

Бареи сареи акаҳуа аажәып,
Бҭахызар ушьҭан,
Бҭахызар уажәы.
Сыԥсымзар уи аҵа
Иамоуп маӡак,
Бареи сареи иҳаздырӡом зынӡа.
Бареи сареи акаҳуа ҳаршып,
Уи шәах мацароуп,
Иаҩызоуп амшын.
Исԥеиԥшу-ибԥеиԥшу
Бҳәарауеи бара, –
Бареи сареи ҳтәап ҳазхара.
Бареи сареи акаҳуа аажәып,
Саргьы ашьшьыҳәа
Сышнеиуа сажәып.
Бара абасҵәҟьа
Бшыҟоу бынхап,
Ԥхыӡла шьха-ԥшӡак
Бықәын иаха.
Бареи сареи акаҳуа аажәып,
Ибдыруаз исабҳәо
Са сзыҳәан ихәшәуп.
Анасыԥ ҭаҳгап
Аҵа ҳҭаԥшны,
Анасыԥ амаз иссиру Аԥсны!
28.01.08

Аҩыжәҩы имонолог
Уаргьы уажәит,
Саргьы сажәит...
Ҳаҟанаҵ
Иаҳфеит иаажәит.
Уаргьы уашьуан,
Саргьы сашьуан,
Адгьыл халон,
Ихәашьуан.
Хцалон сасра,
Ҳнаскьон хара,
Иаажәуан
Ҳахан, ҳазхара.
Саргьы скәашон,
Уаргьы укәашон,
Дыччон
Аԥшәма изхара.
Иаажәит иацы,
Иаажәит жәацы.
Иаажәит
Иҵегь... Сааҭк анҵы.
Ҳа ҳахныҳәеит
Зны акы,
Нас, ҽакы,
Ҽакы, ҽакы...

Иаҳныҳәеит
Иԥсыз, инхаз,
Маҷк идагәаз,
Иҿаҳаз.
Ҳраҩымсит
Акәты, ала,
Ӡәыр дынхамашь,
Шәыԥшаала!
Ибжьахада,
Са сыхиоуп,
Гәнаҳак
Ҳмыхьааит, џьым, ара!
Аха,
Иҟалаз уи ауп:
Ҳаибамныҳәаӡац
Ҳара!
20.02.08

Аӡӷаб хәыҷы лашәа
Сан, бара башәа хаа,
Сан, бара бажәа хаа,
Имыцәо шәахәацуп урҭ са сгәаҿы.
Сан, бара быбла хаа,
Сан, бара бычча хаа,
Сгарахь инаргоит илакәу аҽы.

Сан, быда схәарҭаӡам,
Сан, сиарҭа – иарҭаӡам,
Уаҟа сыԥхыӡқәа ԥшӡоуп, иразуп.
Бымшра сылаҵа,
Быҵхра сылаҵа,
Издыруеит, иреиӷьу башьҭоуп са сзын.
Сан, бара быцәаӡом,
Башәақәа нымҵәаӡо,
Сиаҵәахә ашәа азыбҳәоит бтәаны.
Ҽы ласык дақәтәаны,
Аӷәраҿыц наҭаны,
Ҳашҭа дынҭалоит фырхаҵак дԥырны.
20.09.07

АиԤылара
Ҳаиԥылоит, ҳаиԥырҵуеит ашьшьыҳәа,
Ҳаиԥырҵыр рҭахымзаргь ҳагәқәа.
Нас ҟармаҵысуп быбжьыхаа,
Нас иԥсыршьагоуп ақәа,
Быбла асаркьақәа срылоуп,
Быбла сызгәакьоуп сара.
Урҭ рылоуп, ба былоуп, са сылоуп,
Ишызбо ҳдунеи сызхара.

Ҳаиԥылоит, ҳаиԥырҵуеит, быбжьыхаа,
Харантәи издыруеит сара.
Баԥхьа инагылан ашьшьыҳәа,
Ибыццоит са сгәы маӡала.
Ҳаиԥылоит, ҳаиԥырҵуеит, бшьапышьҭабжь,
Уи ашәа иаҩызоу шьҭыбжьуп.
Иссируп, иқьиоуп ба быччаԥшь,
Уи ада са сымра хәашьуп.
Ҳаиԥылоит, ҳаиԥырҵуеит иҿыцны,
Исҳәара сақәшәом, сҿаҳауп.
Баԥхьа сықәхоит сыԥхыӡны, –
Гәнаҳак ҟалашам еиҳау.
Ҳаиԥылоит, ҳаиԥырҵуеит ашьшьыҳәа,
Ҳамҩаҿ ихәмаруеит аԥша...
Иҟаз наӡаӡа быбжьыхаа,
Ҳгәаҵагь еисуаз есымша!
Аӡәгьы дахьыԥшым...
Срыцуп илакәу, ишаноу аԥхыӡқәа,
Урҭ рымҵәыжәҩақәа срыцуп, ицоит.
Урҭ ирҭахызар – аԥҭақәа хыҵуеит,
Урҭ ирҭахызар – ба бҟынӡа снаӡоит.

Иҿыцуп ба бҟынӡа – амҩақәа ҿыцуп,
Иҿыцым, ирыцҳау са сакәхеит, сара.
Избанзар аԥхыӡаҿ акәхеит сахьбыцу,
Адгьыл ҳанықәу – бгылоуп хара.
Ашьхара иқәиааз аԥса баҩызоуп,
Аԥшӡа, ба бышҟа снеиуеит сԥырны.
Аха агәаҟра – са сылахь ианызоуп,
Сахыԥоит, саныҟоу са сыԥсраны.
Срылоуп аԥхыӡқәа... Урҭ рами ашана,
Баԥсшәа хазыноуп, уи сызхаӡом.
Бнеиуеит ашьшьыҳәа, беихатыр, Манана,
Сыԥсымзар ба быда амра ԥхаӡом.
Са сами ибхьысуа аԥшазаҵә иаҿыхәо,
Амҩагь ианысуа, бызнысуа бара.
Аха са сакәхеит ашәҭқәа зырҿыхо,
Урҭгьы зласеиԥшу ыҟоуп џьара.
Быбла зыдхалаз ашәҭқәа ирнылеит,
Бара бсахьа-ԥшӡа. Иҵегь бҽырба!
Анцәа сиашьапкуеит есышьыжь гәаныла,
Суҳәоит уи аҳкәажә иҿыцны дсырба!
Быблақәа исырҭом, сара ахҭацәыха,
Агаҟа исыԥхьоит... Идуӡӡоуп амшын.
Ажәҩангьы сыхоит, исыхоит, исыха,
Исыԥхьоит аӡәымзар аӡә дахьыԥшым.

Агәыла
Шьоукы ргәылацәа маалықьцәоуп,
Анцәа дрымоуп урҭ, ҳәарада.
Уаха ргәы раҳаҭны ицәоуп,
Уаҵәы ицоит сасра гәырҩада.
Шьоукы ргәылацәа маҭаԥшьуп,
Дхынҳәуеит ргәыла данырԥыла.
Аӡә деицаҟьоуп, егьи дхабжьуп...
Усҵәҟьа дыҟамзар агәыла?
Сгәыла изыҳәа ацәгьа сылам,
Сыҟоуп ус, Анцәа сишазар...
Дзыцәгьахома, мшәан, агәыла,
Иара игәыла дыбзиазар?
***
Аԥсреи сареи акгьы ҳзеилам,
Акгьы ҳзеиламызт зынӡа.
Анцәа исиҭаз сымоуп, снеилап,
Ҽаӡә иԥсҭазаара сҭахӡам.
Аӡәы дҿазаргь, дажәхьазаргь,
Дтәаны ишықәс иԥхьаӡоит.
Уи макьана иԥсы ҭазаргь,
Заа инышәынҭра ҟаиҵоит,

Уи чаԥоуп, ибырлаш ԥсароуп,
Ҩныс исымандаз сара!
Иуеит измоу иабду ичара,
Уи иуеит ианду лыԥсхәра.
Са сгәы каршәны сцоит аҩныҟа,
Сыҟамзаргь атәыла бгом.
Са саныҟоу – аԥсра ыҟам,
Уи анааилак – са сҟалом.
Пицунданӡа
Сцар сҭахуп Пицунданӡа,
Амза, Амзаранӡа.
Сшьац иаҵәаран суҵанда,
Исхалашо амза!
Ажәҩан иалоуп аԥсақәа,
Мшәан, иабанӡахало?
Амра цеи аҽаҵакуа,
Аҷныш цоит иҟьалан.
Уи амшынгьы саркьароуп,
Бырлашк ҭаршәуп аҵа.
Сшәыкәыхшоуп, исашәҳәаруеи,
Уа еиқәызҵаз амца!

Уа аҳауа татаӡоуп,
Цәымзоуп жәҩан-еҵәара.
Уа ашәира хәарҭаӡам, –
О, урыцҳахоит даара.
Уаҟа аҳцәа ртәарҭароуп,
Апринцессагь дрыцны.
Уа ашыцқәа ҳшаҭароуп,
Урҭ ҟамларц иԥхыӡны.
Уа жәытәтәи ныхароуп,
Иҟам аламала.
Сымҩа маҷк ианыхароу,
Самҵаныҳәоит сҭалан.
Наҟ абаашгьы ныҳәарҭоуп,
Ҳа ҳазшаз ихыбра.
О, рыбжьы хаа сыхәарҭоуп,
Уа Алиса, Хьыбла.
Аа, Нептун дахьыҵыҵуа,
Уа дӡы-ԥсы мацаран.
Шьҭа аарҩарак зықәлаӡом,
Аԥсны аԥсабара...
Сцар сҭахуп Пицунданӡа,
Амза, Амзаранӡа.

Сшьац иаҵәаран суҵанда,
Исхалашо амза!
Кировтәи аҵх
Уи ауха Киров цәгьа илашан,
Ашықәс ҿыцгьы ааиуан иԥырны.
Ихәыҭхәыҭуа шәак аҳәон аԥша,
Сҩыза ду иҿ сыҟан са ссасны.
Уа дысԥылт Подлевских дгәырӷьаҵәа,
Даагылазаргь уи деиқәшәоуп сасыла.
Асас дызмоу, димоуп, рҳәоит, Анцәа,
Дгәырӷьоит уи уа ула, сара сыла.
Иӡит амза аеҵәа иацәшәан,
Ари аҵх аман уа ирҿыхан.
Илзымдыруа иарбану ашәас,
Хыхь ихалон аԥшәма ԥҳәыс лыбжьы-хаа.
Иақәыршәызшәа ԥҳәызба ԥшӡак лкасы,
Ишԥассирыз Киров уи ауха!
Ԥыҭҳа-ԥыҭҳа иқәион уа асы,
Исымнахуан наҟ сара сыгәҭыха.
Ашыҩ-сыҩҳәа ажәҩан ахь ицон,
Ианхалалак, ишәҭуан аракета.

Смаҟҿаҳәара уа асы наӡон,
Харантә ашьҭыбжь саҳауан «Радеда».
Ашҭаҿ аишәа ҭынч ишлон, ишлон,
Иакәша игылан гәылала, ҭахыла.
Аԥаҭхь акәын – уи ашәах хыттон,
Аԥшәма дныҳәон иашҭа ду дҭагылан.
Ҽаанбзиала, ажәҩан ду лашоуп,
Илашоуп уи аурыс ҷкәын игәара.
Ҳаиҩызара ԥаҳшәахьеит, иԥшьоуп,
Уи аԥшәымоуп ҳтәылақәа рыбжьара.
31.12.07

Аҵеицәа ирҭахуп...
Цаца Казанба илызкны

Арҵәаа ҳәа арҩаш кшомызт ишьҭыҵны,
Ԥсуа шьҭыбжь гомызт, ашҭа ҭацәын.
Ақырҭуа фицарцәа гылан ишьыцны,
Ишьыцуан дахьрымам асҵәҟьа аӡәы.
– Мап, ԥсуа дгьылуп, ижәдыруаз, са сыдгьыл,
Шәыгә иахәо ажәала исзыхьчом са сцәа!
Аха уи адгьыл итәуп сара сыдагь,
Шәарҭ зегь ишәымам, ишәцәыӡыз Анцәа!

Арҵәаа ҳәа аҳәҳәабжь ахылҵуан адәыӷба,
Икаршәын аҵысгьы ашьа аҿашәын,
Амца лыцрарҵеит, деилыршьын аԥҳәызба,
Алҩа маҭәазшәа амра иашәын.
Цаца – уи адгьыл иахылҵыз шәахәацын,
Цаца – ҳа ҳадгьыл ианшәылахьоу шьан.
Цаца – уи ахьӡгьы хаҵарак ацын,
Уи иҭахаз зегь дреиԥшын, драҳәшьан.
Цаца – абаҳчаҿ имбаӡац ӡаӡоуп,
Уи ҳара ҳажәҩан иалымшәаз қәоуп,
Аха, ижәдыруаз, уи хьӡыдагь дфырхаҵоуп,
Цаца – макьана дҳаздырам, дмаӡоуп.
Аццышә иаҩызан иқәыԥсоуп анра,
Ақырҭқәа, ақырҭуа... Хьымӡӷыла икәабоуп.
Ахьымӡӷ ду амоуп, хымԥада, амра,
Цаца дзымшаҭаз... ажәҩан иаԥоу.
Илышәҭ Афырхаҵа ихьӡ уи аԥҳәызба,
Аԥсадгьыл азыҳәа аԥсышьа ҳзырҵаз.
Адгьыл иахажьыз аԥсыҽра ахызҳәаз,
Илыкәшан игылаз зшьыз ишыбзаз.
Илышәҭ Афырхаҵа ихьӡ, уи ламысроуп,
Уи лара лҿаԥхьа иаҳзымҳәаз ҿахәуп.

Макьанагь инымҵәо амҩа ҳанысроуп,
Ҳа ҳаҵкыс аҵеицәа роуп уи зҭаху.
– Мап, ԥсуа дгьылуп, ижәдыруаз са сыдгьыл,
Шәыгә иахәо ажәала исзыхьчом са сцәа!
Аха уи адгьыл итәуп сара сыдагь,
Шәарҭ зегь ишәымам, ишәцәыӡыз Анцәа!
Илышәҭ Афырхаҵа ихьӡ уи аԥҳәызба!..
Амра ҿыц
Аԥсынтәыла – уи ԥхьарцоуп,
Са сахоуп срахәыцны.
Аҵарақәа рашәа рӡоит,
Сашәа иаҵашьыцны.
Насыԥ хыброуп сызҵатәоу,
Уи лашоит лыԥхала.
Сара сыжәҩан акәа сҭоуп, –
Нарҭ сихыцны салоуп.
Аԥсынтәыла шьала ишәуп,
Шьала шәышықәсала.
Аха уи ашьацгьы хәшәуп,
Схәызар аӷа ихала.

Са сызхысхьоу – қәаршаҩуп, –
Аԥшқа хәыҷ иԥхыӡоуп,
Аха сыгагақәа рнуп,
Схыбаҩқәа ахьыҵоу.
Аԥсынтәыла – дара роуп, –
Сышьхақәа, сыԥшалас.
Сӡыхьқәа, зымҩақәа хароу,
Сышәҭ, ацәылашараз.
Счысгьы ссируп, сҩы ҿацоуп,
Аишәа хиоуп, аҩыза.
Аԥсынтәыла уи ԥхьарцоуп,
Иарҳәа – иуҭахызар.
Зны игәыбзыӷуп, зных ицоуп,
Сымра гылт иҿыцны.
Аԥсынтәыла – уи ԥхьарцоуп
Са сахоуп срахәыцны.
24.11.08.

Амацәыс
Саида Дел-ԥҳа илызкуп

Бара бмацәысны бцәырҵит иацы,
Иацы бара башҭа шәҭын, илашан.
Иахьа ажәҩангьы иалҵуеит аԥхӡы,
Иахьа хәыҷыкгьы аҽарцәгьеит аԥша.

Иацы ибҿаччон бгәил адәаҿы,
Аха инаӡамызт уи аҽҳәара.
Бара наӡаӡа сыԥхап ҳәа баҿын,
Сыԥхап, ҳәа сыблып ҳәа Аԥсны азхара.
Амацәыс ашьҭа ԥхыӡла иббон,
Амацәыс ашьҭа бхын есымша.
Избанзар, избанзар – бара агәра бгон,
Ишыҟам уи ашьҭаҿ ахьҭа, аԥша.
Бымацәыс ашьҭа цоит, инҵәаӡом,
Уажәоуп ҳаназхәыцуа уи ашьҭа иаҳа...
Уи дызҭахеи ҳәа аӡәгьы дҵааӡом,
Избанзар идыруп ба бызҭахаз.
Амацәыс ԥхыӡын, иссирын зынӡа,
Ишцәырҵыз изгәамҭеит аӡәымзар аӡәгьы.
Икәицын, илакәын, лашаран, имцан...
Ианыцәоуп, ианыцәоуп иангәаҳҭа зегьы.
30.12.08

УахьынаԤшлак...
Уахьынаԥшлак икашуп,
Сылабжышқәа, ҳәаа змам.
Сӡыхьқәа сшьала ихәашьуп,
Аӡы рҭылтон уаҟа сан,

Уахьынаԥшлак ашәҭқәа шьҭоуп,
Снышәынҭрақәа зегь хҩаны.
Иқәыҩуагьы сан лыбжьоуп, –
Убри акәхеит ла лыҩны.
Уахьынаԥшлак сара сжуп,
Аԥса ҵлақәа џьаруп уа.
Аеҵәақәа ҭынч иԥшуп,
Ицәоит ашьыжь анаауа.
Уахьынаԥшлак сбаҟақәа,
Сара ссахьақәа рҭасоуп.
Иазеицакӡом уи ақәа –
Сара сыдгьыл аԥа соуп,
Уи имыцәоз мцак акын,
Иалагылан ҳҵеицәа уа...
Ари аибашьра ҽакын, –
Ахьӡ игон зыԥсы зҭиуа.
Уахьынаԥшлак са сыԥсы,
Иаԥшәыман инхеит ара.
Бзынҵы иқәхеит уи Аԥсны, –
Бзынҵы иҟоуп Аԥсынра.
16.12.08

Аума ҵуеит...
Аума ҵуеит...
Аӡы хәашьуп,
Амрагь ҿыхаӡом зынӡа.
Сара быԥшаара саҿуп,
Даҽаӡәызар –
Игра иӡап.
Быгагакәын, –
Уи хароуп,
Ашьҭақәагь аныҵит шьҭа.
Сшәақь иахылҵыз
Схылҩа ԥхоуп,
Саӷа иакәын – дцеит дшьабан.
Аума ҵуеит,
Ба бҟынтәи шәҟәык,
Знызаҵәык исмоут сара,
Са сыргәамҵуа
Срымоуп шәкы,
Сдыртәаӡом иахьа џьарак.
Аума ҵуеит,
Ба бҟынтәи шәҟәык,
Ахы сзықәымԥшит сара.

Аха исымоузеи
Ҳәатәыс,
Саргьы исхашҭит, ди, аҩра!
04.12.08

Аелегиа
Аԥхӡы хьшәашәа сықәнаҭәоит аԥсра,
Зны зынӡаскгьы схагахазшәа збоит,
Сацәыбналон, шьҭахьҟа сцоит сара,
Аха сыжәҩа иқәтәаны иччоит.
Ҳаԥык сақәшәеит уи уагон хара,
Абраскьылгьы уа ибжьы иргоит. –
О, са сышҟа уқәымлан уара –
Шаҟа уааиуа аҟара снаскьоит.
Дахьҭаҿаҳәоу лашьцаӡоуп зынӡа, –
Џьара дәҳәыԥшуп, џьара – ӡык ҭачуп.
Икыншәылаз алабжыш ҵырӡа,
Сара сыжәҩа иалаларц иаҿуп.
Ижжаӡа цәашьык сара искуп.
Ҵаҟа ӡызар – хыхь зынӡа акыц,
Ижәбахьоума, амҩа нҵәара зқәым,
Инымҵәакәа, иалагом аҿыц.
02.12.08

Схала
Бареи сареи ҳабжьара,
Схала соуп инхаз.
Аҵарақәа быбжьала,
Ашәа рҳәон иаха.
Бареи сареи иҟәандаз,
Ӡыхь хәыҷык ҳабжьан,
Саҿымхәаӡеит, избанда,
Уи разын, иԥшьан.
Ҳаиаҵәа хәыҷ насыԥла,
Сзеигәырӷьоз жәаха.
Снаҵагылан, еирыӡла,
Истеит ашәахәа.
Ишәахәам, уи лабжышуп, –
Ҳҩыџьа ҳаизынхеит.
Иџьбароу ма иԥсыҽу?
Иџьбароуп, избеит...
Бареи сареи ҳабжьара,
Ибжьалеит ашәшьы…
Зегь аками быбжьала,
Исацәажәоит бжьык.
29.11.08

Аимак
Суадаҿ ишоуран,
Амра ҩнакын.
Аиоди агәырқәеи
Аҳра ргахьан.
Гәырк насылаҵо,
Нас даҽакы,
Уа аҳақьымцәа
Сеиҵыхны исхан.
Иқәыҩуан ашьҭыбжь
Аарла сгәаҿы,
– Сан лышьҭабжь аума, –
Сгәахәт адәаҟны.
– Инхада-иԥсыда? –
Аисра иаҿын,
Аԥсреи абзареи
Сара сеимакны.
2008

***
Аиҭаҳатәқәа рҭиуан ашҭаҿ –
Иаахә ухаҵазар уаҵәы!
Аӡәы – аца еихаҳа дашьҭан,
Аҵәеихаҳа даҽаӡәы.

Ус ҭаҳмадак дааԥса-дкара,
Днарыдгылеит уа дара.
Изҭиуаз ихнахын рԥара,
Иаҿын иахан ашара.
– Дад, сыԥсымзар, иахьа сагхеит,
– Уагхеит, баба, уаа ҽааны!
Аҭаҳмада, убри акәхеит, –
Днагылт илахь еиқәҵаны.
Нас иҿынеихеит аҩныҟа,
Аха дцон агәра ганы:
– Шықәсык акәзар, – оумак ыҟам,
Иахьа аиԥш иаауеит ҽааны.
20.11.08

Агьама
Амра са сахӡыӡоит,
Сашьҭаланы сцоит.
Исзынхазгьы ԥсыӡоуп,
Нас иара сахьӡоит,
Амра ацыԥхь аршәит,
Уи Аԥсны иахьӡоит.
Ҵыск абаҳчаҿ аршәаа
Иасуеит, иааԥсаӡом,

– Баша, баша уасуеит,
Баша ухы умжьан.
Уимоу, уара уцасҳәагь,
Ҿыц ихәмаруеит сшьа.
Сықәуп, сықәуп амҩа,
Уи хароуп зынӡа.
Ԥхьацароуп игьамоу,
Сцароуп, знык санца!
20.10.08

Ажәҩанаҿ снаӡаанӡа…
Аԥсҭазаара – аҩы џьбара, –
Уи сашьызар акәхап.
Алу саҵган захьынџьара,
Сықәнаԥсарцоуп ссақәха.
Сыбӷаӷо адәы сахьықәу,
Срыцҳазшьазгьы маҷӡам.
Даҽа ԥыҭрак ауп исыгу...
Наҟ ладароуп, шьацӡам.
Шьыцроуп иҟоу уахьыԥшлакгьы,
Агәыр иаҵашьыцуеит.
Сара амца сшақәу рбаргьы,
Аӡы рбеит ишыцәоу.

Мшәан, иҭҟьама сгәыӷра ажәҩа,
Сеимакноуп ишсыхо,
Ҵаҟа – адгьыл, егьи – ажәҩан,
Скарыԥсеит сыԥҽыхан.
Нас цәашьык акуеит ашьшьыҳәа,
Сыԥсы ҭоуп иблаанӡа.
Сбылуеит адгьыл ссир азыҳәа,
Ажәҩанаҿ снаӡаанӡа.
05.10.08

Амала...
Мап, амалаҳәа иурҭом акгьы,
Амала иурҭом
Уԥсуазаргь часак.
Иурҭом ахылԥагь, ашьаҵагьы,
Амала урышьҭоуп
Урҭ уҿҟьаса.
Мап, амалаҳәа узхалаӡом хыхь,
Уимоу узҭалом
Ашьашьмаҭра.
Џьым, амалаҳәа, уагозаргь ахыхь,
Дарбан иузҭо
Уи ахәшәқәа уара!
Мап, амалаҳәа, амцагьы мцам,

Ухаҵоуп ԥсшьара
Узцозар Шәача.
Џьым, амалаҳәа, шьҭак иҳамӡап,
Ԥҳәызбакгьы дуцны
Днеиӡом шьаҿак.
Амала иҟаз – ықәҵит ибжьаӡт,
Амала иҟам
Афархь, алаба.
Амаҭқәа, алым, абга, абжьас,
Ухаҵоуп, амала
Унықәлан иба.
Иҟам иуоурц, џьым, маҵурак,
Уахьгьы ҵарҭышак
Даҳәоит аӡәы.
Џьыбак иҭыҵны ицоит ҽаџьара,
Иахьа узхьымӡаз
Уахьӡароуп уаҵәы.
Мап, амалаҳәа аиааирагь ҟамлеит,
Амала ицама
Иаҳхалаз ашәшьы,..
Ҳарԥарцәа рцәымза лабжышхан илеит,
Амала дарбан
Иузҭо цәашьык.
Аха, аԥсҭазаара, – усгьы қәԥароуп,

Уҟанаҵ иҟоуп,
Амаҵ утәуп.
Џьым, амалаҳәа иҟоу аԥсроуп,
Егьырҭ зегь,
Егьырҭ зегь
Рыхәқәа шәатәуп!
29.11.08

Агәхьаагара
Ашьха кынҩалаҿ
икылжәан акыцра,
Шьауардынк иршан
иаман аҭра.
Шьабысҭак шьҭкәыцәаа,
уаҟа шьапхыцла,
Аԥҭа иагәылган
иҭалон убра.
Ашьха кынҩала
мчык иннакылеит,
Ажәҩанаҿ зызқәа
назгарц иаҿыз.
Уи амҵан ԥслаҳәҵас
инхгыла-аахгыло,
Ӡы-иаҵәак ажәуан
илакәыз аҽыз.

Ашьха кынҩала
иамамызт гәнаҳак,
Уигьы бзиарак
зуп ҳәа иаҿын.
Хыхь игәеигәеиуа
аԥҭақәа кнаҳан,
Ажьакцеи ашьанҵеи
рнын агәаҿы.
Ихалон уи ашьха
ажәҩан аҟынӡа,
Ихалон, дшаҳаҭуп
ҳазхылҵыз Анцәа,
Уа шьауардынқәак
краҳфап ҳәа иаҿымзар,
Реишәа ҵысыр ҳәа
ишәон аԥацәа.
09.10.08

Дыздыруеит уи ауаҩ
Дыздыруеит уи ауаҩ, дгәасҭоит харантәи,
Аԥшатлакә дазыҵҟьоит бжеиҳан, агаӡа.
Адәы дықәлазар акәхап дҳарамны,
Иажәагь ҳарамроуп иаҵоу зынӡа.
Иҽишьуеит иҟәышу аҩада дхалар,
Иахьа дыжәбама, мшәан, агаӡа?

Идыруп, дыҟам уи ауаҩ ихала, –
Арымӡаа ицуп, иаҳбоит, имаӡам.
Аха, нас, дарбан амыжда иижьо,
Еиӷьын асаркьаҿ дшыҟоу ибар!
Ахьи араӡни ҳрылатәо џьишьоит,
Иара аҩада дхаланы дтәар.
Уи ари адгьыл дакәшаны дныҟәоит,
Гәаныла уи амра аҟынӡа днаӡоит.
Уи ари агагь қашьушәа дыҟоуп,
Бзыԥтәи аӡиас ашьхаҟа ицоит..
Зны аҭоурыхаҿ гәалақәак имоуп,
Ҳабацәа рымҩа ахеиҵоит аҵәы.
Иахьа ҳәа дызҿугьы –
иҟам-ианымоуп,
Зынӡаскгьы издырӡом

ишааиуа уаҵәы...
Зҵаарак сыцрыхоит ҽынла,

уахынла,
Шьыри, сыԥсында аҭак саҳаны:
Гаӡак изихылҵуеи, иуҳәарауеи,

зықьҩыла,
Иҟәышу данимам аӡәы иеиҳаны?!
01.01.09

Ажәҩан ду амҵан...
Ажәҩан ду амҵан
амза лашоуп,
Уи иазхымҩаӡеит
аԥҭақәа халан.
Аԥшӡара рыман
ҳашьхақәа шоуп,
Сышьхақәа иреиԥшуп
сашьцәагь акала.
О, ари адгьыл
ахацәа иртәуп,
Урҭ еиԥшымзаргь
акәхап ҟазшьала.
Араҟа ҳҵасқәеи
ҳныхақәеи шәуп,
Аԥсадгьыл азыҳәа
иқәҭәаз ашьала,
Араҟа ахаҵа
дыԥшӡоуп оумашәа,
Аӡреи агәаҟреи
дрылҵит лыԥхала.
Аҩызцәа дрыԥхьоит .
иҳәозар ашәак, –
Аԥсреи аԥҳәызбеи
дырԥылоит ихала.
04.01.09

Агәы умаз, ахы умаз...
Агәы умаз, ахы умаз,
Аламысгьы умаз, нас...
Ҩызак думаз, ныхак умаз,
Урҭ рыдагь – ҳазшаз иҵас.
Амал умаз, ашьал умаз,
Аҩны умаз еиҵҳәаны.
Аҩы умаз, аӡы умаз,
Асас думаз даҽазны.
Ажәа умаз, ашәа умаз,
Думаз, дадхеит, аиҳабгьы.
Пату зқәуҵо гәылак думаз,
Думаз, насгьы, аиҵыбгьы.
Аӡӷаб думаз, аҷкәын думаз,
Аԥҳәыс думаз дыԥшӡаӡа...
Исҳәари, улшара дууназ
Маӡак умазаргь цәгьаӡам.
Амхы умаз, ашҭа умаз,
Аишәа умаз, аԥш, арҵәы...
Шәырк умазар – ахазына, –
Имамзар ҟамлои ҽаӡәы.

Агәы умаз, ахы умаз,
Ҳаиқәшәалоз есуажәааны!
О, егьырҭ зегь уара иумоуп
Ҳа ҳазшаз ибзоураны.
11.01.09

***
– Угәы бзиоума, ушԥаҟоу,
Угәхьаазгеит аҩыза даара?
– Сгәы бзиаӡоуп, уиак сымоуп,
Аха исымаӡам аԥара.
– Уа ушԥаҟоу, ҿыцс ишәылои?–
Ҽаӡәгьы исҭеит нас азҵаара.
– Са стәы уҳәозар, – сгәы уашәшәыроуп,
Аха срыцҳаӡам аԥараз.
22.01.09

Ашҭа еиқәхазар лыԤхала
Аеҵәа ҭаршәуп са сашҭа,
Сашҭаҿ мазарак сашьҭам.
Уи ашҭа еиқәхазар лыԥхала,
Уи сыбзоурамхеит са схала.

Уа уқәла, са сықәла нахьхьынӡа,
Шаҟаҩыҟои зықәра иахьымӡаз.
Иахьымӡаз аҳәаха ашәа хаак,
Иахьӡеит урҭ руал ду ашәаха.
Мыткәмоуп иқәыҩуа Лаҭа,
Иқәхеит анацәа блада.
Уаҟа ажәҩангьы гәнаҳауп,
Уаҟа рышьҭыбжьқәа кнаҳауп.
Имиц, иизгьы насыԥда, –
Суҳәоит амыткәма насымда!
Суҳәоит, унықәла Ешыра,
Уқәла Мықә, Очамчыра.
Уқәла Тамшь, Мыркәыла,
Ҩызак днумыжьын, агәыла...
Ҳабыҩқәа рымцаҿ аҿҿаҳәа,
Иӡрыжәын ҳаҷкәынцәа раҳәа.
Урҭ раҳәа, аҳәа цырцырқәа, –
Урҭ ашьауракәын иззыркуаз.
Игәамҵуан аҽыхәа агәараҿ –
Ан лыцәа ҭаазап агараҿ:
Лысаби абџьар икын,
Избанзар, ҳаԥсадгьыл хьчатәын.
02.02.09

***
Ахш аҽыҭқәа ажәҩан иаҵакнаҳауп,
Асар рымҩа алгоуп рыгәҭаны.
Урҭ зынӡа иԥшӡоуп, зынӡа игәнаҳауп,
Скьаҿуп амзар срыҭәҳәон снаӡаны.
Ахш аҽыҭқәа ажәҩан иаҵакнаҳауп,
Иҟәандаӡа, уа сыԥсы ҵәахуп.
Уахгьы-ҽынгьы, абар ҩахоуп, хахоуп, –
Урҭ ахьыҟоу сыҟазар сҭахуп.
Избоит уахь ицозшәа ихыԥхыԥуа;
Ԥҭеиқәаҵәак, ишԥеиԥшу уи ала!..
Асар рымҩеи уаҟа аԥҭа ҽыҭқәеи,
Анцәа иҭихыз сахьазар ҟалап.
03.02.09

Сгәы сазыӡырҩуан...
Сгәы сазыӡырҩуан шьыжьык,
Иаҿын аисра аҭҳараҳәа.
Сыхнахӡомызт ҽа шьҭыбжьык,
Даҽа ԥхыӡқәак збомызт уаҳа.
Сгәы цәқәырԥон, иԥжәон, иқәԥон,
Ажәҩангьы џьбаран лакҭала...

Аԥсназыҳәа аҳәа рҟьон, –
Ҳҵеицәа аибашьра ду иалан.
Аԥсназыҳәа раҳәа хын,
Аҳәа ӡрыжәын аӷа ишьала...
Хәыҷгьы дугьы ирҭахын,
Ҭынч аҿаанахар аԥшалас.
Аҽархагон сгәы ҽазны,
Сагарызшәа збон сышьҭыхны.
Иагон ажәҩан лаганы,
Амацәыс агон ихыхны.
Гәаӷқәас иҟоу еизыҳәҳәо,
Нас ихыҵуан агәараҳәа.
Сахьазыӡырҩуаз иаҳәон:
«Аԥсны», «Аԥсны», «Аԥсынраҳәа!»
14.02.09

АаԤын амшқәа
Ааԥын амшқәа насыԥуп, –
Сгәалаҟара иамам ҳәаак.
Аҵәыргыла са сахыԥоит,
Сыгәгьы каҳаӡом ахаан.
Ааԥын, ааԥын... Уи еинаалоуп,
Иашьҭит аӡын сашҭа иқәцан.

Ашьыжь, ацәа хаа саналоу,
Исыдтәалоуп схыза сықәҵан.
Ааԥын, ааԥын... Уи лашароуп,
Бзиабароуп, уи сыԥсымзар.
Ашәҭқәа шыску сара сцароуп,
Хара иҟоу сажәра аҟынӡа.
Бзиабароуп, еиқәырхагоуп,
Амыч знамҭаз дарбан руа,
Иҟалоит зынгьы уархагар,
Иҟалоит зынгьы уарҵәуар.
Уи иихьоу зегь раԥхьа иизоуп,
Иааиуам уи угәы анҿыӷьуа...
Абзиабара – бҷуп изҩызоу,
Знызаҵәыкоуп уи анухьуа.
17.02.09

Афырхаҵа иҩнаҿы...
Аԥсны афырхаҵа Даур Гәыргәлиа аӡӷабцәа иман.
Ахаҵарԥыс дани, сеигәырӷьеит...

Уи даҿамхакәа џьара,
Схаҵоуп ҳәа дмақаруан.
Аха далатәан иара,
Аӡӷабцәа рҳәынҭқарра.

Аӡӷабцәа рҳәынҭқарра ԥшӡоуп –
Ашәа ссир иаҩызоуп.
Аха уи ҽазны имцоуп,
Шьоукы-шьоукы зблызоуп.
Аӡӷабцәа рҳәынҭқарра, рмал,
Амаалықьцәа рқәыԥшра...
Адәы дықәлеит Алмасхан,
Урҭ ихьчарц даушла.
Ушьҭа арԥарцәа ҳзилап,
О, анасыԥ рымаз!
Урҭ аӡӷабцәа ирулап,
Урҭ аҷкәынцәа рымаҵ.
23.08.03

Азҵаареи аҭаки
Азҵаареи аҭаки –
Еицуп есымша,
Иарбан, иуҳәозар,
Ҵоура змам оумак?
Азҵаареи аҭаки...
Иагаӡом аԥша, –
Азҵаара анҟәышу,
Иҟәышхоит аҭак.
17.03.09

Хаз -хазы...
Баргьы саргьы – ҳҩыџьагьы ҳагәнаҳан,
Ҳаиқәымшәаӡаргьы усҟан, уи аҽны.
Сара сусқәа наҟ изгеит сырнахан,
Бара бусқәа быман иҵәахны.
Баргьы саргьы усҟан ажәҩан ҳалан,
Ажәҩан аҿгьы еибаркын ҳнапқәа.
Нас адгьылахь ҳалбаауан лыԥхала,
Амра ҳаман, иаҳҭаххар ақәа.
Нас иҟалаз сеидру, ак ҳабжьаҳаит,
Саргьы избац акәым, даҽакхеит.
Акаҭақәеи аԥҭақәеи сырԥахит,
Сызлаԥыруаз сымҵәыжәҩақәа хеит.
Ус ицеит са сымшқәа насыԥда,
Сеидарагьы маҷым, ихьанҭоуп.
Ибзынхазеи сара сҟынтә исымҭан,
Бара бҟынтәи – сгәырӷьоит сгәы бахьҭоу.
Слымҳарыҩны блымҳа сахьынҳалоуп,
Ишԥасҭаху беиҷаҳар иара.
Быгәхьааган, сылабжышқәа ԥшьаала,
Сӡамҩа иқәлан иаҿуп ацара.
Сыԥсҭазаара иахьыз цқьа исыздыруам,
Шылоу џьушьап, лыхәҭала исхәит.

Саԥхьа иҟоу сӡиас хәыҷӡа сзыруам,
Са сызҵалаз агәырҩа иарҭәит.
Убри акәхап, амра маҷк ихьшәашәоуп,
Наҟ иӡаалашт уи ушьҭа лассы...
Бареи сареи аԥсҭазаара ҳаԥнашәон,
Иаҳзымычҳаит, ҳдәықәлеит хаз-хазы.
20.03.09

Инымҵәо азҵаарақәа
– Изакәызеи анасыԥ,
Закәи агәырҩа? –
Ас азҵаара сыманы,
Сынхықәтәалеит сӡыхь.
– Анасыԥ – уи гәырӷьароуп, –
Ааҿнаҭит иара, –
Агәырҩа – насыԥдароуп,
Иацуп уи ахыхь.
– Изакәызеи анасыԥ,
Закәи агәырҩа? –
Ус азҵаара сыманы,
Снамҵахырхәеит сышәҭ:
– Еибаҭаху срывганы,
Сшәымгалан зымҩа,

Рыԥсҭазаара бзиахоит,
Еибаҭаху срышәҭ.
– Изакәызеи анасыԥ,
Закәи агәырҩа? –
Смаҭа хәыҷ азҵаарақәа
Лысҭеит жәаха зны:
– Анасыԥ – уи мҵәыжәҩақәоуп,
Иарааԥсаӡом мҩак.
Агәырҩа ҳәа иуҳәақәо,
Смаҳаӡац Аԥсны!
– Изакәызеи анасыԥ,
Закәи агәырҩа?
Ага, ашьха сразҵаауеит,
Урҭ зынӡа иԥшӡоуп.
– Анасыԥ – уи ацқьароуп,
Агәырҩоуп ҳзырҩа,
Аха урҭ аагылазаргь
Ас еицноуп ишцо.
31.03.09

***
Былабжыш адгьыл
Иқәҭәеит ашьшьыҳәа,

Бхәыцрақәа ԥыбжәон
Қьаадшәа икәыкәны.
Сҵәуар исхарои
Ба бзыҳәа, са сзыҳәа,
Аха сгылахын
Ус ичҳаны.
Былабжыш адгьыл
Иқәҭәеит ишәытан,
Адгьыл ашьацқәа
Гәырҩала ихәаҽуп.
Адгьыл иахьықәҭәаз,
Санқәыԥшыз, ажәытәан,
Иахьа уи ашәыта
Аныхра саҿуп.
14.03.09

Шьыжьыбзиа, АԤсынтәыла!
Шьыжьыбзиа, Аԥсынтәыла,
Шьыжь аӡаӡа-цқьа зхьыршоу,
Шьыжьыбзиа, сықәла, сгәыла,
Сара сныха хәыҷ иԥшьоу!
Шьыжьыбзиа, сышьха ӡышқәа,
Сырҩаш хьшәашәақәа рыбжьы!
Ан-агәыраз лылабжышқәа, –
Ҵеи лашак дылшеит шьыжьык.
Шьыжьыбзиа, сԥацхаҿ амца,

Хыхь, зырхнышьна еиқәаҵәоу,
Зны ҳнатәазаргь аҵла амҵа,
Аӷа иӷба шьҭа иԥҵәоуп.
Уара ухәра иаҭахызар,
Уаҟа сақәҵала, сыхәшәуп.
Хьҭак уакуазар – усҟан схызаз,
Сара сеигӡаӡом исшәу.
Шьыжьыбзиа, сымш, сышҭа,
Сарма – мшынуп, сарӷьа рхоуп!
Сгәы иануп ҳа ҳҵеицәа рышьҭа,
Урҭ рыԥсоуп сара исхоу.
Шьыжьыбзиа, арра иҟоу,
Ашьха иҟоу, ага иху!
Са сзышьҭоу акызаҵәыкоуп, –
Аԥсны шәагымхар сҭахуп.
Шьыжьыбзиа, шьыжьыбзиа,
Ашәҭи, амреи, амзеи зцу!
Ашҭа қьиа, аԥшәма қьиа –
Урҭ зегь роуп Аԥсны зыхьӡу.
14.02.09

***
– Изырканӡазеи, сымыш, сышәҭқәа,
Избоит, рыԥсы ҭалом уаҳа,

– Сгәы иахьадыз, акәхап, рыцҳа.
Сара сгәы былуан аҿҿаҳәа!
– Изҭабазеи, сымыш, сӡыхьқәа,
Адгьыл иҵыҵуан илакәха,
– Исгәалашәар, са сгәы сыхьуеит, –
Ианҭабаз санӡышоз акәхап.
– Аԥхьарца абжьы сарҿыхон,
Иԥызҵәада арахәыцқәа,
– Арахәыцқәа мчыла срыхон, –
Мчыла ажәақәа узхәыцуам!
– Изыршанхазеи ари амза, –
Ажәҩан иалазар ишалац,
– Уи аҵаҟа ҳара ҳтәамзар,
Иабаҳҭаху алашара!
07.03.19

Ашәыта
(Авариант)

Былабжыш адгьыл
Иқәҭәон ашьшьыҳәа,
Бгәыӷрақәа қьаадын,
Иԥыбжәон бтәаны.

Имаҷын аԥхара
Ба бзыҳәа, са сзыҳәа,
Сгылан ба баԥхьа
Схьаа чҳаны.
Былабжыш адгьыл
Иқәын ишәытан,
Сгәаҵаҿ, сыԥсаҵаҿ
Ишәытан ианыз.
Ас исамсалха
Уаҟа изшәыда,
Адгьыл ианыҵру
Уи мышкы зны?
Былабжыш адгьыл
Иахьықәҭәаз аҭыԥан,
Аҵлақәа маҷхеит,
Ашьацгьы хәаҽуп.
Аха банҵәуаз
Ианыбҵаз ашәыта,
Уажәыгьы, уажәыгьы
Аныхра саҿуп.
20.02.09

Са сыԤхыӡ...
Сара сарӷьа,
Сара сарма,
Сара сықәла. Сыжәҩахыр.
Сара сшьа
Иацәцаз акәарма,
Абнаршәыраҿ амаахыр.
Сара сыжәҵыс,
Сара сқаруа.
О, илакәхаз са сыԥхыӡ...
Жәынгьы-ҿангьы
Сзырмақаруа, –
Иага нысҵап, иага схыҵп.
Сыкәашашьа
Збаз ачараҿ,
Аӡбахә рымоуп есымша,
Са саарыхуеит
Ҭынч махәҿала,
Аԥсны иқәысцоит аԥша.
Сара сажәа,
Сара сашәа,
Сеилаҳәашьа, сҽыхәа Бзоу,
Саҵакьысуа

Џьысшьоит ажәҩан.
Уи ба боуп изыбзоуроу.
Са сыбжьы,
Аԥсны иахыҵәаз,
Ҳазшаз дацын дмаӡаны...
Сара сымацәыс
Иҿыцәаз,
Алашара ҟаҵаны.
06.04.09

Ахьӡ -аԤша абаҳча
Ахьӡ-аԥша абаҳча ахьӡуп,
Ахьӡ-аԥша иаԥсоу иртәуп.
Зегь акоуп лабжышуп иацу,
Зегь акоуп гәырҩала иҭәуп.
Ахьӡ-аԥша абаҳча сҭалоит,
Уа рыхчнызақәа ҟаҵоуп.
Арԥарцәа, ҳа ҳашәа иалоу, –
Урҭ ҳаԥхыӡ аҿгьы иԥшӡоуп.
Ахьӡ-аԥша абаҳча ссируп, –
Уаҟа ашәҭқәа аҳра руеит.
Алабжышқәа рӡиа ирны,
Агагақәа цоит-иаауеит.

Изымбацыз амш агьама,
Амра, аԥшӡара закәу.
Аибашьра иацәыргеит иамам, –
Аиаша, зегьы ирыцку.
Иқәылҵозшәа лыҷкәын хызак,
Диахәыҭхәыҭуа ан дыԥшуп...
Иага ибаҳчаз аҭахызаргь,
Уаҟа ҳҵеицәа роуп ижу..
15.04.09

Сыхьӡ
Сыблакнотаҿ исзанын,
Сҩыза ҭынч ителефон.
Сизасуан сангәамҵуаз зны,
Усгьы саслон, игәра згон.
Сшақәымгәыӷуаз сара ҽнак,
Даасыцәгылеит уи хара.
Шәызсыргәаҟуазеи асҟак,
Сналагылт аџьабара.
Аха усгьы исзанын,
Сҩыза гәаҟ ителефон.
Даласгәалашәалон зны,
Зынгьы ҽаџьара сагон.

Аха аԥхын, аӡын цон,
Сышықәсқәагьы рылан уа.
Сара сашҭаҿ ашәҭқәа ччон,
Хыхь аҵарақәа ԥыруан...
Sez Abhaz-Abaza ädäbiyättän 1 tekst ukıdıgız.
Çirattagı - Уԥры, сара сашәа - 3
  • Büleklär
  • Уԥры, сара сашәа - 1
    Süzlärneñ gomumi sanı 3215
    Unikal süzlärneñ gomumi sanı 2081
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Уԥры, сара сашәа - 2
    Süzlärneñ gomumi sanı 3257
    Unikal süzlärneñ gomumi sanı 2014
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Уԥры, сара сашәа - 3
    Süzlärneñ gomumi sanı 3288
    Unikal süzlärneñ gomumi sanı 2090
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Уԥры, сара сашәа - 4
    Süzlärneñ gomumi sanı 2930
    Unikal süzlärneñ gomumi sanı 1830
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.