Latin

Иалкаау. Х-томкны. Актәи атом. Ажәеинраалақәа - 04

Süzlärneñ gomumi sanı 3199
Unikal süzlärneñ gomumi sanı 2034
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Сара исымоуп иахьа уи аамҭала,

Сара сышьҭахь дгылоит даҽаӡәы.
Аԥсҭазаара – ирҳәалоит, ҿарҳасроуп,
Кьаасроуп уи аԥацхаҿ шарԥазы.
Ашьха ду ахаларҭаҿ аанҿасроуп,
Уаҟа маҷк еиҭоукуазар уԥсы.
Аԥсҭазаара - зышьҭа нымҵәо ӡыхьуп,
Зашәа иалгаз имдароуп иара.
Гәырӷьаразаргь, абжеиҳан ихыхьуп,
Уашьцылацәар алшоит уи уара.
Аԥсҭазаара – ашьхаҟа наԥшыгоуп,
Хәыҷы-хәыҷла ақәцәанӡа снаӡеит.
Аха иҟоуп, иҟоуп иара шыҟац,
Са сҿы иҟан, – уара уахь ицеит.
Аԥсҭазаара – иуԥсахыз ԥароуп,
Гәхьаас иара узыҟалҵоит уаҵәы.
Аха уалзар, - хымԥада иушәароуп,
Уи ицсахырц дгылоуп даҽаӡәгьы.
17.02.2013

ИБАРГӘЫЗЕИ...
Ибаргәызеи Аԥсны иалҵны ицахьоу,
Араҟа иҟам уи иоуп зыԥсы зшьаз!
Аԥсны гәнаҳоуп, уи аншәарҭаҵәҟьоу иахьоуп,
Иршаҭаӡом, шьоукы иалырхуеит ашьа.
Уалҵ уцаргьы – ҭынч уахьнеиуа узтәару,
Уи уазхәыцуа цәа-цәашьушәа уӡыҭлап.
Ицырцыруеит, абжьас аблақәа ҵаруп,
Уафап акәым, уи уазымхаргьы ҟалап.
Аҭыԥ азы аӡы ирхәашьлап аӡәы,
Аҭыԥ аиҳагь дубап еиӷьызшьо ахьы.
Дгылоуп хаҵак: иаабап иҟало уаҵәы,
Егьи – иҟоу зынӡа инеигом ихахьы.
Ушԥарыцҳау, Аԥсны, исуҭеит агәырҩа,

Инеибарҵәо џьысшьоит шьоукы уеимакны.
Исыздырам уеиқәырхашьа иахьа мҩак,
Исылшозҭгьы уаргьы уалызгон Аԥсны.
Ишԥансыжьри Дырмит иажәа, ибаҟа,
Аԥсынтәыла зхы нақәызҵаз рыԥхьарца?
Заҟа гәнаҳа ҟасҵарызеи, мшәан, заҟа,
Усгәыдкылан Аԥсны уалганы санца.
Сеиҭымхазшәа сҟалеит, саблит агәырҩа,
Сдақәа ракәын – сцәаҿы иалаԥсоуп иԥсны.
Издыруазҭгьы уеиқәырхашьа иахьа мҩак,
Усгәыдкылан ҳдунеи уалызгон Аԥсны.
05.03.2013

АИААИРА АНЫҲӘА
Иацран амца саб иқәаҵа,
Иацран амца саб иҩны.
Ашьоура даҿын ахаҵа,
Ашьоура иаҿын Аԥсны.
Иацран амца аӡын хьшәашәа, –
Асы каҳауан иахак.
Уа иқәԥон ахацәа рашәа,
Ақәԥара иаҿын аҳақ:
Лаҭа иалаблыз
ашәҭыцқәа рзыҳәа,
Мартаз ихнымҳәыз
арԥарцәа рзыҳәа,
Ажәытәи-аҿатәи –
зегьы-зегьы рзыҳәа,
Усҟан ажәҩангьы
Ҵәыуон аҳәҳәыҳәа,
Аха иаҳзааган
Инрыжьит ҳа ҳзыҳәа,
Шьала икәабазаргь

Аиааира аныҳәа.
Ҳазшаз диҳәон ан-агәыраз,
Амца иалигарц Аԥсны.
Иаргьы ашла лаҳаҭыраз,
Лаԥхьа дгылеит аҳәа кны.
Иԥшьоуп аԥсуа-нарҭаа рашҭа,
Ҳарҭ ҳазшаз игәы ҳазҭоуп.
Ҳарԥарцәа ҽа тәылак иашьҭам,
Рхы назқәырҵо дара ртәоуп.
Лаҭа иалаблыз
ашәҭыцқәа рзыҳәа,
Мартаз ихнымҳәыз
арԥарцәа рзыҳәа,
Ажәытәи-аҿатәи –
Зегьы-зегьы рзыҳәа
Усҟан ажәҩангьы
Ҵәыуон аҳәҳәыҳәа,
Аха иаҳзааган
Инрыжьит ҳа ҳзыҳәа,
Шьала икәабазаргь
Аиааира аныҳәа.
15.03.2013

***
Ааԥынра ашҭа сшықәыз
Ԥҳәызбак дысԥылеит,
Дмырхәаган, дыԥшӡан:
– Акы сшәазҵаауеит,
Уи ԥхашьарам,
Сшәыҳәоит, иауазар,
Аҭакгьы шәымӡан!
Шәара шәышықәсқәа цеит иԥырны,
Ашлара ԥшӡазаргь,
Шәаражәит шәара.

Аха абзиабара иаша иазкны,
Шәара шәаҟәыҵӡом
Уажәгьы аҩра?! –
– Дыҟоуп ахәышәтәҩы, дыҟоуп Анцәа,
Аҭакгьы налысҭеит
Слыхәаԥшуа ԥшьаала, –
Аха иалшоит
Аԥсҭазаара нҵәар,
Уи еибаркымзар
Бзиабарала!
23.03.2013

АҴЫС
Хызаҵәушәа хыхь ихалан,
Ҵыск иацрасит ахьшьыцба...
Уи ахькаршәыз ҭынч ахала,
Агәы ҭыҵ ицон ишцац.
Имыршәакәа снеины ԥшьаала,
Сҵыс нанысҵеит снапаҟны.
Счабра иамысхыз, цахала,
Ахәра ҿасҳәеит иԥшааны...
Нас иԥрит ишалшоз ала,
Ажәҩанаҿ аҵар рацәан.
Ишԥассиру уи ианалоу,
Уа дахылаԥшуеит Анцәа!
10.04.2013

СЫШҞА ИҚӘЫМЛО УАҲА
Ааԥынра ааиуеит, абла еҵәоуп,
Ааԥын какаҷуп, иҿыхоуп.
Ааԥынра ааиуеит, ааԥынра ԥшӡоуп,
Ааԥын – уи иҵҟьаз аҽыхәоуп...

... Аԥхынра ааиуеит, шоуроуп зынӡа,
Иаршәит исықәыз ахыза.
Аӡыхьаҿ инеины иажәуеит шьыжьӡа,
Шьабысҭак ӡык аҭахызар...
Насыԥуп ҭагалан анықәло адәы,
Ихьҩажьуп, иссируп, ималуп...
Изаҳауада сара сҳәатәы, –
Тәамҩахә амаӡам алу...
... Аӡынгьы ааиуеит ус аханы,
Аӡын еиқәышла, лыԥхала.
Ажәҩан сықәыԥшуа сгылоуп ҽааны,
Аӡынгьы иацуп аԥшалас...
Аӡын, аԥхынқәа... Иааиуеит ицоит,
Урҭ ирымаӡам гәнаҳак...
Аха, ба бакәхеит, – шьҭа агәра згоит, –
Сышҟа иқәымло уаҳа.
12.05.201Ӡ

АԤХЫӠ
Аамҭа уи аҵх иамцәаан иагон,
Ажәпара иамаз, иахажьыз ашәшьы…
Ԥхыӡла, сахьышьҭаз рсахьақәа збон –
Слымҳаҿ иҭаҩуан ҩыџьа рыбжьы.
Сашҭа иагәыдлоз џьысшьон амшын,
Ешбеи Лакобеи сԥацхаҿ иԥшын.
Раԥхьа снагылан, схырхәеит сара,
Иԥхыӡу-ииашоу – исзымгеит агәра.
Сысасцәа уаҟа рлабашьақәа ркуп,
Ашлара иаҵоуп, амцагь еиқәуп.
– Дад, уҳаргәамҵит, аха иаҳӡом,
Ҳашьцәа – ҳазхылҵыз дук ҳагәра жәгом, –
Иажәақәа ҭынчын Ешба аҽны,
Аха хәыцрақәак дрыман дхәаҽны:
– Ҳаинышәҟьоит, ҳабжьара шәашьҭоуп акы,

Ҳа ҳакәхеит изхароу ӡбак шәанакы!
Ҳзыцәом, ҳгәаҭеиуеит. Ҳазгылом, ҳазтәом,
Ҳахьыҟоу лашьцароуп, лашарак ҳбаӡом.
Шәашьҭоуп ҳазлыҵыз, иҳалоу ашьа,
Ҳабацои иаҳнаҭар уи ҽа ҟазшьак?..
… Усҟан, ижәдыруеит ҽакын адунеи,
Усҟан уи аҳра аџьныш игеит.
Абџьар иарӡыӡон Кәыдры, Гәымсҭа,
Ахызаҵә иазымгаз рыԥсахәага ҭан.
Усҟан еибаҳҳәеит; ҳаԥсыргьы-ҳаԥсып,
Аха наӡаӡа ҳазықәԥап Аԥсны!
Уиала, сыԥсымзар, иҳалшоз ҟаҳҵеит,
Аха ацәҟьараҿ ҳашкыдыз ҳанхеит…
Днақәымчит усҟан Лакоба илаба,
Иуапа цыҩцыҩгьы ижәҩа иҭарԥан.
– Усҟан аԥазаҵә аб диҭиуан,
Ацқьақәа рҭыԥан агмыг диуан.
Усҟан ишәарҭан ҳара ҳбызшәа,
Усҟан аҳауа иаҩызан ажәак.
Аха шәыгә иалоу ҳҩагылан иаҳҳәар,
Ҳадгьыл иачычар алшон аҳәа.
Усҟан мҳаџьырра ҳдәықәлон ҩаԥхьа,
Ԥсыуак дҟаломызт араҟа иахьа!
Усҟан ҳаҟәыҵып, мшәан иахьагьы,
Аԥсшәа иахӡыӡо дыҟам аӡәгьы!
Усҟан ҳаҟәыҵып – имцозаргь хара,
Аԥсуаа мҳаџьырра иаҿуп ацара…
Усҟан еибаҳҳәеит: ҳаԥсыргьы ҳаԥсып,
Аха наӡаӡа ҳазықәԥап Аԥсны!
Уиала, сыԥсымзар, иҳалшоз ҟаҳҵеит,
Аха ацәҟьараҿ ҳашкыдыз ҳанхеит, –
Нестор Лакоба игәала џьбаран…
Сҿыхеит… Ашьшьыҳәа иаҿын ашара.
02.04.2013

***
Гхак ҟаиҵазар уеиҳабы, –
Аҭак иҭала ламысла.
Аҽгьы иаҵоуп ԥышь-шьапык,
Аха иалшоит ишьацәхныслар.
05.05.2013

***
Ашьабысҭа иашьҭалеит абжьас,
иаргьы ҩаҵҟьеит ирҳаны...
Еиҳа-еиҳа иагхон ирыбжьаз, –
Амра кыдын ажәҩан аханы.
Ашьабысҭа иашьҭалаз ахьӡеит,
Иҟалеит абжьасгьы азхара.
Алаҳәақәа уажә џьарак еизеит, –
Атәыҩақәа рымҵаԥсан дара.
Шьҭа шьабысҭак иашьҭалом лассы,
Адәы иқәзаргь шәкыла еиҵаҩҩы...
Абжьасҵәҟьагьы зны иҭәуеит аԥсы,
Аха иԥсы ҭәуама ауаҩы?
21.05.2013

***
Ох, икьыркьыруеит,
Ихәмаруеит аҽы...
Чара-уск ыҟоуп
Иахьа ҳара ҳҿы.
Ҳгәашәаҿ аҭаца…
Хысроуп адәны,
Дгылоуп ахаҵа
Лныҳәаҿа кны.
Иахылҵуеит ахылҩа,
Иахьгылоу ақәаб.
Длыцкәашоит ԥҳәызбак,

Арԥызба иаб.
Еиԥылоит, еивысуеит
Ачыси алеи...
Ирыԥхьоит ашьаԥахь:
«Сшәыкәыхшоуп, шәлеи!»
Ашҭа хазыноуп,
Илакәуп аҩны...
Ҳҭаца даԥшәымоуп
Уи амыш инаркны.
14.06.2013

БСЫЦХРААУАН…
Ба бнышәынҭра
ҳамх аҵыхәан изаҵәын, –
Изаҵәу зегь
сара ирыцҳасшьоит цәгьала.
Исцәагозаргь уи аус
иахьа, уаҵәы,
Акәша-мыкәша
уҭрас сашьҭалеит сара,
Бнышәынҭраҿы, сан,
иҭынчроуп есымша,
Ба быбжьакәын, –
слымҳа иҭасуеит, иразуп.
– Нан, уҟәышыз,
дуцыз, нан, Анцәа ҳазшаз,
Иҟоуҵаз зегь
бзиаразар, – иузыԥшуп...
Бара амла
ҳабцәагар ҳәа бацәымшәан
Уахгьы-ҽынгьы
акы башьҭан бааԥсаха.
Сылабжышқәа леиуеит
сыблагә иҭшәаны, –

Гәалашәароуп, сан,
ба бҟынтәи исзынхаз.
Сеиҭагылан
анышә шьҭасҵеит игәӡаӡа,
Џьымшьуп, џышуп...
уаҟа иалшоит зегь ҟалар.
Уа анашагь, –
уажә исхамышҭӡеит зынӡа, –
Аҵла иқәлан, нас
амҵәышә хәыҷқәа ҳнарклап...
Быкәша-мыкәша
иҟасҵаз ауҭра сҭан,
Садымхалеит уи
оумакгьы, изӡарым...
Ба бнышәынҭра
сызқәа надысҵеит еиҭа, –
Исымбеит ҳәа,
бсыцхраауазҭгьы ҟаларын.
18.05.12013

САРА ДСЫҲӘЕИТ СЫХААРА...
Сара дсыҳәеит сыхаара:
– Уааи, аҩны ҳаргылап.
Ҳашҭа иҭалап амра ԥхара, –
Асасцәа ҳарԥылап.
Ахьа иалхыз ҳаҩны-ҳгәара,
Ҳашҭа шьац еҵәараз!
Асас дҭалар дааԥса-дкара,
Уи ауха чараз!
Сыхаара илҳәаз ала,
Нас аҩны сыргылеит.

Исырҳаит са сқьиарала,
Ауацәеи агәылеи.
Сара дсыҳәеит сыхаара:
– Иҳааӡап ахшара.
Ашәа ацыз ҳара ҳгара, –
Нас иԥшӡаз ашара!
Рыуаҩышьа, рсахьа, роура,
Ныхақәаз, ишаназ!
Ҳара ҳада ҽаӡәы иоуран,
Иҟам ус ахшара.
Иқәын ашьҭахь ҳара ҳашҭа,
Адауаԥшьқәа раҳра.
Аӡә дубар, – егьи духашҭуан, –
Ахра еиԥшын, ахра.
Сара дсыҳәеит сыхаара,
Аӡыхь ыҵаҳхып ҳәа.
Аӡы хьшәашәа бзиоуп даара,
Шәҭыла ҳқәаҵа ҳхыбп ҳәа.
Аӡыхь ыҵысхит снапала,
Акәапеи ахаршәын.
Уи аӡыхьаҿ хәылбыҽхала,
Ҩыџьа рымза ҭаршәын.
Сыхаара илҳәаз ала,
Иҵысхит, данаҳәа.
Ирҳәоит знык избаз агьама,
Аӡашәа ишәызҳа ҳәа.
Уаҳа ҿылҭӡом сыхаара,
Хәыцрак далан даара.

Уи дазыӡырҩуан агара, –
Лашәа иаҵан хаарак.
19.11.2013

САЖӘЕИНРААЛАҚӘА ЗБЫЛУАН
Сажәеинраалақәа збылуан,
Еиқәырчаҟәан, ирацәан.
Урҭ схаҿы, сгәаҿы иаауам, –
Изыҩхьоу зегь иреицәан.
Абга сеиԥшын, сыџьбаран,
Абга аҵкысгьы сеицәан.
Зны-зынла ирфоит дара,
Анцәа ириҭаз аԥацәа.
Сашҭаҿ амца ду еиқәуп,
Уа сбылуазшәа збоит саргьы.
Сара хәыцрақәак сыркуп, –
Гәхьаас дсымаӡам аӡәгьы.
Ус, ладантә ицәырҟьан ԥшак,
Сшақәымгәыӷуаз уа зынӡа,
Сара сҩымҭа хәыҷқәа руак,
Хыхь ишьҭнахит ижжаӡа.
Ишцоз ԥсаатәшәа иԥырны,
Ҩнык ахыбраҿ инатәеит.
Уи аҩны-ԥшӡа ду ҷыҷны,
Уи аҽны ишьҭанаҵеит.
Хәыҷы-хәыҷла зегь еиԥкаа,
Ӷьычҩык амца данаргеит...
Иҟалазеи ҳәа ианҵаа –
Нас афымца надырбеит.
20.06.2013

ГАГРА ИАЛАГОИТ АԤСНЫ
Иугәыдкылоуп уара уга ҟәанда,
Иухагылоуп ушьхақәа ԥшӡаӡа,
Ушԥассиру, Гагра, сукәыхшанда,
Аԥсынтәыла амра, агәлаҵа.
Уаҟәыҵ, ажәҵыс, алакҩакра,
Уԥры, уахь ухы рханы...
Аԥшӡара иатәылоуп Гагра, –
Уаҟа иалагоит Аԥсны.
Рыԥсы уалоуп аҳцәа, аҳәынҭқарцәа,
Ӡынгьы-ԥхынгьы сасцәаны иуҭоуп.
Урҭ ашьшьыҳәа ага бжьыхаа иарцәоит,
Урҭ рыԥхыӡқәа лабҿабоуп, иԥшӡоуп.
Уаҟәыҵ, ажәҵыс, алакҩакра,
Уԥры, уахь ухы рханы.
Аԥшӡара иатәылоуп Гагра, –
Уаҟа иалагоит Аԥсны.
Дынхоит Аԥсуа, уаҟа ԥсыуа ҵасла,
Ԥсыуа ҵасла дхеиҵоит уи Анцәа.
Еибаркыми уи аҵеицәа дацла,
Ԥсыс ирхоугьы Гагроуп аԥацәа.
Уаҟәыҵ ажәҵыс алакҩакра,
Уԥры, уахь ухы рханы.
Аԥшӡара иатәылоуп Гагра, –
Гагра иалагоит Аԥсны.
Кәтол, 30.06.2013

***
Иҟоу-ҵәыуон аԥҭа ԥжәаха, –
Уи ахькыдызгьы харан.
Аԥшаваҳәазегь шьҭан ишәахха,
Уа дыхгылан нарҭаа ран.

Лысабицәа рышәҵа-рҩыҭәа,
Амра иалҭон иӡәӡәаны.
Шьҭа даргьы еибга-еизҩыда,
Ашҭа иҭалон еиманы.
Хьыӡрацара пату ақәын, –
Рашҭа ду ахь нас раара.
Иатәарымбоз Нарҭ хәыҷ иакәын,
Изыхьчоз ахәышҭаара.
Кәтол, 04.06.2013

АГӘАЛАШӘАРА...
Ибгәалашәома?
Ҳқәыԥшқәан ҳара,
Усҟан, аиашаз,
Ҽакын аҿара.
Ҳаиԥылон, ҳаивысуан,
Аҵыхәтәаны,
Ҳаҩыџьегьы аԥсшәа
Ҳҳәеит игәаӷьны.
Уи ашьҭахь иҿыхьҭаз,
Илеиуаз ақәа,
Аԥсшәа ахьсабҳәаз
Снаргон сшьапқәа.
Аха са сгәаҵа, –
Схәышҭаараҿы,
Амцажәла баҭәҳәеит –
Еиқәыларц иаҿын.
Ҽнак банысԥымла, –
Схагахон нас,
Сеиԥшын аҽ-ура
Ибналан ицаз.
Бшьаҿақәа ракәын, –
Рыбжьы саҳауан,

Бызхылҵыз сымбацызт, –
Амаҳәра зуан.
Сгылон, сгәаҭеиуан
Сныҟәон ҵхыбжьон.
Сыгәҭыха сызҳәомызт,
Цәгьа сыԥхашьон.
Сыҵыхқәа сырцәон,
Са сҷаԥшьаҩын,
Зны-зынла сқьышәаҿ
Иқәбон аҩы.
Бцәа садырҷаблан, –
Сыбӷьыцын сара,
Сышықәсқәа-сӡиас,
Иаҿын ацара,
Ба сышбызхәыцуаз
Сқәыԥшрагьы цеит,
Сӡышӡа, Ерцахә
Аханынӡа снаӡеит...
Слыхәаԥшуан сҩыза,
Дышлазаап ларгьы...
Ҳарҭ ҳалабжышқәа
Изгәамҭеит аӡәгьы.
Уажәыгьы дыссирын,
Дышәҭыцын, дыԥшьан
Аха уи аӡбахә
Сымҳәеит сыԥхашьан.
07.06.2013

МАҶК АНҴЫ
Аҩнаҭа лахҿыхуп,
Ашҭа ду лашоуп,
Ԥҳәызбак дықәуп, дныхоуп,
Анасыԥ дазшоуп.

Гарашәак, дахьықәу,
Абжьы лаҳауеит.
Рдәынакгьы ҿықәҿықәуеит, –
Акы иарҳауеит.
Ан илбоит дахьгылоу,
Лыӡӷаб дымраха,
Мҩа-ԥшӡак уи данылоит,
Иаалырҟьан уаха.
Гәыла дныҳәа-ныԥхьеит, –
Лыӡӷаб хәыҷ дырҳәеит.
Раԥхьа даара дгәырӷьеит,
Маҷк анҵы – дыҳәҳәеит.
Кәтол, 11.06.2013

***
Амш цәгьазар, –
Ибзиахоит, хымԥада,
Аԥҭа хылар, –
Нас ихыҵны ицоит.
Қәак аухьоума
Знымзар-зны ихымкәакәа,
Са сааизаргь
Амш цәгьа сацәшәоит.
Амш цәгьазар, –
Шьҭа уаҵәы иахымгакәа
Ибзиахоит,
Амра ҿыц иԥхоит.
Амш цәгьазар
Ибзиахоит, хымԥада,
Ауаҩыцәгьа, –
Дшыҟоу, ус дынхоит.
20.06.2013

АҲА, СЫҶКӘЫНЦӘА!..
Аҟәатәи ашкол-интернат раԥхьатәи
адиректор Леила Ачԥҳа илыхьӡынҩылоуп

Ҳашҭа шьацын иқәыршәыз,
ҳӡыхьқәа цқьан ара,
Амза, ҳшьацра иларшәыз,
ҳамҭоуп ҳәа иаҳшьон.
Бзиабаран иҟаӡаз,
усҟан Аԥсынра,
Аха уи иазылааӡаз
ашәҭыцқәа дыржьон.
Аха аԥҭа еиқәарақәа,
ҳӡыхьқәа ирхаԥеит,
Урҭ ирхыбит ҳкәарақәа,
ҳгәашәқәа ирыхшьуп.
Ажәҩан дуӡӡа иаҵалан,
амацәыс лагеит,
Уи лабжышуп иалагаз,
ан гәырҩала дшьуп.
Усҟан ажәҩан иалаҩит,
ҵаҟа иҟаз бжьык,
Бжьык ахызаҵә иацызго,
бжьык иҭҟьаз хҿаны.
Уи саркьалын, ԥшатлакәын,
иқәнацон ашәшьы,
Изтәыз дырҵаҩын, аха –
уи иахьа данын.
– Аҳа, сарԥар, сыҷкәынцәа,
абыржәоуп, уажәы, –
Бџьарла ҳадгьыл анасыԥ
аӡбара иаҿуп.
Аб еиҭамҳәа дрыцҳахеит,
ан илшәуп ашәы,

Ҳзырҵысуаз агараҿы
асаби дхәаҽуп.
Шәнеибац, сара сыҷкәынцәа, –
иӡыҭуеит сцәашьы,
Иҵегь, даҽа ԥсҭазаарак
ақәҵатәуп Аԥсны!
Нас иҿыцхоит аԥхынра,
нас ицоит ашәшьы,
Уи ҿааҳәырак аманы
иҟалом ҽазны!
Амца иалан лыҷкәынцәа
дрыцбылуан ларгьы,
Уи дыццышәха дықәыԥсон
шьала ишәыз адәы.
Игәы ҭрысны ҷкәынакгьы
днавамлеит џьаргьы,
Убри ауп изырхынҳәыз,
арԥар дара ртәы.
«Аҳа, сарԥар, сыҷкәынцәа,
абыржәоуп, уажәоуп… –
Иааҩуеит ажәҩан иалшәаны,
уи лара лыбжьоуп.
Усҟан уазын, хымԥада,
Аха шьҭа иашәоуп,
Уи ашәоуп имыцәаӡо,
Ақәԥараҿ иԥшьоуп!
АГХА
Авариант
Ҳа ҳаиқәшәеит иҿыцны,
Ҳашықәсқәа анца,
Схырхәан баԥхьа сгылеит
Избо агәра згом.

Маҷк еидарак иаҵан,
Быблақәа ҭааӡа,
Былахь акыҷыра
Гәыла исуанҭон.
Исызбамҳәеит усҟан,
Ҩажәак. Сыԥхашьон,
Урҭ бара банызбоз,
Исҿабон лассы.
Аха ба бахьыцәаз,
Сара сгәы ҷаԥшьон,
Бара бгәил хазынаҿ,
Иӡыҭуан сыԥсы.
Сыҵан ба бышәшьыра,
Уи ахьцоз сагон.
Быхәда хәыҷ сахаршәын,
Са сеихаԥсаны.
Сышықәсқәа рымшынаҿ,
Сгәалашәара стон,
Алу саҵырхызшәа
Сыҟан слаганы.
Нас ҳаиԥырҵит уаҳа,
Хаз-хазхеит ҳагәқәа.
Аҵыхқәа зегь реиҳа,
Иреицәан иаха…
Ажәҩан ҳашьҭаҵәыуон,
Лаӷырӡын ақәа.
Иаӡәӡәарц аҭахызшәа,
Иҟаҳҵаз агха.
10.08.2013

ААԤЫН ААЗАР АКӘХАП…
Иара
Ажәҵыс џьарк асахьа,
Ажәҩан ианҵаны,

Ашәа ҳәо аҷҷаҳәа,
Иҵаххит аҩны.
Лара
Ааԥынразар акәхап,
Сабаҟаз Сара?
Ԥхыӡла ажәҩан салан, –
Уаҟагь ааԥынран.
Иара
Ажәҩан уи насыԥуп –
Аеҵәақәа ԥшуп.
Бзиабароуп, кәицуп,
Са сгәаҿы иакуп.
Лара
Иҟалаз сыздырам,
Акгьы саҳаӡом.
Аӡәгьы са дысԥылом,
Аӡәгьы дызбаӡом.
Иара
Сҭалеит ааԥын ашҭа,
Исҳәари ашәас?
Ба бзықәшәаз аҩызоуп,
Уажә саргьы сзықәшәаз.
30.08.2013

***
Ажәҩан амра нахьысшьын,
Алашара ҟасҵеит.
Нас иназгеит дахьышьҭаз,
Ашьыжь иациз аҵеи.
Исҭеит, иҟаз наӡаӡа,
Иҩнеигалап ахан.

Ари ажәҩан ду амҵан,
Нас аԥхарагьы нхап.
СЏЬЫБА ИАНҬАМГЬЫ АМААҬ...
Сџьыба ианҭамгьы амааҭ,
Сахәаԥшуа сгылоуп асааҭ, –
Ԥшак иаанагозшәа уажәыҵәҟьа.
Сеиԥшуп иҭынчу аԥсаатә,
Сахәаԥшуа сгылоуп асааҭ,
Иснаҭои аԥҭа сазыҵҟьар?
Џьоукыхгьы сбеиазшәа рбоит,
Сыӡбахәгьы «бзиан» ирҳәоит,
Урҭ аманшәалоуп ашьыцра.
Сџьыбаҿ ианыҟам амааҭ,
Усҟан инықәҵан асааҭ,
Ибзаасхәоит ашәҭыцқәа ршьыҵәра.
06.09.2013

ШӘЫ - ГӘНАҲАК...
Иӡит аҽыхәа иаха, –
Иашҭа инҭыган иргеит.
Уи ашьҭахь уи аԥшәма дҿаҳан,
Дхагахеит ма деилагеит.
Гәҩарас дышьҭихит аӡәы,
Ҩызак дышимаз иӡоит.
Аха диҟәаҵуеит уаҵәы,
Аҩбатәи гәҩарас дҟаиҵоит.
Ахԥатәи гәҩарас дҟаҵоуп,
Аԥшьбатәи дцәырҵуеит уаҵәы.
Аха урҭ зегь маӡоуп,
Игхеит, дахоуҵап аҵәы.

Сшәыҳәоит, ижәбозар, шәгәы иҭаз,
Ҽыла адәеиужь ахьҭәу...
Гәнаҳакоуп имоу изгаз,
Имоуп шә-гәнаҳак изтәу!
07.09.2013

АМЦА ИАЦӘЫРГОН
Аеҵәа гәҭыхак азцәырҵит ашамҭаз,
Агәҭыха агәылоуп аҵаргьы рыбжьы.
Знызаҵәык шандаз,
Знызаҵәык шандаз, –
Лаҳәоушәа са сҿаԥхьагь инықәҳаит ашәшьы.
Иахысит аҳәаа, ихтуп маҟҿаҳәара,
Дҳақәлеит агәыла, ддәықәлеит Аԥсныҟа.
Иԥсыда-инхада?
Ажәҩан иаҳәароуп,
Аԥсуа дабаҟоу иԥсадгьыл аныҟам.
Амышә-хәы рықәуп, еиқәныхуп абџьарла,
Рылахьқәа ҿарҳәеит иҩежьу цахала.
Урҭ идырхиахит
Рыхәдақәа џьарла,
Аха ҳазшаз иахь изнеиру уи ала!?
Ргәаҵа инҭасуа иҳәҳәеит асаркьалқәа,
Нхыҵи-аахыҵи ргәашәқәа ирҭалан...
Амца аҿыкәшон
Амалқәа зегь рмалқәа,
Уи Аԥсынтәыла алгатәын шьала.
Амца иалыргон Лашеи, Ивани,
Ромеи, Ҳамзаҭи, Асҭандеи, Аслани,
Резои, Аскари, Адгәыри, Мкани,
Едемик, Фатима, Бесик ахаҵа,
Ашҭаҿ аҿҿаҳәа ирбылуаз Цаца,
Макьана «Радеда» зызкымыз аҭаца...

Усҟан ишәарҭан ҳӡыхьи ҳаҵәҩани,
Алабжыш иафон урҭ раби рани.
Аҳәсагь-ахацәагь хык иаҿагылан,
Амра иахаҳаит аԥҭақәа хылан.
Ажәҩан аҟынӡа –
Харан, ҳаракыран,
Адгьыл лаҟәыраҿ шьан излагылаз.
Анацәа рмыткәма иарҵәиуан, иархәон, –
Ҳаԥсадгьыл зыхьчодаз рыҷкәынцәа рыда?!
Ианҭахалакгьы, –
Урҭ рыбаҩқәа аархәон,
Рыԥсыбаҩ азыҳәа рхьымацәаз рыҭан.
Аха еиқәтәомызт, – анантәи-арантәи
«Шәнеибац» – ҳәа каҩуан, шәнеибац абџьарын.
«Шәнеибац!» – ахаан
Ианымшәац ҳарамрак,
«Шәнеибац!» – уи алаԥш ҳацәызмыхьчоз џьарын.
«Шәнеибац!» – уи ашьҭахь иамамшәа гәалак,
Амрагь аацәырҵит ԥаса еиԥш ԥшьаала.
Уи нахыс ҳамра
Анцәырҵуа-ианҭало,
Уи еиқәырхоушәа збоит ҳара хшьала.
Сшәыкәыхшоуп ҳҵеицәа Лашеи, Ивани,
Ромеи, Ҳамзаҭи, Асҭандеи, Аслани,
Резои, Аскари, Адгәыри, Мкани,
Едемик, Фатима, Бесик ахаҵа,
Ашҭаҿ аҿҿаҳәа ирбылуаз Цаца,
Макьана «радеда» зызкымыз аҭаца, –
Зда рымаӡамыз рыԥсқәа ҭины,
Амца иацәыргеит наӡаӡа Аԥсны.
27.08.2013

***
Ецы ҳаицырҵит, –
Иахьа бааиӡом.

Аҵых ҵәуон,
Амш бааӡон…
2014

АФОРТЕПИАНО АБЖЬЫ
Раԥхьатәи аԥсуа пианистка А. Ашьхаруа илызкны
Афортепиано ашьҭыбжь хәшәуп,
Иахәышәтәуеит агәала.
Амра ацыԥхь ала ишәуп,
Нас иқәҵоуп уи ала.
Афортепиано ашьҭыбжь хәшәуп,
Иахәышәтәуеит агәала.
Еиқәаҵәазар ан илшәу,
Наҟ илшәых уи ала!
Иаԥҵоуп ашәа Анцәа изы,
Бара бзы, са сзыҳәа.
Ашәақәагь ирхоуп аԥсы, –
Ашәа зҩыз даҳныҳәап.
Сара слымҳаҿ уи иаҳәоит,
Ҳадгьыл гәалас иамоу…
Зны ихьаҵуеит, зны иҳәҳәоит,
Уи – афортепиано.
Ашьҭыбжь ссирқәа еихаԥсоит,
Сыргәыбзыӷуа, ԥшьаала.
Аха урҭ сгәаҿы инаӡоит,
Бара бгәы-быԥсала.
Иарҳәала, нас, иарҳәала,
Бара бхьы напала.
Уи ашьшьыҳәа сагалап,
Ажәҩан салагалан.

АБНА ЕҴӘАРАҾ
Абна еҵәараҿ
Иҟоуп сыҩны...
Иҵыҵуеит ӡыхькгьы
Уи аханы.
Аҳра ҳәа аҳра
Рымоуп аҵар.
О, исҭахыҵәҟьоуп
Рыбызшәа сҵар.
Абнара иамоуп
Амышә, аҽа...
Сӡыхьаҿ ихшәалеит
Зны амзаҿа.
Амза рахәыцуп,
Амза хәыҷуп...
Ӡылаҳәак ҭасны
Искуеит ҳәа иаҿуп.
10.09.2013

АСҞАТӘИ АԤАРА...
Сԥара маҷмызт, агәра згон,
Иацнаҵон сылшара.
Бара бахь исыма сцон,
Исырҳаз аԥара.
Аха, нас, лассы инҵәон,
Беиҷаҳаргьы даара...
Аҭыӡшәаҵәҟьа басыргон,
Иабацеи ҳәа ҳԥара.
Уажә банынаскьа хара, –
Стәеит сазхәыцуа даара...
Мшәан, ибызҭодаз бара,
Асҟатәи аԥара?!
23.09.2013

АЖӘҨАН ИАЛАЛАЗ РЫԤСЫ…
Ан агәашәаҿ дышәзыԥшуп,
Анцәа диашьапкуеит лара.
Уи илхамыз бжьык лыбжьуп,
Даҽакуп зынӡаск лыԥшра.
Лылахь-лыџьымшь лӡатәуеит зны,
Ҳазшаз ишҟа лхы рханы.
Ҩыџьа лҵеицәа абџьар кны,
Аӷа иабашьуеит Аԥсны.
Дгәаҟуеит ан, лыԥсы лызгом,
Ибылуеит дызқәыз ашьац.
Ашәҭқәа ҩон, адацқәа нхон,
Уи уахык лыԥсы лымшьац.
Иман ус аӷа ҟазшьас:
Иабџьар даҵхон цқьа изаны.
Раԥхьа длеихсуан ан-ҳазшаз,
Настәи – иақәикуан Аԥсны.
Абџьар ҭҟьон, ашьа каҭәон
Иқәԥон анацәа рԥацәа.
Урҭ аиааира агәра ргон,
Уи иахьымӡазгьы рацәан.
Нас ицеит, уахык, шықәсык,
Ашықәсқәа зегь иреиҳаз…
Ажәҩан иалахаз рыԥсы
Ус ранаҳәон иҭахаз:́
Ан агәашәаҿы дыԥшуп,
Дбылуеит, избанзар дцәашьуп.
Дбылуеит, избанзар дцәашьуп,
Ан агәашәаҿ дыԥшуп.
03.10.2013

ИСЗЫМАРИАМ
Быхьӡ ансыцу – имариоуп,
Сымҩа, – уи харазаргьы.
Са саҿысуеит зегь акоуп,
Абжеиҳарак хразаргьы.
Быхьӡ ансыцу имариоуп,
Ашәа ҿыц ацәыргара.
Бареи сареи иҳабжьоу,
Аӡиас ду быргара.
Быхьӡ ансыцу имариоуп,
Ажәҩан ахь ахалара.
Сқәаҵаҿ ашәҭыцқәа ӡыҭуеит,
Бареи сареи ҳхарала.
Быхьӡ еиҭасҳәоит ашәаны,
Сыцәоит сышәҭқәа срылаиан.
Ҳанеиԥырҵуа ҳаиқәшәаны, –
Убри ауп исзымариам.
10.10.2013

***
Сеибашьҩуп ҳәа еибашьҩык,
Удгьыл дақәлар –
Уи дгаӡоуп.
Зтәылаз иқәԥо ауаҩы,
Еибашьрала дузгаӡом.
14.10.2013

СЏЬЫБА ЦОИТ АҴА ҬАԤСНЫ…
Сџьыба цоит аҵа ҭаԥсны, –
Исҳәо иашоуп, ихаҵа.

Аха ԥарак соур зны,
Иаасхәоит аԥхынтәи шьаҵак.
Сџьыба цоит аҵа ҭаԥсны, –
Зџьыба иҭам зегьы дрыцәшәоит.
Аха сџьыба иҭалар зны, –
Слафгьы сҳәоит, ахаршәгьы сшәоит.
Сџьыба цоит аҵа ҭаԥсны, –
Ианбасымаз сызхара?!
Аха исоур иара зны,
Ашәҭқәа лзаасхәоит сгәаԥхара.
Сџьыба цоит аҵа ҭаԥсны,
Сгәы ҭагылаӡом аҭра.
Аха исоур знымзар-зны,
Хымхәак иаҭәасшьон иара.
Сџьыба цоит аҵа ҭаԥсны,
Аӡә игра хазуп, иӡап.
Ԥарак соур сара зны,
Сангьы лнышәынҭра ҟасҵап.
Сџьыба цоит аҵа ҭаԥсны,
Мап, икылҵәаӡам иара.
Аха сылахь ус ианын, –
Уи сахыԥаӡом сара.
18.10.2013

ЕГЬАУРЫМ…
Егьаурым ачын уцәыӡыр,
Егьаурым иблыр уҩны,
Уцҳа зхыз аӡиас хыҵыр,
Уаҟа узырӡом уи аҽны.

Егьаурым амал уцәыӡыр, –
Ахьы, араӡын, абҩа…
Ауа-азла дуҵашьыцыр, –
Ус унеила, убла хҩа!
Ухы иакәыхша иуцәыӡыз,
Уи азыҳәа умгәырҩан.
Узықәгылоу амахә ҿыцыз,
Уақәымгәыӷцәалан аҩа.
Аха мрак еснагь иуцыз, Амра ҟәандоуп, амра хаауп.
Збызшәа зцәыӡыз иоуп изцәыӡыз,
Ацәыӡқәазегь иреиҳау.
29.10.2013

УИ ДЫԤСИТ…
Уи дыԥсит, акәыба дҭан, –
Дџьабаҩын агәыла.
Ҳаргьы ҳҵәыуон, – ус иахәҭан, –
Ҳақәҵуан, ҳнихагылан.
Аҳәса, зӡамҩақәа цәыԥԥыз,
Аҳәҳәара иаркаран,
Рыԥсы далырхуан иԥсыз, –
Иҭацәуан агәара.
Уи даныҟаз деибганы,
Дныҟәомызт шьапыла.
Мҩак, иаҳзымдыруаз данын, –
Ацәгьаҳәара илан.
Аӡәы дихәозшәа дижьон,
Егьи дхихуан иаӡар.

Игәра згаз ихәы ҟарҵон,
Дреилаҳауан аӡар.
Хаҵеи ԥҳәыси еиқәирԥон,
Уахьихәаԥшуаз дхаҵан.
Ииҭахыз зегьы дрыхьӡон,
Ииҭахыз диҭацан.
Уажә-аабыкьа ҭакәажәык,
Дыригазаап кәарак.
Убри иаҵәахуан уажәы,
Ицәгьақәа реиҳарак.
25.12.2013

АԤСАӠ...
Абна снылалеит жәаха,
Аԥсаӡ сашьҭан хәлаанӡа.
Ӡиан амза ашәахәа, –
Оҳ, ицәгьан аӡааҵра
Аԥсы ҭоушәа збеит асы,
Ашьҭыбжьгьы саҳахуан.
Ишкәакәаӡа акасы,
Аҵла иаханаршәуан.
Ашықәс Ҿыц аҳамҭа кны,
Иааиуан, гәыҟаҵаган.
Закәытә ныҳәоузеи Аԥсны,
Ашҭаҿ аԥсаӡ ада?!
Иҵаԥысҟон уи абар, –
Сыздәықәырҵаз сархо.
Аха уи ԥҟаны изгар, –
Ари абна ӷархон.
28.12.2013

ҼА ҞАЗШЬАК…
Ари амш ба бҟазшьа иаҩызоуп, –
Аҽаԥсахуеит уажәы-уажә иара.
Жәхьан аҟынӡа уи мырхәагоуп, хызоуп,
Ашьыбжьышьҭахь иаҿуп ақәоура.
Ари амыш беиԥшуп, ари амза,
Ацха илшьым сара сҟазшьагьы.
Аха ҳакоуп ҳаҩџьагь ҭынч, избанзар,
Уи ҟазшьоуп ҳәа иԥхьаӡом аӡәгьы.
22.01.2014

БАН ИЛАБЫМХӘАН...
Ажәлар рашәа иаҿырԥшны
Бан илабымҳәан,
Бабгьы иабымҳәан,
Бзиа бшызбо
Аӡәгьы иабымҳәан.
Ашҭа бҭыҵ бара,
Аҵх бҽалакны,
Уа сыԥшуп сара,
Сҽыхәа сҽавакны.
Ицәа ҭынчыз баб,
Лыцәа ҭынчыз бан,
Ба бандәылҵуа аламҭалаз.
Шарԥазы бышцаз,
Нас идырп ушьҭан,
Башьцәа иранаҳәап аԥшалас.
Баб ианиарҳәалк,
Бан даныҳәҳәалк

Гәылак дналгап
Уаҟа ҳныҳәара.
Нас иаргамахап,
Ҳаҩџьа ҳамаӡа,
Уи маӡам, аха
Гәнаҳак амаӡам.
Ицәа ҭынчыз баб,
Лыцәа ҭынчыз бан,
Ба бандәылҵуа аламҭалаз.
Шарԥазы бышцаз,
Нас, идыр ушьҭан,
Башьцәа иранаҳәап аԥшалас.
АУАХӘАМАҾ
Ауахәамаҿ
Даҽа ԥсҭазааран зынӡа, –
Уаҟа иҟаз
Амра рыцын, иразын.
Ажәҩан иалсны
Ашәа ҩналон ихааӡа,
Уи ашәамызт, –
Уи хәышәтәыган зегьы рзын.
Зынӡа иҭынчран,
Ауахәамаҿ зегь лашан,
Цәашьык авараҿ игылан
Ҽа цәашьык.
Ҷкәыни ӡӷаби
Имҵахырхәон ҳа ҳазшаз,
Иман апап
Ажәҩан иалҵыз аӡә ибжьы.

Ауахәамаҿ
Ауаа рыблақәа ҽакын,
Урҭ ахьгылаз
Рыгәқәа реисра уаҳауан.
Урҭ хәыҭхәыҭуа
Ҭынч ацәажәара иаҿын,
Ан-Мариа
Лысабигьы изҳауан.
Хәыҷгьы-дугьы
Ауахәамаҿ еиҟароуп,
Ӷари беиеи
Еицырхалоит уаҟа ԥсык.
Зегьы рзыҳәа
Аиҵашьыцра ԥхашьароуп,
Зегьы ирымоуп
Даҽа сахьак, даҽа бзык.
Ауахәама
Уи аԥшӡара иаҳҭынроуп.
Уахьынаԥшлак –
Ашәҭ, агәыӷра, аԥсынҵра.
Ишԥабзиоу аԥсҭазаара,
Уи абжьоуп,
Зегь раԥхьаӡа
Угәы иқәыҩуа ара.
Ара ҭынчроуп,
Уқәла дгылам дхараны,
Аӡә ихьаа, –
Ҽаӡәгьы ихьаауп, ибла ҵруп.
Аӡә изыҳәан
Егьи дыҟоуп дыхраны, –
Аԥсынтәылан
Знык абас иҟалару?
26.0I.2014

АҚӘА
Ашла дгылан дрыҳәон,
ажәҩани Анцәеи, –
Ишабон араҟа
зегь аӡба иакын.
Иҭабеит аӡыхьқәа,
ашәҭыцқәа канӡеит,
Иудыруеи уи ашьҭахь
қәак аур Аԥсны.
Ираҳаит уи ажәа
ажәҩани Анцәеи, –
Пату иқәуп уаҟа
аԥсуа иахьагьы…
Амацәыс аҷын еиԥш,
ажәҩанаҿ иԥҵәеит, –
Адгьыл ахаҽаҳәа
иқәҭәеит ақәагьы.
31.01.2014

АШӘИ
Гәылак дсымоуп, ашәира дазгагоуп,
Данышәиуа –
Ажәҩан ахь дыԥшуп.
Лара лзыҳәа – ашәира ԥсыршьагоуп,
Аха ахьшь
Абжьами илыбжьу?!
– Арбаӷь аиԥш иҿуҭуаз аки-киҳәа,
Аху-ху ҳәа
Ушуаз ласбаҵас! –
Ус дышьҭалоит уи ҳазхылҵыз диҳәан, –

Абас иҟоуп
Сара сгәыла лҵас.
Ишԥалҭаху уи сышгылоу скаҳар,
Насгьы амца
Иалаблыр сыҩны.
Ари ашҭа иқәыҩлар аккаҳәа,
Лара лышәи
Аҵх агәҭаны.
О, бшәила, нас, ба бшәила беиҭахан,
Бышәи ала
Сӡыхьгьы ҭарбала!
Сыбшәиуазаргь бара ҩаха, хаха,
Ашәи неиӡом
Ус иахьабалак.
Аҵх агәҭан баҭәҳәа сара сцәымза,
Уа лашьцароуп
Усгьы, бызбаӡом.
Сара бышәи сыцхраауеит, сыԥсымзар,
Акгьы зхарам,
Ашәи дагаӡом!
Ашәи акәӡам – сышықәсқәа сыдражәит, –
Аха сгәаҵа шыҟац
Еиԥш инхоит.
Бара бзыҳәа – ԥсҭазааразаап ашәи,
Аныҳәароуп
Сара ԥсыс исхоу.
Ишԥасцәымӷу, шәанаџьалбеит, ашәи,
Уи сагоит
Цәашьушәа са сӡыҭы.
Сшәоит уи ашәи иԥнаҵәар ҳәа ашәа, –
Асабигьы
Дҿыхар ҳәа дшәаны.
01.02.2014

***
Агәаҟреи агәаҟреи еицылан,
Ирылҵит игәаҟуаз ашәак.
Ацәқәырԥ хышқәа еицылан,
Ирылҵит ашәах.
04.02.2014

… АҼНЫ ИНАРКНЫ…
Саныԥслак аҽны инаркны,
Сҭынчуп, шәашҭа сҭалаӡом.
Снышәынҭраҿ цәашьык аркны,
Сныжьны шәцаргьы салаӡоит.
Ныҳәа дук ахь сыццакуам,
Сашьҭаӡам исшәысҵара.
Фатәык ыҟам сыц иакуа, –
Исзықәыргыл шәыџьара.
Ԥарак сашьҭалом зынӡа,
Исҭахӡам ауадагьы.
Ԥсыхәа сымам уахь сымцар,
Уахь ахаҳә ауазаргьы.
Сҩымҭа ҭшәыжь ҳәа скәалкәало,
Са стәаӡом аҭыжьырҭаҿ.
Сиҳәар, алуқәа зкәало,
Хаҳәк азицәып сыжырҭа.
Сызқәа ҭыԥаҿ маҷк иҭшәоуп,
Иагуп алашарагьы.
Снышәынҭра хәыҷ ахәгьы шәоуп,
Аҵлақәа рыбжьараҿы.
Апап ирласны иԥшьоит,
Наҟ, џьанаҭҟа снеирагьы.
Уаҟа иқәиан рыԥсы ршьоит
Ҭынч аӷаргьы беиагьы.
Саныԥслак аҽны инаркны,

Сашьҭам агәабзиара.
Аџьныш ашәҭқәа ишәмыркын,
Наҟ иԥхьашәца феиараа.
Сара тәымџьара сцаӡом, –
Аԥсынтәыла самалоит.
Аԥсынтәылан уаҩ дыԥсӡом, –
Дыцәоит ауп ҳәа гьамала.
10.02.2014

АОЛИМПИАДА
Ныҳәа ссируп уи – аолимпиада,
Аԥшӡареи ахаҵареи иртәуп.
Уи насыԥуп, аха убри адагь,
Шәҭыкакаҷла ари ашҭа ҭәуп,
Уаҟа иқәуп урҭ ахацәа рхацәа,
Зевс-Адугьы илаԥш урҭ ирхуп.
Рымҩа ԥиҵәоит аџьныш, аҳарамцәа, –
Адунеи лашозар иҭахуп.
Аԥҭа хыҵуан ажәҩан хыхь иахажьыз,
Ицон ашьха сыԥсақәа ӡыҭны.
Аибашьра ҳәа ззырҳәоз аӡбахә кажьны,
Згәы нхахьаз еинышәон уи аҽны.
Ашҭа иқәын рыжәҩахыр еидкылан,
Ажәҩан ду иаԥҽыхақәан дара.
Урҭ ахаҳәқәа дырхәашон напыла,
Урҭ рыхҿа ахьырышьҭуаз харан.
Ныҳәан иҟаз ари ашьха амҵан,
Ҷкәыни ӡӷаби гәырӷьон, ашәҭқәа ркын.
Ицәаӡомызт уи аныҳәа амца,
Уи, сыԥсымзар, дара ргәы иакын.
Амза – ашәҭқәа рыгагаҿ иӡаан,
Аеҵәақәа ҳацкәашарц иаҿын.
Амаалықьцәа ықәгьежьуан аҵаа,

Рышьҭа нрыжьуан арԥар асаҿы.
Амра ҟәанда – ашьха ӡышқәа рҭаца,
Аԥҭа цәыш иаԥылан иарҳауан.
Наҟ – ижәытәӡоу ари адгьыл аҵан,
Ԥсыуа гәҭыхак ашьҭыбжь саҳауан.
Аха, ицон, ицон аолимпиада,
Ахаҵареи аԥшӡареи иазҳәоу.
Даҽа ныҳәак ыҟамызт уи ада, –
Даҽакала ажәҩан еилаҳәоуп.
Аха иқәҵуан ааԥын еиԥш ашьшьыҳәа,
Уи – ҳзышьцылаз, ҳара ҳгәы иаԥшьыз.
Инаскьалгон Хьыбла уи аныҳәа,
Ажәҩан ду азыӡырҩуан лыбжьы.
09.02.2014

***
Ахшара дзауз леиԥш
ажәҩан еилгеит,
Ахшара даиуит –
адгьыл кәашеит.
Аӡын иннажьыз
схьаа сыхгеит,
Раԥхьатәи ашьыжь
ажәҵыс иаршеит.
Ӡышьҭақәак цәажәоит
уа аҷҷа-ҷҷа,
Иалшоит уажәыҵәҟьа
Sez Abhaz-Abaza ädäbiyättän 1 tekst ukıdıgız.
Çirattagı - Иалкаау. Х-томкны. Актәи атом. Ажәеинраалақәа - 05