Ауаа разқәа - 8

Ашәахәа ҳныруазар…
Аӡхыҵреиԥш иандәықәло ажәлар еижәыланы,
Раӷәра рзымкуазар?..
Шьҭа игылеит аҿар, даара еиныланы,
Урҭ рыбла хыркуазар?..
Дара ирҭаху акәымкәа, ҽаџьара имҩахызҟьо,
Марӷьаԥалқәак рылазар?..
Аҟамч иашьцылам аҽы, аҟамчы анахырҟьо,
Ишшәарҭоу рдыруазар…
Абзиа иашьҭоу, урҭ абзиа рԥылауеит,
Агәаӷь ӷәӷәа рымазар…
Аҽаҵәахӡом ҳамра, икаххаа игылауеит,
Ашәахәа ҳныруазар…
15.11.2014

***
Ҳхьаақәа ириааиуа, изырԥсыҽуа,
Мчык ҟалар…
Ианамуӡах, маҷк ихызҽуа,
Шьоук ҳахьӡар…
Ҳа ҳазҿызгьы зынӡа ишмыӡуа,
Агәра аагар…
Ҳара иҳаиӷьу нас ишцәырҵуа,
Ҳацәымшәо иаабар…
Ижәдыруоу, амра, аԥсҭҳәа иахьрыло,
Измыршәо?!.
Уи ианыруеит амза шгыло,
Иара анҭашәо!..
15.11.2014

Ба снаскьабгон…
Ба снаскьабгоит саршьны,
Уаҳа сзыжәуам уажәшьҭа…
Скьаҿгьы сыжәҩа инахшьны,
Наҟ инсыжьуеит шәцуҭа…
Агәра згомызт сшашьуаз,
Баша сақәгәыӷуан схы…
Бҩыза лыжәҩа зшьышьуаз,
Зынӡа ифеит сыԥсахы!..
Ларгьы баша дыччон,
Кагь лымбозшәа ҟаҵо…
Сара сгәы еиҟәыҷҷон,
Цқьа дыздыруан дзыццо…

«Ба бхы аӡы ҭыршаны,
Арахь бзаазеи, гаӡа!
Шьаҿак уи игәра ганы,
Иҟабымҵароуп зынӡа!»
Са сашьыҵәҟьаз џьышәшьон,
Аха исымжәыцызт сыхшыҩ!
Са шәымҿы шәызсыршьшьон,
Сара саваҩуан шәҽыҩ!..
Хыхь Еҵәаџьаа еикәаџьџьо,
Сымҩа дырлашон урҭ…
Бара баша сбыршәон:
«Уаха изымхәмарт уфурҭ!»
Сара исҳәаз шәмаҳаи,
Ииҳәоз шәасҳәеит ҭынхак…
Митә ҟалама, аҳаҳаи,
Сфурҭ аӡажәзар уахак!..
21.12.2009

АПАРОДИАҚӘА
Быҽбырҵәаҳәт бара!..
Ибҭахызар, ашьха схалан,
Сҽалсырбгап сара!
Ибҭахызар, аӡы сҭалан,
Сҽасыршьып убра!
Терент Ҷаниа

Ас сабахәо, џьым, са схала,
Быҽбырҵәаҳәт бара!
Икылырҳәҳәан бԥынҵа хәылбыҽхала,
Бныҵабоит џьара!..
Бсырчагәышьон зны лаҳала,
Счеиџьыка ббахьан…
Сыжь зҭаз акалаҭ бнахала,
Быхгара бфахьан!..
Бзиа избоит ҳәа атама ҟәазқәа,
Брықәлан ибыршәшәеит!
Урҭ иргәылҵыз уеидрак азна,
Агәаӷьқәа аҩныҟа изгеит!
Сҵәақәа абаҟоу, сҳақәа абаҟоу,
Срасагь аӡбахә сҳәом!..

Ааҵәак азна скакан бҟәаҟәеит,
Уӷәк сџьынџьыхәа збом!..
Лыԥсы рылоуп ҳәа архьынак иаҟроу,
Акәҷарақәа бзаазгон!
Узықәшәаз закәи ҳәа, иарбан гәаҟроу,
Шьоук абз садыргон?!.
Ипахә-пахәӡа счаӷәазалқәа,
Бқьышәқәарҿ иӡыҭуан!
Брыҩноушәа Кремльтәи азалқәа,
Зынӡак беикәаԥхауан!..
Зныкымкәа арыжәтәгьы самшьи,
Аха сахнамԥааӡеит сыхшыҩ!..
Исцәеиламгакәа Дӷамшьи Тамшьи,
Кәыдры сбыхьӡеит банысцәыҩ!..
Са споетуп, сышәҟә адаҟьа,
Еихыршәшәо иаартла!
Бықәтәан кәтолтәи бца ацалаҟьа,
Аҟәаҟа бааԥшла!..
10.11.2014

Ирбаз ртәуп!..
Снацәкьарақәа быкәаҿ еимдоит,
Ирбаз ртәуп!..
Рушьбеи Смыр

Снацәкьарақәа быкәаҿ еимдоит,
Сеидру изышьҭоу…

Сгәы мыжда баша исырдоит,
Ирбои иахьҭоу?!
Араҟа саԥшәымам сара,
Араҟа ссасуп!
Снацәкьарақәа аҿуп абылра,
Изымцо иҭасуп!
Исышәҭ иҟалозар уажәшьҭа,
Арахь исҭахуп!..
Иҭаҳазшәа ахықә, аԥсҭа,
Иҭаршәны иҵәахуп…
Снацәкьарақәа срыҳәеит еиҭагьы,
Шәымҭак сыргарц!
Ҩ-жьаԥшқак рыгәҭаҵәҟьа саргьы,
Снаган сдыртәарц!..
Хи-ԥси роуп иҟоу мшәа ара,
Ԥсраказ ирымуит!
Снацәкьарақәа схымхәыцт сара,
Рҽаларԥа иркит!..
Асҵәҟьа жәбахьоума, зынӡак,
Иҳабжьалт аҭыӡшәа!
Ламысҵәҟьакгьы рмоуит хәыҷӡак,
Рҽырҵәахт ианшәа!..
Аӡсашьа цқьа идызмырҵаз,
Са соуп агаӡа!..
Снацәкьарақәа лыкәахь иахьцаз,
Изымхынҳәт зынӡа!..
09.11.2014

Аӡ иасҭахьаз бзиарак сыхьӡеит!..
Ҳпоет, ҳҵарауаҩ Владимир Занҭариа ақалақь агәҭа
маланыҟәала дышнеиуаз, алыцәҳа дыхҭаркит… Уи урҭ
дышрылҵзи, ихигази, акритик леишәацәгьа-бааԥсӡақәа
ирылашәаз, соуп зҳәо поетк ихимгацт!..

Анкьа аиҳабырарҿ исымаз «Волга»,
Иабаҟаху, исыҵхны ирҳаҳаит!
Усҵәҟьа сынхар ҟалозма, нас, долга,
Ихәыҷу маланыҟәак сыхәҳаит…
Ақалақь агәҭа ианыршәлан сышнеиуаз,
Алыцәҳа санырба еихеит!
Ех, зшьапқәа ԥҵәаша, убри ауп сзыргәаҭеиуаз,
Уаҩы симбаӡакәа сҭахеит!..
– Са скандидатуп, насгьы сдоцентуп,
Ишәымуҵәҟьозар, сдокторуп, џьым!..
– Уара ууаҩ татоуп, убригь процентуп,
Уҳашьҭал, зынӡаҵәҟьа уаҳшьрым!..
Ус аламала схы рысҭозма алыцәҳа,
Смаланыҟәа шьҭыхны сыкшеит!..
–Уҽкыдумҟьан џьым, апоет, уара арыцҳа,
Иахьа амш уара иутәым,уаҿашәеит!..
– Ах, уара алабаа, сыцҳәа усырҳәозма,
С-«Волга» санақәтәаз, сумбеит!
– Алыцәҳа шәыхьчароуп ҳәа хыхьынтә уҳәҳәозма,
Иазхоит, уажәшьҭа акыргьы уҽырбеит!..
Ахаҳәи амҿыхәи араҟа акрубома,
Абӷанҷҵәҟьа рҭихьеит иҟәшәаны!

Абасҵәҟьа сыргәыҵаҳәҳәан рҭыҩрахь сыргома,
Ҵарауаҩк, поетк сыршәаны!..
Кыр ҳаибарбылгьеит,кыр ҳаибаргәаҟит,
Хаԥыцлаҵәҟьа исыцҳар смуӡеит!
Сыззымдыруаз дарбан, Гәдоуҭеи Аҟәеи,
Аӡ иасҭахьаз бзиарак сыхьӡеит!..
Бара ахса, Ҟәараса!..
Мҩаду ԥшӡак банылан,
Банцо быҿҟьаса,
Бызҿысҭуеит гәаныла,
«Баангыл, Ҟәараса!»
Вахтанг Аԥҳазоу

Гәаныла, гәаныла,
Знык сбыҳәеит, беимса!
Бысзымԥшааит лаԥшыла,
Бысцәыӡт с-Ҟәараса!
Асаба сҿарчыҵәҟьан,
Бысԥырҵыр суӡом!
Ибдыруаз, саныҵҟьа,
Аӡәы лзыҳәан схынҳәӡом!
Бмап-чапқәа сымбароуп,
Бчабреиԥш иҵәахы!
Бызгароуп, бызгароуп,
Иԥҵәаҵәҟьеит сгәахы!
Иҭсыжьт агазеҭгьы,
Иҭсыжьит ашәҟәгьы!..

Иреицәаз абуфеҭгьы,
Иазаамхәеит, разҟны.
Сҩызцәа инеимҵырԥаан,
Исымҟәыҵкәкәан иргеит!
Абазк иара азыҳәан,
Иббазар, избеит!..
Ҳаиқәшәап хәылԥазыла,
Амза анҭашәо!
Бахьамбо ҽаӡә ила,
Бигар ҳәа сымшәо!
Сызцәажәом ироуны,
Сбырӷьазкт, ахса!..
Бымҩашьарц, ирхоуны
Беимса, с-Ҟәараса!..
08.11.2014

Ҳаӷеимшхароуп схаҵа иҭаҷкәым!..
Ақәа ыцәоуп, сԥенџьыр ахы надҵан –
Сыбзиабаҩ,
Схаҵа уибаанӡа уҟаз,
Уаниба, сындәылцан ашә наиркып!..
Гәында Кәыҵниа

Уа ҽырцәа ҟаумҵан уара ақәа,
Са схышәаҿ асаркьа уахьыкәкәа,
Мшәан, суада уҩналарцу еиҭа,
Схаҵа уааибеит, ҳаӷеиҭа!
Уи иҭаҷкәым убас ибааԥсуп,
Уҽӡа, наҟ уҽаларшә са ссуԥ!
Акагь ҟамлаӡазшәа усфап,
Уиԥыхьашәар аҵкыс, иучҳап!..

Ақәа, уара бзиа узбауеит,
Аха схаҵа ианҳаҵих, ҳаишьуеит!
Имырбакәа ус усшьышьуеит,
Усҭахӡамшәа зынӡа дызжьауеит!
Шьҭа иудырып ақәа уара уус,
Думкыроуп аӡәызаҵәык усс!..
Уара ажәҩан аанужьит са сзы,
Сыхиоуп ухаҵкы сцаразы!..
Уҩнал, сара схышә, игәаӷьы,
Араӡны иахҭнысҵоит ахьы!..
Амала угәы иҭоумкын иакәым,
Ҳаӷеимшхароуп схаҵа иҭаҷкәым!..
11.11.2014

Ибшәыз, ибшәымыз, зегь акоуп!..
Уи аҵкы ԥшӡа цәгьаӡа ибнаало,
Иаҵахыбҩо рацәахеит!..
Бышԥеиҿартәу бара агәнаала,
Сылаԥш алҟьан зегь абахьеит!..
Енвер Ажьиба

Сылаԥш алҟьеит ба быҵкы,
О, иабаз сызҳәом, игәыӷьит!
Сыҭра сҭыбымцан, бхаҵкы,
Саргьы схаҵамкәа, исыхьи?!.
Мап ацәыскуам, иҵәахтәуп,
Аха иқәсыргылоит зҵаарак,
Изшаз исасуп, ба ибтәуп,
Ҳқьышә изықәрымшьуазеи хаарак?!.
Бцәа-бжьы снадыбҵар саргьы,
Быҵкы хҩеижьааҵәҟьа сеицәоума?!

Убра иҟалааит, нас, сыԥсрагьы,
Ҽа шәышықәса сцар ҳәа бшәома?!.
́
Аха иӷәӷәоуп макьана сгәаӷь,
Сцәеижьгьы сақәиҭуп, саԥшәымоуп!..
Канфеҭла иааӡоу, бара ахәырҭлаӷь,
Мап аныбк, ибеиӷьугь дсымоуп!..
Ҽыԥныҳәа бысҭом, ибшәыз, ибшәыз,
Уи салыԥшны зегьы збарҭоуп!..
Схахәгьы каԥсеит, сажәыз, сажәыз,
Аха лапҟьа икақәхаз еиԥш сшәарҭоуп!..
30.04.2013

Уи быҭауадрагь чхьарԥҵас ибыршәып!..
Бқьышә патырқалқәа ирылоуп сыԥсы!..
Енвер Ажьиба

Аӡы иагааит сара исымоу зегь смалқәа,
Уаҳа иаасзымгәӡуазар лқьышә патырқалқәа!..
Иагәыдылҵааит, нас, лангьы лнышәгәалқәа,
Ицҟьашәҟьа илзықәҵозар смашьына абарбалқәа!..
Ҳара анхаҩцәагьы бзабаак ҳмырбаӡакәа,
Ҭауад-ҭыԥҳак ашәаӡеиԥш дмырпыҵӡакәа!..
Шьоук рча есымша ахәша зақәуи,
Исашәҳә иаахҵәаны, изакуи, изакуи?!.
Аԥсҭа иҭызгахьоу амҿы чарак иазхозар,
Иҿысххьоу ачаи Мгәыӡырхәа хнаҟьозар!..
Жәымз ирҭагылоу леиԥш, сцақәа қьуазар,
Сҳаԥшьақәа ирҭамӡо схәыл-ҟаԥшь сырҵәуазар…

Суаткеи сҩи анхәеи ҭацеи реиԥш еидгылоуп,
Ашәишәи ауаҭәа, о, сыԥсы агәылоуп!..
Мҟәыба кәапеила амаҷар-хаа бсыржәып,
Уи быҭауадрагь,чхьарԥҵас ибыршәып!..
Бымаҵ рымушеи, ианхәома, иабхәома,
Нас ибызкамыжьуеи, Џьырхәома, Џьырхәома?!.
Баша бҽырԥагьала, шьҭа издыруеит быгә иалоу,
Шәыҩн амра ҭагьалан, аарлоуп ишхало!..
Ба быгага аџьареиԥш исхадыргылааит с-Ҷыжь!..
Амра цара наҟ инасхыжь,
Быблақәа сырхыԥшылоит Ҷыжь…
Сергеи Агындиа

Усҟан сара схылԥарчгьы аҩ ирымфацызт,
Баргьы балахәмаруа бықәын бкәырҷыжь…
Быхцәгьы аҽаҵыхәеиԥш иԥшӡан, ихыбмырффацызт,
Ахәыҷреи аҭыԥҳареи беимаркуан, са с-Ҷыжь!..
Усҟан дара аҭыԥҳацәагь цқьаҵәҟьа срымбацызт,
Ба ибцәысҵәахуа егьсымам, алаԥш сацәшәон…
Аӡәгьы бызгоит ҳәа ҵоуп дысмыркаацызт,
Аха иреиӷьыз Жәыргьыҭтәи адухьфҩы схышәшәон…
Сабдугьы уи ашықәсан иҭиит икамбашьқәа,
Сыԥхӡаша изгозма, ҟәрышьқәак сиҭеит саргьы…
Апроспектаҿ санрықәшәа, о, сыӡӷабцәа, срашьқәа,
Марожник, марожник рзаасхәеит даргьы!..
Усҟан уи агәаӷьра усҵәҟьа имариазма,
Са сҩызцәа рџьыба аҵа анҭыппуаз!

Ех, аӡӷабцәа рхыхшьа сара уажә избазма,
Исгәалашәоит урҭ алапҟьеиԥш ишҿсырпуаз!..
Зны сылаԥш ихнахуан, зны сажәа ихнахуан,
Зны жәеинраалак рыкәа ирыцәҭаршәны срыцәцон!..
Уи аҭәарҭа илашәаз акәицеиԥш ибылӡахуан,
Шьҭа исцәызгода анысҳәоз, ҽаӡә иахь икәараҵон!..
Сара шьҭа ԥхыӡлоуп аӡӷабцәа сышреиҩаӡо,
Зны ҽыхәак сақәтәоуп, зны инаадиуа агәыжь!..
Ԥақәашьааи Аҟәааи сырҭахӡоушәа санеимаркӡо,
Ба быгага аџьареиԥш исхадыргылааит с-Ҷыжь!..
04.05.2013

Мгәарҭаҿ иҟоу, угәы умырҭынчцәан!
Мгәарҭаҿ иҟоу сыҷкәын…
Гунда Сақаниа

Мгәарҭаҿ иҟоу сыҷкәын ибжьы саҳауеит,
Иацәажәара сналагар, мырхәацҵас дырҳауеит!..
Сара споетессоуп, џьым, ахьӡ сырҳауеит.
Ас сықәзаауама, шьҭа сҽырбауеит!..
Удәықәлазар, уааи, иубап ҳдунеи закәу,
Изакәытә демократиоу, изакәытә мҩоу ҳазқәу…
Ҳуадақәа аҵәҵәаҳәа иркылсуеит ақәаршҩы,
Аиҳабырагь аиҵбырагь идсырбахьеит аӡәырҩы…
Схаҵа ак иоуҳәар дгәаауеит, исызшәа аток,
Исҭоубоуп, инапы ишамкыц уи амолоток!..
Аҟәатәи Администрациа ашә ҵсырхаахьеит,
Ажәохәтәи аразмер аҵәымӷ сзааргахьеит!..
Ашыҵырбел еиԥш срыӷралан ианрысымҭа ҭыԥ,

Быԥсы иамаз ҳәа, иааган икарыжьит ахыб!..
Аха еиқәыбгаша, ицәаакыз сыҭӡамцқәа зшьыхуада,
Уи атаджикгьы, мап икыр дызшьыхуада?!.
Арахь жәеинраалакгьы акәкәыҳәа исыцрыхауеит,
Сыхьӡыла Кәыҵниаԥҳа аусурахь ҳәа дсыхауеит!..
Ҳрыхьӡом, иахьахәлаанӡа ҳарҿуп апрезентациақәа,
Иҳадыргало закәызеи,
ашәҟәқәа ҳәа, апровокациақәа!..
Уара уоуп сзықәгәыӷуа, сыҷкәын, сгәырӷьаҿҳәаша,
Иахьа иааспарпарыз,
мгәарҭаҿынтә аара угәаԥхашам!..
Аха сзыгәжәажәо еилукаап, ушҟәышу збауеит,
Уаб иеиԥш аоппозициаа усцәыргар ҳәа сшәауеит!..
24.02.2014

Сԥаҵа џаџа!
Сычҳара зегь ҭрыкәкәа ижәит,
Иҿымҭрала…
Заира Ҭҳаиҵыкә

Шьҭа дхәыҷума, шьҭа дажәит,
Дмаҷым қәрала!..
Сычҳара зегь ҭрыкәкәа ижәит,
Иҿымҭрала!..
Амшқәа дреигӡаӡом зынӡа,
Аҵхқәагь бналоит!
Амзеиҧш дцәырҵуеит дразӡа,
Нас дынҭалоит!..
Гәаныла ҿысҭуеит: «Ухынҳәы,
Уахь аужәроуп!

Иугарц унасыҧ еикәарҳәы,
Улапҟьа уршәроуп!..»
Ҧыҭк сиргәаҟыр иҭахын,
Сҧаҵа џаџа!
Ибыз акәзар цәгьашәа ихын,
Дымцәажәеит баша!..
– Уа быжь-ӡыки, нас бжьы-шьхеи,
Са сырхыԥрааит!..
Мшәан, баша бышьҭа зсырхеи,
Еиҭах бысцәыҵԥрааит!..
– Ус ахьԥоуҳәо, сдомыжьхан,
Сга, сутәызааит!..
Амала саӷәра сҿаумрыххан,
Аарла иукызааит!..
Уи даныччо аҽыгә-ҽыгәҳәа,
Исхыҵәоит ԥхаррак…
Ҳҳақәа анлеиуеиԥш, абық-бықҳәа,
Сгәырӷьоит даара!..
«Сԥаҵа џаџа!» – сыҽхәалап,
Сыԥшуп сигаанӡа!
Санду лкәаҷаб еиԥш дбыллап,
Игаз нҵәаанӡа!..
03.11.2014

Бара мшаԥахьы бцоит…
(Схазы апародиа)
Уаҵәы мшаԥны, иахьа ашьыжь Ачадараҟа сышцоз
сыбла зықәшәаз аԥҳәызба илызкны…

Бара мшаԥахьы бцоит, сара – баҳара,
Насыԥ змоу аӡә дыҟам ба баҟара!..
Избоит, ибықәымшәеит акгьы аахәара,
Бҭаацәа ашьҭазар акәхап быгә иахәара!..
Ус ауп ишыҟоу џьым, ауаа нагақәа,
Сара рыцҳа исзыԥшузеи, – сҽагақәа!..
Ашьац ԥҟаны салгаанӡа исышьҭалоит,
Сӡахәақәа ирықәлаз амаӷқәа идыркалоит!
Иахьа сҟәыд аҭыԥ ылхны исбаҳароуп,
Сыдгьыл ҟадыџь маҷкгьы иҭаҳароуп…
Арахь сҵыбра ахьыласҵо сымкәакәаӡац,
Акәытқәа ирбаргьы иҟоуп ирхәахәаӡарц!..
Избоит сара сбывсны сахьнеиуа,
Бара бнацәхыԥқәа шшәу иуаркалеиуа!..
Усымбароуп арахь ҳәа ахаангьы уаҳа,
Ибыршәхьазар акәхап ирууаа ббаҳа!..
Аџьа аусаз аума, нас, бан бзылааӡа,
Аҽагеи бареи шәеиԥырҵит, шәеишьцылаанӡа!
Абрантә бдухьфҩы Ачадара инеираҳа!..
Бышсызхьамԥшуа шыздыруагь, сеидру сызбеилаҳа!..
Бара мшаԥахьы бцоит, сара – баҳара,
Насыԥ змоу аӡә дыҟам ба баҟара!..
19.04.2014

Исумырбан, исумырбан, уа уҭаԥсааит Џьырхәа!
Аҿаҩаҿы – уара,
Агаҿа – сара!
Альбина Анқәаб

Уҽхәала нас, уҽхәа, уҽхәала нас, уҽхәа,
Унхозар Џьырхәа, унҵуазар Џьырхәа!
Ажь уоур ирацәаны, уааӷраԥало ихәа,
Иҟьацаанӡа ихәала, нас асок еиҵыхәхәа,

Исзаага икархәхәа, изыжәлап исҿархәхәа!..
Ара иахьасуа аԥша, ахәхәахәхәа, ахәхәахәхәа!..
Са гаҿала сааӡамзаргь, шьҭа сацәҟьалеит Џьырхәа!
Уџьмақәа абгақәа ирфеит, уцәқәагь ргеит еимрыхха,
Иаанхаз усгьы иубаӡом, наҟ иаҿалеит Анхәа!..
Сзықәургәыӷыз абаауго, абгеи ақәыџьмеи ианрыхәха.
Урышьҭаз уахь уқәасқәасуа, аҳәынҵәа-баа уагаха!..
Зны акарпыжә еиԥш угәхьаазгоит,
нас усыршәуеит хагәха,
Ухы акәмаҷыраҵәҟьа ԥҽырҳәагь
сшәоит, жәладуқәак рҭыԥҳа!..
Зегь ириааиз амшаԥы кәтаӷь еиԥш,
иуҭахызар ирҽхәа,
Исумырбан, исумырбан, уа уҭаԥсааит Џьырхәа!..
19.05.2013

Аӡәы лкалҭ схы занысҵари?!.
Иҟоуп аҳәсақәа амаалықь иеиԥшу,
Зныҳәара ҳалоу, ҳаԥсы еиқәзырхо…
Дуԥылааит аҩыза, амҩан ушнеиуа,
Шьири дыстәындаз, гәаныла иузырҳәо!..
Дмитри Габелиа

Иҟоуп аҳәсақәа уԥсы зегьы ҭызхуа,
Уааргәамԥхеит, уцәа ккаӡа иухызхуа!..
Убыз ашахеиԥш иахан иуҿызхуа,
Алаҳарҭ ацәеиԥш, укьаҿгьы наушәызхуа!..
Рыбла ԥаџьԥаџьқәа рыла ухызхуа,
Рҵыхәа аауҿаршәшәаны, уԥара зегь нызхуа!
Аџьымгьыр бзиа иеиԥш, уџьыба иҭызхуа!
Ех, урҭ аҳәсақәа, абга ирыхәхаша!
Сара сзыҳәан аӡәгьы илзаамгеит гәырӷьаҿҳәаша!

Лшьапқәа ааиҵылымхуаз
аӡә дсыццазҭгьы Џьалнӡа,
Агьама лкыргьы здыруадаз сымгьалымҵаа!
Аӡәы лхы-лҿы зегь ақәԥсан цәгьашәа аканқәа,
«Ҳаиццап,-сҳәеит,-аҩныҟа, уажәшьҭа ҳмеиканкәа!»
Аха лхәы сфазшәа, лыбла паӷьақәа кылылцан,
Ҳәымсаг ӡлачла дсышьҭалеит,
акакеиҳәа сдәылылцан!
Изуа-исҳәо сақәымшәо,
схьагәгәа аҩныҟа схьаҵгәышьеит,
Џьма цыркьушәа исыдхалаз,
сразҟ зынӡа имыхәмаргәышьеит!..
Сеидру,сеидру, изқәысҵари, лахьынҵоума, џьалума,
Аӡә лкалҭ схы занысҵари, хьыла иҭәума, ҟәџьалума?!.
21.05.2014