Latin

Аҵеира - 2

Süzlärneñ gomumi sanı 3119
Unikal süzlärneñ gomumi sanı 2117
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
ads place
Аӷәра зкырц зҭаху аҽыҩ.
Кәтол. 16.03.2004

АЖЬЫРНЫҲӘА
Знык ҳазхьаԥшзар,
Нас ҳацәхьаҵуам,
Ҳамҵаныҳәоит уи аԥшьа.
Напы цқьала
Анышәаԥшь иалхны,
Иазҳархиап уи аҳаԥшьа.
Аҩы цқьа ҭаҳҭәап
Ажьыргәыц иалхны,
Иԥхеиԥхеиуа еилыхха.
Уныҳәаҿа аанаҳкылап
Злыԥха ҳаура, есуаха.
Иаҳзымдыруа ҳаҭоумҵан,
Зегь реиҳа зымчу Ухаҵкы.
Хьанҭара дук ҳаҵаумҵан,
Аҭыԥ ԥшьа иазырхынҳәуп ацкы.
Кәтол. 13.01.2004

АМШЫН ЕИҚӘА
Зны уцәқәырԥоит угәрымуа,
Хьарч-хьарч – даҽазных.
Узыргәрымуа ԥшоума,
Иуԥырхагоу даных.
Иуҽԥну Аԥсынтәыла,
Ашьханӡа инаӡоит.
Иазыҟоу гәырҭәыла,
Аҵеицәа ирыхьчоит.
Умшын ҟәара аҳәаа,
Ихьчала уцәқәырԥо.
Иқәыло изы ирҵаа,
Агыгшәыгцәа зхарԥо.
Идырҭәып ҳаԥсадгьыл,
Аҵеира иаԥсоу.
Ирыхьчап уи нап адкыл,
Аҭынчра азкаԥсо.
Очамчыра. 07.04.2004

ХӘЫСА ИКӘАРА
Идырӡыз аҭыԥ ахьӡ иазкуп
Урыцҳасшьоит Хәыса икәара,
Уӡышьҭра уахьҭыргаз мҩабжара.
Лаӷәашьи Бзанеи аҩ-ӡрыбжьара,
Аԥсаа азноугон аҽаҩра.
Удырҵәиин Лаӷәашь уарҭеит,
Уԥсы цқьа зҭаз уҭҳәа уҭганы.
Хьаас урыман, иагьазгәарҭеит,
Хаҭала уздыруаз иҵабыргны.
Зынӡа уанырхит Аԥсны ахсаала,
Аха ҳгәаҵаҿы уаанхоит.
Ужәытә ӡхьышьҭра уҭалап ԥшьаала,
Уажәы уӡхықәаҿ ауаа нхоит.
Кәтол ақыҭа уара урдыруан,
Џьоукы удырӡырц рҭахын.
Уи азыҳәан жәпаҩык гәрымуан,
Умҩа есқьынагь ухьӡ ахын.
Агәра згоит ҽазнык ахсаалаҿ,
Изну санаԥхьо иахьарбоу.

Ԥаса ушрыхәоз еиԥш анхараҿ,
Уҭысла, уҭысла уҽырбо.
Кәтол.15.04.2004

СИҾАГЫЛОУП АМЦА АЦРАЗҴО
Исылшоз ала снахо, снаҵгәо,
Иахьанӡа иаазгеит сыԥсҭа ахықә.
Са сызхысыз, са сызҵысыз,
Шәарҭ ишәысҭом рыххатәыс.
Шьаҭанкыла са сыззааиуа,
Аиаша шәасҳәоит, анцәа иныс.
Нерон иакәзар уи зыԥсадгьыл,
Амца ацразҵаз иазгәышьуа.
Аԥсуа иакәзаап нас еиқәхарцаз,
Аԥсны зыԥсадгьыл зыхьчауа.
Ирықәымӡааит Аԥсны аҵеира,
Ахақәиҭра иазыԥшыз.
Хашҭра рықәымзааит, ҳәарада,
Уи азын зшьа кашыз.
2005

АԤСЦӘАҲА ИАХЬ
Иҭабуп ҳәа уасҳәоит иахьанӡа,
Иахьсуҭаз аԥсҭазаара азин.
Сазымхәыцкәа имҩаԥызгазар ак уаанӡа,
Аҭамзаара шьҭасҵоит уи азын.
Сынарцә ҳаиқәшәозар мышкызны,
Иуасҳәап аиашаҵәҟьа шшоу.
Ишыҟоу аиашара мжьыжькны,
Ҳазԥырҵыз адунеи ахьлашо.
Схы уқәкны ауп сышцәажәо, аԥсцәаҳа,
Иаԥсам уара уусқәа зызку.
Иԥсҭазаара имумхын уаҳа.
Еилымкаакәа дызусҭоу, дзакәу.
Анцәа иишаз ауаа зегь уааԥсыроуп,
Еилых ҟамҵаӡакәан ишеит.
Ацәа уалҵроуп, уааԥшыроуп.
Ус акәзар, иҟьаҟьаӡа ишеит.
ЏЬАНАҬҞА
Уҩнагәышьаз уԥацха,
Иҵкьыҿхьазаргь ахаҭа.

Иҿҵәахьазаргьы угәаҵӷа,
Ицқьаз угәаҭа.
Уаԥсуара уахымсын,
Уламыс умфан.
Сзашьҭоузеи ҳәа умхысын,
Ухы иахьакәым иумырхан.
Уизыԥшыз аԥсцәаҳа,
Уиԥыл хаҵаҵас.
Ушнымхо дырны уаҳа,
Уицца ишумоу уқә-уҵас.
Џьанаҭ иҟаларцаз
Ахьы ахьыршо уԥсаҭа,
Адәы уанықәу уаԥсазароуп
Хьык ухаҭа.
Исаҳәа нас уи дарбану,
Адунеи иазынхаз.
Уҵаауазар иарбану, –
Ауаҩ иажәа акәзаап иҭынхаз.
Кәтол. 03.06.2005

УЛГАП УТҞӘАНЫ
Лыԥшӡара ухнахуеит,
Афрангь еиԥш уеихнахуеит,
Уқәнаҵоит наҟ убылны.
Жәҩан ахь ушьҭнахуеит,
Ушьа уда уҭнахуеит,
Уқәнаҵоит наҟ ухәаҽны.
Лыбла агәы ахаара,
Иухьымскәан ахала,
Узалҵуам лшоура абылра.
Ухәыцрақәа дрылоуп,
Дрылҵуам уахала,
Иуҭахуп еснагь лбара.
Зныктәи лцәа ахьысра,
Аҵықьҳәа ахысра,
Иузаҩызахап, ҳаит, анцәа иныс.
Угәы уԥсы лырҭынчып,
Уԥсҭазаара лҳәынҷап,
Насгьы улытҟәап уи нахыс.
Агәыӡера. 09.07.2009

ЗЕГЬЫ ИАҲУАЛУП
Хықәкыс иҟоу аибашьраҿы,
Акы заҵәык – аиааироуп.
Ашьаарҵәыра аилашыраҿы,
Хаҵаҵас азнеироуп.
Агәымшәара, афырхаҵара,
Аԥсуа есқьынагь илан.
Иԥсадгьыл ахьчараҿы,
Аҳәаҭыхла дгылан.
Иара изын ималуп,
Иан дзыхшаз – иԥсадгьыл.
Зегьы ирзеиԥшны иуалуп.
Ахьчараз нап адкыл.
Ихьаҵыз аӡә дҟамлакәа,
Хәаԥсакгьы даҿашәароуп.
Хьаасгьы уи дҟамҵакәа,
Ԥхьаҟа ҳцалароуп.
Аԥсадгьыл агәы иҭыхо,
Ҳәарада, ихьанҭароуп.
Зегьы иаҳзеиԥшны иаҳныхо,
Жәҩақәҵала иаагалароуп.
Агәыӡера. 08.07.2009

АНХАРА
Аамҭа аарҩароуп,
Амра кашуеит.
Инамыцхәны ишоуроуп,
Анышә еиҟәыҷҷеит.
Ахәрақәа анызҵоз,
Аԥсҭҳәа ихнаҩеит.
Ацәаакы ишьҭнахыз,
Қәаны иканаҭәеит.
Адгьыл игәаҟуаз,
Дгьыл ишабоз,
Ахәрақәа еинылеит,
Сыла ишабоз.
Аԥсабара дырҿыхеит,
Иааиз аԥсаа.
Сгәы аҳәауа исыхеит,
Анхарахь сара.
ЗЕГЬЫ УРЕИӶЬУП
Аԥша иасуа амшынгәы шьҭнахуеит.
Уи иахылҵуеит ацәқәырԥа.

Аԥшӡара ауаҩы дыхнахуеит,
Иаша иазнеиуеит аҟәара.
Зныхгьы игәаан аҭра иҭыҵуеит,
Ауаҩытәыҩса даршәаратәы.
Ишнеи-шнеиуа аҽарҭынчуеит,
Иҟанаҵоит уи иара атәы.
Ашьха дуқәа ирҽыԥныҩлоит,
Ашәах ҟәашшӡа наҿарчны.
Ашьхеи агеи ус еигәныҩуеит.
Ус иҟоуп адунеи шаны.
Сымшын Еиқәа, зегьы уреиӷьуп,
Иуҽԥну, убасҵәҟьа – с-Аԥсынра.
Кәтол

БЗАНА
Иҟоуп Бзана еиԥш аӡыхьқәа еиуеиԥшым,
Иара урҭ аӡыхьқәа иреиԥшым.
Иҟан аамҭа аӡқәа анҭабоз,
Зыԥсы ҭаз зегьы аншабоз.

Бзана аӡы акәын зыԥсы ҭаз,
Араҟа аԥсҭазаара еиқәзырхаз.
Аԥхын ихьшәашәаӡа иҿацоуп,
Аӡын иҟәандаӡа иԥхоуп.
Ицқьоуп ииашаҵәҟьан, иагьбзоуп,
Бзиа изырбогьы убри азоуп.
Алеишәа бзиоуп, иџьбарам,
Аха знык имгәааргь ауам.
Знык изқәызҭәаз иара аӡыхь,
Ахаан азы ихьуам ахыхь-гәыхь.
Ирҳәоит аӡышлақәа иажәыз,
Џьанаҭ дагоит ҳәа Бзана зжәыз.
СГӘЫ ШЬҬЫЗХУА
Уабаҟоу мшәан, сымза каҷҷа,
Сгәыр ахьынкашәаз сзырбоз.
Еиҵәаџьаа ракәзар, ицәырҵаанӡа,
Икаххаа асар рымҩа сзырбоз.
Ус анакәха, са слашәхазаап,
Иауазар ашара саазыԥшып.

Уа амш ашара иазыԥшызаап
Шарԥы еҵәа акгьы мҳәакәа,
Ус ашараҿ аҽанаӡа.
Аҽыҳарак амра ицәырҵыз,
Иагьсанаҳәеит сышлашәхаз.
Уи сара оумак ихьаазгом,
Егьаурым, нас, са слашәыз.
Сгәы шьҭызхуа уоуп, Сыԥсадгьыл,
Хақәиҭрала иҭәыз.
АХӘЫШҬААРАМЦА
Ахәышҭаараҿы амца анеиқәу,
Шаҟа угәы аҵанӡа иарԥхозеи.
Иаҭахызаргьы иԥхынразааит,
Шаҟа хәыцра еизнагозеи.
Аҵх иалыршан иахьеиқәу,
Уи аԥхарра ду ахылҵуеит.
Амра алсуазар уи алашарахь,
Ааԥын, аԥхын ашәҭқәа гәылҵуеит.
Хкы-хкыла исзеиқәыԥхьаӡома,
Адәыкрынқәа, нас агәил...
Иҟаҳҵазеи мбатәыс оума,
Рҳәоушәа рыхқәа шьҭыхны игылт.

Иссирҵәҟьаны аԥсҭазаара,
Омашәала еиҿартәуп,
Ҭынч, тәымкәан зегь ракзаара.
Адунеи зегь азыԥшуп.
2004

АШӘЕИҚӘАҴӘА БЫЛАҲӘОУП
(Иҭахаз аибашьҩы имонолог)
Ҳаԥсадгьыл иажәлаз дымцан,
Сымцар ԥсыхәагь ыҟамызт.
Ашәеиқәаҵәа былаҳәоуп, сан!
Издыруан: сыдагь дбымамызт.
Ҳабацәа рыԥсадгьыл былуан,
Аӷа хәымга иҿагылатәын.
Ашәеиқәаҵәа былаҳәоуп, сан!
Бысзыԥшуп биарҭа былатәан.
Саҭахын азоуп сзишаз Анцәа,
Сыԥсадгьыл ахьчара азыҳәан.
Сагьзалихыз ҳабацәа рцәа,
Сызцазгьы аибашьра сгәы азыҳәан.

Ахы цаҳәцаҳә кырцхҵас илеиуан…
Ашәеиқәаҵәа былаҳәоуп, сан!
Сҩызцәеи сареи ҳжәылан ҳаицнеиуан –
Убасҟан акыр бысзаԥсан.
Сыԥсадгьыл азыҳәан сҭахазар,
Ашәеиқәаҵәа бзылаҳәои, сан!?
Исхарам, нас, уаҳа сбымбазар…
Сан! Саҭабымҵан, сан!
Кәтол. 16.03.1994

АԤСУА ФЫРХАҴА
Иҿыцәааит ихәышҭаара,
Еиқәылом уаҳа амца,
Дыцәом аԥшқа дҭахәхәа,
Ашәшьыраҿ ахьаца амҵан.
Имбацызт изхара,
Дызхылҵыз иԥсадгьыл.
Ашәарҭа ианҭашәа,
Иаԥсуара дагьадгылт.
Мычла уи дыӷәӷәан,
Фырхаҵаран уи илаз.

Дагьаҩызан аҭоуӷан,
Диҿагылт ижәылаз.
Ихымҭа ӡәыр дзацәцозма,
Дцон ԥхьаҟа джәылан!
Дхьаҵыр ма иҟалозма, –
Иԥсадгьыл ибла ихгылан!
ԤХЬАҞА
Иҳазҭада ҳарҭ аԥсыха:
Ҳаӷа иаҳамҭароуп ԥсгаха.
Еишьҭаҳцалап еишьҭахәхәа,
Иагьырхаҳҵап урҭ аҟәҟәа.
Уаҳа изҭамло ҳа ҳахкаара,
Иҵаҳцалароуп аккара.
Иҳарӷәӷәароуп ҳара ҳгәара,
Ҳаанымгылароуп Аҽгәара.
Иҳаӷоу зегьы нырҵәаны,
Ԥхьаҟа ҳцароуп ҳаиханы.
Лассы ҳнеироуп Егры аӡиас,
Ихы хаҳсоит аӡә даниас…
Ус иагьыҟалеит Аԥсны –
Ҳашҭа шьҭаҳҵеит иԥссаны.

Ҳаӷа уажәшьҭа Аԥсны даным,
Ҿыцха дҭажьуп џьаҳаным.
Лабра – Егры. 21.09.1993 – 03.10.1993

УГӘЫ ИАЛЫМСЫН, АҨЫЗА
Иахьа хәлаанӡа амҩа уангылоуп,
Арахә ԥсымҭә еиԥш ужаҳәо.
Ауаа рышәқәа урылагылоуп,
Хәлар иумԥыхьашәо рҳәазо.
Зегьы иреиӷьуп ҿымҭ урҿыԥшыр,
Аԥсны азыҳәан кыр иаԥсоу.
Урҭ уара, иҟалап, иузымԥшыр,
Ицалароуп ԥхьаҟа ишцо.
Угәы иалымсын, аҩыза,
Уажәшьҭа уаангыларгьы цәгьаӡам.
Дуҭахызар амҩаныза,
Уалҵ узлажьу агәамсам.
Уааҟәымҵӡакәа еиҵоуҟәаҟәо,
Уара иџьушьоит ус инхо.
Иахьа еиԥш избахра сыҟоуп,
Уи мышкы зны ушҭанархо.
Очамчыра – Маҷара. 15.04.1994

***
Иахьа еизигоит аӡә амалыжә,
Ихаҭа издырӡом шаҟа имоу.
Иибалак зегь дырхьынҳалоит,
Анцәа иахьгьы дыгәрымуеит, уи моу.
Дгылан дрылаҽхәоит аҩызцәа,
Икәша-мыкәша, иара иҩызцәа.
Иҭашәашт мышкы зны имра,
Иалацәажәашт иуаҩымра:
Ишеизигоз ауаа рыԥхӡаша,
Дагеит џьаҳанымҟа иаша.
Ҿыцха дасит адамра хыла,
Дыжны илгеит уа-ҭахыла.
Адәы дықәызҭгьы гәык-ԥсыкала
Ауаа рзыҳәан илшо ак ала,
Дҩашьахуазма, ҿыцха ицаша,
Данымзаауаз амҩа иаша.
Бабышьра. 08.07.2001

***
Аџьар рахь дкылсуеит уи, дҳәынҭқаруп,
Иԥшра, исахьа дпаҭырқалуп.

Ибз цҳафыруеит, афрангь иаҩызоуп,
Уцәа ухнахуеит уи ҳәызбада.
Данудгыло уара дуҩызоуп,
Дҭынха дууп уара узын, ҳәарада.
Дануҿцәажәо иԥсы уиҭоит,
Иараӡәк иакәушәа агәыраз.
Дануԥыло дагьуеихырхәоит,
Уагьыҟаиҵоит ныха қәырас.
Гәык-ԥсыкала аԥсшәа уеиҳәоит,
Ушьҭахь ала унапқәа ҿеиҳәоит.
Ажәак ала, уқәхра дашьҭоуп,
Уи дуаҩума? Мап! Дгьангьашшьҭроуп.
Кәтол. Лаҵара, 2001

***
Ишәасҳәари иахьала, аԥсуараҿ џьым,
Ижәбац ауп иҟоу – иҟам-ианым.
Уашьҭазаргь иубом иахьа аҿыц,
Ажәытә еиԥш иаҿуп зегьы зҿыц.
Изныкымкәа ианысхьеит ас еиԥш аҭоурых,
Иаабац ауааԥсыра, абиԥарала еиқәных.

Нхарала еиқәшәоума згәарақәа ҵшәаау?
Ирыхьзеи, иаҳҳәеит ҳәа, ирхашҭма ишуаау?
Иабарго ҳаԥсадгьыл шьҭыхны, ирҳәазо?
Аизарахь икылсуа зкәымжәы шьҭарҳәазо?
Игәырӷьо аныҳәақәарҿ иасуеит атрышә,
Уахгьы-ҽынгьы аԥсуара иарҭоит анышә.
Рыхәда иахажьуп жәлар рыхьтә рахәыц,
Иразҳәогь аӡә дыҟам: «шәгәы шәынҭахәыц».
Ирызгәамҭакәа игылап урҭ рышьҭахь аҿар,
Ҳәаццышәла еиҿызҟьо рдац-ԥашә, ршьаҟьар.
Раԥсуара абаҟоу, иабаҟоу рхаҭа?
Ицәгьахааит ззырҳәо ракәхеит рыԥсаҭа.
Ԥсоу. 28.10.2001

УҲӘАН-СҲӘАН
Агәарбжьара ибжьаршәны ицоит,
Уахынлеи ҽынлеи иубаӡом.
Бгахәыҷҵас икәараҵоит,
Аҽыҩ бзиа уи захьӡом.

Ҭӡыцыԥхьаӡа иара ҩналоит,
Уи уҳәан-сҳәануп, агәра узгом.
Лада илбаауеит, ҩада ихалоит,
Игәыԥжәагоуп, иузыхгом.
Анап амам, ашьап амам,
Ауаа еичнарчоит, еиқәнарԥоит.
Агәрагь хазҵо, ииашан, дхаҵам,
Агәра згазгьы, дыхнарҵәоит.
Зны игәабзыӷны укәа иҭалоит,
Ухы иҭалоит игьежьуа.
Иара уашьҭалар уарҟьалоит,
Уара узыҳәан ажра зжуа.
Ицҳафыруеит, абз шҳамуп,
Уеихнаҵәеит ауп ианухьыс.
Ус еиԥш иҟоу ԥыҭҩык ҳалоуп,
Наҟ ианыхтәу, Анцәа иныс.
Кәтол. 2001

***
Амра каххаа иахьыԥхо,
Иахьыблахкыгоу аԥсабара.
Ауаҩытәыҩса дызрыԥхо,
Аԥсуа иашҭа, игәара.

Гәыла-ԥсыла ҭынч инхо,
Аԥша ҟәанда ахьасуа.
Анцәа иҟынтә аԥсыцқьа зхо,
Афырхаҵа аԥсуа.
Уара уоуп ари адгьыл зызшо,
Уара уоуп иахажәуа.
Уара уоуп араҟа инхо,
Абшьҭралагь имҩасуа.
Уҵеицәа ииашан зыгәра уго,
Иуҵаӡуам, ҳәарада.
Аԥсны ԥшӡа ԥхьаҟа изго,
Иҟазааит ҿҳәарада.
Кәтол – Аҟәа. 2001

ԤСЫУА ԤҲӘЫЗБАК …
Ԥсыуа ԥҳәызбак ҭаҭынк дахозар,
Уи азын акыр ҳәатәума?
Ахацәа дреисан рыжәтәык лжәуазар,
Нас, закәызеи, иџьашьатәума?
Ахаҵа иеиԥш лыхцәы рҟәыдызар,
Нас, закәызеи, митә ҟалама?

Лцәа-лжьы ҵҟәашшӡа ицәыҵлырԥшызар,
Иҭгатәума уи азы аҟама?
Аԥсуа хаҵа иҽы кәадырзар,
Ас еиԥш иҟоу дылзыԥшуама?
Мап, аҩызцәа, шәарҭ ижәдыруаз,
Ус еиԥш иҟоу длымҩанызам.
Лгәы зегь ԥсыцқьала иҭаҳәҳәазар,
Лакәзар ԥсыуа ҵасла идыру,
Иҟалоума дылзыԥшымкәа,
Аԥсуа хаҵа, зҽы кәадыру!
Аҟәа. 07.05.2003

АҾАРА
Аамҭа цоит, ицоит инықәҳа,
Ашықәсгьы ашьҭалан ицоит.
Ус сымԥсыкәа адәы санықәха,
Мышкы зны уигь аҵыхәа ԥҵәоит.
Зны сыхәмаруеит сара дәҳәыԥшкаҿ,
Зных, мҵәыжәҩада сԥыруеит.
Ҽыҩ хәыҷык сақәтәоуп сара шҭакаҿ,
Ашьап адгьыл ардыдуеит.

Абас схәыҷрашықәсқәа среиԥхыӡуеит,
Даҽазныкыхгьы – сҿара.
Сналҵыр ацәа, урҭ зегь сцәыӡуеит,
Избозар срышьҭоуп ҽаџьара.
Абар инҵәоит уажәшьҭа сшәышықәса,
Зықәра зегь гәырҩала иҭәыз.
Ҳәарада, игәхьаазгоит сара сышьҭра,
Избаз сыблақәа аныхтыз.
Ииасхьоу аамҭа зырхынҳәхьада,
Баша гәыӷроуп, уи жьароуп.
Адунеи зегь хызфаахьада,
Иҟоу қәыԥшроуп, уи ҿароуп.
Кәтол. 15.07.2002

***
Саргьы дысзыԥшуп аԥсцәаҳа,
Ианбанҵәои ҳәа слахьынҵа.
Сагьаниҵарц иара аӡәыҳәа,
Зегьы зниҵо имшынҵа.
Аха уаанӡа исзынагӡама,
Сара исуалԥшьоу зегь цқьаны?
Жәлар ирыхәаша ак сызҳәама?
Сықәра цама мшәа иццакны?

Ус анакәха, зны сазхәыцып
Сабиԥара инагӡаны.
Шаҟа сиҭаз нас инысҵып,
Анцәа Ду ибзоураны.
Зегь раҵкысгьы сара исхьаау,
Ахьаақәа зегь ирыцку:
Аԥсцәаҳа даама сышҟа заа,
Исҳәаанӡа схәыцрақәа зызку?
Ус сыԥсит ҳәа сызҭахыда,
Снаган снарҭап уеизгь анышә.
Сцәымзахә аан сҭынха ида,
Иагьаҩ асып са сзы атрышә.
Кәтол. 26.01.2001

АЖӘҴЫС
Аӡә дыҟоуп, иибо иҳаҳауеит,
Егьи иижәуа, иифо ихаҳауеит.
Изҳаҳауа иԥсы цәгьоуп,
Изхаҳауа иԥсы цқьоуп.
Аԥсыцәгьа ԥароуп ихы иҭоу,
Ашоура издырӡом уи дызҭоу.

Иныҟәиго зегьы ԥхасҭоуп,
Адәгьы дзықәу ихазоуп.
Ауаа рзын акгьы даԥсам,
Иҳәо дрылоуп уҳәан-сҳәан,
Ак ануиҭо, жәаба игоит,
Џьаҳанымҟагьы дагоит.
Ас еиԥш иҟоу ауаҩы хәаԥса,
Иҩызцәагь ицуп ишьҭыԥсса.
Аԥсы цқьақәа, шәиҿагыл,
Шәыжәҩахыр еибыҭан шәгыл.
Кәтол. 31.03.2011

АԤСУА
Иԥсадгьыл ахьчараз
аԥсуа дангыла,
Дҟәыбаса дықәиҵоит
иқәылаз аӷа.
Бџьарда диԥылан
гәышԥыла,
Дышьҭеиҵоит напыла
игәы зегь рыӷӷа.

Дкаҳартә ихәызаргьы
аҳәала ихы,
Аԥсуа иаирсуам аӷа
иҿаԥхьа ишьамхы.
Кәтол. 2003

АԤСҬАЗААРА
Уагәылаԥшыр аԥсҭазаара,
Цәгьа игызмалуп ахаҭа.
Инкаужьып умазара,
Унҭаԥшыҵәҟьар алакҭа.
Аҵас бзиа амазаара, –
Уи акыр иаԥсоуп.
Иара азкуп абзазара,
Ашәҭқәа хкыла иазкаԥсоуп.
Иабасҭаху аԥсҭазаара,
Шәыга хкыла иҭаҳәҳәоу.
Сыкәша-мыкәша иеҵәазаарын,
Шьҭа саҩызоуп абӷьы икаԥсоу.
Кәтол. 13.03.2004

СЫШЬХАҚӘА
Џьоукы иузырҳәалоит уажәит ҳәа,
Уахьгылоу азын уӡышлаӡа.
Қәра дук уман уҟаӡам,
Аха гәырҩами узыршлаӡа.
Аԥсуаа ҳтәылаҿ ашьхақәа,
Зҽыҳарак жәҩангәы иаласоу.
Уҵаҿ инхо ашлақәа,
Урҭ рзы уԥшаласуп.
Умшын ԥха аҳауа азҩыдара,
Уҟәара ԥшӡа инаваршәны.
Изурц сҭахуп уҩызара,
Сыԥсыр учашә дгьыл снамада.
КӘАФҬА ШКӘАКӘА
Саԥхьа имҩасуеит аԥсҭҳәа шкәакәа,
Иара мҩасуеит уахи-ҽни.
Уа дагәылоуп скәафҭа шкәакәа,
Сзыргәаҭеиуа уахи-ҽни.
Аԥсҭҳәа шкәакәақәа еизозаап,
Исызгәамҭакәа џьара.

Скәафҭа шкәакәагьы дыргозаап,
Дсымбаӡакәа сгәазхара.
Сыԥсҭҳәа шкәакәа иагәылакыз,
Скәафҭа шкәакәа дышьҭабеит.
Ишкәакәаны инеилачыз,
Шәеиқәараны инасхаԥеит.
АГӘҬЫХА
Угәрымуа уцәқәырԥоит, сымшын,
Зегь узҳәом, угәҭыха.
Еснагь аиаша уазыԥшын,
Иагәҭасуан џьоук уныха.
Аха ухәыҷ гарақәа ҵысуеит,
Уцәқәырԥоуп изырцәо.
Рхахәы бырфынқәа ԥырԥыруеит,
Угәеисроуп изырҿыхо.
Сымшын, умгәрымын,
Уцәқәырԥа хьарч-хьарч.
Угәы ҭыга, уԥсы ҭыга,
Ушәаҳәа, уқьачақь.

ХӘЫШҬААРАМЦАК
О, сымшын ду, усыцәҭабама,
Ҟәара шәахҵас усцәышьҭабама.
Ашьха дуқәа уздыҽҽалоз,
Изоуҳәоз есыҽны уара угәы иалаз.
Иабоугеи иаразнак, иуцәыбгама?
Бзиа шәшеицыҟаз шәеибагама?
Сашьцәа, шәҩыџьагь сыԥсы шәыцуп,
Лассы снеиуеит, саргьы сҿыцуп.
Амшын ҿықәаҿ, хәышҭаарамцак,
Исзеиқәҵозар шәыкәа сҭаршәуп.
ИЗҚӘАҬЫԤ ҬЫНЧУП
Аибашьцәа гәымшәақәа амца ҭадырсуан,
Аӷа иҭыҩра дахьҭатәаз.
Ирытҟәоз наган ршьамхы адырсуан,
Анацәа рҿаԥхьа зҵеицәа ҭахаз.
Ирхырхуаз аҳәаҭҳа ибџьардаз ирырҭон,
Урҭ ԥхьаҟа ижәылан ицон.
Ашьхақәа ирхысны, аӡиасқәа ирҭысны,
Ршьа зегьы кәапеила иртон.

Иахьа изқәаҭыԥ ҭынчуп,
Ихьшәашәан дызмадоуаҿ адамра.
Икәша-мыкәша шәҭыла иҩычоуп,
Ахы иақәиҭуп Аԥсынра.
С-БАБАДУ
Ихәда сықәтәоуп с-Бабаду,
Иара икуп илабаду.
Сара иску аҷын хәыҷуп,
Избан акәзар са схәыҷуп.
Ашиҵә-ашиҵәҳәа исҟьоит,
Иара са сзыҳәан ашәа иҳәоит.
Ҳаԥсы ҳшьап ҳәа ҳантәалак,
Иара исзеиҭеиҳәоит алакә.
Иссир-ссирны, еиҿкааны,
Урҭ сыргоит оуп сышьҭԥааны.
Ииҳәо алакәқәа ашәа рҳәоит,
Сабду ииҳәо агәра згоит.
АИАША
Сҩыга хәыҷы, сҩыга гәыраз,
Аиаша шиашаҵәҟьоу уҳәалар,

Нас мышкы зны, уара иудыруаз,
Ииашам шамуа ихымбгалар.
Цәаҳәа зажәла уара умцәажәан,
Уқәыз адгьыл уцқьаны.
Ҵәҩанҵәы ухиаало уалаз ажәҩан,
Умшәан ургар ҳәа уцҟьаны.
Иагьа аамҭа мҩасны ицаргьы,
Дарбан аиаша змаҳауа?!
Ииашам ныҟәызго ирмаҳаргьы,
Дыҟоуп сиаша заҳауа.
Кәтол. 25.07.2002

АԤСУА УИҬӘҲӘАН ДУЗАХЦОМ
Саӷа, башаӡа умақаруеит,
Баша ухылԥа аҵыс ҭахәмаруеит.
Ус Аԥсны уара иузгом,
Иеизуцаз рыԥсыԥ азхом.
Аԥсуа уиҭәҳәан дузахцом,
Иԥсадгьыл ныжьны џьаргьы дцом.
Иеиӷьуп ҭынч уҩны уакыр,
Иҟалап анцәа инапы «уиркыр».

Дыԥхамшьаӡакәа еиҭах дмақаруеит,
Ихылԥа ихоу аҵыс ҭахәмаруеит.
Аԥсны игошәа игәы иабоит,
Аргама ишаабо иӡмах ҭабоит.
Кәтол. 18.11.1993

АӠХЫҴРА
Аамҭа «ӡхыҵроуп» иахьа ҳазҭоу,
Уи сара исҭахым.
Аԥсуа иашҭа иҭысны иахьцо,
Уи сара исҭахым.
Ашҭаҿ «малуп» иаанаго,
Уи сара исҭахым.
Избар агәам еизнаго
Уи сара исҭахым.
Ашҭа иҭысны аӡыхь анцо,
Уи сара исҭахуп,
Избанзар аԥсуара иатәуп,—
Уи сара исҭахуп.
30.10.1993

***
Иагьа иаӷьызаргь аԥша иасуа,
Дазхыҭәҳәалом иара амшын.
Иԥсадгьыл шакәу идыруеит аԥсуа,
Ахақәиҭра дазыԥшын.
Цасҳәа иасыргьы фарҭынҵас,
Имч-илшара азыркәадом.
Аламала изгом инымҵарс,
Аԥшәма иҿаԥхьа имч азхом.
Заҟаҩ ашьҭада ари адгьыл,
Ас еиԥш иԥшӡоу омашәа.
Ахьчараан анцәагь дадгылт,
Аԥсуа ишьамдгьыл, ахьҟәыршәа.
Аҟәа. 06.09.2002

УА МШЫБЗИА
Аргәын Лиосик
60 шықәса ихыҵра иазкуп

Хынҩажәа шықәса инарҭагылаз,
Аибашьра ду иаҿагылаз,
Афырхаҵа, ахаҵа бзиа,
Аргәын Лиосик, уа мшыбзиа.

Ашьха агәамчра удыскылоит,
Уныҳәаҿа ааныскылоит.
Сагьуқәныҳәоит гәык-ԥсыкала,
Уара уҟоуп даҽакала.
Здырра зегьы ауаа ирызҭо,
Аӷа хәымга ицәа дҭызцо,
Уара уззыҟоу, гәыла-ԥсыла
Уагымхааит Аԥсынтәыла!
Риҵа – Ауадҳара. Нанҳәа, 2001

***
Абзиабара – уи закәызеи?
Бзиа иубо аӡӷаб лоума?
Абзиабара – уи закәызеи?
Бзиа иубо ушьам дгьыл оума?
Абзиабара – уи закәызеи?
Бзиа иубо уашьцәа роума?
Абзиабара – уи закәызеи?
Бзиа иубо уҩызцәа роума?
Адунеи зегь бзиа иубозар,
Аӡәыр иумаикыр ҳәа ушәома

Бзиа ишубоҵәҟьа дурбозар,
Ус анакәха, зегь ҳаидгылап,–
Уара уоума сара соума!
Кәтол. 09.07.2001

ЏЬУЛЕТТА
Сара сымҩаҿын бысԥылеит бкаҷҷо,
Сҽыхәда бықәкны бсыман сдәықәлеит «Чоу!»
О! Џьулетта, сара с-Џьулетта, сгәацаԥха,
Бара бакәхеит сара сзыҳәан аҳ иԥҳа.
Сымҩа кьаҿын, ббара сахьымӡеит сгәазхара,
Аӡы зҵабаз аԥсыӡ еиԥш сықәхеит аҟәара.
О! Џьулетта, сара с-Џьулетта,сгәыӷырҭа,
Сыԥсы былахеит санынҭаԥш ба блакҭа.
Даҽазнык сгәы азыҳәоит ҽнак ҳаиқәшәарц,
Сыгәҭыхақәа зегь мӡакәа уаҟа исҳәарц.
О! Џьулетта, сара с-Џьулетта, сгәацаԥха,
Ашәа бзысҳәоит, сыԥхыӡ балоуп есуаха.
Кәтол. 09. 05.1994

ХЫЛА-ХШЫҨЛА
Хыла даст, гәышԥыла даст,
Даст ҭаҷкәымла, изыхжәом.
Хшыҩла дадгылт еиҿыршәшәо,
Идыруеит, шьҭа ихшыҩ дажьом.
Агьангьашражә аҵыхәа,
Измам иахьа ԥсыхәа.
Ԥсыуала наҟ иԥҵәатәуп,
Уи ныҟәызго ауаа идырбатәуп.
АӠӘГЬЫ УСЫЗИҬОМ
Аԥсадгьыл иагәыҵхо агәаҟра,
Исгәыҵхоит хаҭала саргьы.
Иҭынчран иаиурцаз ақәра,
Самеигӡакәа иасҭоит сыԥсгьы.
Ԥсҭазаарас иҟоу хақәиҭроуп,
Ахақәиҭра ахала иаауам.
Уи азын ахаҵа дҭахароуп,
Ҳәарада, уи адагь иауам.
Кәтол. 18.03.2004

САЖӘА
Уҽумырдадан, сажәа,
Угәыԥҵәаган уҟамлан.
Угәы цқьа иҭыг, уцәажәа
Иҳәала, «умшәан».
Узҭахым уҽидумгалан,
Уцала ушыцқьоу.
Амарџьа, џьара умҟьалан,
Уцәажәала ишахәҭоу.
Кәтол. 23.03.2004

УМЫЦЦАКЫН
Мышкызны сымра наҟ ихшәап,
Наҟ иаҟәыҵып сгәеисрагь.
Сыԥсы иҭазгьы насыхшәап,
Сиеҵәагь кыдшәан инкашәап.
Агәра згоит шьҭа акгьы сшаԥсам,
Аԥсрамҩахьгьы сызцәырҵуа.
Сызнысыз сымҩа цәгьа ихьанҭан,
Еиӷьуп сахьаԥырҵуа.

** *
Р. Лашәриа иахь
Сгәылак дыҟоуп, дшьалашьынуеит,
Ацәа ахихуеит, ицәирԥссоит,
Агәаԥшь агәылихуеит, ирпашәуеит,
Иақәҵыз ацәыцә наҟ иԥссоит.
Иара агәаԥшьҵәҟьа акамыхьыртә,
Гәыла - ԥсылаҵәҟьа ихьчоит.
Дцәырымҵуазар араҟа мыхьтәык,
Даҿагылаҵәҟьан дықәԥоит.
УАХАЗАҴӘЫК
Сынхарҭа аҿаԥхьа ус быԥшызар,
Иаатыз сгәашәшьҭыбжь бхьанарԥшызар,
Бакәзаап ииашан благәыкык,
Бааины сгәыдкыл сара знык.
Уахазаҵәык сбыдкыл,
Зны заҵәык сгәыдкыл.
Исзынхартә еиԥш ахаара,
Бқьышә ҟәымшәышә аԥхарра.
Аҟәа. 2005

АԤСУА ԤҲӘЫЗБА
Лаԥш лыкәа иҭамшәарц азыҳәан,
Иҭаҳәҳәазароуп, ухаҵкы.
Иумбарцаз лцәа-лжьы аҵҟәашра,
Ихнаҩозароуп лыҵкы.
Ԥсабарала ус дышәҭышзар,
Бла хаак дамбар ҟалаӡом.
Илахьынҵа уи данызар,
Динасыԥымхар ауӡом.
ӠЫЗЛАН-ӠАҲКӘАЖӘ
Лыкәа иҭоу зегь бырлашуп,
Лгәы иагәылоу ӡырлашәуп.
Аҩны уандәылҵуа ла лзы ччароуп,
Уаныҩнало мамиқәароуп.
Ашҭа уанҭыҵуа зынӡа чароуп,
Лара лзыҳәан жәҩангәашәԥхьароуп.
Ашҭа уанҭало ҵааршәыроуп,
Уаныгазҽаз, ууашәшәыроуп.

Ӡызлан-ӡаҳкәажә гызмал ӡышьҭра,
Ҳазшаз ианихааит зынӡаск лышьҭра.
АХӘШӘТӘЫРҬАҾЫ
Сымԥсындаз ҳәа сшәыргәындаха,
Еиӷьын смааир ас.
Шәсыруадаҩит акыр уаха.
Иҟаҵам, ижәдыруаз, цас.
Мыцхә мҳәакәан ажәа уаҳа,
Сиццар акәын хаҵаҵас.
Зегьы зго адунеи Аԥсцәаҳа,
Дшәыргәындоуп сзырҳәарымызт нас.
Агәыӡера. 14.03.2009

ИААНДА АНБАРДХА
Ианбабираха иашҭа иблит,
Иара ианаамҭаз измырхит.
Аԥсҭазаара деимнарххеит,
Ақалақьахь ҳәа деихеит.
Иаанда анбардха иҷыҷит.
Аиха, аигәышә ҳәа ак имкит.

Иҟәрышьқәа зегь анынҵәа,
Деихеит ақыҭахь диҳәо Анцәа.
Кәтол. 16.05.2008

КӘАЧАРАНТӘИ
Иқәнаргылом адгьыл тата,
Ицоит иаша ишьҭҟьаны.
Иашьны иҟоуп арыжәтә чата,
Ицоит аӷьфҩы рыҿҟьаны.
Ишрасҳәа-расҳәоз иаашәымган ҳәа,
Кәачарантә ирышәшәаны.
Ишәмыршын ҳәа аҳәаса уатка,
Зегь агазаап ицҟьаны.
ИШԤАШОУ ИССИРНЫ
Саамҭа аӡынра иҭагылоуп,
Гәаҵаӷара исԥуеит асы.
Аӡын ааԥын аҽԥынгылоуп,
Адәыкрын сыҟәшәап лассы.
Ааԥыни аԥхыни еидҽырбало,
Адунеи дыршәҭуеит урҭ еисо.

Ус сынҭалап нас ҭагалан,
Ахьԥштәы змоу абӷьы анкаԥсо.
ШЬЫЖЬТӘИ АӠАӠЕИԤШ
Бзиа избаз сылашара,
Лара лами сымч сылшара.
Санықәхалак сымацара,
Исзыршом сара аҵх ашара.
Нас ашамҭаз, аӡаӡа аҳәымҭаз,
Сгәы азыҳәоит: сналхьыԥшындаз.
Аха иабаҟоу дыҵабазаап,
Шьыжьтәи аӡаӡеиԥш дышьҭабазаап.
АХЬЫԤШЫМРА
Дгьыли жәҩани зегь зырԥхо,
Жәҩангәы икыду сымра.
Ушцырцыруа, ушкаԥхо,
Ушәахәа сзақәырԥха схьыԥшымра.
Ҭагәҭасроуп ҳәа иумыргәагәан,
Жәҩан ду икыду сымра.
Ҳазшаз илԥха насыманы,
Исуҭарц саҳәоит ахьыԥшымра.

БААИ ҲАИНААЛАП
Ашьха схалан ибзылбаазгап,
Ашәҭқәа иреиӷьӡоу «Едельвесин».
Гәык-ԥсыкала ибыдызгалап,
Бара исыбҭозар азин.
Бааи, нас ус акәзар ҳаинаалап,
Ҳаинасыԥхап бааццакы.
Аҭацахьӡ бысҭап сашҭаҿ – Наала
Егьныбшәысҵап аҭаца ҵкы.
АҾҲӘАРА
Акы иаԥсамкәа имҩасуазар,
Сымшқәа исызшоу.
Иуркьаҿырц азы аҳәара
Ҟасҵоит, сызкәыхшоу.
Адунеи зегьы зымпыҵаку,
Анцәа ду уара,
Изыркьаҿуа аԥсцәаҳа иоуп,
Аԥсҭазаара аҿҳәара.

АГӘЫЦҚЬАҚӘЕИ АԤСЫМЦҚЬАҚӘЕИ
Акагьы змам агәыцқьақәа,
Ахшара роуеит ирацәаҩны.
Ирымаӡамкәан урҭ хәыцырҭас,
Акыр рҿазҵода ҳәа ишәаны.
Амал змоу арыцҳақәа,
Ахшара роур ҳәа ишәаны,
Идырҳаз ҳцәырфоит амыҷҟарқәа…
САЖӘЕИНРААЛА
Сажәеинраала, ус убжьамхан,
Уҳәан-сҳәан еиԥш уеимдырххо.
Урҭ рҩызцәа урцәыԥхамшьан,
Агәра дургароуп ишҭахо.
Шәааи, ахацәа, зегь ҳаидгылан,
Амҩа азаҳкып иҟам-ианым.
Ҳцәа ҳхызхуа зегь ҳааидкылан,
Иагьҭаҳажьып џьаҳаным.
2003

АХӘЫЦРА БЗИА
Сымгәаҿ акәзар схәыцра ахьыҟоу,
Иагьа афатә сҳаҳарын.
Смалахь акәзар, сџьыбахь акәзар,
Егьа аԥара сырҳарын.
Ирыцкымкәа ус ахәыцра,
Сара сзы акыр иаԥсоуп.
Хьи разни нас еимхәыцра,
Аԥсҭазаара ианазкаԥхо.
2003

АԤСҬАЗААРА
Аԥсҭазаара кәараҵоит,
Зны-зынла аҽырԥагьан.
Амшын гәыҭбаа ухнаҵоит,
Азнык азы уҽырбаган.
Амшын Еиқәа анхьарч-хьарч,
Аԥсҭазаараҿ иҟоу ҭынчроуп.
Ицәқәырԥа дуны ианыгәрым,
Ԥсадгьыл хьчароуп, ҭынчрам.

СЫМҞӘЫБА
О, Сымҟәыба. О, Сымҟәыба,
Сара сӡыжәга, са скәапеи.
Ус скоумыжьын араҵлеиԥш сҟәыба,
Сеиԥш иузыҟоу аӡә дсырбеи?!
О, Сымҟәыба. О, Сымҟәыба,
Сара сҩыжәга, са сматра.
Уааины усыцҭал уара скәыба,
Наҟ санҭарҵо адамра.
ИԤСЫХӘОУЗЕИ
Дартәом, даргылом иахьеи-уахеи,
Дзынхьаауа ачымазара иахьӡуп «трофеи».
Ахыхь бааԥс изцәырнагоит акы анааимго,
Деидараха дҭалоит иашҭа дгаго.
Уи иаԥхьаҟа егьыҟам дҿызхша гәырҩа,
Хәшәы ҳәа акагьы амам илҵыз азҩа.
Дааԥсеит, дӷьазкит, дагькарахеит,
Лабҿаба аныхагьы ихарахеит.
Кәтол. 06.11.1993

***
Абаа, ԥссыка, шәыԥхеибаҵа,
Шәрышьҭалан ишәкы,
Ирымышәхуа еиҵамзароуп,
Ҩынҩажәи жәаба, шәкы.
Ишәҿаԥо зегь азакәан ахь,
Рхы шәырхала.
Измуӡаҵәҟьо дышәԥыхьашәар,
Шәарҭгьы шәыҽшәырххала.
Нанҳәа, 2000

АЦӘЫСЛАМПЫР
Ҳаҭыр-ду зқәу, ацәыслампыр,
Уԥсымҭә иауам иамырпыр.
Уахгьы-ҽынгьы уҵоуп анышә,
Уҩызцәа рзын уасуеит атрышә.
Ирҳәоит, знык угәышҵа лашарак набар,
Иҟалом ҳәа уи нахыс ухабар.
Ус акәзар, уҵаз, уҵаз анышә,
Дҟалап уара узыҳәангьы иасша атрышә.
Кәтол. 2000

СЫГӘҬЫХАҚӘА
О, амҩахәасҭа, ухы абахоу, сабоуго, саба?
Амҩаду ахь скылган лашарак сырба.
Уара узыҳәан сыҟоуп, ҳазшаз, анцәа иныс,
Амҩаду исуҭо знык сананыс.
Адунеи агәыҭбаа зегь рзы уразҟны,
Иқәу ауааԥсырарз уҟаз уразны.
О, амҩахәасҭа, ухы абахоу, сабоуго, саба?
Амҩаду ахь скылган лашарак сырба.
Кәтол. 05.12.2001

ШАҞА ДЫԤШӠОУЗЕИ
Илшәу зегь бырфынуп,
Ԥсабарала дшәуп.
Лыбзиабара фарҭынуп,
Дансыцым – слашәуп.
Кәтол. 08.04.2004

***
Аида Касланӡиаԥҳа лирамш иазкны
Ас еиԥш иԥшӡамызҭгьы адәыкрын,
Егьа хкы ашәҭқәа заа ишәҭрын.
Бара ибзыҟәшәоуп, сашьа иԥҳа
Жәлар рҿаԥхьа Анцәа бзырҳа.
Кәтол. 03.02.2004

АГӘҲӘЫ
Скәапеи сырҭәуеит изаган,
Сгәы цқьа иҭыган шьала ирҭәны.
Иазгәышьуа исыркуеит инаган,
Дҟанаҵозар уи дуаҩны.
Кәтол. 2004

УШӘҬЛАР СҬАХУП
Шәарахи ԥсаатәи зегьы срыԥхьап.
Ҳаԥсадгьыл ҭынчрахарц сныҳәап.
Аԥсны, ушышәҭыц еиԥш ушәҭла,
Аԥсаатә зегь жәҩан ахь шәԥыр-ԥырла.

СЫЖӘҨА ИҚӘУП ЕИДАРАК
Сыжәҩа иқәуп еидарак,
Ақәхра саҿуп, иласхом.
Иаҵам издыруам хьанҭарак,
Ддагәоуп, длашәуп, акгьы ибом.
ИНАМЦХӘНЫ
Иԥсыхәоузеи аҩы мзар,
Имжәыр амуазар Емзар.
Усгьы ижәуеитоуп ишхәашьу,
Зегьы ирбароуп уи дшашьу.
Кәтол. 19.01.2005

АХАҴА
Аԥсра саҳәаны иаазгом,
Ахаҭа анааилак сацәшәап ҳәа сыҟам.
Уи саԥылоит, сагьазгом,
Сыҿҳәара анааиоуп нас саныҟам.
Кәтол. 25.01.2005

АБАЗ КЫЛҴӘАКГЬЫ ДАԤСАМКӘА
Абаз кылҵәакгьы даԥсамкәан,
Днаган днықәырҵар дыԥсны.
Анышә хьшәашәа иамкуа дарбан,
Баша дықәзаарын адәы.
Кәтол. 09.04.2005

АМАРЏЬА
Џьара, амарџьа, сажәа брыма,
Џьаракыр ижәны сбырбырыма.
Сгылоуп, сгәы сҭахәыцуа сгылоуп,
Схаҭа сеиԥшҵәҟьа дхәыцуеит, уи дысгәылоуп.
Сыԥсҭазаара, шьыри-шьыри,
Сабоуго сҭажьуа тышеи-хшьыреи?
ИҞАЛАЗЕИ?
Ицқьоума? Ихәашьума?
Иахьзеи мшәан, сӡыхь.
Сҭаркма, сыршьыма?
Исеижьоу хыхь-хыхь?
Срыцҳашьа ҳәа суҳәом,
Аԥсҭазаара, идыр.

АТӘЫМРА
Умԥхар еиӷьуп зынӡаск, сымра,
Сҭазар еиӷьуп адамра,
Сҭалар аҵкыс мышк атәымра,
Санымзар еиӷьуп Аԥсынра.
Сышьҭа аныҵааит наҟ зынӡа.
Кәтол. 15.04.2007

АСАС ИАХЬ
Умҩахыҵыр ҟамлари,
Иҿыцу ажәабжькгьы ҳамҳәари.
Иузыхсыртлап акаҷыҷ,
Уи ҳзылнаҳап с-Камаҷыҷ.
ИГӘАԤХЕИБАШЬАЗ
Урҭ аҩыџьагь еидҽырбалоит,
Бзиа еибабоит.
Акы ахьшәашәара рыднагалоит,
Даҽакы иарԥхоит.

ҚЬААДЫМЗАР ИҞОУЗЕИ
Қьаадымзар иҟоузеи,
Ус аныхра акгьы иаԥсам.
Иҟан аамҭа ианыҟамызгьы,
Усҟан ажәа акыр иаԥсан.
Кәтол. 27.05.2007

СХӘЫЦРАҚӘА
Иҭарлаҳаит аԥсҭҳәақәа,
Аҵх ҵәцара сыззыԥшыз.
Исыршеит уи аҵх ашарахь,
Схәыцрақәа зегь сцәыӡт.
Кәтол. 27.05.2007

АЧАРАҾЫ ԤСЫУАҴАСЛА
Ҭыԥҳа ԥшӡак дымҵадырсит,
Иахьа иҟоу лара лчароуп.
Ԥаҭхьла аҩыжәра ԥсыуа ҵасуп,
Ачараҿоуп иҭоу ахьыржәуа.

Шәааи, иаажәып нас иахьа чароуп,
Изызкугьы ахаҭа аҿиароуп.
АӠӘЫ ИХӘЫЦРАҚӘА ДЫХҬАРКИТ
Аӡәы ихәыцрақәа дыхҭаркын,
Деибадырфоит, деимдырххоит.
Ҽаӡә ахәыцрақәа деимаркын,
Урҭ дыргәылалан деимдоит.
ААНДАК САВҴАЛАН
Аандак савҵалан сымныҟәац,
Аӡәы сибар ҳәа сцәа сацәшәо.
Сныҟәалароуп са сышныҟәац,
Аԥсҭазаараҿ сашәа ҳәо.
ЕГЬАУРЫМ
Дышԥаԥшӡоу уи ҟазшьала,
Дрылыҷҷаауеит лара ԥшрала.
Афырԥҳәызба – аферым,
Са дыстәымзаргьы егьаурым.
Агәыӡера. 07.07.2009

«АКАҶЫҶ»
Sez Abhaz-Abaza ädäbiyättän 1 tekst ukıdıgız.
Çirattagı - Аҵеира - 3
  • Büleklär
  • Аҵеира - 1
    Süzlärneñ gomumi sanı 3191
    Unikal süzlärneñ gomumi sanı 2164
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аҵеира - 2
    Süzlärneñ gomumi sanı 3119
    Unikal süzlärneñ gomumi sanı 2117
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аҵеира - 3
    Süzlärneñ gomumi sanı 2560
    Unikal süzlärneñ gomumi sanı 1786
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.