Latin

Аизга - 10

Süzlärneñ gomumi sanı 3015
Unikal süzlärneñ gomumi sanı 2297
0.0 süzlär 2000 iñ yış oçrıy torgan süzlärgä kerä.
0.0 süzlär 5000 iñ yış oçrıy torgan süzlärgä kerä.
0.0 süzlär 8000 iñ yış oçrıy torgan süzlärgä kerä.
Härber sızık iñ yış oçrıy torgan 1000 süzlärneñ protsentnı kürsätä.
Адунеи снанылазар, сшамкәа сшаны,
Исымбацызт ахаан, ус ҩыџьа еиԥшны.
Адәыӷба са сцасҳәа иаҳа иццакит,
Иааҳәыз сгәы исызмырхынҳәуа имцакит.
Урыстәылатәи ахьҭа, арахь хәылбыҽха,
Сыҟанаҵы иахьанӡагьы, исылоуп ихҿаха.
Знызаҵәык, знызаҵәык, бхьамԥшит бааҳәны,
Адәыӷба шьҭхысааны ицоит иццакны.
Бгәалашәара иамшуп, Дбар-ԥҳа, иахьа,
Бнышәынҭра саҭааит, стәоуп уажә убра.
Сыбла изхымҵыз уи асахьоуп сызлоу,
Ибывҟьаз адәыӷбоуп сеиқәуазха сызҭоу.
Иҵӡозеи, иҵӡозеи, сан, убриаахыс,
Машәыршәагьы инсԥыршәом сыбла инхыҵ.
Иахьанӡагьы инымҵәаӡо мҩахәасҭак бануп,
Бынкажьны саазшәа сгәы аҵәыуара иаҿуп.
САН
Сан ҳәа ҿысҭырц исыгымхеит аԥсык,
Машәыршәа уа ааигәара иубомзт ҩнык.

Схәыҷра хынҳәызшәа быгәхьаазоит, сан,
Убас сгәы быҵалоит, самхаҵәыуоит нас.

Убасҵәҟа схәыҷхама, исыҵалазеи, мшәан,
Ҿыц исаҳаит: «Шәан дшәыкәыхшоуп, шәан!».
Быхцәԥарақәа абар, иахьбықәу ҩбаны,
Быхцәԥарақәа гәырҩада наҟ-ааҟ иԥаны.
Шәҳәашьа, ҳанбзаз, ҳаныҟаз ахьхьаџьџьа,
Тәыҩақәак анамаз илакәыз ҳхәыҷра.

Акәицқәа аҳауа инагәылшәҭ иӡыҭуан,
Амцабз иагәыдкылан иахакнабҳаз бчуан,
– Ҳамца. Сукәыхшоуп,– бныҳәо баҳҿаԥшуан,
Иагьа бааԥсазаргьы, есымша блашон.

Сикәыхшоуп, сикәыхшоуп, аԥшалас зшаз,
Ҳа ҳаиԥш аԥшалас ҳашҭа иҭшааз.
Аԥшалас, аԥшалас, аԥшалас ажәӡом,
Исҭаауанаҵ сгәы иҵало сыцуп, исцыршәом.
Ахәҵантә бкылххы банаауазеиԥш, сан,
Сгәыдкыло, схыдкыло исацәажәо исҭан.
Иахьынӡасҭоу, сан, сан, бысҭоуп баргьы,
Ахәхәаҳәа иансхагьежьуа схы адуп бгәы…

Лабжышк шәыцәхыҵыр – иԥхьаҳцон зымҩа,
Шәылахьқәа ааиқәылар – ишәхаҳцон ҳара.
Амаӡа аҵәахшьа шәышԥақәшәоз мшәан, сан,
Шәшеизыҟаз рыԥшӡаган, гәыла шәыҭбаан.
– Шәабиаҳәшьа, ишәыхьша! – даҳԥылон астәы,
Ашьхантә дҳазлыбаауан ҳаб деикәаҭәы.
Зегьы бырԥылон, зегь наскьабгон; быҟамзт бхазы,
Хәԥхак башьҭамызт, бтәон ҳазегь ҳҵыхәтәаны.Ҳӡыхьгьы даҽа гьамак амазма нас, сан,
Асаранџьқәа анылашон ҳшыцтә саан.
Шәхаантәи аҵлақәа, изхыскаалоз шәцәа,
Ҳанырбо рықәцәқәа еинҟьон игәырӷьаҵәа.
Игәхьаазгоит ҳарашҵла ажь шкәакәа зқәыз,–
Ихьшәаноуп ианшатәуаз, ссиршәа еиҟәыншәыз,
Ҳарашҵла анысҳәа ахышәҭқәа рҳәы-рҳәын,
Ирыԥхны саҳәшьеи сареи ҳахәда ихшьын.Амца анеиқәыбҵоз ҳбыкәшаны ҳнатәалон,
Бнапқәа адыруазшәа иаразнак еибакуан.
Аҷҷаҳәа акәицқәа ртәала ишьацәхыртәуан,
Аԥсшәа шәанаҳәоит ҳәа бгәырӷьо быччон.

АНАЦӘА
Ҳқыҭақәа мцажәлас ирымаз,
Анацәа – наџьнатәгьы ибызшәаз.
Рбызшәала иувыргон ахымҩас,
Иԥсадгьылны Аԥсадгьыл иазшаз.
Хынкылагас ирымаз иаракәын,
Аеҵәеиԥш рыхьӡ ҳаракын.
Иарала рхьаақәа ԥхьакын,
Аб иҭыԥ мцахаараха еиқәын.
Еиҩызцәамхар агәыӷрақәеи агәыӷреи,
Гәыӷра заҵәык иазышьҭыхуам акгьы.
Ишеибарӷьоз ахәрақәеи ахәреи,
Избарҭахт санадла шәа шәгәы.
Ианымиац иоуми ԥсра ианымшәо,
Аԥсрақәоу? – зегьы еижәлам.

Ҳамшқәа инанраха иршәыло,
Шәыгәаӷьра мцажәлоуп, иажәуам.
Шәа шәыла исҳәоит сара аԥсшәа,
Еиқәзырхаз шәыԥсқәа рхан.
Афырхаҵара шаауаз аншьҭрала,
Са саԥхьа а-Гьечбақәа ирҳәахьан.
АБЫЛРАҬӘҲӘА, МА АХӘРЕИ АХӘРЕИ ЕИБАРӶЬОИТ
Илзыскуеит Емма Ермолова

Аҵых иагәылҩуеит «уан,уан» ҳәа,
Сишь! Емма Еромолова лыбжьоуп.
Лцәеижьаҿы иҿыхеит Мамзышьха,
Уа игылоу Алхас ибаҟоуп.
Гәыли ҿылҭуеит: – Бымшәан! – ҳәа,
Алхас иԥсы Мамзышьха иахоуп.
Иеҵәахә ахьчоит Мамзышьха,
Емма, Мамзышьхеиԥш быӷәӷәоуп.
Быҷкәын данбзымхо, Емма,
Мамзышьха ҳхалап, баала.
Бызаҵә иԥсы алан Мамзышьха,
Ихаҭыԥан Мамзышьха баала.
Ҿылҭуеит Кавказ аԥҳа Зина,
Сбылраҭәҳәа, Емма, бласы!
Зина, Гәыли, мамзаргьы Емма,
Ацәашьеиԥш ибылхьеит Аԥсназы.
Едикраа, Арзикраа, Алхасраа,
Рыԥсадгьыл азы ршьа кашит.
Анацәа, иныҟәызгоз Анра,
Шәыҷкәынцәа рыла иааԥшит.

Быҷкәын данбзымхо, Емма,
Мамзышьха ҳхалап, баала!
Бызаҵә иԥсы алан Мамзышьха,
Ихаҭыԥан Мамзышьха баала!
ЗЫҶКӘЫНЦӘА РЫБАҨҚӘА ЗЫМБАЦ АНАЦӘА
Гәыли Кьычба леиԥш зԥацәа рыбаҩқәа
зымбац анацәа ир­зыскуеит…
Анацәа, сшәыҳәоит, уаха аҵх аныҵәцоу,
Хгарҭак шәымамкәа шәԥацәа аншәыцроу,
Шәҩаҵаԥш ажәҩан, уа ҳалаԥшқәа еиқәшәап,
Ҳаламыс цқьоуп азы ҳалаԥш хәшәхап.
Аеҵәақәа ҳрыҿцәажәап, урҭ рыгәра згоит,
Ҳа ҳзыноуп изкаҷҷо, ҳзыҳәан игәыкуеит.
Гәанылоуп, гәаныла хҽышьас иамоу ааха,
Избанзар, агәқәа роуп излалаз ахқәа…Шәааи, нас, ҳаӷа ицасгьы ҳаҽҳарӷәӷәап,
Ажәҩан ҳаицаҵаԥшуа шаанӡа ҳаицшәаҳәап.
Ҳабжьы иазыԥшу Анцәа игәы иҭҳәаа,
Уанаҵаԥшуа уныҳәаԥхьыӡ иамчыми иаҳа.
Сшәыҳәоит, Анацәа, зԥацәа рыбаҩқәа зымбац,
Рыбаҩқәа шыжәлартәхаз шәарҭ агәра жәгарц.
Наӡаӡагьы ҳадгьыл иакәыршоуп рыгәқәа,
Шәааила ҳбаҟақәа рахь, уа иԥшуп рыԥсқәа.Адоуҳалаша шәиҭеит, ишәиҭеит Анцәа,
Шәыҷкәынцәа рыбаҩқәа ҳзихьчоит ҩаԥхьа.

Анацәа згәырҩашақәа нхәыҵаршә изҵәаххьоу,
Мшынк иҭамӡара зцәа иҭаӡахьоу.
Анацәа, анацәа, сгәы иҭалашо иҭоу,
Шәызмыцәара сылырсны аԥшалас санаҭоу.
Аӡәаӡәала, аӡәаӡәала шәара шәхы-шәҿқәа,
Сыҵхаҿ шәанеизызго исылзхуа ахҿақәа.Ацәымзаҿы раԥхьа иқәдыргылоит аӡыхь,
Абаақәа, уи зҳәоуп, ҳӡыхьқәа шәрызхәыц.
Рыжәлақәа ҭаҵәахушәа збоит Гәымсҭа,
Ԥсыцқьала ухыԥшыла, гәбылрала уҭаԥшла.
Абаақәа, абаақәа, ишәмырҟьацын ашьац,
Ишԥеиҭахыз гәҭынчла днылаиан дыԥсшьарц.
Шәаџьҳәара изызуаз Ахьаца неилԥсааит,
Дышнымхоз ангәанаҭа ацәа инҭыбзааит.Анацәа, Анацәа, Анацәа ԥшӡақәа,
Азаҵәқәа, рызаҵәқәа, рызаҵә ԥацәа.
Анацәа рыҿцәажәара мариам, ицәгьоуп,
Аԥсышәалоуп, аԥсышәала аҽазыҟаҵара ҳахәҭоуп.
Ашьыжьқәа, ашьыжьқәа ирықәҵатәуп пату,
Ԥшӡала ахьрызшаз ҭабуп зыхҳәаатәу.
Иахьанӡагьы зыбаҩқәа зымбац ирыцроу,
Иззымдыруа ишәумырдырын зегьы ишреицәоу.Унылаԥш аҭырасра, иҵыртәыз иҭәырԥсаны,
Сгәанала, ԥыҭҩык уа иамоуп иҵәахны.
Ирӷьатәуп аҳацаҟьа, иахьишьуан инапқәа,
Илаԥшхаа азынижьит ҳара дҳазгәыкуа.
Аҽынканҵа шьхауарбак иара ишҟа иаауан,

Ишьа ажәырц азы акәмызт, хәрашәара изауан.
Рыԥхара зхумкаауа акгьы ыҟам ара,
Сшәыҳәоит, шьаҿацыԥхьаӡа ишәшәала, ишәзала.Абаақәа, араҵла цәҟьарас иҟаумҵан,
Аҵаҟа иан игара лырҵысуан.
Аԥшалас шәаԥыла, агәашә аарттәуп,
Ӡыхь-хәык ыҵыҵит, рыхьӡала итатәуп.
Шьрома уаншәарыца, даара иԥсроуп,
Ҳабаҩқәа ԥсаҟьаны ҳашьхақәа ирҿаԥсоуп.
Егьаџьара, ана-ара ҳӡиасқәа ирҭаԥсоуп,
Абаақәа, шәрыҭәҳәала, џьамыӷәала иааԥсоуп.Ианҭахоз аԥсабара акәын шаҳаҭра зуаз,
Ахаҳәҵәҟьа алоура ауан, ахаҳә ауаз.
Ан лыблақәа, мамзаргьы лара лнапқәа,
Рыла издыруеит измаӡац зыбаҩқәа рбара.
Аиааира! – ҳәа злаҿырҭуаз Аԥсуа бызшәа,
Абаақәа, убриоуп изышәҭалаша ҭоуба.
Убасҟан рыбаҩқәа изрылымҵыц рыԥсқәа,
Ииасуеит ҳа ҳашҟа иҟанаҵ ҳ-Аԥсынра!
« ИСЗЫԤШУП СУАДА АҬӠАМЦҚӘА »
Амашьына сахьылбаауа сазааигәахацыԥхьаӡа сгәы ҭыԥ­саа­
уеит, исҭахӡам сшәыцрыҵыр, аха суада аҭӡамцқәа сзыԥшуп.
Емма Ермолова,
Аиааира жәашықәса аназгәаҳҭоз ашықәс азы.
Лыхны, Сентиабр 7

Илыхоит лыжәлар ргәахьы,
Азаҵәра икыднамхырц лгәы.

Дрыцуп зыҷкәынцәа ҭахаз,
Ргәаҟрақәа дрымоуп хадас.

Шәнеины игәашәҭа, ари лакәым,
Пицундатәи ашьанҵа ҩашьара ақәым.

Акы лмыхьызшәа лбоит рыгәҭаны,
Ишмыцәаӡо анацәа рыгәҭакы.

Уатәи амшын раӡны шәахқәа,
Уатәи ахаҳәқәа, аҳҭны хышәқәа.

Бжьқәакгьы лыцуп дыхҭакны,
Аԥсны дацнаҵ дҟалом дыхьҭакны.

Дхыхны дамоуп уа ухьӡ Пицунда,
Умҩа дықәуп асас: знык снаӡанда.

Аҷараҳәа луада ашә наркны,
Дындәылҵуеит Емма есшьыжьы.

Уатәи анацәа уа иуҟәырҷахоуп,
Уатәи абацәа уара иуцыԥҵәахоуп.

Дҟамлацт лгәыӷра ҿахҵәаны,
Лгәыԥсычҳабжь рымоуп иҵәахны.

Хәыцрашәк аԥшӡара рҽынагәылак,
Уа идунеихеит дара рхеилак.

Лыҩны ашәқәа драцәажәоит бжеиҳан,
Илылабжьоит, бҽырӷәӷәа, бымшәан.

Урҭ зегь беиоуп уа ҿаԥыцла,
Урҭ еиқәныхлоуп аԥсыуа ҵасла.

Лашҭаҿы аҵиаақәагьы лзыԥшуп,
Лԥа ишьҭыбжь амырӡит, илхьыԥшуп.

Издыруеит рԥацха-лҩа афҩала,
Мҿыжәлас иақәу, еиқәу рымца.

Мҩамш ҳәа днаскьеимгозаргь иара,
Ҭацак, ма моҭак дԥырԥыруа.

Зыжәҩан хьышәахәахаз, Пицунда,
Пицунда қалақьуп, ишәҭит насыԥла.

Ан илдоуҳаџьбароу Азаҵә-ԥа идоуҳа,
Луадаҿы илызнауеит ҭынхара…

Уа шәеицҿакны ицәыржәга Раида,
Анцәа иҳамҭоуп, шәкәаша гәырҭәыла…

***

***

Ақалақь хәыҷ, ламыс дуӡӡа,
Анҵыра уиҭааит шәышықәсала.

Хьшьыцбак нысхыԥрааит дыргак нсыҭа,
Издырит аҵх агәазы ишымааз насыԥда.

Иҭәуп ламысла уатәи Раида,
Уеиқәных ҽыла рашҭа унҭала.

Х-ӡиаск шҳабжьоугьы инсхашәҭит ухәыцра,
Исарҳәеит уашәеиԥш сшалоу уԥхыӡхаа.

Ублақәа харантә исыцрадырсыз амца,
Исыханы сыргеит ҳгәашә ду аҿынӡа.

Ашиҵәҳәа уаԥхьа сниаҟьеит смацәысха,
Ахырхырҳәа сынкаҭәеит сқәаршыҩха.

Аԥшалас аасҿагьежьын инсывсит ажәада,
Абас уцәа ахыскаауа сҟамлацызт уажәада.

Сыԥшаласха снауқәҵәиашан, сымҩасит,
Жәантә сеилысит, жәантә сеиҭасит.

Уиеҵәахә аԥхара чыҭ-ҵкны инсшәылеит,
Ҵәымӷк акараҳәа уеҵәахә иналшәеит.

Сеилшәеит амшеиԥш скеикеиуа, сҵәыцоуп,
Сароу? Иреиҳау ԥсабара цәырҵроуп…

Угәах иалаз шакәыз иаразнак издырит,
Сгәы инадсҵеит, игәаӷьны исызкамыршәит.

АЦӘАҲӘЕИ АЦӘАҲӘЕИ РЫБЖЬАРА

Сԥырҵшьа иақәшәомызт, исырхынҳәыз аԥшалас,
Хәыҭхәыҭла исанаҳәеит ссаркьа ушанԥшылаз.
Сабылуан, сабылуан узыԥсахыз уԥшалас,
Уԥшалас уара уеиԥш аҿымҭра иаршлаз…
Саԥхьа ишьацәхыртәит амза ашәахәацқәа,
Сыхцәԥарақәа еиҭа инырхьысит ахьшьыцба.
Хӡык сыжәҩахыр инақәнаршәит акәапаҳәа.
Цәыкәбарк раӡынԥсараха инсықәҭәеит акәапҳәа,
Уи аҭыԥаҿ амзашеиԥш сахьынкаԥсаз сыццышәха,
Ҵлашәҭк еихытаруеит, ақәцәанӡа ишәҭышха.

Ацәаҳәеи ацәаҳәеи рыбжьара,
Суҿықәлама снасыԥны.
Ацәаҳәеи ацәаҳәеи рыбжьара,
Усхыԥшылама сы-Бзыԥны.
Ацәаҳәеи ацәаҳәеи рыбжьара,
Усҿыхәама са сӡыхьны,
Ацәаҳәеи ацәаҳәеи рыбжьара,
Угәы сақәызма схәырбӷьыцны.
Ацәаҳәеи ацәаҳәеи рыбжьара,
Ухәда сакәшама сшәахәацны.
Ацәаҳәеи ацәаҳәеи рыбжьара,
Ухахәышла салаԥсама сеимхәыцны.

Гагрыԥшь иахашәҭыз амра сеиԥшха,
Ублақәа снырхшәылеит исԥеиԥшха.

Ацәаҳәеи ацәаҳәеи рыбжьара,
Ушәхымс сылаԥсама сышәҭыцны.
Ацәаҳәеи ацәаҳәеи рыбжьара,
Сахьӡама уԥсы сыхәшәыцны.

Лассы сшаеҵәахан снаҵаҷҷеит ажәҩан,
Нас асырҳәеиԥш сҿаасхеит сналшәшәан.

Ацәаҳәеи ацәаҳәеи рыбжьара,
Укәа сҭашәама сеҵәацны.

***

Ацәаҳәеи ацәаҳәеи рыбжьара,
Сугәыҵыҷҷама сфымца кәицны.
Ацәаҳәеи ацәаҳәеи рыбжьара,
Уӡамҩа сацроума са сшәаԥшьны.
Ацәаҳәеи ацәаҳәеи рыбжьара,
Суарҳалхама уаԥхьа сшьацны.
Ацәаҳәеи ацәаҳәеи рыбжьара,
Сыхәрашәан сацында улаӡара.
Иахьаҵәҟьа исыхшәаргьы нас ԥшьаала,
Исызнымҵуа сзацҵонда унҵыра.

***

Аҟармаҵыс абжьы аныздыр –
Сҟармаҵысхеит.
Иахьысҭахыз саԥсшәа ансыртыр,
Хьышәахәан снахьыӡсеит.

***

Сгәырӷьароу? Исымаӡам ҵәахышьа,
Сыжәлар ишәхьызгӡоит ишаны.
Нашанак сымоуп шәхьаа шәхызхша,
Шәа ишәмырбакәа шәыԥшааны.
Шәысгәаласыршәом ианеиқәу сылахь,
Имаӡоу мҩак санысны сцоит.
Лашьцарак ықәымларц шәа шәымԥахь,
Агәырӷьароу? Ишсоулак сшәыхьӡоит.
Сызлабеиоу – сара сы-Бзыԥҭоуп,
Схазыҳәа инхәыҵаршә хаак сҵәахӡом.
Шәзыҳәан сашәа еснагь еибыҭоуп.
Сгәы шәанҭымсуа – исызшаӡом.
Сгәырӷьаҿҳәаша – ари ԥсабароуп,
Ага, ахра иузацәӡаӡом.
Иаарту жәҩануп, имрахәагоуп,
Аԥҭа амра азхҩаӡом.

Санахьӡа аиха имҩаниҵаз,
Схьацадацхеит!
Аӡыхьқәа сыԥсы анрыцсҵа,
Сышьхаӡыхьхеит!

Са сиҩызоуп Бжеиқәа-Бжашла,
Бзиашәа, ишәызгәаҭаӡом сзыԥсоу.
Ишәхыкны амза аншаԥшаԥуа,
Сара сашәа ишабзоуроу.

Сыжәлар ирыхьша санаҿыхәа,
Сыхәшәеиҭахәшәхеит.
Ианрылсх ирылаз аԥҽыха,
Сышықәсқәа ирыцлеит.

Акоуп сзыҳәо, ачҳара сыҭа,
Малс иҳамоу – зегьы иреиҳауп.
Шәымԥшын сцәаҳәақәа, шәысгәыҵԥраа,
Аԥсышәала сгәы шәыҭҳәаауп.

Аеҵәақәа рашәа ансшәысҵа,
Сыжәҩантәхеит.
Аԥша сахьагалак санымца,
Сыжәлартәхеит.

О, ахьаауп сгәашә изахымсуа,
Сыԥсы инаҵаршәны иҵәахтәу.
Сылаӷырӡҵәҟьа сӡамҩа ианахьысуа,
Иавзгоит сыдгьыл инцәахәу…

АПОЕЗИА
Апоезиа – зегьы ириааиуеит.
Иу. Ԥкьын

Уахак ажәҩан лаҟәцәахеит,
Сзыҳәан Бзыԥҭагьы ҭшәахеит.
Сшазгәышьуаз амра сыцәҭашәеит,
Сызгарызгьы сгәы иҭашәеит.
Ҿамҩак сызҭымго сӡыхь ҭабеит,
Аргама саџьал уа избеит.
Иаалырҟьан исҿаҷҷеит еҵәацк,
Сыкәа инҭанаршәит цәаҳәацк.
Ублақәа роуп, ублақәа рхаҭа,
Исыхьӡеит ианысҭахыз иаҳа.
Сиит ҿыц, ааԥынтәи қәахеит,
Акгьы смыхьӡеит, са сеиқәхеит.

***

Ҿамҩазаҵәык ашәа сзыхәшәыцха,
Амзашеиԥш скарԥсахьан сыццышәха.
Амацәазблеиԥш сгәы аҭра иҭдыршәахьоузеи,
Иаҳа сзықәгәыӷуаз сҳәоу сахьдыршәахьоузеи.

Ҿуҭит сгәы иҭыԥрааз нашанан,
Сыбла уаахыҷҷалеит лашаран.
Ублақәа – сҭахарҭа сацәызгаз,
Убзиабара – уи ахра саҿызгаз.
Аӡмыжьра шәӡыкьаса сырзгаз,
Ак смыхьызшәа амцаԥшь салзгаз.
Снеиуеит амҩақәа ирныршәла,
Саҩызаха аԥсуа жәеинраала.
Ҽазнык скарԥсаргьы сыццышәха,
Ушлара снагәылпытуеит сышәҭышха.

***

Ишәҭит сӡамҩеиԥш ҳа ҳтама,
Иптызаап ҳҵәаҵлагьы иаха.
Ааԥын шааиз агәра сырго,
Аччаԥшь налашит ҳлаҳа.
Амра ашәахәа ҭыԥҳа напушәа,
Бзыԥ аӡиас агәы ҭнарҷҷон.
Сӡаӡан снылашызшәа ашьацра,
Хьы раӡнышха еилыџьџьон.

***

Сиашара сцәырхәаҽуан сыргәаша,
Сшьацқьа кадыршхьан ирҩашха.

Ажәҩан ануҵаԥшра жәҩан иаԥсоуп,
Саԥсазароуп, суԥҳауп, суԥоуп.
Дгьыли жәҩани шәзын сара сыцҳауп,
Стәаӡом сара баша – сыӷбоуп.

Заҟаџьара сҵааршәха скашәхьоузеи,
Исыхәарԥштәымыз ӡышхәыс сыржәхьоузеи.

Иҟоуп малс иансымоу аԥша,
Сыхәра иаҿаҭәҳәон, санықәха мҩабжа.

Ашьа зыхьшәу ахаҳә сакәшеит сангәаҟ,
Храк скыдлеит еиҭа, сыԥсы ааиҭак.
Уара утәала снасыԥдаз – егьаурым,
Сылабжыш ншәылаҟьо ахаан схы скрым.
Алира саҷыҭбжьыз, исызхоит сара,
Даҽа зныкгьы сахнарԥоит санԥсра.

***

Исцәыӡт ажәак сыԥсы зыӷраз,
Ажәа, ажәа цәаҳәа ссирк иазхаз.
Ишызбоз алахь еиқәылеит сцәаҳәа,
Алахь еиқәылеит, ишыччоз ахьхьа.
Иқәыԥшыз, игәылшааз ҵхы ссирк агәазы,
Ахра иахшазшәа, имшәоз аказы.
Сашьҭоуп, уи сашьҭоуп, схьаҵуам џьара,
Аԥсабара агәашәқәа аартуа аҷара.
Аҵаа шьашьалеиԥш ицаз иӡыҭны,
Лакә хьшьушәа инышьҭԥраа аҽӡаны.
Абнаџьма атәыҩа иҭаршәыз аҭаххар,
Сзанышәом сажәа абасҵәҟьа иҭахар.

АҬАҬЫН УАХОН
Аҭаҭын уахон, уахон, уахон,
Сыццышәха уццышәҭра сҭаԥсон.
Иаҳзеиԥшыз хьаак гәырны исылхон,
Сҽырцәысхьчон, ублақәа срыцәшәон.
Аҭаҭын уахон, уахон, уахон,
Итәаз ианыржәуаз аҩы еимакны.
Акы нҿыцәар ҽакы уаахон,
Угәырҩа ахугон уеибакны.
Аҭаҭын уахон, уахон, уахон,
Угәахы уҟәион, сыԥсы былуан.
Акы нҿыцәаар даҽакы уаахон,
Усырныкьҭрагьы ҭацәуан.
Аҭаҭын уахон, уахон, уахон,
Иахашәҭуан сыхәда напԥхаҵас.
Аҭаҭын уахон, акы уеилнархуан,
Иухьша анулсхуаз ҭынхаҵас.
Аҭаҭын уахон, уахон, уахон,
Сыццышәха уццышәҭра сҭаԥсон.
Аҭаҭын каумыжьырц анцәа сиҳәон,
Уҭаҭын-лҩа схашәҭуан, сеиқәнархон.

Аԥҭақәа рхыза ԥхьаршәҭны сыԥшаап,
Иарада сзыхынҳәуам, аҭахызар, сыршап.
Ссаркьа нашанаха ацыӷцәа сҭакәрып,
Акәицқәа шахылҵуа исыма сыԥрып.

Ишызбоз аццышә иалахт улаԥш,
Уа акы еилурхуан, уԥшаауан.
Узышьҭаз ццышәуп, сшәахәацха сулашт,
Ҳаццышә кәицҵас еиԥхьшаауан.

Ашьҭа уанҭаз нас хырхарҭа сымбо,
Снеилап, са снеилап хәыц-хәыц зегь еимдо.
Схала исызгәамҭаргь исԥылар ахаҭа,
Издыруеит ишавымсуа ишадыруа аҭра.

Ҳҩыџьа ҳаццышә сыԥсы инаҵаршә,
Уахон, угәы амаӡа ԥыртуа.
Иццышәхахьоу лоуп аццышә нхәыҵаршә,
Зыхчы инҭаӡны изҵәахуа…

***

Есыуаха салнахлоит уи ацәа,
Аеҵәа икыду сханы.
Аԥхашьала исныруеит уи Аеҵәа,
Ҩыџьа ишырзеиԥшу Акы.
Есыуаха уи ажәҩанахь исыԥхьоит,
Уи Аеҵәа аԥсыуа хаҿуп.
Уи Аеҵәа сарҿыхоит, исыԥхьоит,
Схьаақәа уи ала ихҽуп.
Ҳаныҟамгьы икыдуп, уи ҳԥеиԥшоуп,
Аԥҭақәа ианхырҩо са схәуп.
Уи Аеҵәа ҩыџьа иаҳзеиԥшуп, –
Ҩыџьа ҳгәы аԥхара ахуп.

Сымҩа рыҳаракра изаншыло,
Гәыӷрақәас ирымоу сара соуп.
Рҽынканҵо изсышьҭоу мҩамш ҳәа,
Шәрыԥхьа, рзыҳәан – сымшынҵоуп.
Сынҵыра иацырҵоит амшқәа,
Амшқәа рыԥсықәра – сыԥсынҵроуп.
Ишышьхоу гәазҭода сара сыда,
Изықәгылоу адгьыл азын – сышхәоуп.
Сара сыжәҩанзаап дара рзыҳәа,
Сымҩашьеит! Ирҳәеит: – бара бҳаҳәшьоуп.

***

Зқьы-еҵәа ирылскаауеит срылԥшыр,
Сгәеиԥш усзааигәоуп – заҟа иҳараку.
Уи Аеҵәаҿ еиқәшәоит ҳара ҳалаԥшқәа,
Уи Аеҵәа, исгәыбылроу, исразҟу.

Аеҵәақәа рхы удныҳәало иангәылԥхо,
Исаҩсхьоу уаармыхан еиҭа.
Сыргәылумхын зшәахәацқәа сырҿыхәо,
Ҵыԥхтәи амш рҿыцны иԥыртуа.

Уи Аеҵәаҿ избоит уажә усахьа,
Уԥсыԥ алагаҩагабжь саҳауеит.
Шысзымшоз адырзаап уара уда,
Сызшарцаз – уи Аеҵәа сызхоит.

Амза, сыблақәа ирыххәыцло,
Сыхәда ианакәнаршо ашәахәа.
Саумҭан аӡмыжьра сызхыӡло,
Знызаҵәык мраҵас усызкаԥха.

САРГЬЫ СЫШЬХОУП
Агәра зызго сызну амҩа,
Сышьхақәа рылаԥш ахуп азоуп.
Ишцәырҵлак сзаԥшаауа амра,
Рыԥхагас иалоу сара соуп.
Мҩакы санықәу сызрынԥшыло,
Анрыҵаԥшра ахалара иаԥсоуп.

Суҳәоит, сгәы ҭаумшьын уаҳа,
Ажәҩан уҩаҵаԥш игәаӷьны.
Исыдуныҳәалаша умбозар – ухы уҩаха,
Аеҵәақәа ԥхьаӡала ҳханы…

***

Сгылоуп уахак аеҵәақәа срыҵаԥшуа,
Хьаца-мҵаныҳәаҩ илаԥш хаа ргәыҵаршуа,

Шасыс ирыманаҵ ҳгәы-ҳаԥсы нкыланы,
Ҳгәеисыбжь аӡәы изынкылашам дҳақәланы.
Адгьыл аҟнытә аӡәырҩы ҳамца рыцралахьеи,
Ҳамшала ихьухьууа заҟантәы ҳаиҵалахьеи.
Иршәылахьеи уа заҟаҩгьы ҳалаԥшқәа,
Ҳаиԥылахьада уа заҟаҩгьы ахгәашақәа.
Шәҩык еҵәацк еимаркратәа қәрахьымӡала,
Ҳбылхьеит убранӡа, ҳбылхьеит хымцала.
Аха аеҵәақәа ҳара ҳала ишәарҭаӡам,
Ажәҩан иазхом ҳәа ҳашшыргьы ҳаҭәаӡам.
Хланҵы иҭалозар, икыдыз икыдшаауа,
Уацәымшәан аӡәгьы, ицеитоуп еҵәаԥшаара.
О, шәара Еҵәаџьаа, о шәара ҳгәыхьхәшәқәа,
Ҳлахьеиқәра зныруа, излысуа ҳгәыхәажәқәа.
Ижәдыруеит, сымцажәла шгәашахьоу гәаҟрала,
Иҵәыуатәӡам, икыдымзаргьы икыдшәахьоу раҟара.
Икыдымзаргьы, аеҵәақәа иаҵаԥшуа ҳацԥхьаӡа,
Иныҟәыргоит ирыҵаԥшуа ҳазынтәык ҳахьӡқәа.
Зны-зынла дара рзыҳәа ҳара ҳҳамҭаӡам,
Аха ҳара ҳаиԥш ирынцәажәло дрымаӡам.

***

«Аицышәҭымҭаз» иҭугаз ажәла,
Ичара чысхоит уҿамаҿа.
Аицышәҭымҭаз ииз ашәа,
Еиқәнаршәоит уара ушьаҿа.
Уи ахьӡала игәылҷҷоит амра,
Уеицышәҭышьа иаҿыԥшуеит.
Уԥацхаҿы «ура» зҳәо алҩа,
Умцагьы шәҭуеит, ишәҭуеит.
Аицышәҭымҭаз иуҳәаз ажәа,
Угарҭыԥаҿ ишьацәхыртәуеит.
Ашацәа мҩасуеит иныҳәаныԥхьа,
Ашәиԥхьыӡ зымҩа иԥхьатәоит.
Аицышәҭымҭаз шәазхәыц ҽеишәа,
Ҳаҭыр шақәҵатәу аҿара.
Ҳааизхьаԥшп, иҭысхьоу ҳақәра,
Баша ишкамшәоз зны ихҿа…

***

Сеимаркуеит аҵхи ашареи,
Еилаҵәаны гәҭыхала сырԥоит.
Исылаҵо амчи алшареи,
Поезиатә рыцны сыҿдырпуеит.

Ишеимадоу еиԥш, дара-дара дыррала,
Аеҵәақәеи ҳареи ҳаигәылаҳауп дыргала.

Аеҵәақәа уеҵәахә рылскааит,
Аҽснардырит ухьӡ шахыз.
Уашәабжьы ацәа ахыскааит,
Аԥҭақәа иааргәылҵны иԥшыз.

Ҳақәра, ҳаԥсықәра, ҳшәышықәса амаӡа, –
Аеҵәақәа! – ҳаԥсуа нбанқәа, ҳныхамца!

Изкаҷҷома уеҵәахә санамба,
Иааскьеит сашҭа агәахьы.

Изкаҷҷома сӡыхь-хәы ианамба,
Избеит уанаҿыхәоз уазгәыкны.
Са сыда ушьыжь шьыжьума,
Аеҵәақәа рзыҳәан сымшынҵоуп.
Хьы-рахәыцны срыбжьдоушәа,
Рыла сыхьчазар, сыла иԥшӡоуп.

***

Аӡаӡа рыԥсаҳәагаха икашааит,
Адацқәа ирыкәаҳәааит иашәаны.
Ақәыршыҩгьы гәырӷьаӡха икәашааит,
Дцәымҵааит уаҩԥсыжәла дшәаны.
Ҳрызхәыцлааит агәқәа ирымоу рӷьашьас,
Иаҳхазыршҭуа ҽак ацымлааит еиҭах.
Иаҳхаагахьоу ҿаҳәазааит, аиашаз,
Иауазар, шьҭа имлеиааит ахаҳә.
Ҳаилибакаар – акгьы ахьӡом ҳадгьыл,
Иаҟәыблаауеит, иахьхьоу азхоит.
Ахәрақәа еимырхакәа угәы надкыл,
Ианухьча анҵыра ду ҳазҳәахоит.
Ажәҵарақәа мҩахыҵлап ҳа ҳбарҵаҿ,
Аҳәаха ҳахьыргӡап ҳгәы иҭоу.
Гарашәак ҳарҿыхалап ашамҭаз,
Аԥсуара ҽыжәԥраа ишахәҭоу.
Еицәа, еиҭа еицәа мнеиааит аӡә уашҭахь,
Икәашалааит сызҭахӡам аҩнаҭаҿгьы.
Ахаҳә леиуазар, имлеиаат са сышьҭахь,
Амч ахьынӡасымоу – ианамуа аҽны…

***

Еҵәаџьаа аԥҭақәа ныршәыхуа,
Икаҷҷеит. Сгәыхьқәа рыԥсы рӡеит.
Адгьыл инықәҭәаз амза ашәахәа,
Иҿыцыз цәаԥшӡак аҟәыннаҵеит.
Ахҭырԥа шкәакәа ахнахын ашьха,
Ирықәныҳәеит арха, адәқәа.
Сыҵых-сынасыԥ, сцәаҳәахазшәа,
Сыдрыԥхуеит аеҵә ҭыԥхаақәа.
Ҩаԥхьа иссирхеит ашьац иаҵәара,
Сыԥсы нрыласҭәҳәеит адәқәа.
Иаиурым сашәа ҵыхәаԥҵәара,
Рыкәа сҭарҭәҳәахьеит аҳәатәқәа.
Измамкәа идәылҵыз уаха хгарҭа,
Сгылоуп ааԥныла сҭаҳәҳәаны.
Уара уакәымзар, ишаноу сыԥсабара,
Исшәыҵуамызт сгәаҟрақәа рхамы.

***

Еҵәазаҵәыкоуп сашәақәа зрыԥхуа,
Смыцәаӡакәа уахак сзыртәаз.
Еҵәазаҵәыкоуп шә-гәҭыхак рҿыха,
Суада сдәылганы сызгаз.
Аӡиас аеҵә-ӡы инаҿырхәа,
Аԥаҩ ҿыцқәа раԥзырҵаз.
Зхы кны итәазгьы дырлахҿыхуа,
Цәыӡ шимоуц агәра изыргаз.
Еҵәазаҵәыкоуп аҽыуаҩ хаҵа,
Имҩа шлакәыз изырбаз.

Арха, ахра, жәҩан ҵаула,
Саргьы ашара сгәазырԥхаз.
Еҵәазаҵәыкоуп Нарҭ Сасрыҟәа,
Иашьцәа анҵаак излаирԥхаз.
Ажәҩан иаҵаԥшуаз игәаҟха,
Дацәнагеит зхьаақәа зхаԥахьаз.
Еҵәазаҵәыкгьы иалшаӡозеи,
Аеҵә кәицхәыҷ, дунеик иазхаз.
Изыхьӡозеи, иаԥшааӡозеи,
Заҟаҩгьы рынасыԥ днарбаз.
Аӡәы ҳәа игылаз аӡәк дынҳалшәар,
Ишаҳныԥшуеиԥш ԥсгьы бзагьы.
Убри азакәхап, еҵәацк нкыдшәар,
Ҳзыхыџхыџуа ҳара зегьы…

***

Имаҷӡам еҵәацкгьы иалшо,
Аӡәкқәа роуп ҳа ҳаиқәзырхаз.
Ҳазегь мцажәлак еиҩызшо,
Изырԥхаз агәашәқәа ишәхьаз.
Аҵхқәа уԥхаран уршәыла,
Саныҟамоуп, иаҳа улашала!
Агәашәқәа урҭысла иршәҭуа,
Урыхәа, иззымшо рзыршала!...
ИЦӘАЖӘОИТ АԤСУА КӘАШАРАҚӘА
Ужәлар шбеиаз жәытә доуҳала,
Адунеи иахьугӡеит еихаҳа-еиҵаҳа.
Узхаанымыз урҭ аҵхқәа рҿынӡа,
Анеира улшеит бла-ҵарыла.
Ес-ииуа ирыциуа – аԥсуа кәашара,
Аԥсуа кәашарақәа – амҩа лашара.

Аҵхқәа уԥхаран уршәыла,
Улаша, сиеҵәахә, улаша!
Ашҭақәа урҭысла иршәҭуа,
Урыхәа. Иззымшо рзырша.

Зыласра, зыԥшӡара цәажәоз ажәада,
Сылаԥш рылашәҭуан исымбацшәа уажәада.

Аиҳараҩык заҵаԥшӡом ажәҩан,
Суҳәоит, ушеишеи рханы.
Аџьалда имлеихьеи икыдшәан,
Заҟаҩ рылымкаа иахызбаауеи схы.

Акәашарақәа – сыжәлар рҟәышра,
«Шьараҭын», «Иаирума», «Афыкәашара».

Лашьцазааит. Иахыкны сқьашана,
Лашарак нумхын са сзы.
Суҳәоит, сиеҵәахә, улшара,
Сыжәлар ирыҭа ишаны.

«Анасыԥ кәашара» – аӡыхь иаҩсуаз,
Аԥсуа рԥызба ихы шлыхҭниҵоз.

Издыруаз џьысшьон «Аибаркыра»,
Сшахәаԥшуазгьы уи згәыкрыла.
«Ааҵракәаша» кәашара мариазма,
Гьечаагьы зны иашьҭан уи «Каԥхамза».

Еицәа, еиҭа еицәа шьамҩа ирнысхьоу,
Уазрацыԥхьаӡа кәашара згәылҵхьоу.

Иулоу ахқәа кәашарала иулзхша,
Умоҭацәа рчара иахьӡаша.

Идурдырит милаҭ рацәала,
Ԥхьаӡашьа шрымамыз урҭ нацәала.

Анҵыра уцыз – ҳҟазара агәҭылса,
Аргәын ишанаало еиԥш ухьӡ Алықьса!..

Иахьа иизшәа аҿыц-цәа рхами,
Раԥхьа изхәыцыз рыԥсала ирԥхами.

МАРИНА ЛНАЦӘКЬАРАҚӘА

Рхылҵшьҭра рами иаазго Аиааира,
Аԥсны ианықәуаз рыбжьы еинраала.
Угәы згәыз рԥацәа роуми ҳҿызхыз,
Ҳадгьыл ахьаақәа зшьала ихызҽыз.
Уажәақәа рыла: – кәашара бызшәала,
Аԥсра-ҽеи иаԥылоз шьацәхыртәрала.
Ҳахәра ҭыԥқәа зыԥсала иҿазҳәоз,
Кәашарала аԥсы дзырҿыхоз.
Абри аҟара кәашара злиааз ужәлар,
Ахааназ ишымажәуа урҭ рыжәҩан.
Исдыргеит агәра, исҳәап имӡакәа,
Ишугәылаҳау арҿиара акәицқәа.
Зылабжышқәа згараҭыԥ иахымга,
Зцәеижьаҿ изҵәахыз уи ахымҭа.

Илзыскуеит Аԥсны жәлар рартист, раԥхьатәи
аԥсуа ԥҳәызба аорӷан арҳәаҩы
Марина Никәа-иԥҳа Шамба

Ихәшәтәыгоуп, ихәшәтәыга лыблақәа,
Лҷыцқәа рҿы ҳаизылгоит зегьы.
Дырҩызахеит аӡыхь-цқьа ҭамбақәа,
Ҳаԥсны-шьхақәа змоу еибаркны.
Иузыруеит, иузыру гәакьара,
Иуаҩсхьоу – уаҿамшәо урҭҟәоит.
Марина Шамба лнацәкьарақәа,
Ухьаақәа наулҟәшәаны иргоит.
Мамзышьха иааиҵнахит амҵәыжәҩа,
Иатәи амш ҳацәԥымтуа еиқәԥах.
Аорӷан аҿы ианлырцәажәа Ахәрашәа,
Гагра дизшәа дылҽыжәԥеит Бах.

Ишсахьаҭыхгаз уаԥсшәа аҳәашьа,
Издырт «Аестетика адунеи» санаԥхьа.

Дырзышәаҳәоит аԥсуа гарақәа,
Зыԥсадгьыл зны иззыуаараз Орҳан.
Иҭарлашо Гагрыԥшьтәи ҳгәарақәа,
Ишԥаԥшӡоу… Аԥсышәала аорӷан.

Ҩажәи жәаба кәашара ҳзырбаз улшара,
Иуиҭааит уашҭаҿ «Ачаракәашара».

Ашәақәа зхашәаҳәо лнацәкьарақәа,
Ифлеитаха агәаҵақәа рҿы ишәҭуеит.

Увараҿ итәазшәа ақәрахьымӡақәа,
Иуцны идәылҵуеит, иашәахоит.

Сыхьӡала ӡыхькгьы хәыҵаччон ахьхьаҳәа,
Сыхьӡала ԥшахаак асуан еиқәлафха.

Ианыхәмаруа Марина лнацәкьарақәа,
Лгәы-лыԥсы аирақәа ирызҳәаз.
Лыхьӡала самыҳәои агәаҟрақәа,
Иаҳзааргахьоу шьҭаҵәҟьа иазхаз.

Ршәахәацқәа неилаҵәаны сыгәҭыхаха сырԥон,
Лымала дахьцәажәо ҳәа џьоукы сеибадырбон.

Иаҳнарбоит Марина л-Шамбара,
Ашьацеиԥш ҳазмырцәоз ҳкашьшьы.
Аргама изузгьы Бзыԥашҭара,
Аӡәызаҵәык ҳшизымгаз ҳкашьны.

Гәнаҳала ҵлак бӷьыцк ҿызмыршәац,
Махәык иқәтәоу ҵыс иаҵәак змыршәац.

Иҵаулоуп Гагрыԥшьеиԥш лыблақәа,
Ихыҵәахуп сҭоурых зегь аҵакы.
Ирҳәоит ишақәлахо а-Никәара,
Ԥхьа ишиуа Маринараа рыцкы…

***

Ԥҭақәак ҩада ихалон Бзыԥ аҿы рыҽрыхьны,
Амра ахьышәахәа Гагрыԥшь иаҿарыԥхны.
Ашәаԥыџьаԥ еилыџьџьаауан итамашәҭха,
Рхы аасықәыркит сгәырҩа ныԥхьаршәҭуа.
Ура! – еицырҳәозшәа ахьара еилагылан,
Ахьаҟәшәаҩ иеиԥш, абӷьыцқәа аԥша ргәылан.
Сыхьшәаны сизшәа ҩыџьа акы еибырҳәон,
Дымир иаҳа еиӷьын ҳәа егьырҭ «сырныҳәон».
Срыцҳаха, зны уарбак ахраҿ снаҿшәазшәа,
Иалиааз аҵиаа иалнагеит ажәла.

***

Есышьыжь зыхьӡала аҵиаақәа ииуа,
Зашәақәа шьауардынха уа иԥыруа.
Сӡыхь-хәы шаҳзеиԥшу сыжәҩан иаҳәап,
Агәыхь змоу унаҿыхәар угәыхь ухнагап.
Хатәы бызшәала ацәажәара угәанарԥхап,
Уи ала иаԥҵоу зегь урԥхалап.
Сбызшәаҳәашьа абџьарны исиҭеит Анцәа,
Саԥсыуамызҭгьы ахаан споетхомызт сара.
АҴХ АГӘҬАНЫ
Аҭааҩ дсымоуп, сылаԥш кыдхалт,
Аҵх неиуеит еиханы.
Еҵәацк сгәаҭан аҭыԥ ылнахт,
Зегь цоит ашарахь еихәаны.
Амза бӷьыцқәак арчыхәчыхәуеит,
Схышә иаакылҷҷоит акы аҳәарц.
Ҳласба адәныҟа иҷыхәҷыхәуеит,
Аԥша хага ҳгәара иҭнацарц.

Аеҵәа, амза, зегь ԥшымызт баша,
Сласба, иԥхазырсыз наҟ аԥша.
Иаҳзеиԥшуп исҭааз ажәеинраала,
Уи ауп насыԥла ҳаззырша…

***

Сҿахәу? Сымала исымаӡам нагӡашьа,
Исҳәахьоу уазхьаԥшроуп имырҩашьа.
Сылахьу? Ианӡам слахьынҵа мацара,
Сиеҵәахәгьы ҳазишеит, исҳәап имӡакәа.
Сӡыхь-хәу? Сыхьӡ ахызаргьы – еицаҳтәуп,
Шьыцҩык имырхәашьырц – иазхьаԥштәуп.
Ахаҳәу? Башаӡа иуламхеит иара алаԥш,
Ихьчатәуп! Иахьшуп сашьцәа ршьарҩаш.

АНБАН
Сылаԥш нахызгоит сгәы ҭыԥраауа,
Улаԥш ахьнақәшәо иқәгылоуп иара.
Ани аԥеи реиԥш ҳара ҳаизгәыкуеит,
Нхыҵи-Аахыҵи Анбан ҳаизнагоит.
Аԥсуа игәы иаднаҵ изын еизҳароуп,
Анбан аԥсышәоуп. Ан илбызшәоуп.
Анбан – Мамзышьхоуп, абан снаҿаԥшуеит,
Аԥсыуа мырхәагоуп, абар исхашуеит.
Анбан – Андуреи Абдуреи рдоуҳа,
Ҳхылҵшьҭра, ҳдаракәац, Анбан-ҳҭынха.
Еиԥшуп агара агәыдыҳәа иҵысуа,
Игарҵыз амаалықь, мшызҳа изҳауа.

Аҵлоу? Иарҩагәышьеит имцоуроу амыткәма,
Авараҿы ацкы еиҭоуҳароуп умԥшыкәа.

Сан усзылҩызахеит, ахаан усызхаӡом,
Уара узлацәажәо сызхара исызҳәаӡом.

Сымҩоу? Мчылаҵәҟьа илсхзаргь – иаҳзеиԥшуп,
Уқәымлан сыцҳа! Ирҿаҟәеит, уи сԥеиԥшоуп.

Ашьҭыбжьқәа ирхылҵуа поезиа бызшәоуп,
Амҩақәа рахь иуԥхьо, инымҵәо ашәоуп.

Абарҭқәа роуп иаазгаз уара уҿынӡа,
Еиҭаҳәарҭоуп, сахьтәамыз ԥсраҽнынӡа.

Сылаԥш нахызгоит сгәы ҭыԥраауа,
Сгараҭыԥ иаҩсуеит сгәырӷьа ԥзыртуа.

Игәы надҵаны, абарҭ роуп иурбаша имиц,
Иара иакәхәоит еихазҳаша са исзымҳәац.

Анбанқәа рыччаԥшь сашҭа иашәуп,
Ҳҭоурых хаҳәқәа дара рыла ишәҭуп.

Амала, аԥсышәалоуп зегьы-зегь шиурбаша,
Зны дазхьоурԥшроуп, исҳәахьоу мырҩашьа!

Анбан – са сыжәла, сыԥсҭазаара ахәҭа,
Анбан уа узыҳәа – сынбанхеит схаҭа!

АРАҴЛА
Шалуа Инал-иԥа
игәалашәара иазыскуеит

Акоуп дызламӡо аԥсуа хаҵа, –
Аԥсадгьыл ацәыӡра – аԥсра еицәоу.
Ухьӡ ахҭнуп изқәымыз хьаҵра,
Амцақәа ирылугаз шрацәоу.

Уадызбалоит ҳашҭа араҵла,
Арасаӡыхь абахә ашьапаны.
Рышьҭа унхыланы асаӡқәа,
Унеихьан Ӡыхьҿа, саб иҩны.

Цәаҳәацыԥхьаӡа ҳраҵла адацқәа,
Сырхыџхыџуа «Ахәрашәа» рҳәоит.
Рымахә згәылгоу ушәҟәы «Асаӡқәа»,
Сашҭаҿ сцәыӡқәа еизнагоит.

Иишоуп, иахьа ркәапеи хыршәлам,
Аха ишҭамбаз – агәра сургеит.
Ацаҟьа кышра зхәыцра кыдшәам,
Рышьҭа шхьышьҭрахаз сурбеит.

Шәадызбалоит убри араҵла,
Саб иаҳәшьеи, иареи, уареи,
Рыхьӡқәа ануҵан саӡ бызшәала,
Шьхеи, нас ӡыхьи, ԥсҭеи, ҟәареи.

Сарҵысхьазшәа уи ржәытә гара,
Ргәыбылра саб иаҳәшьа ислыркхьан.
Иргәылахьеҩит ҳраҵла, ҳгәара,
Рҿаԥыц ҳәамҭақәа ԥзыртлахьаз.
Рлабашьашьҭа санцәажәло скыдуп,
Аԥшьыџьк, иахьрымаз ныҳәарҭас.
Ишысымбацгьы сыбла ихгылоуп,
Раԥсшәа мырцәо рыԥсы шҭаз.
Исурдырит ҽеишәа рӡыхь агьама,
Сцәыӡқәа суҭеит иԥшааны.
Урҭ асаӡқәа збоит аргама,
Уҭоурых цәаҳәацқәа срыбжьыԥшны.
Аԥсыуа хаҳәышк кәицк ахьалҵуа,
Ужәла анушәа сыхәра арӷьоит.
Иӡхьаз ҳсаӡқәа уԥсы анырхоуҵа,
Зыҵәҩаншьап ыҵшәоугь дымраԥхоит.

Уасаркьалхеит аԥсуа раҵла.
Шәҩыуаа рышәкра еиқәурхеит.
Аԥсуара акәын изызкыз асаӡра,
Уццышә ала уи ухьчеит…
Sez Abhaz-Abaza ädäbiyättän 1 tekst ukıdıgız.
Çirattagı - Аизга - 11
  • Büleklär
  • Аизга - 01
    Süzlärneñ gomumi sanı 3452
    Unikal süzlärneñ gomumi sanı 2279
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 02
    Süzlärneñ gomumi sanı 3384
    Unikal süzlärneñ gomumi sanı 2338
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 03
    Süzlärneñ gomumi sanı 3184
    Unikal süzlärneñ gomumi sanı 2254
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 04
    Süzlärneñ gomumi sanı 3065
    Unikal süzlärneñ gomumi sanı 2265
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 05
    Süzlärneñ gomumi sanı 3041
    Unikal süzlärneñ gomumi sanı 2359
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 06
    Süzlärneñ gomumi sanı 3016
    Unikal süzlärneñ gomumi sanı 2325
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 07
    Süzlärneñ gomumi sanı 3025
    Unikal süzlärneñ gomumi sanı 2353
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 08
    Süzlärneñ gomumi sanı 3058
    Unikal süzlärneñ gomumi sanı 2307
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 09
    Süzlärneñ gomumi sanı 3060
    Unikal süzlärneñ gomumi sanı 2343
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 10
    Süzlärneñ gomumi sanı 3015
    Unikal süzlärneñ gomumi sanı 2297
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 11
    Süzlärneñ gomumi sanı 3046
    Unikal süzlärneñ gomumi sanı 2279
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 12
    Süzlärneñ gomumi sanı 3118
    Unikal süzlärneñ gomumi sanı 2356
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 13
    Süzlärneñ gomumi sanı 3028
    Unikal süzlärneñ gomumi sanı 2276
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 14
    Süzlärneñ gomumi sanı 3066
    Unikal süzlärneñ gomumi sanı 2347
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 15
    Süzlärneñ gomumi sanı 3091
    Unikal süzlärneñ gomumi sanı 2393
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 16
    Süzlärneñ gomumi sanı 3079
    Unikal süzlärneñ gomumi sanı 2424
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 17
    Süzlärneñ gomumi sanı 3122
    Unikal süzlärneñ gomumi sanı 2383
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 18
    Süzlärneñ gomumi sanı 3051
    Unikal süzlärneñ gomumi sanı 2311
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.
  • Аизга - 19
    Süzlärneñ gomumi sanı 1297
    Unikal süzlärneñ gomumi sanı 1103
    0.0 süzlär 2000 iñ yış oçrıy torgan süzlärgä kerä.
    0.0 süzlär 5000 iñ yış oçrıy torgan süzlärgä kerä.
    0.0 süzlär 8000 iñ yış oçrıy torgan süzlärgä kerä.
    Härber sızık iñ yış oçrıy torgan 1000 süzlärneñ protsentnı kürsätä.