Аамҭа иазымҵәахыз - 3

Уи ус акәым ҳәа мчыла,
Еиҭа рыбҭоит ҽа ҽҳәарак…
Баша сгәырӷьон са гәаныла,
Сымш сахӡыӡаауан иахьак…
Исзынхазеи, нас саахәыцуеит,
Ас сеиҭамшәацызт бзанҵы?!
Иахьа амш са истәым, саҟәыҵуеит,
Аха аӡәгьы исызиҭаӡом иацы!..
05.05.2015

***
Нас изури, сгәы самыхәеит,
Сатҟәоит быԥшӡара зынӡа!..
Расатә ҷыншәа сеиҭахырхәеит,
Банызба қәыԥшҵас схы ԥхьаӡа!..
Ба бзакәыҵәҟьоу ақьаад ианҵазар,
Споезиа гәылшәоит еиҳагьы!..

Арифмеи аритмеи набыцҵазар,
Мшәан бжәеинраалоуп бхаҭагьы!
05.05.2015

***
Ааԥын сыхәоит, сара сымчқәа анынҵәо,
Уи иадыруеит, сызқәу ацҳақәа шԥыҵәҵәо,
Иԥырны иааиуеит…
Ааԥын ҿыхоит, сара хьаак санарҳәацәо,
Аха зны-зынла амҩа ианықәхо, ианкҿахацәо,
Аӡын сиааиуеит!..
06.05.2015

***
Шәысԥырҵ, наҟ сашәақәа, иҟалозар ҳаилгап,
Шәареи сареи акырынтә ҳаицыбылхьеит!..
Зынӡа ҳаибамбацшәа ҳҽырҭынчны ҳнатәап,
Ишԥазури, ӡмыжь дук схыԥшылахьеит…
Мышкы-зны сҿажәкны шәара саншәызхьуа,
Шәыгәхьааган, аӡышеиԥш шәысгәалашәоит!..
Уахь аӡсашьа здыруа роуп изгәаӷьуа,
Амарҵеи – уа рыцушәа дахәлашәоит!..
06.05.2015

***
Ауаа рҽырԥсахит зынӡа,
Рлакҭақәаҵәҟьа урҭадрыԥшуам!..
Иубац ракәушәа иԥхьаӡа,
Аха ирыхьи?! Угәы иауам…
Мап, иҽимԥсахит аӡәгьы,

Урҭ зегь шыҟац иаанхауеит…
Аамҭа иалшозап мбатәгьы,
Иара иахьаҭаху иаанарҳәуеит!...
10.05.2015

***
Ианаамҭаз иҳәамыз ажәа,
Иабаҟоу? Агәы ҿыӷьны иԥрит!..
Ицәырҵыз уажә еиқәыхьшәашәа,
Иџьашәшьоит, изакәызеи ари?!
Шәа ишәзымҳәаз ажәа ахаҭыԥан,
Ишәан иалаӡыз уаҟа шәыԥсыԥ…
Иашас иҟаз зегь ирхыԥан,
Иааит, иннакыларц аҭыԥ!..
10.05.2015

***
Изанажьтәугьы, изанажьтәымгьы,
Зегьы иранажьуа ишаауаз,
Иаҳҭахым, рҳәеит шәызҿугьы,
Рҭыԥқәа даара изгәаԥхауаз!..
Еимактәугьы, еимактәымгьы,
Иааҟәымҵӡакәа ишдрыххауаз,
Рҽанеидыркыла гәакьагь тәымгьы,
Иддырбеит амҩа иахьцауаз!..
Изаҭәоугьы, зынӡа изаҭәамгьы,
Урҭ рҭыԥаҿ инатәеит!..
Зегь зцәа иҭазыгӡо ахангьы,
Мчыла алакҭа ааччеит!..
Уажә иҳәатәугьы, иҳәатәымгьы,

Цәыршәымгароуп, шьҭа иазшәырха!..
Ргәы рхымшәароуп ишьҭыхны изкугьы,
Мамзар, иҭыҵуеит рымӡырха!..
10.05.2015

***
Мап, иауӡом, сгәы бҭоуп бара бышҭац,
Быгәхьааган сцәырҵуеит, ма џьара бызбарц,
Ҳамҭакы…
Мап сызкӡом, ак сыгымхеит сшанхарц,
Ҷкәынак бышҟа иҿынеихеит бигарц,
Усс сымкы…
Узымцеит џьым, уаангылароуп ара,
Уара уеиԥш, ҳаҿуп ҳаргьы абылра,
Иаачҳала!
Анцәа иуҟәырхуп џьымхеит ахҵәара,
Угәҭыха умҵәахын, иуқәшәаргьы ацара,
Иаацҳала!..
Кагь ҟамлазшәа, акыркыр быччоит,
Бара быччаԥшь, шәаԥшьҵас исҿаҷҷоит,
Сгәы сарго…
Сара издыруеит, ицәыргам мчқәак срыхьчоит,
Урҭ рҽанырӡо, иаразнак ба бсыхьӡоит,
Шәарҭарак сыҟәго…
20.05.2015

МЧЫЛА ҼЫРЧЧА ҞАҴАНЫ!..
Мчыла ҽырчча ҟаҵауа,
Хаҵа дцеит!..
Ламыск аацәырҵыр иԥхаҵауа,
Зегьы дрыхьӡеит!..
Аха дызлаҟамыз ҟалҵар,
Арахь иааԥшуан…
Илурызеи, зегь лымӡар,
Дзакәыҵәҟьаз хтуан!..
Баҩхатәрак лзхьамԥшит зынӡак,
Зынӡак, зынӡак…
Ах, иаацәырҵызҭгьы хәыҷӡак,
Хәыҷӡак, хәыҷӡак…
Аха изцома нас иаргьы,
Иахьаҭахым?..
Лара илзаанхеит лҳәатәгьы,
Ҽак лхым…
Уи уҳәан-сҳәанла иаалҭаххар,
Илыргылоит ханк…
Длызхәыцуам лхаҵагь, баангыл иҳәар,
Илымам ԥанк…
Ла даауԥылар,ҳаӷеиҭа,
Ӷьатамак хжәеит!..
Убас иҭылашьцаауп ллакҭа,
Аԥсцәаҳагь дшәеит!..
Мчыла ҽырчча ҟаҵаны,
Хаҵа дцеит!..
Аха лынасыԥ аҽӡаны,
Илыцәцеит!..
21.05.2015

***
Уи насыԥума, иразҟу,
Ицәгьоуп аҳәара…
Мамзаргь аҩысҭаа ҳаиҟу,
Мшәан ҳара?!
Аамҭа бзиак ҳшазыԥшыз,
Ихәлеит, ишеит…
Ахчнызагь амыцхәҵәҟьа ишыз,
Агәҭа еиҟәшеит…
Уажәшьҭа иҳалшаӡом аԥшра,
Шьҭа иазхоит…
Ижәдыр, иаҟәымҵыз ҳжьара,
Ҭаҳархоит!..
21.05.2015

***
Урҭ лаԥшыла иааибадырын,
Дара сшыртәмыз агәра сдыргеит…
Нас афырҳәа «дааркәадырын»
Раԥхьагыла дрыма ицеит!..
Ус шаҟаџьара иҟарҵазеи,
Хьаасгьы ирымам, акгьы мӡа!..
Мшәан иаҳҳәеит ҳәа, иддырбазеи,
Рыхқәа ркәачрахеит зынӡа!..
Ас ҳандәықәла, ҳабанеиуеи,
Ижәдыр, ашәарҭара ааигәахоит…
Ауаа ҟәышқәа аныгәаҭеиуа,
Ауаа мдырқәа рацәаҩхоит…
22.05.2015

***
Дара ракәзаап ипатриотцәоу,
Дара иреиԥшу дырбаӡом!..
Дара раҟара идилитантцәоу,
Шьҭа рполитика сфаӡом!..
22. 05. 2015

***
– Уԥсыргьы усҵәыуаӡом гәыблыла, –
Днасыԥгылт ихы рҵысуа…
– Уара уҩыза дысхагылар,
Убасҟан акәҵәҟьоуп саныԥсуа!..
22.05.2015

ЗНЫК УЗНАԤХАЗ…
Шаҟантә удыргәаахьои, удырҵәыуахьои,
сбызшәа,
Рҩны удәылырцахьои, ианумулак уршәа…
Аха урҭ амдырқәа рыцҳәа зынӡа иуҳәаӡом,
Угәы шыԥжәоугьы, ҿуҭӡом, уҳәҳәаӡом…
Шаҟантә унышьҭаҵан иуԥырҵхьои уара,
Уқьышә хнажәоит, ицәгьоуп ҳәа уҳәара!..
Иаразнак ишьҭырхуеит рысасцәа рбызшәа,
Уара ус асахьаз удыртәоит аханшәа…
Шаҟантә уара уда ишхәарҭам рбахьои,
Ахықә ианхықәгылалак урыхьӡаны
еиқәурхахьои?!
Уаҳа ахаан уныжьны ҳцом рҳәахьои,
Аха рыԥсқәа анроулак, иугәҭасны урҭихьои?..

Шаҟантә ихоугалахьои ауаа ирбаратәы,
Арҭ баша ҷкәынцәам ҳәа рыӡбахә рҳәаратәы…
Аха аҟәара инықәсны, ианнықәлалак адәы,
Зынӡа иаархадрышҭуеит уара убзеира атәы…
Сбызшәа, урҭ арыцҳақәа аанагоит уа уҿы,
Ус ԥхашьарак ықәларгьы ҟалоит рхы-рҿы…
Игәра гашьас иамои аамҭала узҭаххаз,
Ахаангьы уизхьамԥшын, уара знык узнаԥхаз…
26.05.2015

***
Аамҭоуп иртәу, уаҳа акгьы,
Нас ирымазааит, иргааит…
Рааигәа днеир руам аӡәгьы,
Арахь иусхәуи ҳәа изгәааит…
Есымша еиԥшым амҟәыба,
Иаанагоугьы цқьа имзаӡац…
Аамҭа ашәыр еиԥш ианырҟәыба,
Ҵаҟа имлеиз – ҟамлаӡац!..
26.05.2015

***
Амца ахьеиқәыз рымбаӡеит,
Алҩа ахьыҟамыз иҩналеит…
Урҭ ирҿцәажәаз, иргаӡеит,
Изыхәҭамыз иашҭа иҭалеит…
Уахь идәықәлаҵәҟьар зегьы,
Ахықә иазааигәахоит, ишәарҭоуп…
Акгьы рхарамзар аӡәгьы,
Анцәа изгәаҭозар, ишаҭоуп…

Гәы зызҭам ауаа рацәаҩхеит,
Аамҭа дырхәашьуеит рхала…
Аиашагь ахра иаҿахеит,
Изаҿысрымашь уи лыԥхала?..
Зегьы ҳрылаӡап ҳара,
Ҳхьаагьы ҳхаҳрышҭып мчыла…
Аха аӡы ақәызҭәо ҳхәышҭаара,
Бзеирак амбароуп урҭ рыла…
02.06.2015

***
Шьири исзымдыруа рацәазҭгьы,
Ма исымбозҭгьы зегь аахтны…
Шьири, маҷӡак са сгаӡазҭгьы,
Избозҭгьы иҟоу зегь аарҳәны!..
Аха зегь ахарантә избарҭоуп,
Издыруеит урҭ рыԥсы ахьҭоу…
Мыцхә анудыруа ишәарҭоуп,
Насгьы, ак улымшо уантәоу!..
02.06.2015

ИХЫ ДАНАХЬӠА…
Есымша ицрыхоит акәкәыҳәа мчык: –
Ухгьы уаазхәыцла иҟалозар хәыҷык…
– Уи баргәума, мшәан,нас зны сахьӡап,
Уажә сҩызак ицхраатәуп, сышзахәо сцап…
– Уи ихы дахәоит, иҟалозар уиҟәаҵ,
Усҵәҟьа икәадам анцәа иҟынтә иара идац!..

– Ус егьа иҟазаргь, сгәы ҭынчӡам зынӡа,
Атәымуаа рыбжьара дсызныжьуам дзаҵәӡа!..
– Ажәлар қызықызуа еизеит уажә еиҭа,
Ирҭахуп уқәгылар убрагь ухаҭа…
– Уажәыҵәҟьа снеиуеит, саанымха мыцхәы,
Хымԥада исҳәароуп уаҟа сҿахәы!..
– Уа ужәла иҿыҵакуп агәаҟра иаҿу,
Унеира дазыԥшуп гәырҩала ихәаҽу…
Ачара мҩаԥугарц ухьӡгьы рҳәеит…
Згәы нибархаз уажәа анырхьымӡа, иҭахеит…
Абас мацара иара имшқәа зегь цеит,
Ахәшә бзиеиԥш, дызҭахызгьы дрыхьӡеит…
Иара ихы аха шимамыз уаҳа зынӡа,
Иажәра дынхықәгылт, ихы данахьӡа!..
06.06.2015

***
Абыржә иаабаҵәҟьеит, абыржә
иаадырҵәҟьеит урҭ закәыз,
Мшәан, уажәраанӡа нас ҳабаҟаз, ҳа ҳазҿыз?..
Анцәа иаҳзааишьҭит, ҳаиқәдырхоит ҳәа
ҳарзыԥшуан,
Ус акәҵәҟьоушәа, даргь ааҟәымҵкәа
ала дыршуан!..
Нас иҳахьи, изымариоуи, мшәан, абас ҳжьара,
Аӡы ҳашьҭнаԥаар, ҳаӡхыҵыр акәӡами џьара?!
Аԥсабара акәӡам уи аҩыза алахьынҵа
ҳаззрыхио,
Ҳара ҳгәаӷь ауп, урҭ зхылҵуа, иагьзырҿио…
07.06.2015

***
Ула хумҩар, иумбаша зегь убауеит,
Улымҳа умыџьгәар, иумаҳашагь уаҳауеит!..
Уҿы еихоумкыр, иумҳәаша уарҳәацәауеит,
Аҩызцәа рҭыԥан, аӷацәаҵәҟьа урҳауеит!..
Уа уаӡәыкым, ус ишоуп нас ари адунеи,
Уажәа нхароуп, ушьҭа нхароуп уахь уаннеи…
Аиаша иақәӡыз, уи дыбжьаӡӡом, уи дынхоит,
Ушьҭахь иааиуа, аӡ иазымгаз ацҳаиԥш,
урҭаххоит!..
07.06.2015

***
Уи дахьыҟоу, уи иԥшаара даара ицәгьоуп,
Ҩада дцозар, иара ишьҭақәа лада ихоуп!..
Ихаҭа издырӡом, макьанагьы уи дызҿу,
Илаз бзеирак, аӡы ишаиҭаз, ишхәаҽу…
Нас дазхәыцышт, дшымҩахҟьазгьы нас ибашт,
Абри аума, схы зыхҭнысҵазгьы иҳәашт…
Зегь урхынҳәыр, зегьы урыхьӡар ҟалоит ара,
Аха иузырхынҳәуам, знык иуҭииз ууаҩра!..
08.06.2015

***
Уи маӡазааит, иҵәахызааит, исҳәарым,
Аӡәы имбазааит, ибаргьы ибазшәа ҟаиҵарым!..
Изаҳазгьы, зынӡа агәраҵәҟьа ргарым,
Изамхаҳәазгьы, ихы бжьаирӡып, дырбарым…
Аха ҳҩыџьагь иаамдыруеи уи шмаӡам,
Нас изҿыҵҟьазгьы зынӡаҵәҟьа дышгаӡам!..

Наҟ иаҳҟәаҵааит, русс иалои ҳагәқәа ирҭоу,
Аӡәгьы иазҵааӡом, аха амра гылоит ианахәҭоу!
08.06.2015

***
Иҩызцәа иреиӷьу иааигәа игылазшәа ибауан,
Гәыӷрак ицын, уи дышьҭыԥаан дагауан…
Аамҭа зтәыҵәҟьаз, урҭ ирыхьуаз рбауан,
Рхаҵкы камыршәуа, дара рышҟа иааскьауан…
Иҩызцәа иреиӷьыз, уи данааԥш имбаӡеит,
Зынӡа ицәыӡҵәҟьоу?! Иаразнакгьы
агәра имгаӡеит…
Урҭ абацоз, рҭыԥ нырмыжьит, ара иаанхеит,
Аха ишибоз, иааизымдырыртә ҽа шьоукхеит!..
09.06.2015

***
Аӡәыр идыруоу уаҵәтәи амш иаҳзаанаго,
Шьҭа ҳрымжьандаз, ҳаԥхьа игылоу,
зыгәра ааго…
Дасу иоуа иара иуалу, иара иқәнаго,
Шьҭа идыруа дызну амҩа дахьаго…
Цқьа иаԥшәымахару ҳадгьылаҿ ҳбызшәа,
Цқьа ҳаиҵыҵру, иаҳзыԥшузеи ҳәа ҳамшәа…
Сеидру, сеидру, уаҵәтәи амш иаҳзаанаго,
Еиҳамхандаз, иаҳнаҭо аҵкыс, иаҳцәаго…
10.06.2015

***
Иџьаушьаша, урҭ убриаҟара рхагәраргоит,
Ипоетцәоу, дара ракәҵәҟьоушәа рхы рбоит!..
Ус ҳнарывсуан: – Ҳзырԥырхагои, рхы
ржьалааит,
Егьрылҵгәышьом, аха ргәалақәа рҩлааит!..
Ишнеи-шнеиуаз, ҳашәҟәқәа ҭшәыжь ҳәа
иааҳҿагылт,
Ирыхәҭаӡоушәа, иреиӷьыз ҭыԥқәак
инархагылт…
Уажәшьҭа аҩышьагь, уажәшьҭа
ацәажәашьагь ҳдырҵоит,
Ҳаҳауп изхароу, ажәла башақәа лаҳҵоит!..
10.06.2015

***
Абаҩхатәра змоу, уи дышшәарҭам агәра згоит,
Иажәа брыргьы, уи лымыс дук ныҟәигоит..
Ибаҩхатәрадоу, зынӡа их беиаӡа ибоит,
Уи дзакәыҵәҟьоу, димырдырырцы дҽырбоит!..
Араҟа ишәарҭоу, араҟа игәаҭатәу ҽакуп,
Аԥхьаҩ гәыраз, иааизелмыргартә ибла хкуп…
Аус злоу, уи димжьароуп зыгәра иго,
Заа идырроуп, дызнылоу амҩа дахьаго…
13.06.2015

***
Нас уаҩразар уа узышьҭоу,
Нас узцугьы уааизхәыцла…
Уи дацәхьаҵхьеит угәы иҭоу,
Уа ушгылаз ҿымҭ уеиԥхьхәыцуа…

Нас шәабагауеи шәзышьҭоу,
Уи ладароума, иҩадароу?!
Аӡәгьы иашәҳәом шәгәы иҭоу,
Аӡәгьы иашәҳәом шәыуа изхароу…
Нас издыруада шәахьцо,
Нас издыруада уахь ижәго?..
Абзиеи ацәгьеи шәзыхьӡо,
Рыуа иарбан шәымҩахызго?..
13.06.2015

***
Аиаша ицәыӡын, ишааигоз,
Дашьҭамлазар…
Арахь уи ихьыз зегьы збоз,
Кагь рымҳәазар…
Амц ахькаршәыз уа ибан,
Ишьҭиԥаазар…
Нас иахьигоз зегьы ӡбан,
Игәаԥхазар…
Уажәа изеилкаашам ахаан,
Дамрыԥхазар…
Ус зысзиуи ҳәа умҵаан,
Уинаԥхазар…
13.06.2015

***
Саамҭа анааиҵәҟьа аӷәра сзымкит,
Исзыԥшуазма, уи ццакуан…
Баша усқәак сыбла хыркит,
Баша мчык сыхҭанакуан…

Шьҭа аӡы ахьышьҭрахь игьежьуама,
Даҽа ҿышәҭак иазцахьеит.
Саамҭа мааиӡаргьы, сыԥшуама,
Иааиз-аҿахәы сҳәахьеит!..
***
Мап. Исхамышҭӡеит акгьы,
Уажәа хьшәашәақәа маҭушәа,
Схәыҽны исылгарц рҭахушәа,
Сыхәда иакәшоит еиҳагьы…
Аха… Сыҽрысҭаӡом сара,
Наҟ исхыԥаан икасыжьуеит,
Рышҳам, рхаҭақәа идсыржәуеит,
Азыԥшыха рысҭаӡом сыԥсра…
***
Абзеира деигӡозма, иҟаиҵеит,
Дышзахәоз иаиҭеит зегь аӡы…
Аха ашьҭахьҟа имхынҳәӡеит,
Уимоу, ирҿымҟьеит ибзарӡы…
Аха даанымгылеит убра,
Еиҭах абзеира ҟаиҵауан…
Даргьы ирзымгоушәа агәра,
Ишьҭыхны аҩныҟа иргауан…
Уи ибзеира ҭабаӡом,
Ишьҭхысаа аӡиас еиԥш иаалоит…
Шьоук ҭабупгьы рҳәаӡом,
Ирхәҭаны ироуашәа рбалоит…
Ҳгәы змырҭынчуазеи ара?..
Ак заҵәык ауп изыцәшәатәу…

Ианулшах абзеира ашара,
Дыбжьамхондаз изҭатәу…
***
Уи гәыкала дысзыҟазшәа збауан,
Схаҟара уи игәра згауан,
Иара иҿы зегь аартны исҳәауан…
Аха ииҭахыз мацара иаҳауан…
Хәыҷы-хәыҷла уи днаскьауан,
Исзеицәаз мацара иӡбауан…
Дҟәышхап, сааиԥеиԥшлап, сыӡбеит,
Аха сызқәымгәыӷуаз збеит…
Дгылт сызҭахымыз рыгәҭа,
Зынӡак сҭаимырԥшит илакҭа…
Исзызуаз иацы иашьара,
Симыԥсахыр замузеи ара?!
Уцәа иҭаумыгӡар ауам угәырҩа,
Иуҵәахып ухьаақәагь зымҩа…
Акызаҵәык иуӷрыхо, узрыххо,
Ихьааугоит – ушәҭ анмаҭхо…
***
Дааҷырҷырын суада дындәылԥрааны дцеит,
Ах, анаассыни, уи сжьашьагьы лҵеит!..
Шьҭа данҩнало ҳәа укәаҩӡа уԥшла,
Угәыӷра акаҳуеиԥш ирхаан иршла!..
Сыжәҵыс хәыҷ, иабыкәу иахьыҟоу быҭра?!
Быхьӡ ҳәаны есымша иаҿуп сгәы аҿыҭра…
Сықәра базымҵаан, иацоуп саныхшәаз,
Уахь азы сшәарҭам, уи акәзар бзыршәаз!..

ҲАИЦЫРԤЫЛОН АБЗИЕИ АЦӘГЬЕИ…
Ахра аҿҟьара ҳаицаҿысхьан,
Еицаҳфахьан ахьҭагь кыр…
Зынгьы раԥхьа иара дсырхысхьан,
Дааԥшыр, иалшон ибла хкыр…
Ҳаицырԥылон абзиеи ацәгьеи,
Ҳаицыриааиуан есымша…
Аразҟыдеи ажәымҭацәгьеи,
Ахаан ирыгҳмыжьцызт ҳалша…
Уажә даазқәылаз иҽиԥсахит,
Избац иакәӡам уи зынӡа…
Зегьы дахьырбарҭаз дтәахит,
Ҭыԥкгьы рцәигеит иԥхаӡа!..
Аԥсшәагь аарла иурҳәароуп,
Иччаԥшь днахан иҵәаххьеит!..
Шьоук рҿаԥхьа цқьа дҽырбароуп,
Дара дшыртәу агәра ргахьеит…
Нас издуҵода шьҭа ахара,
Аамҭа исзақәыжьуам зегьы…
Цәыӡкгьы сымам, еибгоуп сынхара,
Аха исымамшәа стәоуп акгьы…
28.06.2015

***
Зегьы дрыхьӡазшәа, еиликааӡазшәа,
Иҭиҵааӡазшәа, ихы агәра игеит…
Ииҭахыз зегь, рҿиҵааӡазшәа,
Их ду беиашәа ибеит!..

Аха дрышьҭуазма ус дыштәҩасуаз,
Аҵаа дәықәлеит, иқәацеит…
Зегь рзыҳәан аԥша анасуаз,
Иаргьы даашьҭԥааны дагеит!..
***
Бмыччан банысԥыло, бмыччан банысԥыло,
Сыббаргьы бҭахымшәа, бгәаазшәа ҟаҵа…
Саргьы сгәырӷьара мчыла аӷәра аанкыло,
Сынцәыҵашәкәап уаҩы имырбаӡакәа сахьца…
Зегь акоуп ибышьҭалоит сгәы мтәаӡакәа,
Егьаџьара бцаргьы быԥшааны баанагоит…
Бсызгәаазшәа бысԥырҵыргьы ажәак мҳәаӡакәа,
Бгәеисыбжь, аҽҵыс акьыркьырбжьеиԥш
иааӡоит!..
***
Исхароу сеидру, сеидру, сеидру,
Уи лыблақәа шгәааз збоит…
Ҳшеицәыхароугь, ҳагәқәа анеиду,
Ирзымҳәац шыҟоу агәра згоит…
Егьа сҳәаргьы, егьа зургьы,
Лара илҭаху ажәак бжьахоит…
Уи сыԥшаанӡа егьа ҵыргьы,
Ак шысхароу лыблақәа ирҳәалоит!..
***
Иануҿаччоу ауп ианшәарҭоу,
Рыччаԥшь иаҵаҵәахуп шҳамк…
Аха иаразнак ианузгәамҭоу,
Ма угәаҭеиуа ҭыԥк уанамк,

Усҟан урҭ иахьухьуа рдыруеит,
Уусқәа иаразнак ирҟаҭәоит…
Угәы каумыжьыр, рыӡӷьы уруеит,
Иануцәкаҳа-рылаԥш бааԥс уарҭәоит!..
***
Жәеинраалала исзымҳәеит сгәы
иҭаҵәҟьаз зегьы,
Уажәоуп иансыцрала сыргәаҟуа еиҳагьы…
Уи хьаауп, иаасзымчҳартә цәгьашәа
ибызбызуеит,
Исымпыҵҵәраарц аҭахушәа скалам
ҵыс-ҵысуеит…
Сазхәыцроуп исхызгаз, уи шьҭа сзацәцаӡом,
Уи сгәаҿы ада ҽаџьара амҵәыжәҩа азҟьаӡом…
Иара аҽура иаҩызоуп, ақәырқәырбжь саҳауеит,
Аха аӷәра ансзаҿамк, иахьакәым сагауеит!..
12.07.2015

***
Уи дысзеилымкааӡеит уаҳа,
Жәантә иҽиԥсахуан мышкы…
Аха ишьацҳәа санаҿаҳа,
Џьаргьы сзымцартә санакы,
Нас дыздырит дзакәыҵәҟьаз,
Аха игәианхахьан зегьы…
Сажьеит анкьа акәиц ихәыҵҟьаз,
Сарԥхоз џьысшьон иахьагьы!..
***
Џьара узавамлаҵәҟьо дцәажәеит,
Ииҳәаз даара иргәаԥхеит.

Иара иҭеиҭԥши, иҿыҵшәоз ажәеи,
Иаарызҭымго ргәы иҭахеит!..
Аха ԥыҭрак аамҭа анбжьала,
Ииҳәоз рмыхәеит зынӡа акгьы…
Ргәаҿы дзаанхаз ус ибжьала,
Избан рыздыруам иахьагьы!..
УРҬ ДРЫЛАМ УЗЫҚӘГӘЫӶША…
Урҭ рҽеидыркылт мчыла,
Наҟ ирхадыршҭт изакәқәаз!..
Аха амҩа иананыла,
Ауп иангәарҭа ирзыԥшқәаз…
Урҭ дрылам узықәгәыӷша,
Баша ицәажәауеит рҿы…
Анцәагьы издырам ирзихәыцша,
Кәицк мҿыхац ргәаҿы…
Аха рҽеидыркылт мчыла,
Дара ртәала ак рҩуеит!
Иаԥырҵоу башоуп, аха бжьыла,
Урҭ елаӡҩеижьҭеи кыр ҵуеит!..
***
Аӡә иоуп уара иубо уи уаниҿцәажәо,
Аӡә иоуп уара усҟан зыбжьы уаҳауа…
Иааҟәымҵӡакәа аиаша иашьҭоу, игәжәажәо,
Арахь уаҩ изгәамҭоу амал зырҳауа…
Ҳаи, уара рыцҳа, ианбыкәу уанҟәышхо,
Иубац дабаҟоу, уи кырынтә дааҳәхьеит…
Анкьа узықәгәыӷуаз дбаагәаран, ддаушха,
Иабаҟоу уи абаагәара, иԥыххаа ицахьеит…

СХАЛА САНААТӘО…
Ас иаазырҳәызеи сҩызцәа сзықәгәыӷуаз,
Аамҭа, о, аамҭа, зегь зхароу уа уоуп!..
Анкьа ҳартәомзт, иаҳхьаан аӡә иҳахьуаз,
Уажәы изышьҭоузеи, акызаҵәык-рхоуп!..
Асҵәҟьа сызқәымгәыӷуа сақәшәоит ҳәа иҟадаз,
Аиашаз, еиҳа сазыԥшын сара аԥсра…
Шьоукы инарышьҭалт русқәа рҿы ирыхәоутаз,
Шьҭа сызҭахыда, сырхашҭит сара!..
Ҳаҷкәынра, ҳаҷкәынра, еиӷьу аамҭа ыҟаӡам,
Изури, уи саазхәыцуа стәалап…
Аамҭа ааҳәызар, урҭгьы акгьы рхараӡам,
Схала санаатәо, ус схы зжьалап!..
***
Исылшом, исылшом, гәырҩа хьанҭак сашәеит,
Иҟам абзиабара, ихьшәашәеит, ихьшәашәеит…
Анкьа иҳабжьаз зегьы лхаршҭны дцәажәеит…
Сабацои,сабацои, схы аҩны исзҩнакуама,
Сгәырҩақәа сықәпапан сеимыржәжәарц
сыркуама,
Иахьак зынӡа ирықәшәеи, рыҭра зегь
дырбгама?!.
Шьҭа ажәҩангьы исаҳәи, угәра злазгари уаҳа,
Сгәыӷра уҵәахит ԥсҭҳәа еиқәаҵәала инеимаҳа,
Исурбашам, слымҳа саркьада избараҳа…
Сгәыӷрақәа аацәырҵыр, гәырҩак мчыла
иажуеит,
Сзырхагоз уи лыччаԥшь, уажә сгәы канажьуеит,
Абзиабара ашьҭагь, ашәахсҭеиԥш иннажьуеит…

ИМЦАЗ АБЗИАБАРА
Уажәшьҭа иаадыруеит егьшаҳзеилам,
Уи шаҳԥырҵыз, ишхароу…
Аха зны-зынла ҳарԥеиԥеиуеит,
Ус изтәома мцак зыцроу…
Уи ахаан ԥша иазырцәом,
Уи ахаан ӡы иазгом…
Џьара гәыкаҿ аҽеизырҵәан,
Иахьҭатәоу зынӡак иубом…
Зны ишәахәахаауп,зны иаркацеиуеит,
Насыԥ имоуп изхашыз!..
Ианцәырҵуа сеидру, ҳаргәаҭеиуеит,
Зных аӡлеиреиԥш уазыԥшыз!..
***
Ах, аԥсҭазаара, сужьеит,
Ацҳа шәарҭа сықәугалеит…
Ақәаршҩы аҟәыҵит, ихыжьжьеит,
Аха сгәы шәахәакгьы ҭамлеит…
Ах, аԥсҭазаара, суфеит,
Есымша ҿҟьаррак саҿагылоуп…
Саџьал сԥырууаан имцеит,
Ижьышуа ақәыџьмеиԥш исыԥгылоуп!..
Зегь змоу срыҵашьыцуам, мап,
Зынӡа еицәыхароуп ҳазҿугьы…
Урҭ зны аамҭа икҿанарӷәӷәап,
Анцәа идырааит ирзыԥшугьы…
Ажәҩан урҭ аҭаххаӡом,
Иазгәаауеит амра ирхаԥхазгьы…
Ианыҟам рыхьӡҵәҟьақәа нхаӡом,
Дара ирыцԥсуеит идырҳазгьы!

Зегь змоу сԥыларгьы сҭахӡам,
Дара иреиԥшуп – ирыҵашьыцуа!..
Урҭ рҩны аламыс ахӡам,
Зан-зыԥсадгьыл иаҵаӷьычуа…
***
Ҳаилгеит ахааназ, уажәшьҭа акагь ҳабжьам,
Игәианны еилыскааит, уажәраанӡа сара сжьан…
Амаахыр иаҩызаз ба быблақәа сгәаԥхон,
Егьа схаразаргь, сыԥшааны исҿаԥхон…
Иахьа иабаҟоу, даҽаӡә дыргәаԥхоит,
Сырԥырҵп ахааназ, мамзар сҭадырхоит…
Акызаҵәык, ҳахьеиқәшәалоз убра,
О, амҩахәасҭа, урыцҳасшьоит уара!..
***
Уаҳа дысзеилымкааит уи аӡӷаб сара,
Исылымшеит зныкгьы уи лгәы аҭаԥшра!..
Лыччаԥшь сыхнахуеит, ааи, изӡаӡом,
Аха убриҵәҟьагь иаҵоу збаӡом…
Ианбыкәу са сзыҳәа, уи лгәы ԥшқа анатуа,
Ианбыкәу дансышьҭало сыхьӡ ҳәан ҿыҭуа?!..
Аӡӷаб ԥшӡа, аӡӷаб, исаҳә шьҭа бгәы иҭоу,
Ианаҳәои ашьхыц ашәҭ иаҿатәоу?!..
***
Шьҭа уазхәыцла рыуа дарбан,
Аиаша агәҭаҵәҟьа иҭаршәны ицо,
Уи зуа иакәу змахәар ԥхьарҵәан,
Изҳәо иакәу, иназыгӡо?!.

Урҭ аҩыџьагь мҩак еицықәуп,
Дара ртәала – изҿугьы акоуп…
Аӡәы ижәлар руал иқәуп,
Егьи изышьҭымхуа – ргәырҩоуп…
АМҨА РЫРҬЕИТ…
Урҭ амҩа рырҭеит, ицалааит ҳәа,
Акыр рылҵыр, уа иаабоит…
Ҳа шҳакәу иҟоу рбалааит ҳәа,
Рҽыргәаԥны даргь аатәоит!..
Нас дарбану цәгьас иҳалоу,
Ҳара иҳауит рыххатәыс!..
Амҩа рызҭаз ракәу изхароу,
Ма иззынамыгӡаз зус?!
Зегь бзиоуп, уаҩ дарымам
Ҳәа изрыҽхәо – длашәуп, дҿаҳауп…
Урҭ аҩ-ганкгьы хьаа рымам,
Ибжьахәашаз – ҳара ҳауп!..
АХААНАЗ ИНХО…
Нас иарбану имԥсуа, ахааназ инхо?..
Ажәлар ирхамышҭуа ргәы иҭахо,
Кыр шықәса ргәаҵаҿ ирымоу ирыххо,
Нас ауп иангәарҭо уи зеишрахо…
Ажәоуп, уи ажәа, ахьыршәыгә иаԥсахо!..
Нас дарбану изқәашьу уи ажәа аҳәара,
Даадыруеит, изаҳҭахуи уи ихьӡ арххара…
Апоет, уара аамҭагь уаԥысны уцахьеит,
Уи аҵаҵәҟьа иҭаршәу маӡак уԥшаахьеит,
Уа уажәа-ԥха аҿаԥхьа амрагь ҭаахьеит!..

***
Имааит уи аамҭа, ҳара ҳаззыԥшыз,
Дызусҭа иаазмышьҭуа ҳа ҳҟынӡа?..
– Ишәыҵалеи, аума ҟалама, шәыԥшыз,
Ишәымами, иарбан шәызхьымӡа?! –
Уазхәыцыр, ҳаԥсадгьыл ҳаԥшәымоуп ҳара,
Уи аԥшәмара – уалԥшьаны ҳаҵоуп!
Аха абриаҟраҵәҟьа ҳагны араҟа анхара,
Зыламыс зымҭииз – уи дфырхаҵоуп!
***
Зыԥсадгьыл иара иаҟара бзиа избауа,
Аӡә дыҟамшәа ауп уи дышцәажәо…
Уи иагу иабзоу рзы ахьаа дшагауа,
Ихы нықәҵан дышмыцәац, дшыгәжәажәо,
Иуирбаларц иҭахуп есымша иара,
Аха идыруеит рацәакгьы игәра шумго!..
Зыԥсадгьыл азыҳәан иаҿу абылра,
Имца арцәоит, ибжь амыцхә ианҭиго!..
***
Иумжәыроуп, иумфароуп,
Иураӡароуп уара уԥсы…
Зегь узеиԥшны баша угәароуп,
Ухы уацклаԥш, абааԥсы!..
Шаҟа угу уԥхьаӡароуп,
Умши уҵхи ццакӡауеит!..
Умтәаӡароуп, уԥырӡароуп,
Мамзар, уаџьал ухьӡауеит!..

РУАК ԤЫРУЕИТ…
Амш ҳԥырҵыр, аҵх ҳзааиуеит,
Аҵх ҳԥырҵыр, ҩаԥхьа мшуп…
Азныказ ҳгәырҩа ҳаиааиуеит,
Аха иҿыцӡа ҩаԥхьа иԥшуп…
Арахь анасыԥ аҽаҵәахт,
Ҳнапы ахьнеиша имтәаӡеит…
Зны цәқәырԥоушәа ҳхәҽуа иаҳҿаҵәахт,
Ҩнытә ԥсаатәушәа имшәаӡеит!..
Ҩ-бахәык, ҩ-цҳак рықәдоуп,
Ҵаҟа аӡыхәашь еилашуеит…
Агәырҩеи анасыԥи еицықәтәоуп,
Иҳацәшәаз – руак ԥыруеит…
***
Мап, сзазымиааит сгәырҩа,
Ицазшәа снарбан, ус аҽаҵәахт…
Абӷьыжәраҿ цыблыкьҵас аҽыхҩа
Ицәыҵатәан, уажә исҿаҵәахт…
Иҟалап исзеиӷьзар еиҳагьы,
Зны уи анапџьаџьа сашьышьыхуеит…
Аӡә еидарас ианиумҭа угәырҩагьы,
Агәырӷьара ааиргьы ишьҭухуеит…
***
Уи ицәырҵра ҳаигәырӷьоит ҳара,
Зегь иреицәоу – ашьыцра дамгар!..
Ари аҟыбаӡыба, ари абылра,
Ибаҩхатәра – аԥшқа еиԥш изалгар!..

***
Даазбалак зегь иара ицәхасуеит,
Урҭ ргәаӷ зегь игәы иҭажьуп…
Шьҭа илуршои, ус дымҩасуеит,
Икылжәоу ампыл еиԥш, дкажьуп…
***
– Абзиа зҭахуи, абзиа ҟазҵоуи,
Злеиԥшым уҳәозар уара?!
– Акәтаӷь зҵоуи, акәтаӷь зымҵоуи,
Иарбан кәту иануҵо уара?!
***
– Уи данааиуаз ҳзықәиргәыӷыз,
Абжа ма изыҟаҵондаз!..
– Макьана изымҳәац иара ииҭахыз,
Ацәажәара дшаҿу ибжьы мцондаз!..
***
Амшын агәы иҭоу – ианҭынчу иуздырӡом,
Уи аҵан џьара илақьҭауеит…
Ажәлар ргәы иҭоу – иуршаанӡа ирнырӡом,
Иуршыр – ухаҭагьы уарҭәауеит…
***
Уи даазқәылаз аӷьычцәа рыӡбахә иҳәауеит:
– Ҳзықәшәазеи абааԥс, урҭ Аԥсны дырҳәуеит!..
Иара имаҭагь есыхәылбыҽха абахҭахь
дыргауеит,
Уи анигәалашәалак, ишыра маҷк иааихгауеит!..
***
Аиаша иашьҭан…Аиашаз ҳлымҳақәа ргахьан,
Уи ахьыԥшаатәыз, ишеиқәырхатәыз
рыӡбахьан…

Аха ианырԥыла, ирзымдырит иахьыртәатәыз,
Ихынҳәгәышьеит, еиҭарыдыркылт иара зтәыз!..
***
Закәҭыԥу сыздыруам аиашаз убри аҭыԥ,
Аарла еиҩыргоит уанрацәажәо рыԥсыԥ…
Уахь ихалаанӡа ухаҵкыҵәҟьа ицауеит,
Иаахалт, ушаарбаз рыхлахац гьежьуеит!..
***
Уӷәӷәоуп рҳәан, дыӷәӷәазшәаҵәҟьа ибеит,
Ухиоуп рҳәан, аҭыԥ ԥхахь деихеит!..
Упоетуп рҳәан, иҭижьит агәам,
Узҩуам рҳәан, убри агәра игауам!..
***
Урҭ анцәажәо, быжьрабыжьҵәа уцар уҭаххоит,
Иааҟәымҵӡакәа ибашоу жәабжьқәак
дырххоит…
Ушзахәо урԥырҵуеит, избанзар уара
умыцхәхоит,
Уаанхар, абаша цәажәара уҭанархоит!..
***
Аӡә хьаас имоуп иҭимыжьыц ишәҟәқәа,
Ҽаӡә амца ицрарҵоит иимҩыц еиҳагьы…
Уаҩ ԥсык еиԥш ирыцҳасшьоит дара рхаҭақәа,
Урҭ хьаас иахьимам аԥхьаҩ зынӡагьы!..
***
Аҩнқәеи адгьылқәеи ҭины,
Иаҭныҵуала аҩнқәа дыргылоит!..
Аԥсуа дсасхауеит иҩны,
Бзеила уаабеит ҳәа шьоук иԥылоит!.

***
Азакәан шәахыԥар ҟалаӡом,
Зехьынџьара ашьацҳәақәа дыргылоит!..
Аха иџьаушьаша, изыргыло акӡом,
Урҭ акьымсӡакәа иахыԥоит!..
***
Агәырҩа анааиуа иузхәыцӡом,
Уаҟа агәыӷрагьы мыцхәхоит…
Аҭакар еиԥш, заа ихыҵӡом
Шаҟа узаргәаҟуа – агәаԥхоит..
Агәырҩа башаҵәҟьа ицәырҵӡом,
Уи сасҵас аҽарххоит!..
Угәы ианҭалагьы – иҭыҵӡом,
Иҭыҵӡаргьы – ашьҭа нхоит!..
***
Ҿымҭӡакәа ԥшьаала ҳаидыҵит,
Иаҳҭахыз ажәакгьы ҳамҳәеит…
Иҟамыз анасыԥ ҳхәыцит,
Иҟамлаз ҳчараҿ ҳкәашеит!..
Дасу иара инасыԥ имоуп,
Издырӡом иахьыҟоу иразҟы…
Агәыӷьра змам зегь – арымоуп,
Амыцхә иарҟәышцәоит ашәҟәы!..
***
Идсмырбеит урҭ сара сгәала,
Наҟ снахеит, исҵәахит…
Сыла ишабоз дара рнапала,
Сгәыӷра шьацшәа идырхит…
Арахь ирныԥшӡом џьара акала,
Зынӡа исысымҟаауп уҳәап!..

Са санрацәажәо гәҭыӷьӷьала,
Дара аатәахуеит рҽырхәаԥ…
Ишәарҭоу арбану, урҭ рыцҳау?!
Мап, зынӡаксгьы иҵысуам!..
Рыгәра згаз роуп цәгьала ирыцҳау,
Дара ахаангьы рхы ршьуам!..
***
Ах, издыруанда урҭ рыгәиалоу,
Зынӡа измырҭынчуа, избылуа…
Иӷәӷәаму асқам иахьа изынтәалоу,
Иалҟьар, иабыкәу иахьагауа?!
Ах, дыздыруанда урҭ аанкылан,
Иаахтны иразҳәо дара шуаам…
Маӡала ицҳауа ала ааҭгылан,
Зегьы ишырбо зынӡа ишуам…
Аиаша ахәда рхханы иркума,
Ианҳазрымпыҵымх, ирхәыруеит…
Ах, ари аамҭа дара иртәума?!
Дара иртәызар – сгәы ахшәауеит!..
***
Избоит сызхьымӡо шрацәаӡо,
Ҭаха снаҭаӡом сыгәҭыха…
Сеидру исҭаху аннаӡо,
Уажәшьҭа исымаӡам аԥшыха…
Зынӡа имаҷӡамзаргь сзыхьӡаз,
Сарҭынчӡауам ауал исықәу…
Зны санқәыԥшӡаз исыцрасз,
Уажәгьы исзырцәом амца иску!..

САЖӘЕИНРААЛА
Ҳарҭ акыршықәса ҳаиҩызцәан,
Абранӡа сааугеит улаԥш хаала…
Сызгоз аӡӷьы гәышԥыла еиҩуҵәан,
Уара сеиқәурхеит сажәеинраала!..
Уажәшьҭагь улаԥш схызароуп,
Уансыцым ашьхаҳрак сызхалом!..
Аха аҽыҩ иақәтәоу дыҷкәынзароуп,
Ашла аҽышькыл дзахьынҳалом!..
***
Бара сыбхашҭызшәа ҟабҵеит,
Бҩызак блыццеит блахәыҭхәыҭуа…
Ах, цәгьа амцҳәашьагьы бҵеит,
Беиқәыгызмалха, зынӡа ҿымҭуа!..
Аха бгәыраз бызжьаӡом,
Аҳәатәы хабымҵар аушам!..
Уи быршәеитҳәагь ибжьаӡом,
Ибҭахызар ихықәргыл атыша!..
Бара сыбхашҭӡаргьы зынӡа,
Аӡы сазымыӡәӡәо сбырхәашозаргь,
Зызхара сыззымбац, игәыкӡа,
Бгәы шсызхәыцуа иаршозар…
Нас ибыԥсыхәозеи бара?!
Нас, бзаиааиру бгәы мчыла?!
Хәарҭас иҟоу акоуп ара,
Уажәшьҭа исцәыбымҵәахын была!..
***
Уи даҽаӡәуп, уи сара издыруа иакәӡам,
Уи даҽаӡәуп…

Мап, сгәы самжьеит, мап, ари лакәӡам,
Уи дагьзаҵәуп…
Иацы ҳиҩызцәан, иацы ҳаизааигәан,
Иац ԥсык еицаҳхан…
Иацы дызҿагылаз, иахьа инапаҿы дааиган,
Изиргылеит ахан…
Иԥшразаҵәык нхеит, ахаангьы дсыцәҩашьом,
Дрылазаргьы шәҩык…
Аха иламыс цеит, уи изгәаазар, ихынҳәышам,
Шьҭа диаҩсуам ԥсык…
***
Иаабо акәӡам ҳзеигәырӷьаша,
Иааиуеит иаамбаӡо акы…
Аӡәгьы дашьҭам гәырӷьаҿҳәаша,
Аӡәгьы иԥсахуам игәҭакы…
Зны ихароушәа, зны иааигәоушәа,
Зных аҵыхәа ҳҿанаҟьоит!
Зны здаҳамам гәыӷырҭоушәа,
Зны рагәаԥшь дук ҳаннаҟьоит
Иарбан асҵәҟьа ҳзыргәаҭеиуа,
Ҳашҟа иааиуа, иӷәӷәаӡоу?..
Ацҳа иқәу, аиаша иазнеиуа,
Дрыцҳауп заџьалҵәҟьа зыхьӡо…
***
Иҟоуп иԥшьоу, ҳзыхӡыӡо гәҭакқәак,
Ицәгьазаргь, ҳрыхьӡароуп ҳа ҳхала…
Аԥсҭазаара иамоуп ҳзықәгыло махәқәак,
Насыԥуп, иԥымҵәакәа ҳазхалар…

Есыша иныҟәо дтәанхалар ауӡом,
Иахымҵәарц ашьац имҩахәасҭа…
Аамҭа дышԥахьымӡо, аамҭа ԥырӡом,
Уи амҵәыжәҩа аҟьашьа зызгәаҭаз,
Наҟ ажәҩан ҵамҵамра даман ицоит,
Аурҭ бааԥсгьы уаҟа иԥырхагам…
Ажәҩан иацәымшәаз аԥыршьа иҵоит,
Ашьауардын иацлабыз – дхагам!..
Иҟоуп иԥшьоу, ҳзыхӡыӡо гәҭакқәак,
Аԥсыхагьы ҳамам ҳрыхьӡаанӡа…
Иаҳҳәап, иҳаҵаԥҵәар ҳзықәгылоу махәҭак,
Мрагыларахь ҳаԥшлап, ҳҭахаанӡа…
***
Уаҵәтәи амш адәыӷбеиԥш иааиуеит,
Ҳаргьы «ҳҭалоит» ҳаццакуа…
Ҳгәырҩа иҳашьҭоу наҟ ҳаиааиуеит,
Ишаҳзымдыруагь ҳахьагауа…
Акызаҵәык ҳа ҳгәы иҭымҵәо,
Зшьаҿа ссақәа ҳаԥхьаӡо,
Гәыӷрак ҳамоуп, ахаан инымҵәо, –
Иҳацу џьаҳшьауеит ҳахьцо!..
***
Ҳаԥшын, еиҳа еиӷьу аамҭа ааигәахоит ҳәа,
Архәара иаавҵшәарц егьагым, иааскьон…
Усҟан зегь ҳзыҳәан амш лашахоит ҳәа,
Агәра зымгозгьы, мчыла ҳхы аажьон…
Иааит уи аамҭа, аха иаҳҭахыз акәӡам,
Зынӡаксгьы еиԥшӡам иссируп ҳәа изҿыз…

Аԥсҭазаара ӡеибафароуп, ижьагоу лакәӡам,
Игәнаҳау – иажәыз роуп уи ишазыԥшыз…
***
Иара ианагәаԥхо ауп ианааиуа аразҟгьы…
Изыргәыбзыӷуа, баша рхы ржьозаап…
Умгәыӷлан ҳәа ианаҳәом уи зынӡа аӡәгьы,
Игәаԥхаларцаз, аҵыхәагь аршәшәозаап!..
Уи аԥшаара ус иааинырслан ицәгьоуп,
Иуздырӡом иара ахьуԥыло…
Иҟоуп зхаз иашьҭам, имаҷӡоугь урҭ роуп,
Зыжәлар рразҟ аԥхьа изыргыло…
***
Ишәмырҿыхан, ишәмырҿыхан, са сгәырҩа,
Уи аныцәоу, сахашҭуашәа схы зжьоит…
Иҟаӡамшәа, исымаӡамшәа наҟ ихҩа,
Хьаа змам еиԥш, сышәҿаччауа сцалоит…
Сара ишьҭысхша шәа ишәсырбома, изӡауеит,
Схала саҵоуп, ишәышәуа ишсышьҭоугьы
аԥшаҩа…
Иахьатәи амш са истәушәа збауеит,
Сыччаԥшь рыцҳа, ианышәзалымбаауа
сгәырҩа…
***
Ибзиоуп, ҳаржьазааит, ҳаргьы рыгәра аагазааит,
Урҭ зышьҭаз рыблала ирбеит…
Рҭыԥқәараҿ ихәназааит, ирҭахыз рыԥшаазааит,
Ҳзықәдыргәыӷуаз абаҟоу, инҵәеит…

Еиҭах ҳмыццакгәышьап, еиҭах ҳаатәагәышьап,
Ибжьаҳамхып, шәааи, ҳхәыҷқәа рԥеиԥш…
Ибзиоуп, ҳаԥшгәышьап, аамҭа ҳашьҭгәышьап,
Иҳалыҳцап ибааԥсу ашьеиԥш!..
***
Зегьы здыруа уажәшьҭа иазҵаара иаҟәыҵит,
Иааилацәажәан, еиҳагь еиӷьыз ҽак рхәыцит…
Ԥыҭрак ашьҭахь, иара дшыҟазгьы рхашҭит,
Рымҵәыжәҩа анеиҵырх, иахьакәӡамыз
џьара иашьҭит!..