Hikäyä
Min gomerem buyına yaratmagan eşemne başkarırga mäcbür idem. Ägär dä ul mine häm ğailämne aşatırlık, eçerterlek häm irkenlektä yäşäterlek bulsa — ber häl, anı taşlamavımnıñ säbäbe dä añlaşılır ide. Yuk bit, alay dip äytä almıym. Kulıma kergän hezmät hakım uçımnı cılıtırga da citmi. Ämma min haman şul uk eşemdä kala biräm. Moña qadär anı alıştırırga isäbemdä dä yuk ide, inde kay vakıtlarda şul hakta özleksez uylaştırgalıy başladım. Yahşı eş urını ezlämäkçemen. Kem bulırga? Kaysı eşne, niçek saylarga, kaydan tabarga?
Mäsälän, ällä uram cıyıştıruçı, seberüçe bulırgamı? Änä, irtä toralar da, seberkeläre belän uñga-sulga çalıp çıgalar — eşläre bette, köne buyına buş yörilär, kesä tutırıp akça alalar. Häzer bit, äytülärenä karaganda, uram seberüçelär yülär tügel ikän, professorlarga birelä torgan hezmät hakına eşlilär, di. Buldı bu, eş tabıldı.
Ä, äye, kışların kar körise, yazların boz çabıp gazaplar kiçeräse dä bar bit äle... Kızganıç! Yuk ikän, bulmıy. Andıy uk cavaplı eşkä batırçılıgım citmi minem!
Kaytıp, gäcitlär karaştırıp utıra idem, ber belderügä tap bulıp häyran ittem. Nigä moñarçı ul hakta başıma da kermägän? Şähärgä mer bulırga kandidatura ezlilär ikän bit! Ul urınga minnän dä kulayrak keşe yuk inde, cämäğat. Uñga-sulga väğdälär ırgıtırga, baş äyländergeç säyäsätlär korırga, berni dä başkarmıyça, barısın da iskeçä kaldırırga minnän dä ostarak keşe yuk!
Dustım telefonnan şaltırattı, borın töbenä Dumaga deputatlar saylau vakıtı kilep yata ikän. Ah, niçek onıtıp cibärgänmen? Deputat bulam, deputat! Ul Duma digännärenä minnän dä kulayrak keşe yuk. Halık mänfäğate, diyärmen, yaktı kiläçäk, diyärmen! Hezmät hakları da bik şäp ikän! Buldı gına! Menä bit, näq kiräkle eş tä tabıldı!
2007.