Шигырьләр - Фәйзерахман Хәйбуллин

Мәшһүр мәрхүм шагыйрь Габдулла әфәндегә
(«Кара урман» көенә)
Мең тәәссеф тә аз күренәдер
Милли көйгә шигырь язганга;
Укыган да саен күңлем тула —
Дәва беләм бәгърем сызганга.
Нечкә тамырларга хис бирүче —
Үтеп китте шагыйрь Габдулла;
Үлгән йөрәкләрне күп терелттең,
Шаять онтылмассың күп елда.
Язучы идең сүзнең тәмен белеп,
Һәркаюсын тугърылык белән;
Рухыңа һәркөн җиде Коръән
Багышлаганда да аз беләм.
Әлхасил, дуст, киттең безне ташлап,
Хак язмышы булгач — чара юк;
Мәңге калыр исмең, дәвам итәр,
Ядкяр бездә шаять шулай ук.
Барчамыз да шуны көтмәктә бит:
Качан килеп җитәр кизүе,
Раббем үзе рәхмәт нурын сачеп,
Шайтан ләгыйнь бездән бизүе.
Һәрни булса, тәкъдиргә тәбдил (1) юк —
Аслы гарәпләрнең мәкале.
Мәгънәле шигърең һәр көн укып,
Дога кыйлам шул ук хатәме (2)


Күңел күтәрә
Ак Идел буйларын күп йөредем,
Сахра гизеп сары ат белән;
Җиһангизлек шулай таныштырып,
Бер тугандай итә ят белән.
Бер мин түгел, бик күп җиһан гизеп
Йөрүчеләр һәрбер илләрдән.
Рәхәтеннән күбрәк михнәт күреп,
Гомер үтә заигъ (3) безләрдән.

1 Тәбдил — алмаш.
2 Хатәме — сүзне (хатәмне?).
3 3аигъ — файдасызга, бушка.