(yumoreska)
- Al-le, Kärim Säyfiyeç, sezme? Gaynan ide äle bu! Kazannan şaltıratam. Äye, başkaladan! Kärim Säyfiyeç, eşlärne tögälläp beterep bulmadı bit äle. Berär köngä totkarlanırga turı kilmägäye, diyüem. Kaytumı? İrtägä eşkä çıgarmın, dip uylıym. Kaytır yulga kuzgalgaç, kabat şaltıratırmın äle. Yarıy, häzergä huşıgız!..
Gaynan, käräzle telefonın sırma kesäsenä salıp kuydı da, bayadan birle tartılgalap kuygan karmak ceben cıya başladı. Ozak ta ütmäde, boraulap yasalgan boz tişemendä çäbälängän balık başı kürende. Ällä ni zur bulmasa da, ber-ike säğat utırıp, balık tügel, balık koyrıgın da kürmägän Gaynan öçen bu altın balık kaptırgan kebek buldı. Söyeneçtän, ul üz aldına sızgırıp ta aldı hätta.
Kışın boz östendä balık totudan da rähäträk närsä bar ikän?! Monıñ şulay ikänen üz gomerendä ber tapkır da bäkegä karmak taşlap, änä şul ber tişekkä ike küzen töbäp, säğatlär buyı balık çirtkänen kötep utırmagan keşe genä añlamıydır. Ä Gaynan belä. Şuña da bügen irtädän monda kilde dä inde ul. Kärim Säyfiyeçkä, yağni «şef»ına Kazannan şaltıratam dip äytüe dä, bolay gına, küz buyau öçen genä lä. Böten eşen tögälläp, Kazannan kiçä ük kaytkan ide inde ul. Bügen menä tañ atuga Kamaga kilep, karmak salıp utıra.
Däülät eşe kaçmas, dip uyladı Gaynan, karmagına cim kuya-kuya. «Şef»ı häzer irtänge planerkasın uzdırıp, obektlarga çıgıp yögergänder inde. Çapsın äydä, gel Gaynanga gına yögerergä dimägän!
Gaynan, yänä kılday tartılgan karmak ceben ipläp kenä cıya-cıya, avız çite belän yılmaep kuydı. Ber-ike sekundtan, boz östendä kömeştäy täñkäläre belän yaltırap, ikençe çabak yata ide inde. Çänti barmaktan az gına olırak balıkka karap, monısı tegesenä karaganda da zurrak, dip uyladı Gaynan...
Yılga östenä kiçke eñger töşä başlaganda, boz östendä erele-vaklı balıklar şaktıy ide inde. Gaynan alarnı cıyıp, kün sumkasına tutırdı da, kul belän çamalap, ülçäp karaganday itte. «Öç kilogramm tartır»,- dip söylände ul kanäğatlänep. Balık totu kiräk-yarakların cıyıp, kaytır yulga kuzgalgaç, «şef»ına şaltıratıp alırga kiräklege isenä töşte.
- Al-le, Kärim Säyfiyeç, bu tagın Gaynan ide äle. Buldı, eşlärem tögällände, şef. O-key! Kaytır yulga çıktık. Alla boyırsa, dürt-biş säğattän Tübän Kamada bulırbız. Sezneñ hällär niçek anda? Ä-ä, şulaymı? Dönya yögertä inde ul. Yarıy alaysa, oçraşkançı, huşıgız!..
Ha, yögerdem, imeş! Yögersäñ soñ! Ber Gaynanga gına yögerergä dimägän.
Üz aldına şulay uylana-uylana Gaynan yulın dävam itte. Ä bu minutlarda annan dürt-biş metr çittäräk, bäke yanında karmak salıp utırgan Kärim Säyfiyeç tä käräzle telefonnı maktıy-maktıy, qaderläp kenä kesäsenä saldı da, äyberlären cıyıştıra başladı. Köne buyı utırıp, ul da şaktıy balık kaptırgan ide şul.