Latin

Бу дөньяда матурлык бар...

Общее количество слов 892
Общее количество уникальных слов составляет 647
42.0 слов входит в 2000 наиболее распространенных слов
54.8 слов входит в 5000 наиболее распространенных слов
61.2 слов входит в 8000 наиболее распространенных слов
Каждый столб представляет процент слов на 1000 наиболее распространенных слов
Кеше булып җиргә тудың – алга ымсын, Яшәү ямен татып кара – ул бер тылсым, Изге юлда шәһит булсаң илең өчен, Халкың сине изге итеп дога кылсын. * * * Ромашкалар кинәнгәндә чәчәк атып, Җир сулышын тыңлыйм кайчак җиргә ятып – Сызлана ул, ыңгыраша, әйтә кебек: Мин кичергәннәрне, Кешем, кара татып! * * * Ничек кеше гомер итсен тыныч кына – Баш очында элеп куйган кылыч тора, Шул кылычны тизрәк өзеп төшерү уе Күпме җәлладның уч төбен кычыттыра... * * * Аңлый алмыйм гамьсез, тыныч яшәүчене, Аңлый алмыйм тирләп кылыч ясаучыны, Хәят әле шундыйларны тудырганда Кем ышаныр тынмас диеп яшәү чыңы... * * * Яшьлегемдә нидер калган онытылып: Изге эшләр – өлгермәгән мин кылып, Нидер көткән күзләр калган – моң тулып, Хыялларым – ирешмәгән омтылып... * * * Сабый күзләренең керсез карашы... Әнкәйләрнең ачы йөрәк ярасы... Бармы бүтән җаны сукыр булганнарның Күңел күзләрен ачтыру чарасы?! * * * Кайбер дуслар әйтә, син дип беркатлы, Беләм үзем, ул дусларым мең хаклы – Бу дөньядан кара эзли белми җаным, Үҗәтләнеп эзли аннан гел акны... * * * Ыгы-зыгы, борчулардан тәмам туйдым, Барын җыеп бәгыремә бикләп куйдым, Көнем үтте, атнам үтте – мин үземнең Бу дөньяга кирәк түгеллегем тойдым. * * * Шыбырдашып җиргә яфрак коела – "Тәфтиләү"не көйләгәндәй тоела, Гомерләрнең фанилыгын тоеп шулчак Әрнеп-сулкылдап бәгырьләр кыела... * * * Бу тормышның була шундый мизгеле – Ычкына кулдан хәятнең тезгене, Кабат аны тезгенләргә көнең түгел, Гомер көннәреңнең җитми йөз-меңе. * * * Таңнар үткән, көннәр үткән, кичебез, Сәфәр чыгып, юлда калган ише без, Төнгә калмый шул юлларның ахырына Ирешергә җитсә икән көчебез... * * * Язмышларны һич кенә дә аңлап булмый, Язмышларны һич кенә дә алдап булмый, Яшәешнең Аллаһ биргән төп кануны – Ялган белән хакыйкатьне ялгап булмый. * * * Мәнсезләргә яшәү җиңел анысы – Нидер уйлап көясе юк, янасы, Ник тудырдым бу баланы дөньяга, дип Ут йота тик табып баккан анасы... * * * Мәхәббәтне сыный гомер агышы – Аерылулар-сагынулар сагышы, Сагынуларның ачылыгын сөйли кебек Иелә-бөгелә кипкән елга камышы... * * * Каян килеп адашкан бу ак болыт – Әллә бәхет күккә ашкан ак булып, Кочаклыйсы килә үзен очып менеп, Әкияттәге бер канатлы ат булып! * * * Минем күңелем шундый инде – "особый", Я саташкан бер мәҗнүн ул, я сабый, Иртә дими, кичен дими, эзләнә, Аңлый алмыйм, нигә шулай гасаби!.. * * * Искә алса ихлас белән Әгъләсен Оныта кеше нәфсенең дәгъвасын, Тирәнрәк аңлый башлый Кеше булып Яшәвенең җирдә асыл мәгънәсен. * * * Аптырыйм мин кайчагында байларга – Хыялланалар очарга айларга, Илдә май юк гади тормыш арбасының Шыгырдаган тәгәрмәчен майларга. * * * Башкаларның фикеренә түзмисең, Уңнан-сулдан һаман кара эзлисең, Үз-үзеңә тик бер карап баксаң иде – Һәркемдә дә юк шул күңел көзгесе. * * * Таң ата да, күзләреңә кояш бага: – Ни кылырга ният бүген, Фәлән ага? Зая үткән һәр көн саен кайтарасы Бурычыбыз арта бара бу дөньяга. * * * Үз язмышын бәхет итеп үргән кеше, Бәхет көтеп коры калган сүрән кеше, Шундыйлардан гыйбрәт алыр бу дөньяга Кеше булып яшим диеп килгән кеше. * * * Җаным яралы, дип кемгә зарланасың – Бу дөньяда җан ярасыз кемнәр бар соң? Үз яраңа түзеп була, дусларыңның Дәваларга тырыш күбрәк җан ярасын... * * * Балачакта иярләгән атлар... Үсмер чакта без бирешкән антлар... Бәгырьләрнең иң түреннән суырып алып Кем соң сезне җиргә салып таптар?! * * * Юраганнар кайчагында юш килә, Теләгәннәр кайчагында хуш килә... Тик алдана күрмә берүк өндә, диеп, Андый хәлләр бары якты төш кенә. * * * Кеше күңеле сәгадәтле чишмә кебек, Моңнар ага аннан саркып-тибеп, Шул моңнарын аңлый белсәк, бер-беребезнең Хәят чишмәләре бетмәс кибеп. * * * Табигатьтә нинди мизгел, күр син ә, Ике чәчәк ашкына бер-берсенә – Гашыйкларны кавыштыра алмаганга Җирдә аунап чарасыз җил көрсенә. * * * Көн-төн ага җырлый-җырлый чишмәләр, Серләре күп шул аларның чишмәгән, Бәхетлеме учка алып чишмәләрнең Сер-сихәтле салкын суын эчмәгән?! * * * Бер сорауга җавап тапмый йөрим күптән: Ник атыла бу йолдызлар Җиргә күктән? Йолдыз булып куенына атылырдай Планеталар бу галәмдә юктыр бүтән! * * * Шушы җирдә без яшисе, белмибезме, Әллә белеп колакка да элмибезме? Яралыйбыз, пычратабыз, агулыйбыз – Нигә болай мыскыллыйбыз җиребезне?! * * * Бу дөньяда сихри-серле көчләр бар – Җанны җанга бәйли торган хисләр бар, Шул хисләрне бәхет итеп үрер өчен Яшьлектәге тиңсез айлы кичләр бар... * * * Сөйдек тә без, сөелдек тә – мең шөкер, Күңелләргә шифа-бәлзәм шул фикер – Сөю кадерен белгәннәргә гомер буе Дога итеп кабатлыйсы бер зикер. * * * Ярый әле бу дөньяда гүзәллек бар – Бер күрүдә үзәгеңне өзәрлекләр, Гүзәллекне күрә белсәк, җанны назлап Гомер буе безне сөю "эзәрлекләр". * * * Мәктәпләрдә юк мәхәббәт дәресе, Ә бит юкса без мәхәббәт варисы, Үзебезчә сөеп, үзебезчә, димәк, Сөйгәннәрнең күзләренә карыйсы! * * * Таң беленде ерак офык читеннән, Таң җилләре үбеп алды битемнән, Синсез үткән тәүге төнем хатирәсе – Тулган айның бер почмагы кителгән... * * * Сорарлар бит килгәч Тәңрең янына: – Нинди өлеш керттең сөю фәненә? Көнләшерлек түгел лә һич, әй Гарифҗан, Сөйми-сөелми киткәннең хәленә! * * * Яши идем тыныч кына, битараф, Бар дөньямны тетрәндерде шул караш, Чәчләрем күк матур итеп хисләремне Тара инде, сихри гүзәл чәчтараш! * * * Кеше җиргә елап туа, күрәсең, Сизенәдер бер көн килгәч үләсен, Аңлап ала җиргә юкка килмәгәнен, Ятлап алгач бары сөю сүрәсен. * * * Кояш баткан керфекләрең арасына, Ничек түзим ул күзләрнең карашына, Уйламадым шул күзләрнең карашыннан Йөрәгемә сулмас ялкын кабасына... * * * Гаеп итмә әле мине сүрән, диеп, Хисләреңне яшерәсең тирән, диеп, Хисләремне йөртәлмим шул уч төбемдә, Һәр очраган җилбәзәккә бирәм, диеп. * * * Арып китсә җаным тормыш гаменнән, Тәм тапмый башласам яшәү яменнән, Искә алып синең назлы кочагыңны Авыз итәм саф сөю бәлзәменнән... * * * Сөйгән ярың куенында бер гөл булсаң, Узышларда ярсып торган дөлдөл булсаң, Бу дөньяда яшәдем дип егет булып Намусыңа әйтәләсең гадел булсаң. * * * Миңа синең очкын тулы күзең кирәк, Оялып әйткән сөям дигән сүзең кирәк, Алмагачтан әле генә өзеп алган Татлы алмадан да татлы үзең кирәк. * * * Баласы күк иртә килгән сыерчыкның Нигә, язмыш, мине болай кыерсыттың – Иртә сөю, иртә көю – сәбәпләре Йөземдәге һәрбер тирән җыерчыкның... * * * Шау хисләрен тота алмый йөгәндә, Тәү сөюдән башын җуеп йөргәндә, Тәүге коймак гел төерле була, диеп Башына да китерми шул бу бәндә... * * * Карап тора, көлеп тора кендегең, Кендегең үк әйтеп тора кемлегең, Кендегеңә ялгыш күзем төшкән саен Үз хокукын даулый башлый ирлегем...
Вы прочитали 1 текст из Татарский литературы.