Талпақ танау тарғылым

  Ә деп уызын жегізген,
  Аузымды аққа тигізген -
  Талпақ танау тарғылым.
  Шөлдегенде айраным,
  Қарным ашса, қаймағым -
  Талпақ танау тарғылым.
  
  Кертіп жейтін қатығым,
  Тік тұратын қасығым,
  Талпақ танау тарғылым.
  Сауып жатса - көпіршік,
  Сауып алса - ірімшік,
  Талпақ танау тарғылым.
  Алақанда сарымайым,
  Құртым толы баспағым.
  
  Сенің жөнің бір басқа,
  Бұйра құртым сар қасқа -
  Талпақ танау тарғылым.
  Бәрі менің тарғылым,
  Бәрін берген тарғылым.
  
  Тарғылымды нетейін?
  Тарғылымды күтейін:
  Бағайын да, қағайын,
  Арқаңа үзік жабайын.
  
  Аузыңа шөп тосайын,
  Суарайын, қарайын,
  Жылы жерге салайын.
  Тарғылымды жатқызып,
  Мен де ұйқыға жатайын.
  
  «Жүсіпбек Аймауытов шығармалары» жинағынан