Қазақша күрес

  Күресуге тіленген
  Бала болса,
  Білем мен,
  Жасыл майса,
  Көгорай
  Жұмсағырақ кілемнен.
  
  Қызық болса керегі,
  Күш сынасып көрелік.
  Шығыңыздар ортаға,
  Жасаймын мен төрелік.
  
  Күшті күтіп жүре ме?!
  Атып ұр да түрегел!
  Тобықтан қақ,
  Шалып жық,
  Бірақ шаптан тіреме!
  
  Күштіге де,
  Асылы,
  Керек емес бас ұрып.
  Жата қалып,
  Сен оны
  Жібер бастан асырып!
  
  Әдістің бір пайдасын
  Көрмейсің бе?
  Қайдасың?!
  Алып соғар күштіні
  Асырғандар айласын.
  
  Білем! Білем!
  Өжетсің,
  Демек елге қажетсің.
  Ақылы мен күші сай
  Азаматқа не жетсін!