News Tatar news add news

Rusiyädä täülekkä 20 meñgä yakın keşedä COVID-19 räsmi raslangan

Rusiyädä häm dönyada koronavirus taralunıñ rekordlı kürsätkeçläre terkälä.

Soñgı täülektä koronavirus belän çirläp 389 keşe ülgän, bu da epidemiyä başınnan iñ zur kürsätkeç. Räsmi sannarga karıy, ildä koronavirustan barlıgı 29 217 keşe ülgän.

Dönya külämendä COVID-19 zur tizlektä tarala. Ber atna eçendä 3 mln 300 meñnän artık keşe virus yoktırgan. Bu pandemiyä başınnan iñ zur kürsätkeç diyelä Dönya sälamätlek saklau oyışmasınıñ atnalık beleşmäsendä.

Yaña oçraklar sanı buyınça AKŞ, Hindstan, Frantsiyä alda bara. Rusiyädä atnasına 120 meñnän artık keşedä COVID-19 açıklangan.

Häzerge vakıtta virus ayıruça Yıvropa öleşendä köçle tarala. Atnalık oçraklarnıñ yartısı diyärlek Yıvropaga turı kilä.

Dönya sälamätlek saklau oyışması kitergän mäğlümatka karıy, dönyada COVID-19 yoktıruçılar sanı 46 millionga citte. Avıru oçrakların real vakıt şartlarında terkäp baruçı Dcons Hopkins universitetı bu san 47,5 millionga yakınlaştı dip häbär itä. Yaña tör koronavirus barlıgı 213 735 keşeneñ gomeren özgän.

Räsmi statistika kürsätkänçä, soñgı täülektä Tatarstanda 47, Başkortstanda 97 keşedä COVID-19 tabılgan. Başkortstanda tagın 279 keşegä pnevmoniyä diagnozı kuyılgan.


2 weeks, 5 days ago
18 visists
Source: www.azatliq.org