News Tatar news add news

"Otkrıtaya şkola" platformasında tatar telen öyränü bülege barlıkka kilde

Platforma mäktäptäge urıs telle ukuçılarga yunälgän, ul "Sälam" däreslege programı nigezendä tözelgän. Alga taba tatar telle ukuçılarga da platforma buldıru, başka fännärne tatarçaga tärcemä itü planlaştırıla.

Rusiyäneñ hosusıy "Otkrıtaya şkola" platformasında tatar telen öyränü bülege eşli başladı, tatar tele ukıtuçıları bu platformanı däreslärdä inde kullana. Bu turıda Azatlıkka Tatarstannıñ Mägarifne üsterü institutı karşındagı "Otkrıtaya şkola 2035" resurs üzäge citäkçese, proyıktnıñ töbäk koordinatorı Nuriyä Gayazova belderde.

"Häzerge vakıtta platformada 1nçe häm 2nçe sıynıf materialları urnaştırılgan, alar urıs telle törkemnär öçen "Sälam" däreslege programı nigezendä tözelgän. Platformada animatsion videolar, interaktiv biremnär, küp törle audiolar täqdim itelä", dide ul.

Gayazova süzlärençä, Tatarstan hökümäte belän "Otkrıtaya şkola" arasında tözelgän kileşü nigezendä, respublikanıñ 500 mäktäbe älege platformanı kullana ala. Bügenge köndä anı yakınça 21 meñ ukıtuçı kullau mömkinlegenä iyä. Tatar tele ukıtu platformasın buldıru sorauları tatar tele ukıtuçılarınnan da, Tatarstan mägarif ministrlıgınnan da bulgan, di ul. İnteraktiv platforma distantsion ukıtu öçen dä, däreslärdä östämä kontent bularak ta, öy eşläre öçen dä kullanıla ala.

"Otkrıtaya şkola" tatar telen ukıtu platformasın alga taba dävam itärgä cıyına, monnan tış tatar telle ukuçılar öçen dä platforma buldıru niyäte bar. Nuriyä Gayazova süzlärençä, alga taba başka fännär mäydançıkların da tatar telenä tärcemä itü planlaştırıla.

"Otkrıtaya şkola 2035" – mäktäplärdä interaktiv uku öçen onlayn-platforma, Rusiyäneñ hosusıy belem birü oyışması. Saytta törle mäktäp fännärennän interaktiv platformalar tuplangan, alar eçenä äzer däreslär, videodäreslär, trenacerlar, testlar, interaktiv biremnär häm başkalar kerä.

2019 yılda Tatarstannıñ Mägarifne üsterü institutı karşında "Otkrıtaya şkola 2035" resurs üzäge oyıştırıldı. Üzäk eşçänlege häm mäktäplärne platformaga kuşu öçen 24 million sum bülende.

"Sälam" däreslege – 2016 yıldan Tatarstan Mägarifne üsterü institutı tarafınnan gamälgä kuyıluçı yaña buın tatar tele däreslege. Ul urıs telle ukuçılarga yunälgän, däreslek nigezendä çit telne ukıtu metodikası kullanıla.


3 weeks ago
13 visists
Source: www.azatliq.org