News Tatar news add news

Kazanda koronavirus turında feyk taratuçı 13 keşe cavapka tartılgan

Monnan tış, koronaviruska bäyle hokuk bozu öçen Kazanda 415 eşmäkär häm 52 yuridik zatnı cavaplılıkka tartkannar

İke kön eçendä Kazanda 7 kafe häm barda hokuk bozu oçragı açıklangan. Tönge vakıtta eşläü tıyıluına karamastan, alar halıkka hezmät kürsätkän. Bu hakta Rusiyä eçke eşlär ministrlıgınıñ Kazan idaräse başlıgı urınbasarı Valeriy Samatoşenkov Kazan hakimiyäte kiñäşmäsendä belderde. Ul koronaviruska bäyle hokuk bozu oçrakları turında hisap tottı. Tulısınça tıyıluına karamastan, kafelarda kalyan tartu hezmäte kürsätelä di ul.

“Bügen Kazandagı 70tän artık kafe, restorannarda kalyan tartu hezmäten kürsätü oçragı açıklandı. Şularnıñ unısında bu häl kabatlandı. Eşmäkärlärgä, yuridik zatlarga administrativ berketmä tözelde. Barlıgı 390 vazifadagı zat, 415 eşmäkär, 52 yuridik zat sanitar-epidemiologik normalarnı ütämägän öçen cavaplılıkka tartıldı”, dide Samatoşenkov.

15 i̇yüldän Rosgvardiyä väkillärennän torgan mobil törkemnär kiçke häm tönge vakıtta eşlägän Kazan üzäklären tikşergän.

“Mobil törkemnär kön sayın kiçke säğat cidedän irtänge bişkä kadär eşli. Alar tönge vakıtta eşläüçe aşhanä, säüdä üzäklären tikşerä. Şul vakıt eçendä mobil törkemnär 3400 hokuk bozu oçragın açıkladı. Şularnıñ 2400e sanitar-epidemiologik normalarnı bozu sanala”, dide ul.

Kazanda çit ildän kaytıp, koronaviruska test birmägän 14 keşene açıklagannar. Alarnı politsiyä väkilläre öylärenä barıp tikşergän. Şulay uk matbugatta, internet häm sotsial çeltärdä koronavirus turında yalgan mäğlümat birgän öçen 13 keşe cavaplılıkka tartılgan.

Hokuk bozu oçrakları cämäğat transportında da artkan. Oktyabrdä 15 meñ avtobus, tramvay, trolleybus häm metro tikşerelgän. Barlıgı 25 700 passacirnıñ bitleksez yörüe açıklangan. Taläplärne ütämägän konduktorlarnı eştän kuu belän yanagannar, premiyälären kiskännär.

“104 konduktor bitlek recimın bozdı. Alarga karata distsiplinar çaralar kürelde. 28 keşegä premiyä kiselde, 55 konduktorga kisätü yasaldı, 21 keşe kürsätmä aldı”, dide Kazannıñ başkarma hakimiyäte citäkçese urınbasarı İldar Şakirov.

Monnan tış Tatarstanda yaşäüçelärgä keşelär küpläp bulgan urınnarda bitleklär kiyärgä kuşıldı. Bu 50dän artık keşe bula algan urınnarga, şulay uk cämäğat transportı, taksi, parkovkalar, liftlarga kagıla.


3 weeks ago
15 visists
Source: www.azatliq.org