News Tatar news add news

Kazanda çüp yandıru korılmasına karşı piket ütte

Piketka 15 keşe çıktı.

31 oktyabrdä Kazannıñ Lenin isemendäge mädäniyät sarayı karşında Kazannıñ Osinovo bistäse yanında tözeläçäk çüp yandıru korılmasına karşı rizasızlık belderep piket uzdı. Çaranı Tatarstannıñ atomga karşı oyışması oyıştırdı.

Oyışma citäkçese Albert Garapov äytüençä, alar inde dürt yıldan birle Osinovo bistäse yanında tözeläçäk çüp yandıru korılmasına karşı köräş alıp bara.

"Küp sanda konferentsiyälär, cıyılışlar, ekologik ekspertizalar uzdırdık. Galimnär dä bu korılmanıñ keşelekkä zıyanlı buluın citkerde. Çüpne yandıru tehnologiyäsennän vaz kiçergä kiräk digän näticä çıgardık", dide ul.

Garapov süzlärençä, çüp yanıru korılması tözeleşeneñ zıyanlı buluı açıklanuına karamastan Tatarstan hakimiyäte haman da bu korılmanı tözüdän baş tartmıy.

"Bu korılmanı tözü öçen bik köçle lobbi eşçänlek alıp bara, zur akçalar totu planlaştırıla. Korılmanıñ tözeleşe öçen genä dä 30 milliard sum akça totılaçak", dide ul.

Garapov iñ berençe çiratta halıkka bu tözeleş turında kübräk mäğlümat citkerergä kiräk dip sanıy häm piketlarnı şul säbäple uzdıruların äytä.

"Halık bu korılmanıñ nindi zur afät kiterergä mömkinlegen äle añlamıy. Çüp yandıru korılmasın tözüne Kazan belän genä çikläp kalmayaçaklar, Çallı, Älmät, Tübän Kamanı da şuşındıy korılmalar belän tutıraçaklar.

Bez Tatarstan häm Başkortstan respublikaları bolay da Rusiyädä dioksin belän agulanu yagınnan berençe urınnarda torabız.

Bez çüplär, kaldıklarnı energiyä resursları dip bäyälibez. Bu resurslarnı yandırırga tügel yañadan eşkärtergä kiräk. Çönki çüpne yandırgaç başta atmosfera pıçranaçak annan çüp yandırudan soñ bülenep çıkkan törle dioksinnar tufrakka utıraçak häm tufrak aşa bezneñ organizmnarnı agulayaçak. Halık menä şuşı kurkınıçnı añlasın ide. Dioksinnan berkem dä kotılıp kala almayaçak", dip belderde Garapov.

15läp keşe katnaşkan piketta "Çüp yandıru korılması=kazannar öçen genodtsid", "Tatarstan hökümäte, supertoksinnarnı daimi kontrolğä alunı taläp itäbez", "Kazanda çüp yandıru korılması tözelmäsen, çüplär ayırıp cıyılsın", digän şigarlär kütärelde.

Şulay uk piketka çıguçılar atmosferaga zararlı matdälär çıgarunı küzätü öçen ictimagıy çeltär buldırunı täqdim itte.

Ber atna elek Rusiyä däülät üseş korporatsiyäse Osinovo bistäse yanında çüp yandıru korılması tözeleşenä kreditnıñ berençe öleşen birde. Kredit küläme 2,5 milliard sumga kadär täşkil itä.


3 weeks, 2 days ago
16 visists
Source: www.azatliq.org