News Tatar news add news

“Zur etnografik diktant” bıyıl onlayn ütäçäk

3-8 noyabr könnärendä respublikada «Zur etnografik diktant» halıkara aktsiyäse uzaçak.

Bıyıl bişençe tapkır oyıştırıla torgan aktsiyäneñ töp yañalıgı – anıñ onlayn-formatta ütüe. Uzgan yıl çarada 5 000 keşe katnaşkan. Bıyıl alarnıñ sanı kübräk bulır dip kötelä. Pandemiyä şartlarında milli bäyrämnär dä onlayn formatta uzdı häm aldagı yıllardagıdan ayırmalı bularak, alarnı internet aşa küzätüçe tamaşaçılarnıñ sanı unbiş tapkırga artkan. Monnan tış, çara biş kön dävam itä, bu da katnaşırga teläüçelärneñ sanı arttırır digän ömet bar.

3 noyabrdä aktsiyä Halıklar duslıgı yortında oflayn formatta ütäçäk. Ul mäydançıkka blogerlar, bilgele cırçılar, törle ministrlıklar, vedomstvo, ictimagıy oyışmalar citäkçeläre çakırılgan. Alar katnaşındagı çara aktsiyäne populyarlaştırırga yardäm itäçäk, di Tatarstan halıklarınıñ Duslık yortı direktorı İrek Şäripov.

Anıñ süzlärençä, ildä yaşäüçe millätlär turında bik az beläbez, aktsiyäne oyıştırunıñ maksatı da etnografik gramotalılıknı arttıru. Şunısı kuanıçlı – Tatarstan etnografik diktant näticäläre buyınça liderlar rätendä. Rayonnarga kilgändä, iñ küp katnaşuçılar uzgan yıl Apas, Biyektau häm Sarmannan bulgan.

Diktantta telägän här keşe katnaşa ala. Biremnär www.miretno.ru. saytında 3 noyabrdä tönge säğat 00.01dä basılaçak. Utız biremneñ yegerme – federal, unısı töbäkkä karagan bulaçak. Biremnärne eşlärgä 45 minut vakıt birelä. Katnaşu turındagı sertifikatnı da biremnärne eşläp tapşırgaç uk alırgabula. Anda niçä ball aluıñ da şunda uk kürsätelä.


3 weeks, 3 days ago
16 visists
Source: shahrikazan.ru