News Tatar news add news

Färit Zäkiyev: Stalin zolımı turında onıttılar, repressiyälär dävam itä

Bötentatar ictimagıy üzäge (TİÜ) räise tatar ictimagıy üzägenä karşı säyäsi repressiyä eşçänlege bügen dä dävam itä dip sanıy.

30 avgustta Kazannıñ Lenin bakçasında säyäsi repressiyä korbannarı istälegenä kuyılgan häykälgä TİÜ väkilläre çäçäklär salıp, korbannar ruhına doga ukıdı.

Çarada katnaşkan TİÜ räise Färit Zäkiyev Azatlıkka, bügen älege häykäl yanına 1930-1940 nçı yıllarda bolşeviklar oyıştırgan genotsid korbannarın iskä alu öçen cıyıluların äytte.

"1990 yıllarda bu genotsid turında küp söyläşensä dä, bügen anıñ turında onıttılar. Kaneçkeç Stalinga häykällär kuya başladılar. Keşe üterüçe Beriyänı näticäle eşläüçe menedcer itep kinolar kürsätälär. Säyäsi repressiyälärne oyıştıruçılarnı bez läğnätlärgä tiyeşbez", dip belderde.

Anıñ süzlärençä, Rusiyädä säyäsi repressiyälär buluga niçä yıllar ütsä dä, bu genodtsidnı oyıştıruçılar tiyeşençä cavap birmäde häm şuña kürä bu repressiyälär bügen dä dävam itä.

"Millioannarça keşelärne gayıpsezgä ütergän keşelärneñ barısı da yahşı pensiyälär, ordennar alıp yaşädelär. Şuña kürä häzer dä şundıy uk repressiyälär bara. Bıltırgı Häter könendä şiğır ukıgan öçen 82 yäşlek şağıyrgä biş meñ sum ştraf birdelär häm politsiyägä çakırıp intekterep yörttelär.

Bez tatar ictimagıy üzäge bularak üzebezneñ oyışmaga karata bara torgan säyäsi repressiyälärgä karşı çıgabız häm bu repressiyälärne tuktatunı taläp itäbez", dip belderde TİÜ räise Färit Zäkiyev.

Milli aktivistlarnıñ häykälgä çäçäk saluların tärtip saklauçılar yakınnan küzätep tordı.

2011 yılda bastırılgan "Häter kitabı" mäğlümatlarına karaganda, Tatarstanda kim digändä 54 meñ 500 keşe säyäsi repressiyä korbanı bulıp isäplänä. Bolarnıñ 9366sı Kazannan, ä 3657se hatın-kızlar. Tatarstanda repressiyälängän keşelärneñ kim digändä 5687se atıp üterelä. Küpläreneñ äle dä kayda häm niçek yukka çıguı bilgele tügel.

"Memorial" hokuk yaklau üzäge bügenge Rusiyädä säyäsi totkınnar turında mäğlümat tuplanmasın kön sayın diyärlek yañartıp tora. Häzer bu isemlektä öç yözdän artık isem bar. Älege oyışma hokuk yaklauçıları bügen Rusiyädä kimendä 649 keşe säyäsi säbäplär arkasında ezärleklänä di.


1 month ago
15 visists
Source: www.azatliq.org