News Tatar news add news

Ana keşe balaları belän yanıp ülgän...

3 häm 5 yäşlek ike bala, alarnıñ 41 yäşlek anası...

26 oktyabrdä köndezge unberlär tiräsendä Başkortstannıñ Fedorov rayonındagı Novosofiyevka avılında kirpeç yortta yangın çıga. Yangında vakıtında ike bala häm alarnıñ anası hälak bula. Yangınnı sündergändä berençe bulıp änilären, annarı olı balanı tapkannar. İkençe malaynı bik ozak ezlägännär. Anı kiçke yakta gına tabıp algannar. Bu turıda «Başinform» agentlıgı häbär itte.

«Faciga buldı, öç keşelek gailä ülde. Bu — 3 häm 5 yäşlek ike bala, alarnıñ 41 yäşlek anası. Gailä yahşılar rätendä tügel ide, alar baliğ bulmagan balalar eşläre buyınça inspektsiyädä hisapta tora. Bu hatınnıñ biş balası bar. 2014 yılda ul berençe irennän tugan öç balasına karata ana bulu hokukınnan mährüm itelgän. 19, 17 häm 14 yäşlek ike ulı häm kızı ätiläre belän yäşi. gailä Salavat şähärendä terkälgän, Novosofiyevka avılında öy algannar, ana kapitalına buluı ihtimal», — dip söyli Fedorov rayonı başlıgı Vener Nasretdinov.

Anıñ süzlärençä, 2018 yılda opeka organnarı bu hatınnıñ ikençe irennän tugan balaların da ala. Alarnı berniçä köngä rayon hastahanäsenä salalar. Anıñ salgalap yörüe dä terkälgän. «Eşlär bu hatınnı ana bulu hokukınnan mährüm itügä taba bara ide. Häzer monıñ ni öçen azakka kadär citkerelmäven açıklıybız. kem komaçaulagan, bu eşkä kem katnaşkan? Şularnı bilgelibez. Anıñ hälenä kerep, balalarnı kaldıru turında karar kabul itelüe ihtimal, dip uylıym», — di Nasretdinov.

Yakınça beleşmä buyınça, märhüm balalarnıñ atası faciga vakıtında Salavat şähärendä bula, ul şunda yäşi häm eşli. Balalarnıñ mäyetlären ezlägändä ul da kaytıp citkän.

2019 yılda bu yortka yangın turında häbär itä torgan caylanma kuygannar. Bıyıl 12 oktyabrdä anı tikşergännär, caylanma tözek buluı turında akt tözegännär. Yangın ni säbäple çıkkan, caylanma nigä eşlämägän - şul soraular açıklana.

Vener Nasretdinov süzlärençä, cirläü eşlärendä munitsipalitet yardäm itäçäk. Bu yort ike fatirlı bulgan. İkençe fatirda yalgız hatın yäşi. Ägär ul administratsiyägä möräcäğat itsä, aña da torak ezlärgä bulışalar. Facigadän soñ kürşe hatını borçımıy torırga soragan. Yortnıñ märhümnär yaşägän öleşe bötenläy yanıp betkän.

Başkortstan buyınça Gadättän tış hällär ministrlıgı Tikşerü komitetı cinayat eşe açkan. Yangın säbäplären tikşerü-operativ törkeme açıklayaçak, bu eşne prokuratura kontroldä tota, diyelä häbärdä.

Çıganak: İntertat


3 weeks, 4 days ago
19 visists
Source: shahrikazan.ru