News Tatar news add news

Kazanda torak yortta yaşäüçelär cıyılışı uzdırgan irgä karşı eş açılgan

Vladimir Solovtsovnı hakimiyätkä häbär itmiçä miting uzdıruda gayıplilär.

Kazannıñ Sibgat Häkim uramı, 60nçı yortta yaşäüçelär balalar mäydançıgı yanında yul tözügä karşı cıyın uzdırgannan soñ, cıyınnı oyıştıruçı Vladimir Solovtsovka karşı administrativ kanun bozu turında berketmä yazılgan. Anı “tiyeşle tärtiptä häbär itmiçä açık çara oyıştıru yaki uzdıru” maddäse nigezendä gayıplilär.

Cıyılış 17 oktyabrdä uzgan. Anda 20-25 keşe katnaşkan, alar kullarına “Balalarga öy yanında imin häm irken mäydançıknı kaytarırga”, “Bezgä işegaldıbıznı kaytarıgız” digän yazular totıp torgan.

Politsiyä monı “miting formasındagı açık çara” dip bäyälägän, bu çara “cämäğatçelekneñ iğtibarın cälep itte häm sotsial-säyäsi ähämiyät aldı” dip beldergän.

Politsiyä şulay uk mitingta katnaşuçılarnıñ tavış köçäytkeç cihazlar kullanuın da iskärtkän.

Çarada katnaşkan keşelärneñ kübese añlatma birü öçen politsiyägä çakırılgan diyelä. Älege maddä nigezendä 30 meñ sumga kadär ştraf, yaki 50 säğatkä kadär mäcbüri eş, yaki un täülekkä kadär sak astına kuyu karalgan. Vazifadagı keşelärgä ştraf 40 meñ sumga citärgä mömkin.


3 weeks, 5 days ago
17 visists
Source: www.azatliq.org