News Tatar news add news

Häbirov "başkort teleneñ tönyak-könbatış dialektında" diktant yazıluın iskä aldı

Başkort tele ukıtuçıları belän oçraşuda Başkortstan citäkçese “tönyak-könbatış rayonnarda berençe tapkır tönyak-könbatış dialektta diktant uzdı” dip hisap birde

“Bügen başkort halkı planetada 2 million keşene berläşterä, şunıñ 1,5 millionı – Rusiyädä, 1,2 millionga yakın öleşe – Başkortstanda. Respublika hakimiyäteneñ burıçı – başkort tele häm küp gasırlık mädäniyätne kaygırtu” dip söyläde Häbirov.

“Başkort telen üsterü, anı ukıtu, öyränü, populyarlaştıru turında töp kararlarnı kabul itärbez. Kiläse yılda tagın da citdiräk äzerlänerbez. Byudcet mömkinleklären dä kullanırbız, çönki finans yardäm bulmıyça berni dä alga barmıy” dide Häbirov.

Ul Başkortstanda başkort telen üsterü kısalarında çaralarnı sanap kitte. 2020 yıl Başkort tele yılı bularak uzdı, Başkort tele köne räsmi kertelde, “Eşlekle başkort tele” proyıktı başlandı, bu proyıkt kısalarında respublika parlamentında, hökümättä, rayon häm şähär idarälärendä çıgışlar başkort telendä yasala başladı dide Häbirov. Şulay uk Başkortstan halıkları milli kiyeme könnäre kertelgänen, üzeneñ häm hökümät äğzalarınıñ bu oçraşuga da milli stildä tegelgän eşlekle kostyumnardan kilüen äytte.

“Başkort telen öyränü respublikanıñ törle rayonnarı häm şähärlärendäge dialektlarnı da iskä alırga tiyeş. Mäsälän, häzer tönyak-könbatış rayonnarda tugan telne öyränügä citdi iğtibar birelä. Başkort däülät universitetı bıyıl anda folklor ekspeditsiyälär uzdırdı. Başkort tele buyınça halıkara diktantnı bıyıl tönyak-könbatış dialektta da yazdılar” dip söyläde Häbirov.

Başkortstanda başkort tele häm ädäbiyätı buyınça dissertatsiyä şurası yañadan torgızılgan. Mägarif ministrlıgında milli mägarif idaräse buldırılgan, mägarifne üsterü institutında milli mägarif buyınça resurs üzäge açılgan.

Başkort telen öyränü öçen internet-saytlar, smartfon öçen kuşımtalar, interaktiv uyınnar buldırılganın iskä aldı respublika başlıgı. “İnteraktiv başkort tele” saytı yasalgan, “IQ Bala Baş”, “İnofonbaş” mobil kuşımtalar, “Älläse” östäl uyını eşläp çıgarılgan.

Ul 2024 yılga respublikada başkort telendä dä belem birüçe 14 polilingval mäktäp bulaçak dide. Başkortça söyläm telen üsterügä östenlek birä torgan yaña mäktäp däreslekläre bastırılganın iskärtte.


1 month ago
21 visists
Source: www.azatliq.org