News Kazakh news add news

Qaraǵandy oblysynda karantın jeńildetildi

NUR-SULTAN. QazAqparat - Qaraǵandy oblysynda saýda ortalyqtaryndaǵy dámhanalar men teatrlar jumysyn qalpyna keltirýde, balalarǵa arnalǵan túzetý ortalyqtaryna toptardaǵy balalar sanyn kóbeıtýge ruqsat etildi, dep habarlaıdy oblystyq ákimdiktiń

baspasóz qyzmeti.

Karantındik sharalardy jeńildetý týraly Qaraǵandy oblysynyń taýarlar men kórsetiletin qyzmetterdiń sapasy men qaýipsizdigin baqylaý departamentiniń bas mamany Serik Syqpabaev egjeı-tegjeıli aıtyp berdi.

Qazaqstan Respýblıkasynyń Bas sanıtarlyq dárigeriniń qaýlysyna sáıkes shekteý sharalary 16 qyrkúıekten bastap eldiń barlyq óńirlerinde báseńdetiledi. Qaraǵandy oblysynda ashyq aýada jáne úı-jaılarda qoǵamdyq tamaqtaný obektilerine endi zalda 50-ge deıin kelýshiler qabyldaý ruqsat etildi. Saýda ortalyqtarynda, biraq jeke úı-jaılarda ornalasqan dámhanalar men meıramhanalar óz qyzmetin qaıta bastaıdy. Bul rette tolymdylyǵy 30%-dan aspaýy tıis jáne bir kelýshige 4 sharshy metr bos keńistik tıesili bolýy tıis. Qoǵamdyq tamaqtaný obektilerine endi 24.00-ge deıin jumys isteýge ruqsat etiledi.

Balalar túzetý kabınetterinde aldyn ala jazylý boıynsha toptardaǵy balalar sany 5-ten 15 adamǵa deıin artady.

Sondaı-aq, azyq-túlik dúkenderi men sýpermarketterdiń jumys ýaqyty 24.00-ge deıin uzartylady. Bıznes-ortalyqtar endi saǵat 18.00-ge deıin jumys isteıtin bolady.

Ruqsat etiledi:

- Kórermenderi 50%-dan aspaıtyn, biraq 50 adamnan kóp bolmaıtyn, sonymen qatar infokazakhstan.kz portalynda tirkelgen teatrlardyń qyzmetine. Maska rejımin jáne áleýmettik qashyqtyqty saqtaý mindetti;

- memlekettik organdardyń (uıymdardyń, kásiporyndardyń), kvazımemlekettik sektor organdarynyń, ulttyq kompanııalar men ózge de uıymdardyń, sondaı-aq kásipkerlik sýbektileriniń jumysy. Bul rette qyzmetkerlerdiń keminde 50%-y shtat kestesi 30-dan astam qyzmetker bolǵan kezde qashyqtyqtan jumys isteý formatynda qalýy tıis.

- Barlyq nysandar úshin kelýshiler men qyzmetkerlerdiń mindetti termometrııasyn júrgizý, jeke qorǵanys quraldaryn paıdalaný, áleýmettik qashyqtyqty saqtaý, kúsheıtilgen sanıtarlyq-dezınfektsııalyq rejım jalpy talaptar bolyp qalatynyn eske salǵym keledi, - dedi Serik Syqpabaev.

Ol sondaı-aq demalys kúnderi oblys aýmaǵynda karantın saqtalatynyn atap ótti. Senbi jáne jeksenbi kúnderi azyq-túlik sýpermarketteri men dárihanalardy qospaǵanda, saýda úıleriniń, saýda-oıyn-saýyq ortalyqtarynyń jumysyna tyıym salynady. Jabyq bazarlar jumysyn toqtatady.

Demalys kúnderi jumys isteýge sulýlyq salondary, shashtarazdar, SPA ortalyqtary jáne kosmetologııa qyzmetterin usynatyn nysandar ruqsat etilgen. Fıtnes jáne sporttyq-saýyqtyrý ortalyqtarynyń, basseınderdiń, trenajer zaldarynyń jáne sport keshenderiniń qyzmetine ruqsat etiledi. Demalys kúnderi monshalar men saýnalarǵa, ashyq attraktsıondarǵa barýǵa bolady.

Karaoke, bılıard, kompıýterlik klýbtar, túngi klýbtar, boýlıng ortalyqtary sııaqty oıyn-saýyq mekemeleriniń qyzmetine tyıym salynady. Jabyq úı-jaılardaǵy balalar oıyn alańdary men attraktsıondarynyń, batýttardyń, úı-jaılardaǵy kınoteatrlardyń, býkmekerlik keńselerdiń qyzmetine tyıym salynady.

Burynǵydaı jappaı kezdesýler, estelik is-sharalar jáne otbasylyq saltanattar ótkizýge ruqsat etilmeıdi.

- Shekteý is-sharalaryn jeńildetýge qaramastan, árqaısymyzdan sanıtarlyq sharalardy qatań saqtaý talap etiledi. Adamdar kóp jınalatyn jerlerde betperde kıińizder, áleýmettik qashyqtyqty saqtańyzdar jáne jótel men murynnyń aǵýy sııaqty tynys joldarynyń ınfektsııasy bar adamdarmen qarym-qatynasty shekteńizder. Aýrýdyń belgileri bolǵan kezde ózin-ózi emdeýmen aınalyspańyzdar, dárigerlerden kómek surańyzdar. Ýaqytyly emdeý - tez saýyǵýdyń jáne jaqyndaryńyzdy ınfektsııadan qorǵaýdyń kepili! - dedi Serik Syqpabaev.


1 month ago
32 visists
Source: www.inform.kz