News Kazakh news add news

«Nur Otan» partııasynyń hatshysy aqtóbelik kandıdattarmen kezdesti

AQTÓBE. QazAqparat - Partııa hatshysy Álibek Áldeneı «Nur Otan» partııasy jaqtastary lıgasynyń múshesi Erlan Saırovpen birge Aqtóbe oblysyna kelip, kandıdattarmen kezdesti, dep habarlaıdy QazAqparat tilshisi.

Praımerız kezinde jastardyń baspanaly bolýy, olardyń saıası ómirge aralasýy jıi kóterildi. Kandıdattar qazirgi úgit-nasıhat kezinde jastarǵa qatysty halyqtan túsken suraqtardy usynys retinde «Jastar – Otanǵa!» baǵdarlamasyna engizýleri múmkin.

«Qazirgi úgit-nasıhat jumystary sheńberinde berip otyrǵan usynystaryńyzdyń bári sol baǵdarlamaǵa kirýi kerek. Baǵdarlama qyrkúıek-qazan aılarynda talqylanady. Sondyqtan maqsat partııalyq tizimge kirý ǵana emes, usynysty baǵdarlamaǵa engizý bolýy tıis», – dedi partııa hatshysy. Onyń aıtýynsha, «Jas Otan» jastar qanaty jol kartasyna 216 jobasyn ázirlendi. Onda árbir óńir, qala jáne aýdan boıynsha jastardyń negizgi problemalaryn sheshýge qatysty naqty sharalar kórsetilgen. Qazaqstandyq jastar atalǵan qujatpen tanysyp qana qoımaı, sonymen qatar jasotan.kz jáne primaries.kz saıttary arqyly usynystaryn joldaı alady.

Sondaı-aq partııa hatshysy máslıhattarda áıel adamdardyń úles salmaǵy 12 paıyzdan aspaıtynyn jetkizdi. Sońǵy 2-3 jylda kópbalaly analardyń máseleleri jıi kóterilgen. Partııa hatshysy otbasy qundylyqtaryna qatysty osyndaı máselelerdiń sheshilýi úshin áıel adamdardyń memlekettik organdarda, áıelderge qatysty komıssııalarda kóbirek bolýy qajet ekenin aıtty. Іssapardyń ekinshi kúni partııa hatshysy Hromtaý aýdanyna bardy. Munda Aqjar selolyq okrýginde ornalasqan daýys berý ýchaskesiniń sanıtarlyq talaptarǵa sáıkestigin tekserip, «Aqjar aýyldyq okrýgi» BPU múshelerimen kezdesý ótkizdi. Kezdesýde «Nur Otan» partııasynyń jaqtastary lıgasynyń múshesi Erlan Saırov praımerızge qatysty suraqtarǵa jaýap berdi.

«Praımerızdiń negizgi maqsaty – halyqtyń senimine ıe jergilikti jerdegi atqarýshy bılikke óziniń sózin aıta alatyn azamattardy máslıhattarǵa alyp kelý. Búgingi tańda Qazaqstan halqynyń eń negizgi suranymy ol – demokratııa. Halyqtyń bir aq tilegi bar, ol – bıliktiń halyq oıynan shyǵyp otyrýy», – dedi ol. Partııanyń aýdandyq fılıaly tóraǵasynyń birinshi orynbasary Jantas Nurımovtyń aıtýynsha, partııaishilik saılaýǵa Hromtaý aýdanynan 31 kandıdat qatysýǵa nıet bildirgen. Olar taý-ken óndirý ónerkásibi, bilim berý jáne medıtsına, kásipkerlik jáne taǵy da basqa sala ókilderi. Barlyq kandıdat partııa múshelerimen kezdesýler ótkizip, ózderiniń saılaýaldy baǵdarlamalarymen tanystyrdy.

Aıta ketý kerek, búgingi tańda «Nur Otan» praımerızine Aqtóbe oblysy boıynsha 486 kandıdat qatysyp jatyr. 7 qyrkúıekte kandıdattar úgit-nasıhatty bastady. Barlyǵy 2 myńnan astam kezdesý uıymdastyrylǵan. Onyń 234-i onlaın túrde ótti.


1 month ago
30 visists
Source: www.inform.kz