"İran berkayçan da atom-töş koralına iyä bulırga tiyeş tügel"

İrannıñ atom-töş programmasın tagın da kiñäytüe kiyerenkelekne arttırdı

Angliyä tışkı eşlär ministrı Dceyms Kleverli İrannıñ berkayçan da atom-töş koralına iyä bulmaska tiyeşlegen äytte. Ul Tvitterdagı yazmasında älege ilneñ atom-töş programmasın tagın da kiñäytüen, monıñ recim tarafınnan dönyaküläm iminlekkä yanavnıñ tagın ber dälile buluın belderde.

“Eçtä üz halkın cäberläüçe recim, hiçşiksez, dus häm berlektäşlärebezgä dä yanayaçak. İran berkayçan da atom-töş koralına iyä bulırga tiyeş tügel,”-dide ministr.

Halıkara atom energiyäse agentlıgı belän citärlek külämdä hezmättäşlek itmäüe säbäple oeşmanıñ idarä şurasında İranga karşı karar çıgarıldı. Tähran idaräse isä moña reaktsiyä bularak Fordodagı atom-töş obyektında urannı 60% çistalıkta baeta başladı.

Angliyä, Frantsiyä häm Germaniyä öçlege kiçä İrannıñ atom-töş programmasın tagın da kiñäytü kararın tänkıytläde. Alarnıñ urtak belderüendä “İrannıñ bu adımı global atom-töş korallarınıñ kiñ cäyelüen kisätü sistemasına karşı kilä” digän yullar bar.

Source: www.trt.net.tr