Taliyä Miñnullina: "Respublikadagı çaralar tatar telenä sinhron tärcemä belän uzarga tiyeş"

Moña ihtıyac zur, kaytavazlar küp, di ul.

Tatarstanda uzuçı çaralar tatar telenä sinhron räveştä tärcemä itelep uzarga tiyeş. Älege täqdim belän 4 oktyabrdä respublikanıñ investitsion üseş agentlıgı citäkçese Taliyä Miñnullina matbugat oçraşuında çıktı.

Ul misal itep "100% Tatarstan. Tözeleş häm territoriyälär üseşe" forumın kiterde. Öçençe tapkır oyıştırıluçı cıyın tatar häm ingliz telenä sinhron tärcemä belän uza.

— Uzgan yıl forumnı tatar telenä sinhron tärcemä belän uzdırgannan soñ, bik küp uñay kaytavazlar kilde. Bu östämä çıgımnar. Bez cıyınnı inglizçägä tärcemä itärgä kiräklegen berniçä tapkır uyladık. Ägär dä bez halıkara dönya bazarında köndäşlekkä sälätle bulırga, partnerlarnı cälep itärgä telibez ikän, açık bulırga tiyeşbez. Ägär dä cirle halıkka yakın bulırga telibez ikän, ike däülät tele dä buluı kiräk. Soñgı ike yılda bez forumnı tatar telenä tärcemä itep barganga, bik küp uñay fikerlär aldık. Respublikadagı başka çaralarnı da tatar telenä sinhron tärcemä belän uzdırır öçen ihtıyac bar. Älege täqdimnän soñ, mäsälän, KazanSummit-nı da tatar telenä sinhron tärcemä itä başladık. Äye, bu smetanı küpkä arttıra, läkin mondıy çıgımnar bulırga tiyeş, — dide ul.

Source: www.azatliq.org