Däülät Sovetına yaña saylangan deputatlar isemlege bilgele

Alar parlamentnıñ ike komitetında eşläyäçäk.

Altınçı çakırılış Tatarstan Däülät Sovetınıñ utız dürtençe utırışında parlamentka yaña saylangan deputatlar isemnären atadılar. Bolar Dmitriy Anisimov häm Rima Möhämmätşina.

“Dmitriy Anisimov Torak säyäsäte häm infrastruktura üseşe komitetına, Rima Möhämmätşina Mäğarif, mädäniyät, fän häm milli mäsälälär komitetına keräçäk”, - dip belderde Däülät Sovetı Räise Färit Möhämmätşin.

Bilgele bulgança, 11 sentyabr könne ike saylau okrugları buyınça Däülät Sovetına östämä saylaular uzdı. İbrahimov isemendäge 7 nçe nomerlı saylau okrugı buyınça Rima Möhämmätşina, Pioner ber mandatlı saylau okrugı buyınça Dmitriy Anisimov ciñü yauladı. Alar Däülät Sovetına Dumaga kitkän İlya Volfson häm Marat Nuriyev urınına saylandı.

Source: shahrikazan.ru