Tatarstanda Tikşerü komitetı kiñküläm tärtipsezleklärgä çakıru turında cinayät eşe açkan

Kazanda politsiyäneñ 23 ğıynvar çarasına çıgu yaramavın kisätep, aktivistlarga hatlar taratuı da bilgele.

Tatarstandagı Tikşerü komitetı kiñküläm tärtipsezleklärgä çakıru turında cinayät eşe açkan. Bu hakta oyışma saytında äytelä.

"2021 yılnıñ 20 ğıynvarında şähese açıklanmagan zat sotsial çeltärlärneñ bersendä 2021 yılnıñ 23 ğıynvarında kiñküläm tärtipsezleklär kıluga çakırıp mäğlümat çıgargan. Ul şulay uk tiyeşle instruktsiyälär dä elgän" diyelä häbärdä.

Annan alda Roskomnadzor TikTok häm VKontakte sotsial çeltärlärennän "baliğ bulmagannarnı kanunsız protest aktsiyälärendä katnaşuga çakırgan" böten materiallarnı alıp kuyarga taläp itte. Şul uk vakıtta Roskomnadzor barlık sotsial çeltärlär häm medialarnı şundıy çakırularnı taratunı buldırmaska öndäde. Kaysı çaralar turında süz barganı Roskomnadzor belderüendä äytelmi.

Rusiyä oppozitsiyä säyäsätçese Aleksey Navalnıy 30 täülekkä törmägä utırtılgannan soñ, tarafdarları anı irekkä çıgarunı taläp itep 23 ğıynvarda aktsiyälär uzaçagın belderde.

Şunnan soñ TikTok kullanuçıları protestlar turında videolar çıgara başladı, ä VKontakte çeltäre aktsiyälärdä katnaşu plannarı turında häbärlär çıgardı.

Kazanda da politsiyä 23 ğıynvar çarasına çıgu yaramavın kisätep, aktivistlarga hatlar taratkan. Şundıy hatlarnıñ bersen "Apologiyä protesta" Telegram-kanalı kürsätte. Hatta 23 ğıynvar çarası däülät oyışmaları belän kileşterelmägän dip iskärtelä.


1 month, 2 weeks ago
0 visists
Source: www.azatliq.org