Qarağandı oblısında şahtadan şığa almay qalğan jumısşınıñ denesi tabıldı

Qarağandı oblısı Lenin atındağı şahtada tötenşe oqiğa kezinde sırtqa şığa almay qalğan jumısşınıñ denesi tabıldı. 13 qañtar tünde kömir şahtasında metan jayılıp, jumısşılar sırtqa evakuatsiyälanğan. Oqiğa kezinde burğılau qurılğısınıñ maşinisti Nikolay Şadirov jer astında qalıp qalğan. Buğan deyin şahta iesi "ArselorMittal Temirtau" kompaniyäsı izdeu jumıstarı jürip jatqanın habarlağan. 14 qañtarda kündiz jumısşınıñ denesi tabıldı. Gazdan ulanğan 1969 jäne 1997 jılğı eki jumısşı auruhanağa tüsken.

Kompaniyä mälimetinşe, opat bolğan er adam käsiporınnıñ kömir departamentinde 16 jıl istegen, 15 jıl burğılau qurılğısınıñ maşinisti bolğan. AMT jumısşınıñ otbasına Qazaqstan zañnaması men ujımdıq kelisim şarttarına säykes, kömektesetinin aytı.

Tötenşe jağday ministrligine qarastı önerkäsip qauipsizdigi komitetiniñ mälimetinşe, 13 qañtarda tüngi sağat 10-dar şamasında şahtada auağa metan men kömirdiñ usaq tüyirşekteri jayılıp, maşinist kömekşisi Muftahov pen ventilyatsiyä böliminiñ mamanı Şadirov apat ornınan qaşıp şıqqan. Al Şadirov şığa almay qalğan. Dispetçer apattı joyu josparın iske qosıp, qutqaru-izdeu qızmeti mamandarın şaqırğan.

Memlekettik organdar bir adam opat bolıp, eki adam zardap şekken oqiğağa baylanıstı komissiyä qurılıp, arnayı tekseris bastağanın habarladı.

14 qañtar tüngi sağat üşter şamasında auruhanağa tüsken eki jumısşı qazir Qarağandı qalasındağı meditsinalıq ortalıqtıñ toksikologiyä böliminde jatır. Därigerler olardıñ gazdan ulanğanın aytqan. "Jağdayları turaqtı, orta därejede ulanğan" dedi oblıstıq densaulıq saqtau uyımınıñ ökilderi.

Qarağandı kömir basseynindegi iri şahtalardıñ biri Lenin atındağı şahta 1964 jılı paydalanuğa berilgen. 1996 jılı şahta ündistandıq milliarder Lakşmi Mittal basqaratın kompaniyänıñ menşigine ötti.

1970 jıldıñ soñınan beri Lenin atındağı şahtada adam şığını bolğan keminde jeti apat bolğan. Eñ irisi 2006 jılı boldı. Ol kezde metan jarılıp, 41 kenşi qaza taptı, jeti adam jaralandı.

Telegram bizge jazılıñız

Elena Veber - şığarmaşılıq psevdonim. Elena - 2010 jıldan beri Azattıqtıñ Qarağandı oblısı boyınşa tilşisi. Temirtau qalasında turadı. QarUU-diñ filologiyä fakultetin bitirgen.


3 days, 7 hours ago
0 visists
Source: www.azattyq.org