Tatarstanda 2 400 keşe "Sputnik V" vaktsinası yasatkan

Respublikaga koronavirustan barlıgı 5 900 doza vaktsina kilgän.

Tatarstanda 2 400 keşe koronavirustan vaktsina yasatkan. Yaña yıl bäyrämnäre vakıtında älege eş sülpänäygän. Bu hakta 6 gıynvarda Tatarstan sälamätlek saklau ministrı urınbasarı Vladimir Cavoronkov matbugat oçraşuında belderde.

"Vaktsina moña äzer bulgan barlık sırhauhanälärdä yasala. Yaña yıl bäyrämnäre vakıtında bu eş äkren bara, läkin ul dävam itä. Aldan äytkänçä, bez başta meditsina hezmätkärlärenä vaktsina yasıy başladık. Häzer başka katlamnarın kabul itü mömkinlege birelä. Härkemgä citärlek külämdä vaktsina kötäbez. Moña qadär 5 900 doza vaktsina kilgän ide. Ägär dä häzer respublika keşeläre sırhauhanälärgä agılsa, vaktsina citmäskä mömkin", dide ul.

Bügengä 2 400 keşe "Sputnik V" vaktsina yasatkan. Şularnıñ 50dän artıgı vaktsinalaştırunıñ ikençe öleşen ütkän.

Tatarstanda koronavirus belän vazgıyät totrıklı diyelde. Läkin curnalistlarnı soñgı vakıtta ülemnär sanı artuı kızıksındırdı. "Bu sorauga cavap birü avır. Berniçä atna, berniçä ay avır häldä yatkan avırular bar ide. Alar ülde. Ämma avır häldä yatuçılar dulkını zur diyä almıybız. Eş totrıklı bara. Hastahanälärdä urınnar bar, avırularnı kabul itälär, reanimatsiyä yatakları da äzer", dide Vladimir Cavoronkov.


1 week, 3 days ago
1 visists
Source: www.azatliq.org