Kazanda başkortlaştıru säyäsäten faş itüçe "Ufa öyäze tatarları" hezmäte dönya kürde

Kitap käğazgä dä basıla, elektron variantta da taratıla.

Şihabetdin Märcani isemendäge tarih institutı "Ufa öyäze tatarları" hezmäten çıgardı. Anda Tatarstannıñ könçıgış rayonnarı, Başkortstan, Orenbur häm Udmurtiyädäge tatar avıllarınıñ tatarlar tarafınnan tözelüe häm anda elektän tatarlarnıñ yäşäve yazılgan. Bu hakta kitapnıñ cavaplı möhärrire, tarih fännäre doktorı Radik İshakov Azatlıkka häbär itte. Anıñ süzlärençä, bu tatarnı başkort dip kürsätüçe galimnärgä karşı citdi dälil bulıp tora.

"Başkort etno-politologları tarafınnan agressiv ideologik basım alıp barılganda bu hezmät bik ähämiyätle. Monda obektiv surät kürsätelä. Tatarlarnıñ Ufada, Ufa yanında, Stärletamak, Stärlebaşta, Tatarstannıñ Möslim, Sarman, Aznakay häm başka rayonnarında da yäşägäne kürsätelä. Bu avıllar tatarlar tarafınnan tözelüe häm alarnıñ anda yäşävenä bik citdi dälil bulıp tora. Başkortlarnıñ folklorga, 20 buınga, ıru sistemına tayanuına karaganda, bu küpkä köçleräk citdi argument. Başkortlarnıñ mondıy dälile yuk. Tatar avıllarınıñ başkortka bernindi mönäsäbäte bulmagan", dide Radik İshakov.

Hezmättä fiskal hisapnıñ 1-4 reviziyä beleşmläläre kiterelä. Çıganak bulıp Rusiyä däülät arhivınıñ borıngı aktları häm Rusiyä däülät tarih arhivınıñ Senat fondı tora.

Azatlık radiosınıñ mobil äsbabı

YÖKLÄGEZ!

"Bu mäğlümatlarda Ufa öyäzeneñ etnik yaktan kemnärdän täşkil buluı kiterelä. Ul bügenge Tatarstannıñ könçıgışı, Başkortstan, Orenbur Udmurtiyäneñ ber öleşen alıp torgan. 1-4 reviziyädä tatarlarnıñ sosloviyesı dä kürsätelä. XVIII gasır başında bulgan tatar avıllarınıñ zur çeltäre bügen dä yäşi. Ni öçen 1-4 reviziyä? Anda bu cirlektä tatarlarnıñ yäşäve terkälgän. Ä başkort galimnäre soñrak çıkkan 5,6,9 reviziyägä tayana. Anda tatar avıllarında yäşäüçelär başkort bulıp yazılgan. Bu XVIII gasır ahırında başkort härbi sosloviyesı barlıkka kilü belän bäyle. Küp kenä tatar avılları başkort kantonnarına kergän. Yağni 1-4 reviziyä mäğlümatlarınnan çıgıp, bez avıllarnıñ tatarlar tarafınnan tözelüen häm anda yäşäülären äytä alabız", dide İshakov.


4 weeks, 1 day ago
3 visists
Source: www.azatliq.org