Yıvropa berlegeneñ kayber illäre Britaniyädän oçışlarnı tuktatıp tora

Britaniyädä koronavirusnıñ yaña ştammı tarala başladı.

Niderland, Belğiyä, Avstriyä häm İtaliyä yakşämbe Britaniyädän oçışlarnı tuktatıp toru turında belderde. Bu Angliyä könyak-könçıgışında koronavirusnıñ yaña ştammı taralu turındagı häbärlär belän bäyle.

Belğiyä şulay uk London belän Yıvrotonnel aşa timer yul elemtäsen dä özde. Älegä bu çaralar 24 säğatkä kertelde.

Häbär itelüençä, Germaniyä belän Frantsiyä dä çikläü çaraları turında uylana.

Şimbä Britaniyä hakimiyätläre Angliyäneñ könyak-könçıgışında häm Londonda çikläü çaraların iñ yugarı, dürtençe däräcäsenä qadär kırıslatu turında belderde. Bu tulı lokdaun digänne añlata.

Raştua uñayınnan niyätlängän kiñküläm çaralar Britaniyä başkalasında bulmayaçak, restoran häm kafelar yabık. Cirle halıkka üz yortlarınnan ihtıyac bulmagan oçrakta çıgu, Raştuada berniçä ğailä bergä cıyılu tıyıldı. Çaralar älegä ike atnaga kertelde.

Britaniyä premer-ministrı Boris Dconson koronavirusnıñ yaña ştammı "gadiyenä" karaganda 70 protsentka tizräk tarala dide. Tabiblar isä avıru tiz taraluga karamastan, ul keşe gomerenä elekke ştammnan zurrak kurkınıç tudırmıy, koronavirustan vaktsinatsiyäläü çaralarına yogıntı yasamayaçak dip belderä.


3 weeks, 5 days ago
2 visists
Source: www.azatliq.org