News Tatar news add news

Un yäşlek malay biş kön aç kileş ber yalgızı yaşägän.

Ber yıl elek babay da vafat bula. Şunnan soñ balanı karauçı kalmıy.

Mäskäü ölkäsendä un yäşlek malay biş kön çaması fatirda ber yalgızı yaşägän. Anı änise östennän bikläp kaldırıp çıgıp kitkän. Tik bu hatın balasına ike köngä citärlek kenä azık-tölek kaldırgan, Bitaraf bulmagan kürşelär politsiyä çakırgan. Balanıñ anasın berniçä kön ezlägäç kenä, tabalar. Bu turıda «Vesti» kanalı häbär itte.

Dürtençe sıynıfta ukuçı un yäşlek malay ber bülmäle fatirda yäşi. Fatir Novorlovskaya uramındagı yortnıñ ikençe katında urnaşkan. 21 noyabrdä köndez malay eçke yaktan işek şakıy, ul yardäm sorap yalvara. Podezddan uzıp baruçı kürşe ir-at bu tavışnı işetep ala. Şunnan kürşe-külän cıyılışa. Malay äniseneñ inde dürt kön elek çıgıp kitüen, öydä aşarga barı tik döge genä kaluın söyli. Malay üzenä aşarga alıp kaytıp birergä genä sorıy. Ul sotsial hezmätlärgä häbär itmäüne ütenä.

Kürşelär balaga azık-tölekne täräzä aşa birä. Läkin ikençe könne, yakşämbe, balanıñ anası haman kaytmagaç, kürşeläre politsiyä çakıra. Uçastok politsiyä hezmätkäre kilä.

Soñrak açıklangança, berniçä yıl elek bu hatınnıñ ire vafat bula, tol hatın berniçä köngä käyef-safa korırga çıgıp kitä başlıy. Ul çakta balanı babası tärbiyäläp tora. Ber yıl elek babay da vafat bula. Şunnan soñ balanı karauçı kalmıy.

Malay 11 noyabrdän birle mäktäpkä dä kilmägän. Häzer anı hastahanägä ozatkannar. Äni keşene isä ana bulu hokukınnan mährüm itüläre ihtimal, diyelä häbärdä.

Berniçä kön uzgaç, balanıñ anası tabıldı. Bu hatın soñgı könnärdä tanış ir-atı belän kungan, aña kadär uramda yoklagan. Bu turıda RİA Novosti agentlıgı politsiyägä sıltama belän häbär itte.

«Et belän yörergä çıkkaç, totkarlagannar. Ul tanış ir-atınıñ fatirınnan çıkkan. Et şul irneke. Soñgı ike könne şuşı ir-at belän kungan», — dip añlatkan agentlık çıganagı.

Bu hatın ulınıñ öydä yalgız gına utıruın, anıñ açkıçları bulmavın belä, anıñ aşarına «berniçä könlek kaldırdım», di. İmeş üze bu könnärdä avırgan, başı äylängän, şuña öygä kaytmagan. Ul balasın yaratuın äytä, malaynı yalgızın kaldıruınıñ säbäben dä añlata almıy, balasınnan baş tartırga da cıyınmıy. Malaynıñ atası da bar, tik alar küptän aralaşmıy, diyelä bu häbärdä.

Çıganak: İntertat


5 days, 22 hours ago
0 visists
Source: shahrikazan.ru