News Kazakh news add news

Fýtbol: «Qaırat» «Astanadan» 11 upaıǵa uzap ketti

NUR-SULTAN. QazAqparat – Fýtboldan Qazaqstan chempıonatynyń 13-týrynda Almatynyń «Qaıraty» Taldyqorǵannyń «Jetisý» komandasyn utty, dep habarlaıdy QazAqparat tilshisi.

«Jas qyran» stadıonynda ótken kezdesý almatylyqtar úshin ońaıǵa soqqan joq.

Birinshi taımda Dmıtrıı Ogaıdyń shákirtteri 2:0 esebimen alǵa shyqty. Aldymen «Qaırattyń» qorǵaýshysy Aıbol Ábikenniń qateliginen keıin Pedro Eýjenıo 7-mınýtta esep ashty. On mınýttan keıin Ǵafýrjan Súıimbaevtyń artqa bergen dobyn durys toqtata almaǵan Stas Pokatılov óz qaqpasyna gol ótkizip aldy.

Kóp uzamaı 30-mınýtta «Qaırattyń» shabýylshysy Abat Aıymbetov esepti qysqartty.

Ekinshi taımda 50-mınýtta Vagner Lav 11 metrlik aıyp dobyn qaqpadan áldeqaıda joǵary tepti. Degenmen 57-mınýtta A.Aıymbetov tarazy basyn teńestirdi. Іle-shala óz aıyp alańynda Aderınsola Eseolany shalyp qulatqan «Jetisý» qorǵaýshysy Meıram Sapanov ekinshi eskertýin alyp, alańnan qýyldy. Biraq A.Eseolanyń 11 metrlikten dobyn taldyqorǵandyq klýbtyń qaqpashysy Andreı Shabanov qaqshyp ala bildi. Biraq ol 76-mınýtta Denıs Polıakovtyń tepken dobyn qaıtara almady.

Ekinshi taımda «Qaırat» sapynda alǵash ret alańǵa shyqqan 19 jastaǵy Danııar Úsenov 94-mınýtta óziniń birinshi golyn soǵyp, esepti 4:2-ge jetkizdi.

Bul matchta óreskel qatelikke jol bergen Qazaqstan ulttyq quramasynyń qaqpashysy Stas Pokatılovty ekinshi taımda Danıl Ýstımenko almastyrdy.

Oıynnyń ekinshi kezeńinde alańǵa shyqqan «Jetisý» fýtbolshysy Aslan Darabaev eki márte eskertý alyp, ol da qýylyp tyndy.

Osylaısha 32 upaı jınaǵan Alekseı Shpılevskııdiń shákirtteri «Astanadan» 11 upaıǵa uzap ketti. Degenmen bul týrǵa qatyspaǵan elordalyqtardyń bir oıyny kem.

Eske sala keteıik, budan buryn fýtboldan Qazaqstan chempıonaty

qaıta jalǵasqanyn

jazǵan bolatynbyz.


1 week ago
0 visists
Source: www.inform.kz