News Azerbaijani news add news

Azərbaycan Universitetində “Xocalı zülmət bir gecə” filminin təqdimatı olub

Azərbaycan Universitetinin tələbələri üçün “Xocalı – zülmət bir gecə” filminin təqdimatı keçirilib.

“Qafqazinfo”nun məlumatına görə, Erməni Təcavüzünün Tanıdılması İctimai Birliyinin sədri, publisist Səriyyə Müslümqızının yeni layihəsi olan film Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə hazırlanıb. Filmdə Xocalı soyqırımında ermənilərin girovluğunda olan soydaşlarımızın ağlasığmaz işgəncələrə məruz qaldığı onların özü tərəfindən nəql edilir.

Tədbirdə Xocalı şəhidlərinin, o cümlədən Azərbaycanın müstəqilliyi və ərazi bütövlüyü uğrunda həlak olmuş bütün şəhidlərin əziz xatirəsi bir dəqiqəlik sükutla yad edilib, Xocalı soyqırımı haqqında tarixi faktlar diqqətə çatdırılıb, ölkəmizin 1992-ci ildə Xocalıda baş verənlərin beynəlxalq aləmdə soyqırımı kimi tanıdılması ilə bağlı sistemli təbliğata nail olduğu qeyd olunub.

Səriyyə Müslümqızı Xocalı soyqırımının qəddarlıq baxımından tarixin ən qanlı səhifələrindən biri olduğunu, faciənii gözləri ilə gördüyünü və “o gecə”nin içindən keçdiyini bildirib. Səriyyə Müslümqızı indiyə qədər Xocalı soyqırımından bəhs edən 5 film ərsəyə gətirdiyini qeyd edərək faciənin beynəlxalq miqyasda tanıdılması üçün daha çox işin görülməsinin vacibliyini bildirib və “Xocalıya ədalət” beynəlxalq kampaniyasının konkret nəticələrini diqqətə çatdırıb.

Tədbirdə S.Müslümqızının yenidən nəşr olunan “Onlar heç vaxt böyüməyəcəklər” kitabı haqqında da məlumat verilib. Bildirilib ki, Azərbaycan, ingilis, rus və türk dillərində nəşr olunan kitabda 1992-ci il fevralın 25-dən 26-na keçən gecə Xocalıda törədilmiş soyqırımında şəhid olan 63 uşaqdan bəhs olunur.


7 months, 4 weeks ago
59 visists
Source: xeber.im