Zakonlı Kommentariy

(yumoreska)
Tegeni munitsipal rayonınıñ “Fälän avıl cirlege” munitsipal oyışması cirläre çikläreneñ kartografik bilgelämäsenä (“Tegeni munitsipal rayonı” munitsipal berämlegeneñ häm anıñ sostavındagı munitsipal berämleklärneñ territoriyäläre çiklären bilgeläü häm alarnıñ statusı turında” Zakonnıñ 1 kuşımtasına) şul avıl keşese Beldekle Cabbar kommentariye.

Fälän avılına tiyeşle cir kişärlekläreneñ çige, Tögän avılı yagındagı Şüräle çokırı buyındagı käkere naratlarnıñ, Atsız Äğzam kizläve yagınnan sanaganda, cidençese töbendä başlana da, Fälännän Fäsmätängä bara torgan yul buyına utırtılgan agaçlar räte betkän urındagı, inde 1978 yılnı uk kümelep, häzer kıçıtkan belän kaplanıp betkän ülät bazınnan tönyakka taban 2,33 çakrım çaması bara, şunnan soñ, basu buylap yakınça 631 adım, yugalgan savım apparatı bidonı arkasında Tukran Mortazasınıñ hatını sıyır savuçı Ozın Zölayha belän talaşkan häm anı “sasıgan balık” dip ürtägän, şunıñ arkasında kibettä bolamıklı vinoga çiratta torgan cirennän Tukran Mortazası tarafınnan alıp oçırtılgan häm doyarkalar kulı belän rähimsez räncetelgän çatan kötüçe İmametdin ber botagın yandırgan yalgız imängä qadär, suzıla, annarı töp-tögäl 237 adım gel cil kuzgala torgan yakka bara, şunnan çama belän ike yözläp adım mal braçı Hamätcannıñ şoma peläşe kebek tigez kır buylap uza, inde kilep, şaytan tayagı urman kebek ürçegän töbäk buylap 778läp adım uzgaç, midälsez Frontovik Şiriyäzdan ällä kayçan, tögälräge 1964 yılnı uk, batkaklıkka batırıp kaldırgan, äle häzergäçä tartıp çıgarılmagan häm, älbättä, soñgı başmagına qadär talanıp betkän DT-54 traktorı tırpayıp torgan urınga qadär dävam itä, şunnan soñ Şaytan (täübä ästäğafirulla) kanavınıñ töbe buylap 2194 adım tiräse, yağni ak taş çıgarıla torgan Bädri çokırına qadär, bara (häzergäçä isän-sau gracdannar sugışı veteranı Gabidulla babay söylägängä ışansañ, Ähmädican kulak näq şunnan algan taş belän üzenä ike katlı bädräf yasagan bulgan, annarı, häçterüş avıldaşların cälläp, anı 1932 yılnı II İnternatsional isemendäge kolhozga büläk itkän, kolhoz idaräse uçut kenägäsenä ul bädräfne “tegermän” itep terkägän), alga taban çik yakınça 960 adım Alpavıt urmanına taba kitä, yağni tege yıllarda “Lenin bayragı” kolhozınıñ umartaçısı bulıp eşlägän saran Mikulaynıñ baştan arendaga gına alıp torgan, ä häzer inde kortları häm oyaları belän, kışlarlık kuışları häm öye belän, ber maşinası, ike traktorı, peçän çabuçı tagılma agregatı häm ike aşlık cıyu kombaynı belän niçekter hosusıylaştırgan umartalıgı yünäleşendä uza, annarı, umartalıknıñ yul yagındagı iñ kırıy baganasına 7 adım kala, korıgan Zur yılga ineşe yarı buylap 12 adım aska taban töşä, annan soñ, kapma-karşı diyärlek yünäleşkä kisken borılış yasap, korılık yıllarında salam urınına terlek astına cäyä torgan kamıldan başka ülän dä üsmägän, şunıñ arkasında yıl sayın “Melioratsiyä cännäte” digän kontornıñ eş planına häm byudcetlarına kertelä torgan bolınga citä, şunnan çik Kükäyle iñkülekneñ tege yagı buylap 1018 adımnar çaması alla belgän kem uylap tapkan «ÇTZ akiyänı» atamalı Yugarı buaga taba bara, annarı käkere sızık räveşendä su buylap (akvatoriyä buyınça) Akiyännıñ urtasına, ata yalkau yangınçı Zakircan Halturidzenıñ ber tapkır da tuygançı aşatmagan, şunıñ arkasında şır skeletka kaldırılgan, ahır çiktä üzeneñ iblis gazraile Halturidzedan kaçıp kitergä mäcbür bulgan kart alaşası 1983 yılda batıp ülgän urınga qadär suzıla, şunnan çik bu yak yarga taba perpendikulyar sızık yasıy, biredä böten peçäne yıl sayın serle räveştä kolhoz räise Kärimneñ brakoner abıysı Narim yortına küçep bara torgan klever basuınıñ iñ biyek noktasına qadär (koordinataları kuyın däftärendä yazılgan) menä, annarı sul cilkä aşa äylänep yarımtügäräk räveşendä bara-bara, dibil holıklı yap-yäş urmançı Harun Änväräviçyusnıñ şähsi tabigıy resursları dip sanala torgan Kazna urmanınıñ 68nçe kvartalınıñ ber poçmagın beldergän töpçekkä barıp törtelä, şunnan Fäsmätän yünäleşendä kitep, çik çärşämbe sayın yanına «Hrustalnaya voda» dip yazılgan furgonlı maşina su alırga kilep yöri torgan bakalı-kortlı taşlandık koyı yanınnan ütä, annarı Tögän kibetçese Gır-gır Grigoriy bakçasınıñ iñ könyak koymasına 342 adımnar barıp citmästän, kıyık-mıyık borgalana-borgalana, anıñ cide yıl elek burap kuygan munça burasın äylänep uzıp, üz teläge belän pensiyägä çıkkan dürt tapkır kommunistik hezmät udarnigı häm cide tapkır sotsialistik yarış ciñüçese Şämsiganiyev Blyuher Motoroviç üzeneñ bäräñge bakçasınıñ poçmagı dip sanagan elektr baganasına citä, annan çik turı sızık bulıp, mäktäp direktorı Mindiyär Arhimandritoviç añlatkança, bezneñ yaklarda ilneñ Könçıgış çigen yapun, kıtay, mongol häm başka Seber halıklarınnan saklar öçen kazıp öyelgän tarihi val buylap, başlangan noktasına qadär bara.

Click or select a word or words to search the definition