Yugaltu Häm Tabu

Aygölneñ iñ kaygılı könnäre tudı. Ul iñ yakın keşesen –kartinäsen yugalttı. Kız kaygısın kayda kuyarga belmäde, ayakları gına, üzlärennän – üze anı, kartinäse belän bergä yua, ciläk cıya torgan aklanga alıp kildelär. Ul kaygısı belän agaçlar, çäçäklär belän urtaklaştı. Ä alar isä kaygılı häbärne añlaganday, üzlärenä tamgan açı küz yäşlären genä cıyıp, äkren genä, iskän cilgä kuşılıp tibrälä birdelär.
Ä Aygölneñ küz yäşläre tamdılar da tamdılar. Küz yäşlärenä kuşılıp, balaçak hätiräläre, kartinäseneñ avır tormışı turındagı istäleklär dä aktılar da aktılar.
Kızçıkka ber yäş tulganda änisez kaldı ul. Yuk, ülmäde anıñ änise, barı tik çit yaklarga çıgıp yugaldı. Kaytmadı. Niçä yıllar kötte anı kız. Ömetsez kötte. Änise artınnan ätise dä çıgıp yugaldı.
Yatim kalgan balanı kartinäse karap üsterde. 17 yıl gomere dä uzıp kitkän inde. Kartinäseneñ cılı kuyınında eş söyärgä, tormışnı, bar avırlıklarına karamıyça, yaratırga öyrände kız.
Yakın keşeläreneñ ränceşe töşkänme?
Kız soñgı yıllarda änise turında da häbärlär işetep tordı. Yänäse, maşina belän avariyäga eläkkän ikän, häzer garip bulıp kalagan ikän, digän häbärlärne dä işetterdelär añarga. Kıznıñ gına küñelendä cälläü, yäki başka törle hislär dä uyatmadı añarda bu häbärlär...
Aygöl, bermäl, uylarınnan aynıp kitte. Üzeneñ yapa – yalgız urman eçendä utırganın, kiçke eñger – meñger töşkänen kürde. Äkren genä avıl yagına, öylärenä taban atladı.
Yortlarında ut yanganın şäyläp aldı. “Äbilär utıradır inde”. Kilep işekne şakıdı. Ozak kına açmıy tordılar aña.
İşek açılıp kitkäç, Aygöl telsez kaldı. Anıñ aldında, invalid kolyaskasında ber apa utıra ide. Kız anıñ kem ikänen şunduk añlap aldı.
Üze dä sizmästän, alga omtılıp, yat apanı koçaklap aldı:
- Äniyem, kartinäy ülde bit...
- Kızım, kızım... – dip kenä äytä aldı ana, küz yäşlärenä buılıp.

Şulay itep, urtak kaygı ana belän kıznı kavıştırdı. Soñgı yulına kitkändä dä kart äbi izge eş kılıp kitte.

“İgençe” №113, 12 dekabr 1992 yıl.

Click or select a word or words to search the definition