Yäşen sukkan karama

Yartılaş şayartıp äyttem, yartılaş çınlap: «Gailädä tämam ıçkıngan ikäü
bar idek: berse — Firdäves enem, ikençese— min. Firdävesneñ säyer akıllı
ikänlegen tabiblar şunda uk tanıdılar. Mine dä tanısı idelär: şağıyr
bulıp çıktım. Enekäş Tatarstannıñ şaktıy mahsus şifahanälärendä
yattı.

Nihayät, ul Zöyä utravındagı elekkege monastırda yasalgan psihbolnitsaga
barıp eläkte. Älegäçä şiklänäm: kaysıbız şağıyr idek ikän bezneñ? Min
sezgä berniçä misal gına söylim. Äytkänemçä, enekäş İvan Groznıy
Kazanga karşı astırtın köylätkän utrauda. Telefon-radio häbäre yuk.
Mine berençe şakkatırgan häl. Bulganınça söylim.

— Mine tanıysıñmı, enekäş?

— Tanıyım, Dölfät abıkay bit sin! Karale, Dölfät abıkay, ul bezneñ Mari
Karamasın nişläp yäşen suktı ikän?

Min ni äytergä dä belmim — monı işetkänem yuk. «Yarar, beleşermen», —
didem.

— Anıñ östenä ber koş töşkän diye, abıkay, şunı yäşen dip uylagannar
ikän.

Mari Karaması şartlap yanıp kitkän, di!

Şakkatırlık häl bu. Mari Karaması. Yaña Säyet belän Mari Bülär
urtasında, basu urtasında yapa-yalgız üsep utırgan karama ide ul. Buranda
şuña karap yul tota idek.

Yaşen sukkan Mari Karamasın...
Aç yıllarnıñ tik ber mayagın.
Ägär inde cäza kiräk bulsa,
Nik, Hoday, sin anı sayladıñ?
Buran eçlärennän kalkıp çıgıp,
Yul kürsätä ide ul tın gına.
Cılı şäülä bulıp kalka ide
Mari belän Säyet yulında.
Kayan sizgän şaşkan enekäşem,
Kem citkergän aña bu hälne?
Psihmonastırga şuşı häbär
Ällä küktän barıp citkänme?

— Yarar... Şaltıratırmın. Beleşermen,
häm beleştem. Yangan karama!

Häbär taraluın tarala da,
Niçek şulay ımlap tarala?
***

Tagın ber häl buldı. Bügen irtän säğat dürttä. Mansur babay ülgän.

— Kaysı Mansur?
— Bakça tulı usak üskäne!
— İşetmädem äle, üskänem!

Häm beleştem, häm dä döres çıktı.
Dönya kuygan babay. Çın ikän.
Soñınnan gına min çamalap beldem.
Enekäşneñ dä bit... kön citkän.
Tagın ber häl buldı. Busın inde
Hätta meñ dä ber kat şağıyrlek
Sizä, kürä, belä almas ide...
Bu — ser buldı miña gomerlek.
— Yä, ni hällär buldı sezdä, enem?
— Abıkay, bik älläni bulmadı.
Kiçä tülke koşlar oçıp ütte.
Kötü miña kanat bolgadı!
Tanıp kaldım täki min alarnı.
Bezneñ avılnıkı bit alar!
Tavışları... Kanat cilpeşläre!..
Şunı tanımaska, divana!
***

Avıl koşların da tanıp, enem,
Yulär bulıp cirdä yäşädeñ.
Üzeñ sizdeñ meñär çakrımdagı
Karamaga yäşen yäşnäven...
Min şiklänmim, min ışanam häzer,
Ul ışanıç mindä gomerlek!—
Mindä tügel, sindä bulgan, enem,
İñ çın häm iñ ihlas şağıyrlek!
Üz ilemnän yırak-eraklarda
Tanıgaçtın avıl koşların
Şağıyrlegeñ tanıp huşlaşamın.
Kabreñ tauda, şağıyr!
Huş, canım!
Dönyalıkta sine iskä alam,
Şağıyrlänep yörgän arada...
İke şağıyr bulsa, bula ikän
Berse — yäşen sukkan karama...

18 ğıynvar, 2004 yıl.