Ukı, Enem!

(yumoreska)
Karale enekäş! Torıp tor dim beraz! Hiç citeşep bulmıy artıñnan. Papirusıñ borınnı kıtıklap kaldırdı. Tukta, minäytäm, kuıp totıp, berär tämäkesen çiyertim äle, ber uñaydan kem ikänen dä belermen didem. Menä häzer tanıdım, sin bit şähärdä pırkarurga ukıp yörüçe Mäslävi malayı. Döresme? Alaysa, ukuga tülärgä ike sıyırlık akça kitä dip atañ sineñ turında zarlana inde. Kitär şul, nik kitmäsen! Ul prafisırlarnıñ da adäm rätle tormış itäseläre kiläder.

Sineñ alaysa, enem, pırkırur bulırga inde isäbeñ? İ-i, şatlanır inde Mäslävi töpçege ukıp kaytıp, başkalarnı törmägä utırta başlasa. Üze, biçara, benzin urlaganda eläktergän öçen partorgnıñ yañagın sındırıp, niçämä yılın kazna yortında uzdırdı bit. Ul partorg häzer kürşe avılda mulla bulıp yöri. Ä şulay da tege hälne Mäslävi onıtmagan ikän, yuksa, yılına ike sıyırlık akça yünätep intekmäs ide. Şuña, enekäş, sin kızurak ukıp çıgu yagın kara. Sineñ işe tüläp ukuçılar avılda muyınnan. Ä ferma beräü genä. Anısı da betep bara.

Min üzem häzer tönnären yokı almagaç, flägäne gazga kuyam da bankaga tamgan arada, ferma tiräsen küzätergä kapka töbenä çıgıp utıram. Nu, malay, taşıp kürsätälär dä inde fermadan furacnı! Ul biçara kalhuz sıyırlarına söt kayan kilsen! Häzer halık balaların ukıtıp, keşe yasarga tırışa bit. Sänäk atıp, avır eştän tuygangadır bu ğalämät.

Berkönne Täzkirä äytä: "Malay bıyıl ukıp çıksa, şät, kaytıp beraz bulışır ide", – di. Bulışa pıçagım! Anıñ malayı hatın-kız vraçına ukıp yöri bit. Nik alay iza çigep ukıtıp yöriseñ dip soragaç, kulınnan bütän ber eş tä kilmi di. Ber yaktan döres äytä inde, hatın-kız zatı anıñ malayın kürügä eri dä kitä. Belmässeñ, ällä kulı şifalı, ällä... Täzkiräne äytäm, ulım bulışır dip yukka ömetlänä, ul malaynıñ kulları ber dä sänäk totarga yaraklaşmagan. Sineñ ul yaktan, enekäş, söbhanalla, beläkläreñ tupırdap tora, cilkäläreñ dä kiñ, ikeşär kapçık kuyıp taşırlık. Niçek, niçek? Urlarga zakun röhsät itmi? Kit, cülär! Atañ zakun kuşkança öyendä kul kuşırıp utırsa, sin bolay köyäzlänep şähärdä ukıp yörer ideñmeni?

Änä, avılga yaña uçastkovıy bulıp kilgän Hizbullin da baştarak karaklıknıñ tamırın korıtaçakmın dip şapırıngan ide, barıp kına çıkmadı. Nik digändä, Hizbullinnıñ beraz iläsräk kızı ukırga kerä almadı. Ämma kalhuz çutına häl itelgän dürt baş sarıknı ite-tirese belän şähärdäge ber yılgır adämgä iltep tapşıruga, ni gacäp, kızı kergän bulıp çıktı. Häzer, änä, borının çöyep assiminatorga ukıp yöri. Hizbullinnıñ da häzer bernidä game yuk, berkemne kürmi, berni işetmi.

Şuña kürä, sin, enem, ber dä borçılma. Ukıp çıgıp, pırkarur bulıp kayta kalsañ, avıldaşlarıñ öçen kızarırga hiç tä turı kilmäyäçäk, çönki kaytuıña kalgan mallarnıñ urlıysın urlap, büläsen bülep kalhuznıñ ättähiyäten ukıtıp kuyaçaklar. Atañ Mäslävi kebeklär bolay nık tırışkanda bu eş ozakka suzılırga ohşamagan.