Tıçkan Çire

(yumoreska)
Üzen belä başlagannan birle kolhozda terlekçe bulıp eşlägän Säyfetdingä könnärdän berkönne yal yortına putevka kiterep tottırdılar. Gel eş kenä dimägän, beraz yal itep kayt, didelär aña. Putevkası hezmät hakı isäbennän ikän. Akça tüläp alası bulmagaç, buşlay inde ul, dip fiker yörtte, inde yıldan artık açtan ülmäslek hezmät hakı gına alıp eşlägän Säyfi. Gomer buyı avıldan çitkä çıkkanı bulmasa da, täväkkälläde - kiräk äyber-säyberen däü genä çemodanga tutırıp, yulga kuzgaldı.

Hatını Täskirä anıñ bu ğamälen bik ük önäp betermäde, bilgele. Andıy cirgä yalgızın gına çıgarıp cibäräse kilmägän ide şul. Hafalanırga säbäbe dä bar: ber yılnı avıldaşları Tıçkan Gapteri, yal yortına barıp, andagı marca hatınnarı belän çualgan da, nindider yaman çir eläkterep kaytıp, avıl halkı aldında adäm risvayı bulgan ide. İrlärneñ bötenese beriş. Säyfi dä çäçbikälär çutına Tıçkan Gapteriyennän kim tügel. Şulay da, ir hakın haklap, Täskirä artık bäreläse itmäde, «Bar, yörep kayt inde, alaysa»,- diyüdän uzmadı.

Säyfine ozatıp, ber atna ütte mikän, Täskirä ulları İlfatnı citäkläp, bakça artlatıp kına, äti-änise yortına kaytıp kerde dä, häl-ähväl soraştırmastan, üksep yılıy da başladı.

- Täqate kalmaganday, tota-kaba çıgıp yögerüennän ük şiklängän idem anı. Şigem ras kilgän. Öydä mokıt kına bulsa da, yal yortına baruga marca itägenä yabışırga da ölgergän, cünsez. İnde keşelär küzenä niçek küreni-i-im?!

- Çü, ni buldı?- dide, hafaga töşkän änise.

- Änä, kiyäveñ, yal yortına kitüe kaya, inde marcalardan yaman çir yoktırıp, bülniskä ük salgannar üzen. Çire şul Tıçkan Gapteriyeneke kebek ikän. Keşelär yanına çıgarlıgımnı kaldırmadı, cir bit, - dip şıñşıdı Täskirä.

- Kayan beldeñ, kem äytte?- dide, älege häldän, şulay uk, aptırap kalgan ätise.

- Menä, hatın aldım. Muciklarda oyat digän närsä barmıni, akka kara belän üze yazgan bit, höräsän!

Täskirä yomarlangan käğaz kisägen östälgä totıp bärde. Älege tamaşanı añışmıyçarak yänäşädä basıp torgan señlese käğazne alıp cäyde dä, kurkıp kına ukıy başladı. Ni gacäpter, ukıgan sayın anıñ yöze yaktıra bara ide. Ä hat ozın tügel, menä mondıy süzlär yazılgan ikän: «İsänme, Täskirä?! Min isän-sau gına kilep cittem-citüen. Tik kilgäç ük temperaturam kütärelde dä, bülniskä salıp kuydılar. Vraçlar, tıçkan çire yoktırgansıñ, dilär... »

Click or select a word or words to search the definition